৬. কুটিকাৰসিক্খাপদং

৩৪২. তেন সমযেন বুদ্ধো ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন আড়ৱকা ভিক্খূ সঞ্ঞাচিকাযো কুটিযো কাৰাপেন্তি অস্সামিকাযো অত্তুদ্দেসিকাযো অপ্পমাণিকাযো. তাযো ন নিট্ঠানং গচ্ছন্তি. তে যাচনবহুলা ৱিঞ্ঞত্তিবহুলা ৱিহৰন্তি – ‘‘পুৰিসং দেথ, পুৰিসত্থকৰং দেথ, গোণং দেথ, সকটং দেথ, ৱাসিং দেথ, পৰসুং দেথ, কুঠাৰিং দেথ, কুদালং দেথ, নিখাদনং দেথ, ৱল্লিং দেথ, ৱেড়ুং দেথ, মুঞ্জং দেথ, পব্বজং দেথ, তিণং দেথ, মত্তিকং দেথা’’তি. মনুস্সা উপদ্দুতা যাচনায উপদ্দুতা ৱিঞ্ঞত্তিযা ভিক্খূ দিস্ৱা উব্বিজ্জন্তিপি উত্তসন্তিপি পলাযন্তিপি অঞ্ঞেনপি গচ্ছন্তি অঞ্ঞেনপি মুখং কৰোন্তি দ্ৱাৰম্পি থকেন্তি, গাৱিম্পি দিস্ৱা পলাযন্তি ভিক্খূতি মঞ্ঞমানা.

অথ খো আযস্মা মহাকস্সপো ৰাজগহে ৱস্সংৱুট্ঠো যেন আড়ৱী তেন পক্কামি. অনুপুব্বেন যেন আড়ৱী তদৱসৰি. তত্ৰ সুদং আযস্মা মহাকস্সপো আড়ৱিযং ৱিহৰতি অগ্গাড়ৱে চেতিযে. অথ খো আযস্মা মহাকস্সপো পুব্বণ্হসমযং নিৱাসেত্ৱা পত্তচীৱৰমাদায আড়ৱিং পিণ্ডায পাৱিসি. মনুস্সা আযস্মন্তং মহাকস্সপং পস্সিত্ৱা উব্বিজ্জন্তিপি উত্তসন্তিপি পলাযন্তিপি অঞ্ঞেনপি গচ্ছন্তি অঞ্ঞেনপি মুখং কৰোন্তি দ্ৱাৰম্পি থকেন্তি. অথ খো আযস্মা মহাকস্সপো আড়ৱিযং পিণ্ডায চৰিত্ৱা পচ্ছাভত্তং পিণ্ডপাতপ্পটিক্কন্তো ভিক্খূ আমন্তেসি – ‘‘পুব্বাযং, আৱুসো, আড়ৱী সুভিক্খা অহোসি সুলভপিণ্ডা সুকৰা উঞ্ছেন পগ্গহেন যাপেতুং; এতৰহি পনাযং আড়ৱী দুব্ভিক্খা দুল্লভপিণ্ডা, ন সুকৰা উঞ্ছেন পগ্গহেন যাপেতুং. কো নু খো, আৱুসো, হেতু কো পচ্চযো, যেনাযং আড়ৱী দুব্ভিক্খা দুল্লভপিণ্ডা, ন সুকৰা উঞ্ছেন পগ্গহেন যাপেতু’’ন্তি? অথ খো তে ভিক্খূ আযস্মতো মহাকস্সপস্স এতমত্থং আৰোচেসুং.

