৯. দুতিযদুট্ঠদোসসিক্খাপদং

৩৯১. তেন সমযেন বুদ্ধো ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন মেত্তিযভূমজকা ভিক্খূ গিজ্ঝকূটা পব্বতা ওৰোহন্তা অদ্দসংসু ছগলকং [ছকলকং (স্যা.)] অজিকায ৱিপ্পটিপজ্জন্তং. দিস্ৱান এৱমাহংসু – ‘‘হন্দ মযং, আৱুসো, ইমং ছগলকং দব্বং মল্লপুত্তং নাম কৰোম. ইমং অজিকং মেত্তিযং নাম ভিক্খুনিং কৰোম. এৱং মযং ৱোহৰিস্সাম. পুব্বে মযং, আৱুসো, দব্বং মল্লপুত্তং সুতেন অৱোচুম্হা. ইদানি পন অম্হেহি সামং দিট্ঠো মেত্তিযায ভিক্খুনিযা ৱিপ্পটিপজ্জন্তো’’তি. তে তং ছগলকং দব্বং মল্লপুত্তং নাম অকংসু. তং অজিকং মেত্তিযং নাম ভিক্খুনিং অকংসু. তে ভিক্খূনং আৰোচেসুং – ‘‘পুব্বে মযং, আৱুসো, দব্বং মল্লপুত্তং সুতেন অৱোচুম্হা. ইদানি পন অম্হেহি সামং দিট্ঠো মেত্তিযায ভিক্খুনিযা ৱিপ্পটিপজ্জন্তো’’তি. ভিক্খূ এৱমাহংসু – ‘‘মাৱুসো, এৱং অৱচুত্থ. নাযস্মা দব্বো মল্লপুত্তো এৱং কৰিস্সতী’’তি.

অথ খো তে ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা আযস্মন্তং দব্বং মল্লপুত্তং পটিপুচ্ছি – ‘‘সৰসি ত্ৱং, দব্ব, এৱৰূপং কত্তা যথযিমে ভিক্খূ আহংসূ’’তি? ‘‘যথা মং, ভন্তে, ভগৱা জানাতী’’তি. দুতিযম্পি খো ভগৱা…পে… ততিযম্পি খো ভগৱা আযস্মন্তং দব্বং মল্লপুত্তং এতদৱোচ – ‘‘সৰসি ত্ৱং, দব্ব, এৱৰূপং কত্তা যথযিমে ভিক্খূ আহংসূ’’তি? ‘‘যথা মং, ভন্তে, ভগৱা জানাতী’’তি. ‘‘ন খো, দব্ব, দব্বা এৱং নিব্বেঠেন্তি. সচে তযা কতং কতন্তি ৱদেহি, সচে তযা অকতং অকতন্তি ৱদেহী’’তি. ‘‘যতো অহং, ভন্তে, জাতো নাভিজানামি সুপিনন্তেনপি মেথুনধম্মং পটিসেৱিতা, পগেৱ জাগৰো’’তি! অথ খো ভগৱা ভিক্খূ আমন্তেসি – ‘‘তেন হি, ভিক্খুৱে, ইমে ভিক্খূ অনুযুঞ্জথা’’তি. ইদং ৱত্ৱা ভগৱা উট্ঠাযাসনা ৱিহাৰং পাৱিসি.

