৭. ৱিহাৰকাৰসিক্খাপদং

৩৬৫. তেন সমযেন বুদ্ধো ভগৱা কোসম্বিযং ৱিহৰতি ঘোসিতাৰামে. তেন খো পন সমযেন আযস্মতো ছন্নস্স উপট্ঠাকো গহপতি আযস্মন্তং ছন্নং এতদৱোচ – ‘‘ৱিহাৰৱত্থুং, ভন্তে, জানাহি অয্যস্স ৱিহাৰং কাৰাপেস্সামী’’তি. অথ খো আযস্মা ছন্নো ৱিহাৰৱত্থুং সোধেন্তো অঞ্ঞতৰং চেতিযৰুক্খং ছেদাপেসি গামপূজিতং নিগমপূজিতং নগৰপূজিতং জনপদপূজিতং ৰট্ঠপূজিতং. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা চেতিযৰুক্খং ছেদাপেস্সন্তি গামপূজিতং নিগমপূজিতং নগৰপূজিতং জনপদপূজিতং ৰট্ঠপূজিতং! একিন্দ্ৰিযং সমণা সক্যপুত্তিযা জীৱং ৱিহেঠেন্তী’’ [ৱিহেঠেস্সন্তি (কত্থচি)] তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা ছন্নো চেতিযৰুক্খং ছেদাপেস্সতি গামপূজিতং…পে… ৰট্ঠপূজিত’’ন্তি! অথ খো তে ভিক্খূ আযস্মন্তং ছন্নং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ ত্ৱং, ছন্ন, চেতিযৰুক্খং ছেদাপেসি গামপূজিতং…পে… ৰট্ঠপূজিত’’ন্তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… ‘‘কথঞ্হি নাম ত্ৱং, মোঘপুৰিস, চেতিযৰুক্খং ছেদাপেস্সসি গামপূজিতং নিগমপূজিতং নগৰপূজিতং জনপদপূজিতং ৰট্ঠপূজিতং! জীৱসঞ্ঞিনো হি, মোঘপুৰিস, মনুস্সা ৰুক্খস্মিং. নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৩৬৬. ‘‘মহল্লকং পন ভিক্খুনা ৱিহাৰং কাৰযমানেন সস্সামিকং অত্তুদ্দেসং ভিক্খূ অভিনেতব্বা ৱত্থুদেসনায. তেহি ভিক্খূহি ৱত্থু দেসেতব্বং অনাৰম্ভং সপৰিক্কমনং. সাৰম্ভে চে ভিক্খু ৱত্থুস্মিং অপৰিক্কমনে মহল্লকং ৱিহাৰং কাৰেয্য ভিক্খূ ৱা অনভিনেয্য ৱত্থুদেসনায, সঙ্ঘাদিসেসো’’তি.

৩৬৭. মহল্লকো নাম ৱিহাৰো সস্সামিকো ৱুচ্চতি.

ৱিহাৰো নাম উল্লিত্তো ৱা হোতি অৱলিত্তো ৱা উল্লিত্তাৱলিত্তো ৱা.

কাৰযমানেনাতি কৰোন্তো ৱা কাৰাপেন্তো ৱা.

সস্সামিকন্তি অঞ্ঞো কোচি সামিকো হোতি ইত্থী ৱা পুৰিসো ৱা গহট্ঠো ৱা পব্বজিতো ৱা.

অত্তুদ্দেসন্তি অত্তনো অত্থায.

ভিক্খূ অভিনেতব্বা ৱত্থুদেসনাযাতি তেন ৱিহাৰকাৰকেন ভিক্খুনা ৱিহাৰৱত্থুং সোধেত্ৱা সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ৱুড্ঢানং ভিক্খূনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘অহং, ভন্তে, মহল্লকং ৱিহাৰং কত্তুকামো সস্সামিকং অত্তুদ্দেসং. সোহং, ভন্তে, সঙ্ঘং ৱিহাৰৱত্থুওলোকনং যাচামী’’তি. দুতিযম্পি যাচিতব্বা. ততিযম্পি যাচিতব্বা. সচে সব্বো সঙ্ঘো উস্সহতি ৱিহাৰৱত্থুং ওলোকেতুং সব্বেন সঙ্ঘেন ওলোকেতব্বং. নো চে সব্বো সঙ্ঘো উস্সহতি ৱিহাৰৱত্থুং ওলোকেতুং, যে তত্থ হোন্তি ভিক্খূ ব্যত্তা পটিবলা সাৰম্ভং অনাৰম্ভং সপৰিক্কমনং অপৰিক্কমনং জানিতুং তে যাচিত্ৱা সম্মন্নিতব্বা. এৱঞ্চ পন, ভিক্খৱে, সম্মন্নিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