৩৪৩. অথ খো ভগৱা ৰাজগহে যথাভিৰন্তং ৱিহৰিত্ৱা যেন আড়ৱী তেন চাৰিকং পক্কামি. অনুপুব্বেন চাৰিকং চৰমানো যেন আড়ৱী তদৱসৰি. তত্ৰ সুদং ভগৱা আড়ৱিযং ৱিহৰতি অগ্গাড়ৱে চেতিযে. অথ খো আযস্মা মহাকস্সপো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা মহাকস্সপো ভগৱতো এতমত্থং আৰোচেসি. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা আড়ৱকে ভিক্খূ পটিপুচ্ছি – ‘‘সচ্চং কিৰ তুম্হে, ভিক্খৱে, সঞ্ঞাচিকাযো কুটিযো কাৰাপেথ অস্সামিকাযো অত্তুদ্দেসিকাযো অপ্পমাণিকাযো. তাযো ন নিট্ঠানং গচ্ছন্তি. তে তুম্হে যাচনবহুলা ৱিঞ্ঞত্তিবহুলা ৱিহৰথ – ‘পুৰিসং দেথ পুৰিসত্থকৰং দেথ…পে… তিণং দেথ মত্তিকং দেথা’তি. মনুস্সা উপদ্দুতা যাচনায উপদ্দুতা ৱিঞ্ঞত্তিযা ভিক্খূ দিস্ৱা উব্বিজ্জন্তিপি উত্তসন্তিপি পলাযন্তিপি অঞ্ঞেনপি গচ্ছন্তি অঞ্ঞেনপি মুখং কৰোন্তি দ্ৱাৰম্পি থকেন্তি, গাৱিম্পি দিস্ৱা পলাযন্তি ভিক্খূতি মঞ্ঞমানা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… ‘‘কথঞ্হি নাম তুম্হে, মোঘপুৰিসা, সংযাচিকাযো কুটিযো কাৰাপেস্সথ অস্সামিকাযো অত্তুদ্দেসিকাযো অপ্পমাণিকাযো! তাযো ন নিট্ঠানং গচ্ছন্তি. তে তুম্হে যাচনবহুলা ৱিঞ্ঞত্তিবহুলা ৱিহৰিস্সথ – ‘পুৰিসং দেথ পুৰিসত্থকৰং দেথ…পে… তিণং দেথ মত্তিকং দেথা’তি! নেতং মোঘপুৰিসা, অপ্পসন্নানং ৱা পসাদায…পে…’’ ৱিগৰহিত্ৱা ধম্মিং কথং কত্ৱা ভিক্খূ আমন্তেসি –

৩৪৪. ‘‘ভূতপুব্বং, ভিক্খৱে, দ্ৱে ভাতৰো ইসযো গঙ্গং নদিং উপনিস্সায ৱিহৰিংসু. অথ খো, ভিক্খৱে, মণিকণ্ঠো নাগৰাজা গঙ্গং নদিং উত্তৰিত্ৱা যেন কনিট্ঠো ইসি তেনুপসঙ্কমি; উপসঙ্কমিত্ৱা কনিট্ঠং ইসিং সত্তক্খত্তুং ভোগেহি পৰিক্খিপিত্ৱা উপৰিমুদ্ধনি মহন্তং ফণং কৰিত্ৱা অট্ঠাসি. অথ খো, ভিক্খৱে, কনিট্ঠো ইসি তস্স নাগস্স ভযা কিসো অহোসি লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো. অদ্দস খো, ভিক্খৱে, জেট্ঠো ইসি কনিট্ঠং ইসিং কিসং লূখং দুব্বণ্ণং উপ্পণ্ডুপ্পণ্ডুকজাতং ধমনিসন্থতগত্তং. দিস্ৱান কনিট্ঠং ইসিং এতদৱোচ – ‘‘কিস্স ত্ৱং, ভো, কিসো লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো’’তি? ‘‘ইধ, ভো, মণিকণ্ঠো নাগৰাজা গঙ্গং নদিং উত্তৰিত্ৱা যেনাহং তেনুপসঙ্কমি; উপসঙ্কমিত্ৱা মং সত্তক্খত্তুং ভোগেহি পৰিক্খিপিত্ৱা উপৰিমুদ্ধনি মহন্তং ফণং কৰিত্ৱা অট্ঠাসি. তস্সাহং, ভো, নাগস্স ভযা [ভযাম্হি (সী.)] কিসো লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো’’তি. ‘‘ইচ্ছসি পন ত্ৱং, ভো, তস্স নাগস্স অনাগমন’’ন্তি? ‘‘ইচ্ছামহং, ভো, তস্স নাগস্স অনাগমন’’ন্তি. ‘‘অপি পন ত্ৱং, ভো, তস্স নাগস্স কিঞ্চি পস্সসী’’তি? ‘‘পস্সামহং, ভো, মণিমস্স [মণিস্স (সী. ক.)] কণ্ঠে পিলন্ধন’’ন্তি. ‘‘তেন হি ত্ৱং, ভো, তং নাগং মণিং যাচ – ‘মণিং মে, ভো, দেহি; মণিনা মে অত্থো’’’তি.