অথ খো তে ভিক্খূ মেত্তিযভূমজকে ভিক্খূ অনুযুঞ্জিংসু. তে ভিক্খূহি অনুযুঞ্জীযমানা ভিক্খূনং এতমত্থং আৰোচেসুং – ‘‘কিং পন তুম্হে, আৱুসো, আযস্মন্তং দব্বং মল্লপুত্তং অঞ্ঞভাগিযস্স অধিকৰণস্স কিঞ্চিদেসং লেসমত্তং উপাদায পাৰাজিকেন ধম্মেন অনুদ্ধংসেথা’’তি? ‘‘এৱমাৱুসো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম মেত্তিযভূমজকা ভিক্খূ আযস্মন্তং দব্বং মল্লপুত্তং অঞ্ঞভাগিযস্স অধিকৰণস্স কিঞ্চি দেসং লেসমত্তং উপাদায পাৰাজিকেন ধম্মেন অনুদ্ধংসেস্সন্তী’’তি! অথ খো তে ভিক্খূ মেত্তিযভূমজকে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ তুম্হে, ভিক্খৱে, দব্বং মল্লপুত্তং অঞ্ঞভাগিযস্স অধিকৰণস্স কিঞ্চি দেসং লেসমত্তং উপাদায পাৰাজিকেন ধম্মেন অনুদ্ধংসেথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… ‘‘কথঞ্হি নাম তুম্হে, মোঘপুৰিসা, দব্বং মল্লপুত্তং অঞ্ঞভাগিযস্স অধিকৰণস্স কিঞ্চি দেসং লেসমত্তং উপাদায পাৰাজিকেন ধম্মেন অনুদ্ধংসেস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৩৯২. ‘‘যো পন ভিক্খু ভিক্খুং দুট্ঠো দোসো অপ্পতীতো অঞ্ঞভাগিযস্স অধিকৰণস্স কিঞ্চিদেসং লেসমত্তং উপাদায পাৰাজিকেন ধম্মেন অনুদ্ধংসেয্য – ‘অপ্পেৱ নাম নং ইমম্হা ব্ৰহ্মচৰিযা চাৱেয্য’ন্তি. ততো অপৰেন সমযেন সমনুগ্গাহীযমানো ৱা অসমনুগ্গাহীযমানো ৱা অঞ্ঞভাগিযঞ্চেৱ তং অধিকৰণং হোতি কোচিদেসো লেসমত্তো উপাদিন্নো, ভিক্খু চ দোসং পতিট্ঠাতি, সঙ্ঘাদিসেসো’’তি.

৩৯৩. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুন্তি অঞ্ঞং ভিক্খুং.

দুট্ঠো দোসোতি কুপিতো অনত্তমনো অনভিৰদ্ধো আহতচিত্তো খিলজাতো.

অপ্পতীতোতি তেন চ কোপেন, তেন চ দোসেন, তায চ অনত্তমনতায, তায চ অনভিৰদ্ধিযা অপ্পতীতো হোতি.

অঞ্ঞভাগিযস্স অধিকৰণস্সাতি আপত্তঞ্ঞভাগিযং ৱা হোতি অধিকৰণঞ্ঞভাগিযং ৱা. কথং অধিকৰণং অধিকৰণস্স অঞ্ঞভাগিযং? ৱিৱাদাধিকৰণং অনুৱাদাধিকৰণস্স আপত্তাধিকৰণস্স কিচ্চাধিকৰণস্স অঞ্ঞভাগিযং. অনুৱাদাধিকৰণং আপত্তাধিকৰণস্স কিচ্চাধিকৰণস্স ৱিৱাদাধিকৰণস্স অঞ্ঞভাগিযং. আপত্তাধিকৰণং কিচ্চাধিকৰণস্স ৱিৱাদাধিকৰণস্স অনুৱাদাধিকৰণস্স অঞ্ঞভাগিযং. কিচ্চাধিকৰণং ৱিৱাদাধিকৰণস্স অনুৱাদাধিকৰণস্স আপত্তাধিকৰণস্স অঞ্ঞভাগিযং. এৱং অধিকৰণং অধিকৰণস্স অঞ্ঞভাগিযং.

কথং অধিকৰণং অধিকৰণস্স তব্ভাগিযং? ৱিৱাদাধিকৰণং ৱিৱাদাধিকৰণস্স তব্ভাগিযং. অনুৱাদাধিকৰণং অনুৱাদাধিকৰণস্স তব্ভাগিযং. আপত্তাধিকৰণং আপত্তাধিকৰণস্স সিযা তব্ভাগিযং সিযা অঞ্ঞভাগিযং.