৩৬৮. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু মহল্লকং ৱিহাৰং কত্তুকামো সস্সামিকং অত্তুদ্দেসং. সো সঙ্ঘং ৱিহাৰৱত্থুওলোকনং যাচতি. যদি সঙ্ঘস্স পত্তকল্লং, সঙ্ঘো ইত্থন্নামঞ্চ ইত্থন্নামঞ্চ ভিক্খু সম্মন্নেয্য ইত্থন্নামস্স ভিক্খুনো ৱিহাৰৱত্থুং ওলোকেতুং. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু মহল্লকং ৱিহাৰং কত্তুকামো সস্সামিকং অত্তুদ্দেসং. সো সঙ্ঘং ৱিহাৰৱত্থুওলোকনং যাচতি. সঙ্ঘো ইত্থন্নামঞ্চ ইত্থন্নামঞ্চ ভিক্খূ সম্মন্নতি ইত্থন্নামস্স ভিক্খুনো ৱিহাৰৱত্থুং ওলোকেতুং. যস্সাযস্মতো খমতি ইত্থন্নামস্স চ ইত্থন্নামস্স চ ভিক্খূনং সম্মুতি ইত্থন্নামস্স ভিক্খুনো ৱিহাৰৱত্থুং ওলোকেতুং, সো তুণ্হস্স; যস্স নক্খমতি, সো ভাসেয্য.

‘‘সম্মতা সঙ্ঘেন ইত্থন্নামো চ ইত্থন্নামো চ ভিক্খূ ইত্থন্নামস্স ভিক্খুনো ৱিহাৰৱত্থুং ওলোকেতুং. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

৩৬৯. তেহি সম্মতেহি ভিক্খূহি তত্থ গন্ত্ৱা ৱিহাৰৱত্থু ওলোকেতব্বং; সাৰম্ভং অনাৰম্ভং সপৰিক্কমনং অপৰিক্কমনং জানিতব্বং. সচে সাৰম্ভং হোতি অপৰিক্কমনং, ‘মাযিধ কৰী’তি ৱত্তব্বো. সচে অনাৰম্ভং হোতি সপৰিক্কমনং, সঙ্ঘস্স আৰোচেতব্বং – ‘অনাৰম্ভং সপৰিক্কমন’ন্তি. তেন ৱিহাৰকাৰকেন ভিক্খুনা সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ৱুড্ঢানং ভিক্খূনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘অহং, ভন্তে, মহল্লকং ৱিহাৰং কত্তুকামো সস্সামিকং অত্তুদ্দেসং. সোহং, ভন্তে, সঙ্ঘং ৱিহাৰৱত্থুদেসনং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

৩৭০. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু মহল্লকং ৱিহাৰং কত্তুকামো সস্সামিকং অত্তুদ্দেসং. সো সঙ্ঘং ৱিহাৰৱত্থুদেসনং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো ৱিহাৰৱত্থুং দেসেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু মহল্লকং ৱিহাৰং কত্তুকামো সস্সামিকং অত্তুদ্দেসং. সো সঙ্ঘং ৱিহাৰৱত্থুদেসনং যাচতি. সঙ্ঘো ইত্থন্নামস্স ভিক্খুনো ৱিহাৰৱত্থুং দেসেতি. যস্সাযস্মতো খমতি ইত্থন্নামস্স ভিক্খুনো ৱিহাৰৱত্থুস্স দেসনা, সো তুণ্হস্স; যস্স নক্খমতি, সো ভাসেয্য.