অথ খো, ভিক্খৱে, মণিকণ্ঠো নাগৰাজা গঙ্গং নদিং উত্তৰিত্ৱা যেন কনিট্ঠো ইসি তেনুপসঙ্কমি; উপসঙ্কমিত্ৱা একমন্তং অট্ঠাসি. একমন্তং ঠিতং খো, ভিক্খৱে, মণিকণ্ঠং নাগৰাজানং কনিট্ঠো ইসি এতদৱোচ – ‘‘মণিং মে, ভো, দেহি; মণিনা মে অত্থো’’তি. অথ খো, ভিক্খৱে, মণিকণ্ঠো নাগৰাজা – ‘ভিক্খু মণিং যাচতি, ভিক্খুস্স মণিনা অত্থো’তি খিপ্পঞ্ঞেৱ অগমাসি. দুতিযম্পি খো, ভিক্খৱে, মণিকণ্ঠো নাগৰাজা গঙ্গং নদিং উত্তৰিত্ৱা যেন কনিট্ঠো ইসি তেনুপসঙ্কমি. অদ্দস খো, ভিক্খৱে, কনিট্ঠো ইসি মণিকণ্ঠং নাগৰাজানং দূৰতোৱ আগচ্ছন্তং. দিস্ৱান মণিকণ্ঠং নাগৰাজানং এতদৱোচ – ‘‘মণিং মে, ভো, দেহি; মণিনা মে অত্থো’’তি. অথ খো, ভিক্খৱে, মণিকণ্ঠো নাগৰাজা – ‘‘ভিক্খু মণিং যাচতি, ভিক্খুস্স মণিনা অত্থো’’তি ততোৱ পটিনিৱত্তি. ততিযম্পি খো, ভিক্খৱে, মণিকণ্ঠো নাগৰাজা গঙ্গং নদিং উত্তৰতি. অদ্দস খো, ভিক্খৱে, কনিট্ঠো ইসি মণিকণ্ঠং নাগৰাজানং গঙ্গং নদিং উত্তৰন্তং. দিস্ৱান মণিকণ্ঠং নাগৰাজানং এতদৱোচ – ‘‘মণিং মে, ভো, দেহি; মণিনা মে অত্থো’’তি. অথ খো, ভিক্খৱে, মণিকণ্ঠো নাগৰাজা কনিট্ঠং ইসিং গাথাহি অজ্ঝভাসি –

[জা. ১.৩.৭ মণিকণ্ঠজাতকেপি] ‘‘মমন্নপানং ৱিপুলং উড়াৰং,

উপ্পজ্জতীমস্স মণিস্স হেতু;

তং তে ন দস্সং অতিযাচকোসি;

ন চাপি তে অস্সমমাগমিস্সং.

[জা. ১.৩.৮ মণিকণ্ঠজাতকেপি] ‘‘সুসূ যথা সক্খৰধোতপাণী;

তাসেসি মং সেলমাযাচমানো;

তং তে ন দস্সং অতিযাচকোসি;

ন চাপি তে অস্সমমাগমিস্স’’ন্তি.