কথং আপত্তাধিকৰণং আপত্তাধিকৰণস্স অঞ্ঞভাগিযং? মেথুনধম্মপাৰাজিকাপত্তি অদিন্নাদানপাৰাজিকাপত্তিযা মনুস্সৱিগ্গহপাৰাজিকাপত্তিযা উত্তৰিমনুস্সধম্মপাৰাজিকাপত্তিযা অঞ্ঞভাগিযা. অদিন্নাদানপাৰাজিকাপত্তি মনুস্সৱিগ্গহপাৰাজিকাপত্তিযা উত্তৰিমনুস্সধম্মপাৰাজিকাপত্তিযা মেথুনধম্মপাৰাজিকাপত্তিযা অঞ্ঞভাগিযা. মনুস্সৱিগ্গহপাৰাজিকাপত্তি উত্তৰিমনুস্সধম্মপাৰাজিকাপত্তিযা মেথুনধম্মপাৰাজিকাপত্তিযা অদিন্নাদানপাৰাজিকাপত্তিযা অঞ্ঞভাগিযা. উত্তৰিমনুস্সধম্মপাৰাজিকাপত্তি মেথুনধম্মপাৰাজিকাপত্তিযা অদিন্নাদানপাৰাজিকাপত্তিযা মনুস্সৱিগ্গহপাৰাজিকাপত্তিযা অঞ্ঞভাগিযা. এৱং আপত্তাধিকৰণং আপত্তাধিকৰণস্স অঞ্ঞভাগিযং.

কথং আপত্তাধিকৰণং আপত্তাধিকৰণস্স তব্ভাগিযং? মেথুনধম্মপাৰাজিকাপত্তি মেথুনধম্মপাৰাজিকাপত্তিযা তব্ভাগিযা. অদিন্নাদানপাৰাজিকাপত্তি অদিন্নাদানপাৰাজিকাপত্তিযা তব্ভাগিযা. মনুস্সৱিগ্গহপাৰাজিকাপত্তি মনুস্সৱিগ্গহপাৰাজিকাপত্তিযা তব্ভাগিযা. উত্তৰিমনুস্সধম্মপাৰাজিকাপত্তি উত্তৰিমনুস্সধম্মপাৰাজিকাপত্তিযা তব্ভাগিযা. এৱং আপত্তাধিকৰণং আপত্তাধিকৰণস্স তব্ভাগিযং.

কিচ্চাধিকৰণং কিচ্চাধিকৰণস্স তব্ভাগিযং. এৱং অধিকৰণং অধিকৰণস্স তব্ভাগিযং.

৩৯৪. কিঞ্চি দেসং লেসমত্তং উপাদাযাতি লেসো নাম দস লেসা – জাতিলেসো, নামলেসো, গোত্তলেসো, লিঙ্গলেসো, আপত্তিলেসো, পত্তলেসো, চীৱৰলেসো, উপজ্ঝাযলেসো, আচৰিযলেসো, সেনাসনলেসো.

৩৯৫. জাতিলেসো নাম খত্তিযো দিট্ঠো হোতি পাৰাজিকং ধম্মং অজ্ঝাপজ্জন্তো. অঞ্ঞং খত্তিযং পস্সিত্ৱা চোদেতি – ‘‘খত্তিযো মযা দিট্ঠো [এত্থ ‘‘পাৰাজিকং ধম্মং অজ্ঝাপজ্জন্তো’’তি পাঠো ঊনো মঞ্ঞে, অট্ঠকথাযং হি ‘‘খত্তিযো মযা দিট্ঠো পাৰাজিকং ধম্মং অজ্ঝাপজ্জন্তো’’তি দিস্সতি]. পাৰাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৱা পৱাৰণা ৱা সঙ্ঘকম্মং ৱা’’তি, আপত্তি ৱাচায, ৱাচায সঙ্ঘাদিসেসস্স.

ব্ৰাহ্মণো দিট্ঠো হোতি…পে… ৱেস্সো দিট্ঠো হোতি…পে… সুদ্দো দিট্ঠো হোতি পাৰাজিকং ধম্মং অজ্ঝাপজ্জন্তো. অঞ্ঞং সুদ্দং পস্সিত্ৱা চোদেতি – ‘‘সুদ্দো মযা দিট্ঠো. পাৰাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৱাচায, ৱাচায সঙ্ঘাদিসেসস্স.