‘‘দেসিতং সঙ্ঘেন ইত্থন্নামস্স ভিক্খুনো ৱিহাৰৱত্থুং. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

৩৭১. সাৰম্ভং নাম কিপিল্লিকানং ৱা আসযো হোতি, উপচিকানং ৱা আসযো হোতি, উন্দূৰানং ৱা…পে… অহীনং ৱা ৱিচ্ছিকানং ৱা সতপদীনং ৱা হত্থীনং ৱা অস্সানং ৱা সীহানং ৱা ব্যগ্ঘানং ৱা দীপীনং ৱা অচ্ছানং ৱা তৰচ্ছানং ৱা আসযো হোতি, যেসং কেসঞ্চি তিৰচ্ছানগতানং পাণানং আসযো হোতি, পুব্বণ্ণনিস্সিতং ৱা হোতি, অপৰণ্ণনিস্সিতং ৱা হোতি, অব্ভাঘাতনিস্সিতং ৱা হোতি, আঘাতননিস্সিতং ৱা হোতি, সুসাননিস্সিতং ৱা হোতি, উয্যাননিস্সিতং ৱা হোতি, ৰাজৱত্থুনিস্সিতং ৱা হোতি, হত্থিসালানিস্সিতং ৱা হোতি, অস্সসালানিস্সিতং ৱা হোতি, বন্ধনাগাৰনিস্সিতং ৱা হোতি, পানাগাৰনিস্সিতং ৱা হোতি, সূননিস্সিতং ৱা হোতি, ৰচ্ছানিস্সিতং ৱা হোতি, চচ্চৰনিস্সিতং ৱা হোতি, সভানিস্সিতং ৱা হোতি, সংসৰণনিস্সিতং ৱা হোতি. এতং সাৰম্ভং নাম.

অপৰিক্কমনং নাম ন সক্কা হোতি যথাযুত্তেন সকটেন অনুপৰিগন্তুং, সমন্তা নিস্সেণিযা অনুপৰিগন্তুং. এতং অপৰিক্কমনং নাম.

অনাৰম্ভং নাম ন কিপিল্লিকানং ৱা আসযো হোতি…পে… ন সংসৰণনিস্সিতং ৱা হোতি. এতং অনাৰম্ভং নাম.

সপৰিক্কমনং নাম সক্কা হোতি যথাযুত্তেন সকটেন অনুপৰিগন্তুং, সমন্তা নিস্সেণিযা অনুপৰিগন্তুং. এতং সপৰিক্কমনং নাম.

মহল্লকো নাম ৱিহাৰো সস্সামিকো ৱুচ্চতি.

ৱিহাৰো নাম উল্লিত্তো ৱা হোতি অৱলিত্তো ৱা উল্লিত্তাৱলিত্তো ৱা.

কাৰেয্যাতি কৰোতি ৱা কাৰাপেতি ৱা.

ভিক্খূ ৱা অনভিনেয্য ৱত্থুদেসনাযাতি ঞত্তিদুতিযেন কম্মেন ৱিহাৰৱত্থুং ন দেসাপেত্ৱা কৰোতি ৱা কাৰাপেতি ৱা, পযোগে দুক্কটং. একং পিণ্ডং অনাগতে, আপত্তি থুল্লচ্চযস্স. তস্মিং পিণ্ডে আগতে, আপত্তি সঙ্ঘাদিসেসস্স.

সঙ্ঘাদিসেসোতি…পে… তেনপি ৱুচ্চতি – ‘সঙ্ঘাদিসেসো’তি.

৩৭২. ভিক্খু ৱিহাৰং কৰোতি অদেসিতৱত্থুকং সাৰম্ভং অপৰিক্কমনং, আপত্তি সঙ্ঘাদিসেসেন দ্ৱিন্নং দুক্কটানং. ভিক্খু ৱিহাৰং কৰোতি অদেসিতৱত্থুকং সাৰম্ভং সপৰিক্কমনং, আপত্তি সঙ্ঘাদিসেসেন দুক্কটস্স. ভিক্খু ৱিহাৰং কৰোতি অদেসিতৱত্থুকং অনাৰম্ভং অপৰিক্কমনং, আপত্তি সঙ্ঘাদিসেসেন দুক্কটস্স. ভিক্খু ৱিহাৰং কৰোতি অদেসিতৱত্থুকং অনাৰম্ভং সপৰিক্কমনং, আপত্তি সঙ্ঘাদিসেসস্স.

ভিক্খু ৱিহাৰং কৰোতি দেসিতৱত্থুকং সাৰম্ভং অপৰিক্কমনং, আপত্তি দ্ৱিন্নং দুক্কটানং. ভিক্খু ৱিহাৰং কৰোতি দেসিতৱত্থুকং সাৰম্ভং সপৰিক্কমনং, আপত্তি দুক্কটস্স. ভিক্খু ৱিহাৰং কৰোতি দেসিতৱত্থুকং অনাৰম্ভং অপৰিক্কমনং, আপত্তি দুক্কটস্স. ভিক্খু ৱিহাৰং কৰোতি দেসিতৱত্থুকং অনাৰম্ভং সপৰিক্কমনং, অনাপত্তি.