অথ খো, ভিক্খৱে, মণিকণ্ঠো নাগৰাজা – ‘‘ভিক্খু মণিং যাচতি, ভিক্খুস্স মণিনা অত্থো’’তি পক্কামি. তথা পক্কন্তোৱ [তদাপক্কন্তোৱ (ক.)] অহোসি, ন পুন পচ্চাগঞ্ছি. অথ খো, ভিক্খৱে, কনিট্ঠো ইসি তস্স নাগস্স দস্সনীযস্স অদস্সনেন ভিয্যোসোমত্তায কিসো অহোসি লূখো দুব্বণ্ণো, উপ্পণ্ডুপ্পণ্ডুকজাতো ধমনিসন্থতগত্তো. অদ্দস খো, ভিক্খৱে, জেট্ঠো ইসি কনিট্ঠং ইসিং ভিয্যোসোমত্তায কিসং লূখং দুব্বণ্ণং উপ্পণ্ডুপ্পণ্ডুকজাতং ধমনিসন্থতগত্তং. দিস্ৱান কনিট্ঠং ইসিং এতদৱোচ – ‘‘কিস্স ত্ৱং, ভো, ভিয্যোসোমত্তায কিসো লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো’’তি? ‘‘তস্সাহং, ভো, নাগস্স দস্সনীযস্স অদস্সনেন ভিয্যোসোমত্তায কিসো লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো’’তি. অথ খো, ভিক্খৱে, জেট্ঠো ইসি কনিট্ঠং ইসিং গাথায অজ্ঝভাসি –

[জা. ১.৩.৯ মণিকণ্ঠজাতকেপি] ‘‘ন তং যাচে যস্স পিযং জিগীসে,

ৱিদেস্সো [দেস্সো (সী.), দেস্সো চ (স্যা.)] হোতি অতিযাচনায;

নাগো মণিং যাচিতো ব্ৰাহ্মণেন;

অদস্সনঞ্ঞেৱ তদজ্ঝগমা’’তি.

তেসঞ্হি নাম, ভিক্খৱে, তিৰচ্ছানগতানং পাণানং অমনাপা ভৱিস্সতি যাচনা অমনাপা ৱিঞ্ঞত্তি. কিমঙ্গং [কিমঙ্গ (সী.)] পন মনুস্সভূতানং!

৩৪৫. ‘‘ভূতপুব্বং, ভিক্খৱে, অঞ্ঞতৰো ভিক্খু হিমৱন্তপস্সে ৱিহৰতি অঞ্ঞতৰস্মিং ৱনসণ্ডে. তস্স খো, ভিক্খৱে, ৱনসণ্ডস্স অৱিদূৰে মহন্তং নিন্নং পল্ললং. অথ খো,