৩৯৬. নামলেসো নাম বুদ্ধৰক্খিতো দিট্ঠো হোতি…পে… ধম্মৰক্খিতো দিট্ঠো হোতি…পে… সঙ্ঘৰক্খিতো দিট্ঠো হোতি পাৰাজিকং ধম্মং অজ্ঝাপজ্জন্তো. অঞ্ঞং সঙ্ঘৰক্খিতং পস্সিত্ৱা চোদেতি – ‘‘সঙ্ঘৰক্খিতো মযা দিট্ঠো. পাৰাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৱাচায, ৱাচায সঙ্ঘাদিসেসস্স.

৩৯৭. গোত্তলেসো নাম গোতমো দিট্ঠো হোতি…পে… মোগ্গল্লানো দিট্ঠো হোতি…পে… কচ্চাযনো দিট্ঠো হোতি…পে… ৱাসিট্ঠো দিট্ঠো হোতি পাৰাজিকং ধম্মং অজ্ঝাপজ্জন্তো. অঞ্ঞং ৱাসিট্ঠং পস্সিত্ৱা চোদেতি – ‘‘ৱাসিট্ঠো মযা দিট্ঠো. পাৰাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৱাচায, ৱাচায সঙ্ঘাদিসেসস্স.

৩৯৮. লিঙ্গলেসো নাম দীঘো দিট্ঠো হোতি…পে… ৰস্সো দিট্ঠো হোতি…পে… কণ্হো দিট্ঠো হোতি…পে… ওদাতো দিট্ঠো হোতি পাৰাজিকং ধম্মং অজ্ঝাপজ্জন্তো. অঞ্ঞং ওদাতং পস্সিত্ৱা চোদেতি – ‘‘ওদাতো মযা দিট্ঠো. পাৰাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৱাচায, ৱাচায সঙ্ঘাদিসেসস্স.

৩৯৯. আপত্তিলেসো নাম লহুকং আপত্তিং আপজ্জন্তো দিট্ঠো হোতি. তঞ্চে পাৰাজিকেন চোদেতি – ‘‘অস্সমণোসি, অসক্যপুত্তিযোসি…পে… আপত্তি ৱাচায, ৱাচায সঙ্ঘাদিসেসস্স.

৪০০. পত্তলেসো নাম লোহপত্তধৰো দিট্ঠো হোতি…পে… সাটকপত্তধৰো দিট্ঠো হোতি…পে… সুম্ভকপত্তধৰো দিট্ঠো হোতি পাৰাজিকং ধম্মং অজ্ঝাপজ্জন্তো. অঞ্ঞং সুম্ভকপত্তধৰং পস্সিত্ৱা চোদেতি – ‘‘সুম্ভকপত্তধৰো মযা দিট্ঠো. পাৰাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৱাচায, ৱাচায সঙ্ঘাদিসেসস্স.

৪০১. চীৱৰলেসো নাম পংসুকূলিকো দিট্ঠো হোতি…পে… গহপতিচীৱৰধৰো দিট্ঠো হোতি পাৰাজিকং ধম্মং অজ্ঝাপজ্জন্তো. অঞ্ঞং গহপতিচীৱৰধৰং পস্সিত্ৱা চোদেতি – ‘‘গহপতিচীৱৰধৰো মযা দিট্ঠো. পাৰাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৱাচায, ৱাচায সঙ্ঘাদিসেসস্স.

৪০২. উপজ্ঝাযলেসো নাম ইত্থন্নামস্স সদ্ধিৱিহাৰিকো দিট্ঠো হোতি পাৰাজিকং ধম্মং অজ্ঝাপজ্জন্তো. অঞ্ঞং ইত্থন্নামস্স সদ্ধিৱিহাৰিকং পস্সিত্ৱা চোদেতি – ‘‘ইত্থন্নামস্স সদ্ধিৱিহাৰিকো মযা দিট্ঠো. পাৰাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৱাচায, ৱাচায সঙ্ঘাদিসেসস্স.