৩৭৩. ভিক্খু সমাদিসতি – ‘‘ৱিহাৰং মে কৰোথা’’তি. তস্স ৱিহাৰং কৰোন্তি অদেসিতৱত্থুকং সাৰম্ভং অপৰিক্কমনং, আপত্তি সঙ্ঘাদিসেসেন দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং অপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং সপৰিক্কমনং, আপত্তি সঙ্ঘাদিসেসস্স.

ভিক্খু সমাদিসতি – ‘‘ৱিহাৰং মে কৰোথা’’তি. তস্স ৱিহাৰং কৰোন্তি দেসিতৱত্থুকং সাৰম্ভং অপৰিক্কমনং, আপত্তি দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দুক্কটস্স…পে… অনাৰম্ভং অপৰিক্কমনং, আপত্তি দুক্কটস্স…পে… অনাৰম্ভং সপৰিক্কমনং, অনাপত্তি.

৩৭৪. ভিক্খু সমাদিসিত্ৱা পক্কমতি – ‘‘ৱিহাৰং মে কৰোথা’’তি. ন চ সমাদিসতি – ‘‘দেসিতৱত্থুকো চ হোতু অনাৰম্ভো চ সপৰিক্কমনো চা’’তি. তস্স ৱিহাৰং কৰোন্তি অদেসিতৱত্থুকং সাৰম্ভং অপৰিক্কমনং, আপত্তি সঙ্ঘাদিসেসেন দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং অপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং সপৰিক্কমনং, আপত্তি সঙ্ঘাদিসেসস্স.

ভিক্খু সমাদিসিত্ৱা পক্কমতি – ‘‘ৱিহাৰং মে কৰোথা’’তি. ন চ সমাদিসতি – ‘‘দেসিতৱত্থুকো চ হোতু অনাৰম্ভো চ সপৰিক্কমনো চা’’তি. তস্স ৱিহাৰং কৰোন্তি দেসিতৱত্থুকং সাৰম্ভং অপৰিক্কমনং, আপত্তি দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দুক্কটস্স…পে… অনাৰম্ভং অপৰিক্কমনং, আপত্তি দুক্কটস্স…পে… অনাৰম্ভং সপৰিক্কমনং, অনাপত্তি.

৩৭৫. ভিক্খু সমাদিসিত্ৱা পক্কমতি – ‘‘ৱিহাৰং মে কৰোথা’’তি. সমাদিসতি চ – ‘‘দেসিতৱত্থুকো চ হোতু অনাৰম্ভো চ সপৰিক্কমনো চা’’তি. তস্স ৱিহাৰং কৰোন্তি অদেসিতৱত্থুকং সাৰম্ভং অপৰিক্কমনং. সো সুণাতি – ‘‘ৱিহাৰো কিৰ মে কযিৰতি অদেসিতৱত্থুকো সাৰম্ভো অপৰিক্কমনো’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘দেসিতৱত্থুকো চ হোতু অনাৰম্ভো চ সপৰিক্কমনো চা’’তি …পে… ‘‘দেসিতৱত্থুকো চ হোতু অনাৰম্ভো চা’’তি…পে… ‘‘দেসিতৱত্থুকো চ হোতু সপৰিক্কমনো চা’’তি …পে… ‘‘দেসিতৱত্থুকো হোতূ’’তি. নো চে সামং ৱা গচ্ছেয্য দূতং ৱা পহিণেয্য, আপত্তি দুক্কটস্স.

ভিক্খু সমাদিসিত্ৱা পক্কমতি – ‘‘ৱিহাৰং মে কৰোথা’’তি. সমাদিসতি চ – ‘‘দেসিতৱত্থুকো চ হোতু অনাৰম্ভো চ সপৰিক্কমনো চা’’তি. তস্স ৱিহাৰং কৰোন্তি দেসিতৱত্থুকং সাৰম্ভং অপৰিক্কমনং. সো সুণাতি – ‘‘ৱিহাৰো কিৰ মে কযিৰতি দেসিতৱত্থুকো সাৰম্ভো অপৰিক্কমনো’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘অনাৰম্ভো চ হোতু সপৰিক্কমনো চা’’তি…পে… ‘‘অনাৰম্ভো হোতূ’’তি ‘‘সপৰিক্কমনো হোতূ’’তি, অনাপত্তি.