ৱাসায উপগচ্ছতি. অথ খো, ভিক্খৱে, সো ভিক্খু তস্স সকুণসঙ্ঘস্স সদ্দেন উব্বাড়্হো যেনাহং তেনুপসঙ্কমি; উপসঙ্কমিত্ৱা মং অভিৱাদেত্ৱা একমন্তং নিসীদি. একমন্তং নিসিন্নং খো অহং, ভিক্খৱে, তং ভিক্খুং এতদৱোচ – ‘কচ্চি, ভিক্খু, খমনীযং কচ্চি যাপনীযং কচ্চিসি অপ্পকিলমথেন অদ্ধানং আগতো? কুতো চ ত্ৱং, ভিক্খু, আগচ্ছসী’তি? ‘খমনীযং, ভগৱা, যাপনীযং, ভগৱা. অপ্পকিলমথেন চাহং, ভন্তে, অদ্ধানং আগতো. অত্থি, ভন্তে, হিমৱন্তপস্সে মহাৱনসণ্ডো. তস্স খো পন, ভন্তে, ৱনসণ্ডস্স অৱিদূৰে মহন্তং নিন্নং পল্ললং. অথ খো, ভন্তে, মহাসকুণসঙ্ঘো তস্মিং পল্ললে দিৱসং গোচৰং চৰিত্ৱা সাযং তং ৱনসণ্ডং ৱাসায উপগচ্ছতি. ততো অহং, ভগৱা, আগচ্ছামি – তস্স সকুণসঙ্ঘস্স সদ্দেন উব্বাড়্হো’তি. ‘ইচ্ছসি পন ত্ৱং, ভিক্খু, তস্স সকুণসঙ্ঘস্স অনাগমন’ন্তি? ‘ইচ্ছামহং, ভগৱা, তস্স সকুণসঙ্ঘস্স অনাগমন’ন্তি. ‘তেন হি ত্ৱং, ভিক্খু, তত্থ গন্ত্ৱা তং ৱনসণ্ডং অজ্ঝোগাহেত্ৱা ৰত্তিযা পঠমং যামং তিক্খত্তুং সদ্দমনুস্সাৱেহি – সুণন্তু মে, ভোন্তো সকুণা, যাৱতিকা ইমস্মিং ৱনসণ্ডে ৱাসং উপগতা, পত্তেন মে অত্থো. একেকং মে, ভোন্তো, পত্তং দদন্তূ’তি. ৰত্তিযা মজ্ঝিমং যামং… ৰত্তিযা পচ্ছিমং যামং তিক্খত্তুং সদ্দমনুস্সাৱেহি – ‘সুণন্তু মে, ভোন্তো সকুণা, যাৱতিকা ইমস্মিং ৱনসণ্ডে ৱাসং উপগতা, পত্তেন মে অত্থো. একেকং মে, ভোন্তো, পত্তং দদন্তূ’তি.

‘‘অথ খো, ভিক্খৱে, সো ভিক্খু তত্থ গন্ত্ৱা তং ৱনসণ্ডং অজ্ঝোগাহেত্ৱা ৰত্তিযা পঠমং যামং তিক্খত্তুং সদ্দমনুস্সাৱেসি – ‘সুণন্তু মে, ভোন্তো সকুণা, যাৱতিকা ইমস্মিং ৱনসণ্ডে ৱাসং উপগতা, পত্তেন মে অত্থো. একেকং মে, ভোন্তো, পত্তং দদন্তূ’তি. ৰত্তিযা মজ্ঝিম যামং… ৰত্তিযা পচ্ছিমং যামং তিক্খত্তুং সদ্দমনুস্সাৱেসি – ‘সুণন্তু মে, ভোন্তো সকুণা, যাৱতিকা ইমস্মিং ৱনসণ্ডে ৱাসং উপগতা, পত্তেন মে অত্থো. একেকং মে, ভোন্তো, পত্তং দদন্তূ’তি. অথ খো, ভিক্খৱে, সো সকুণসঙ্ঘো – ‘ভিক্খু পত্তং যাচতি ভিক্খুস্স পত্তেন অত্থো’তি তম্হা ৱনসণ্ডা পক্কামি. তথা পক্কন্তোৱ অহোসি ন পুন পচ্চাগঞ্ছি. তেসঞ্হি নাম, ভিক্খৱে, তিৰচ্ছানগতানং পাণানং অমনাপা ভৱিস্সতি যাচনা অমনাপা ৱিঞ্ঞত্তি. কিমঙ্গং পন মনুস্সভূতানং’’!

৩৪৬. ‘‘ভূতপুব্বং, ভিক্খৱে, ৰট্ঠপালস্স কুলপুত্তস্স পিতা ৰট্ঠপালং কুলপুত্তং গাথায অজ্ঝভাসি –

‘অপাহং তে ন জানামি, ৰট্ঠপাল বহূ জনা;

[জা. ১.৭.৫৪] তে মং সঙ্গম্ম যাচন্তি, কস্মা মং ত্ৱং ন যাচসী’তি.

[জা. ১.৭.৫৫] ‘যাচকো অপ্পিযো হোতি, যাচং অদদমপ্পিযো;

তস্মাহং তং ন যাচামি, মা মে ৱিদেস্সনা অহূ’তি.