৪০৩. আচৰিযলেসো নাম ইত্থন্নামস্স অন্তেৱাসিকো দিট্ঠো হোতি পাৰাজিকং ধম্মং অজ্ঝাপজ্জন্তো. অঞ্ঞং ইত্থন্নামস্স অন্তেৱাসিকং পস্সিত্ৱা চোদেতি – ‘‘ইত্থন্নামস্স অন্তেৱাসিকো মযা দিট্ঠো. পাৰাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৱাচায, ৱাচায সঙ্ঘাদিসেসস্স.

৪০৪. সেনাসনলেসো নাম ইত্থন্নামসেনাসনৱাসিকো দিট্ঠো হোতি পাৰাজিকং ধম্মং অজ্ঝাপজ্জন্তো. অঞ্ঞং ইত্থন্নামসেনাসনৱাসিকং পস্সিত্ৱা চোদেতি – ‘‘ইত্থন্নামসেনাসনৱাসিকো মযা দিট্ঠো. পাৰাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৱা পৱাৰণা ৱা সঙ্ঘকম্মং ৱা’’তি, আপত্তি ৱাচায, ৱাচায সঙ্ঘাদিসেসস্স.

৪০৫. পাৰাজিকেন ধম্মেনাতি চতুন্নং অঞ্ঞতৰেন.

অনুদ্ধংসেয্যাতি চোদেতি ৱা চোদাপেতি ৱা.

অপ্পেৱ নাম নং ইমম্হা ব্ৰহ্মচৰিযাচাৱেয্যন্তি ভিক্খুভাৱা চাৱেয্যং, সমণধম্মা চাৱেয্যং, সীলক্খন্ধা চাৱেয্যং, তপোগুণা চাৱেয্যং.

ততো অপৰেন সমযেনাতি যস্মিং খণে অনুদ্ধংসিতো হোতি, তং খণং তং লযং তং মুহুত্তং ৱীতিৱত্তে.

সমনুগ্গাহীযমানোতি যেন ৱত্থুনা অনুদ্ধংসিতো হোতি তস্মিং ৱত্থুস্মিং সমনুগ্গাহীযমানো.

অসমনুগ্গাহীযমানোতি ন কেনচি ৱুচ্চমানো.

অধিকৰণং নাম চত্তাৰি অধিকৰণানি – ৱিৱাদাধিকৰণং, অনুৱাদাধিকৰণং, আপত্তাধিকৰণং, কিচ্চাধিকৰণং.

কোচি দেসো লেসমত্তো উপাদিন্নোতি তেসং দসন্নং লেসানং অঞ্ঞতৰো লেসো উপাদিন্নো হোতি.

ভিক্খু চ দোসং পতিট্ঠাতীতি তুচ্ছকং মযা ভণিতং, মুসা মযা ভণিতং, অভূতং মযা ভণিতং, অজানন্তেন মযা ভণিতং.

সঙ্ঘাদিসেসোতি …পে… তেনপি ৱুচ্চতি সঙ্ঘাদিসেসোতি.

৪০৬. ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতি, সঙ্ঘাদিসেসে সঙ্ঘাদিসেসদিট্ঠি হোতি. তঞ্চে পাৰাজিকেন চোদেতি – ‘‘অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৱা পৱাৰণা ৱা সঙ্ঘকম্মং ৱা’’তি, এৱম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৱাচায, ৱাচায সঙ্ঘাদিসেসস্স.

ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতি, সঙ্ঘাদিসেসে থুল্লচ্চযদিট্ঠি হোতি…পে… পাচিত্তিযদিট্ঠি হোতি… পাটিদেসনীযদিট্ঠি হোতি… দুক্কটদিট্ঠি হোতি… দুব্ভাসিতদিট্ঠি হোতি. তঞ্চে পাৰাজিকেন চোদেতি – ‘‘অস্সমণোসি’’…পে… এৱম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৱাচায, ৱাচায সঙ্ঘাদিসেসস্স.

ভিক্খু থুল্লচ্চযং অজ্ঝাপজ্জন্তো দিট্ঠো হোতি থুল্লচ্চযে থুল্লচ্চযদিট্ঠি হোতি…পে… থুল্লচ্চযে পাচিত্তিযদিট্ঠি হোতি… পাটিদেসনীযদিট্ঠি হোতি… দুক্কটদিট্ঠি হোতি… দুব্ভাসিতদিট্ঠি হোতি… সঙ্ঘাদিসেসদিট্ঠি হোতি. তঞ্চে পাৰাজিকেন চোদেতি – ‘‘অস্সমণোসি’’ …পে… এৱম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৱাচায, ৱাচায সঙ্ঘাদিসেসস্স.