৩৭৬. ভিক্খু সমাদিসিত্ৱা পক্কমতি – ‘‘ৱিহাৰং মে কৰোথা’’তি. সমাদিসতি চ – ‘‘দেসিতৱত্থুকো চ হোতু অনাৰম্ভো চ সপৰিক্কমনো চা’’তি. তস্স ৱিহাৰং কৰোন্তি অদেসিতৱত্থুকং সাৰম্ভং অপৰিক্কমনং, আপত্তি কাৰুকানং তিণ্ণং দুক্কটানং…পে… সাৰম্ভং সপৰিক্কমনং, আপত্তি কাৰুকানং দ্ৱিন্নং দুক্কটানং…পে… অনাৰম্ভং অপৰিক্কমনং, আপত্তি কাৰুকানং দ্ৱিন্নং দুক্কটানং…পে… অনাৰম্ভং সপৰিক্কমনং, আপত্তি কাৰুকানং দুক্কটস্স.

ভিক্খু সমাদিসিত্ৱা পক্কমতি – ‘‘ৱিহাৰং মে কৰোথা’’তি. সমাদিসতি চ – ‘‘দেসিতৱত্থুকো চ হোতু অনাৰম্ভো চ সপৰিক্কমনো চা’’তি. তস্স ৱিহাৰং কৰোন্তি দেসিতৱত্থুকং সাৰম্ভং অপৰিক্কমনং, আপত্তি কাৰুকানং দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি কাৰুকানং দুক্কটস্স…পে… অনাৰম্ভং অপৰিক্কমনং, আপত্তি কাৰুকানং দুক্কটস্স…পে… অনাৰম্ভং সপৰিক্কমনং, অনাপত্তি.

৩৭৭. ভিক্খু সমাদিসিত্ৱা পক্কমতি – ‘‘ৱিহাৰং মে কৰোথা’’তি. তস্স ৱিহাৰং কৰোন্তি অদেসিতৱত্থুকং সাৰম্ভং অপৰিক্কমনং. সো চে ৱিপ্পকতে আগচ্ছতি, তেন ভিক্খুনা সো ৱিহাৰো অঞ্ঞস্স ৱা দাতব্বো ভিন্দিত্ৱা ৱা পুন কাতব্বো. নো চে অঞ্ঞস্স ৱা দদেয্য ভিন্দিত্ৱা ৱা পুন কাৰেয্য, আপত্তি সঙ্ঘাদিসেসেন দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং অপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং সপৰিক্কমনং, আপত্তি সঙ্ঘাদিসেসস্স.

ভিক্খু সমাদিসিত্ৱা পক্কমতি – ‘‘ৱিহাৰং মে কৰোথা’’তি. তস্স ৱিহাৰং কৰোন্তি দেসিতৱত্থুকং সাৰম্ভং অপৰিক্কমনং. সো চে ৱিপ্পকতে আগচ্ছতি, তেন ভিক্খুনা সো ৱিহাৰো অঞ্ঞস্স ৱা দাতব্বো ভিন্দিত্ৱা ৱা পুন কাতব্বো. নো চে অঞ্ঞস্স ৱা দদেয্য ভিন্দিত্ৱা ৱা পুন কাৰেয্য, আপত্তি দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দুক্কটস্স…পে… অনাৰম্ভং অপৰিক্কমনং, আপত্তি দুক্কটস্স…পে… অনাৰম্ভং সপৰিক্কমনং, অনাপত্তি.

৩৭৮. অত্তনা ৱিপ্পকতং অত্তনা পৰিযোসাপেতি, আপত্তি সঙ্ঘাদিসেসস্স.

অত্তনা ৱিপ্পকতং পৰেহি পৰিযোসাপেতি, আপত্তি সঙ্ঘাদিসেসস্স.

পৰেহি ৱিপ্পকতং অত্তনা পৰিযোসাপেতি, আপত্তি সঙ্ঘাদিসেসস্স.

পৰেহি ৱিপ্পকতং পৰেহি পৰিযোসাপেতি, আপত্তি সঙ্ঘাদিসেসস্স.

৩৭৯. অনাপত্তি লেণে গুহায তিণকুটিকায অঞ্ঞস্সত্থায ৱাসাগাৰং ঠপেত্ৱা সব্বত্থ. অনাপত্তি উম্মত্তকস্স, আদিকম্মিকস্সাতি.

ৱিহাৰকাৰসিক্খাপদং নিট্ঠিতং সত্তমং.