‘‘সো হি নাম, ভিক্খৱে, ৰট্ঠপালো কুলপুত্তো সকং পিতৰং এৱং ৱক্খতি. কিমঙ্গং পন জনো জনং!

৩৪৭. ‘‘গিহীনং, ভিক্খৱে, দুস্সংহৰানি ভোগানি সম্ভতানিপি দুৰক্খিযানি. তত্থ নাম তুম্হে, মোঘপুৰিসা, এৱং দুস্সংহৰেসু ভোগেসু সম্ভতেসুপি দুৰক্খিযেসু যাচনবহুলা ৱিঞ্ঞত্তিবহুলা ৱিহৰিস্সথ – ‘পুৰিসং দেথ, পুৰিসত্থকৰং দেথ, গোণং দেথ, সকটং দেথ, ৱাসিং দেথ, পৰসুং দেথ, কুঠাৰিং দেথ, কুদালং দেথ, নিখাদনং দেথ, ৱল্লিং দেথ, ৱেড়ুং দেথ, মুঞ্জং দেথ, পব্বজং দেথ, তিণং দেথ, মত্তিকং দেথা’’তি! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৩৪৮. ‘‘সঞ্ঞাচিকায পন ভিক্খুনা কুটিং কাৰযমানেন অস্সামিকং অত্তুদ্দেসং পমাণিকা কাৰেতব্বা. তত্ৰিদং পমাণং – দীঘসো দ্ৱাদস ৱিদত্থিযো, সুগতৱিদত্থিযা; তিৰিযং সত্তন্তৰা. ভিক্খূ অভিনেতব্বা ৱত্থুদেসনায. তেহি ভিক্খূহি ৱত্থু দেসেতব্বং – অনাৰম্ভং [অনাৰব্ভং (ক.)] সপৰিক্কমনং. সাৰম্ভে [সাৰব্ভে (ক.)] চে ভিক্খু ৱত্থুস্মিং অপৰিক্কমনে সঞ্ঞাচিকায কুটিং কাৰেয্য, ভিক্খূ ৱা অনভিনেয্য ৱত্থুদেসনায, পমাণং ৱা অতিক্কামেয্য, সঙ্ঘাদিসেসো’’তি.

৩৪৯. সঞ্ঞাচিকা নাম সযং যাচিত্ৱা পুৰিসম্পি পুৰিসত্থকৰম্পি গোণম্পি সকটম্পি ৱাসিম্পি পৰসুম্পি কুঠাৰিম্পি কুদালম্পি নিখাদনম্পি ৱল্লিম্পি ৱেড়ুম্পি মুঞ্জম্পি পব্বজম্পি তিণম্পি মত্তিকম্পি.

কুটি নাম উল্লিত্তা ৱা হোতি অৱলিত্তা ৱা উল্লিত্তাৱলিত্তা ৱা.

কাৰযমানেনাতি কৰোন্তো ৱা কাৰাপেন্তো ৱা.

অস্সামিকন্তি ন অঞ্ঞো কোচি সামিকো হোতি, ইত্থী ৱা পুৰিসো ৱা গহট্ঠো ৱা পব্বজিতো ৱা.

অত্তুদ্দেসন্তি অত্তনো অত্থায.

পমাণিকা কাৰেতব্বা. তত্ৰিদং পমাণং – দীঘসো দ্ৱাদস ৱিদত্থিযো, সুগতৱিদত্থিযাতি বাহিৰিমেন মানেন.

তিৰিযং সত্তন্তৰাতি অব্ভন্তৰিমেন মানেন.