ভিক্খু পাচিত্তিযং…পে… পাটিদেসনীযং… দুক্কটং… দুব্ভাসিতং অজ্ঝাপজ্জন্তো দিট্ঠো হোতি, দুব্ভাসিতে দুব্ভাসিতদিট্ঠি হোতি…পে… দুব্ভাসিতে সঙ্ঘাদিসেসদিট্ঠি হোতি… থুল্লচ্চযদিট্ঠি হোতি… পাচিত্তিযদিট্ঠি হোতি… পাটিদেসনীযদিট্ঠি হোতি… দুক্কটদিট্ঠি হোতি. তঞ্চে পাৰাজিকেন চোদেতি – ‘‘অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৱা পৱাৰণা ৱা সঙ্ঘকম্মং ৱা’’তি, এৱম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৱাচায, ৱাচায সঙ্ঘাদিসেসস্স.

একেকং মূলং কাতুন চক্কং বন্ধিতব্বং.

৪০৭. ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতি সঙ্ঘাদিসেসে সঙ্ঘাদিসেসদিট্ঠি হোতি. তঞ্চে পাৰাজিকেন চোদাপেতি – ‘‘অস্সমণোসি’’…পে… এৱম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৱাচায, ৱাচায সঙ্ঘাদিসেসস্স.

ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতি, সঙ্ঘাদিসেসে থুল্লচ্চযদিট্ঠি হোতি…পে… পাচিত্তিযদিট্ঠি হোতি… পাটিদেসনীযদিট্ঠি হোতি… দুক্কটদিট্ঠি হোতি… দুব্ভাসিতদিট্ঠি হোতি. তঞ্চে পাৰাজিকেন চোদাপেতি – ‘‘অস্সমণোসি’’…পে… এৱম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৱাচায, ৱাচায সঙ্ঘাদিসেসস্স.

ভিক্খু থুল্লচ্চযং অজ্ঝাপজ্জন্তো দিট্ঠো হোতি থুল্লচ্চযে থুল্লচ্চযদিট্ঠি হোতি…পে… থুল্লচ্চযে পাচিত্তিযদিট্ঠি হোতি… পাটিদেসনীযদিট্ঠি হোতি… দুক্কটদিট্ঠি হোতি… দুব্ভাসিতদিট্ঠি হোতি… সঙ্ঘাদিসেসদিট্ঠি হোতি. তঞ্চে পাৰাজিকেন চোদাপেতি – ‘‘অস্সমণোসি’’…পে… এৱম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৱাচায, ৱাচায সঙ্ঘাদিসেসস্স.

ভিক্খু পাচিত্তিযং…পে… পাটিদেসনীযং… দুক্কটং… দুব্ভাসিতং অজ্ঝাপজ্জন্তো দিট্ঠো হোতি দুব্ভাসিতে দুব্ভাসিতদিট্ঠি হোতি…পে… দুব্ভাসিতে সঙ্ঘাদিসেসদিট্ঠি হোতি… থুল্লচ্চযদিট্ঠি হোতি… পাচিত্তিযদিট্ঠি হোতি… পাটিদেসনীযদিট্ঠি হোতি… দুক্কটদিট্ঠি হোতি. তঞ্চে পাৰাজিকেন চোদাপেতি – ‘‘অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৱা পৱাৰণা ৱা সঙ্ঘকম্মং ৱা’’তি, এৱম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৱাচায, ৱাচায সঙ্ঘাদিসেসস্স.

৪০৮. অনাপত্তি তথাসঞ্ঞী চোদেতি ৱা চোদাপেতি ৱা, উম্মত্তকস্স, আদিকম্মিকস্সাতি.

দুতিযদুট্ঠদোসসিক্খাপদং নিট্ঠিতং নৱমং.