ভিক্খূ অভিনেতব্বা ৱত্থুদেসনাযাতি তেন কুটিকাৰকেন ভিক্খুনা কুটিৱত্থুং সোধেত্ৱা সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ৱুড্ঢানং ভিক্খূনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘অহং, ভন্তে, সঞ্ঞাচিকায কুটিং কত্তুকামো অস্সামিকং অত্তুদ্দেসং. সোহং, ভন্তে, সঙ্ঘং কুটিৱত্থুওলোকনং যাচামী’’তি. দুতিযম্পি যাচিতব্বা. ততিযম্পি যাচিতব্বা. সচে সব্বো সঙ্ঘো উস্সহতি কুটিৱত্থুং ওলোকেতুং, সব্বেন সঙ্ঘেন ওলোকেতব্বং. নো চে সব্বো সঙ্ঘো উস্সহতি কুটিৱত্থুং ওলোকেতুং, যে তত্থ হোন্তি ভিক্খূ ব্যত্তা পটিবলা সাৰম্ভং অনাৰম্ভং সপৰিক্কমনং অপৰিক্কমনং জানিতুং তে যাচিত্ৱা সম্মন্নিতব্বা. এৱঞ্চ পন, ভিক্খৱে, সম্মন্নিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

৩৫০. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সঞ্ঞাচিকায কুটিং কত্তুকামো অস্সামিকং অত্তুদ্দেসং. সো সঙ্ঘং কুটিৱত্থুওলোকনং যাচতি. যদি সঙ্ঘস্স পত্তকল্লং, সঙ্ঘো ইত্থন্নামঞ্চ ইত্থন্নামঞ্চ ভিক্খূ সম্মন্নেয্য ইত্থন্নামস্স ভিক্খুনো কুটিৱত্থুং ওলোকেতুং. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সঞ্ঞাচিকায কুটিং কত্তুকামো অস্সামিকং অত্তুদ্দেসং. সো সঙ্ঘং কুটিৱত্থুওলোকনং যাচতি. সঙ্ঘো ইত্থন্নামঞ্চ ইত্থন্নামঞ্চ ভিক্খূ সম্মন্নতি ইত্থন্নামস্স ভিক্খুনো কুটিৱত্থুং ওলোকেতুং. যস্সাযস্মতো খমতি ইত্থন্নামস্স চ ইত্থন্নামস্স চ ভিক্খূনং সম্মুতি [সম্মতি (স্যা.)] ইত্থন্নামস্স ভিক্খুনো কুটিৱত্থুং ওলোকেতুং, সো তুণ্হস্স; যস্স নক্খমতি, সো ভাসেয্য.

‘‘সম্মতা সঙ্ঘেন ইত্থন্নামো চ ইত্থন্নামো চ ভিক্খূ ইত্থন্নামস্স ভিক্খুনো কুটিৱত্থুং ওলোকেতুং. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

৩৫১. তেহি সম্মতেহি ভিক্খূহি তত্থ গন্ত্ৱা কুটিৱত্থু ওলোকেতব্বং, সাৰম্ভং অনাৰম্ভং সপৰিক্কমনং অপৰিক্কমনং জানিতব্বং. সচে সাৰম্ভং হোতি অপৰিক্কমনং, ‘মা ইধ কৰী’তি ৱত্তব্বো. সচে অনাৰম্ভং হোতি সপৰিক্কমনং, সঙ্ঘস্স আৰোচেতব্বং – ‘অনাৰম্ভং সপৰিক্কমন’ন্তি. তেন কুটিকাৰকেন ভিক্খুনা সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ৱুড্ঢানং ভিক্খূনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘অহং, ভন্তে, সঞ্ঞাচিকায কুটিং কত্তুকামো অস্সামিকং অত্তুদ্দেসং. সোহং, ভন্তে, সঙ্ঘং কুটিৱত্থুদেসনং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

৩৫২. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সঞ্ঞাচিকায কুটিং কত্তুকামো অস্সামিকং অত্তুদ্দেসং. সো সঙ্ঘং কুটিৱত্থুদেসনং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো কুটিৱত্থুং দেসেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সঞ্ঞাচিকায কুটিং কত্তুকামো অস্সামিকং অত্তুদ্দেসং. সো সঙ্ঘং কুটিৱত্থুদেসনং যাচতি. সঙ্ঘো ইত্থন্নামস্স ভিক্খুনো কুটিৱত্থুং দেসেতি. যস্সাযস্মতো খমতি ইত্থন্নামস্স ভিক্খুনো কুটিৱত্থুস্স দেসনা, সো তুণ্হস্স; যস্স নক্খমতি, সো ভাসেয্য.

‘‘দেসিতং সঙ্ঘেন ইত্থন্নামস্স ভিক্খুনো কুটিৱত্থু. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

৩৫৩. সাৰম্ভং নাম কিপিল্লিকানং ৱা আসযো হোতি, উপচিকানং ৱা আসযো হোতি, উন্দুৰানং ৱা আসযো হোতি, অহীনং ৱা আসযো হোতি, ৱিচ্ছিকানং ৱা আসযো হোতি, সতপদীনং ৱা আসযো হোতি, হত্থীনং ৱা আসযো হোতি, অস্সানং ৱা আসযো হোতি, সীহানং ৱা আসযো হোতি, ব্যগ্ঘানং ৱা আসযো হোতি, দীপীনং ৱা আসযো হোতি, অচ্ছানং ৱা আসযো হোতি, তৰচ্ছানং ৱা আসযো হোতি, যেসং কেসঞ্চি তিৰচ্ছানগতানং পাণানং আসযো হোতি, পুব্বণ্ণনিস্সিতং ৱা হোতি, অপৰণ্ণনিস্সিতং ৱা হোতি, অব্ভাঘাতনিস্সিতং ৱা হোতি, আঘাতননিস্সিতং ৱা হোতি, সুসাননিস্সিতং ৱা হোতি, উয্যাননিস্সিতং ৱা হোতি, ৰাজৱত্থুনিস্সিতং ৱা হোতি, হত্থিসালানিস্সিতং ৱা হোতি, অস্সসালানিস্সিতং ৱা হোতি, বন্ধনাগাৰনিস্সিতং ৱা হোতি, পানাগাৰনিস্সিতং ৱা হোতি, সূননিস্সিতং ৱা হোতি, ৰচ্ছানিস্সিতং ৱা হোতি, চচ্চৰনিস্সিতং ৱা হোতি, সভানিস্সিতং ৱা হোতি, সংসৰণনিস্সিতং ৱা [সঞ্চৰণনিস্সিতং ৱা (ক.)] হোতি. এতং সাৰম্ভং নাম.

অপৰিক্কমনং নাম ন সক্কা হোতি যথাযুত্তেন সকটেন অনুপৰিগন্তুং সমন্তা নিস্সেণিযা অনুপৰিগন্তুং. এতং অপৰিক্কমনং নাম.

অনাৰম্ভং নাম ন কিপিল্লিকানং ৱা আসযো হোতি, ন উপচিকানং ৱা আসযো হোতি, ন উন্দুৰানং ৱা আসযো হোতি, ন অহীনং ৱা আসযো হোতি, ন ৱিচ্ছিকানং ৱা আসযো হোতি, ন সতপদীনং ৱা আসযো হোতি…পে… ন সংসৰণনিস্সিতং ৱা হোতি. এতং অনাৰম্ভং নাম.

সপৰিক্কমনং নাম সক্কা হোতি যথাযুত্তেন সকটেন অনুপৰিগন্তুং, সমন্তা নিস্সেণিযা অনুপৰিগন্তুং. এতং সপৰিক্কমনং নাম.

সঞ্ঞাচিকা নাম সযং যাচিত্ৱা পুৰিসম্পি পুৰিসত্থকৰম্পি…পে… মত্তিকম্পি.

কুটি নাম উল্লিত্তা ৱা হোতি ৱা অৱলিত্তা ৱা উল্লিত্তাৱলিত্তা ৱা.

কাৰেয্যাতি কৰোতি ৱা কাৰাপেতি ৱা.

ভিক্খূ ৱা অনভিনেয্য, ৱত্থুদেসনায পমাণং ৱা অতিক্কামেয্যাতি ঞত্তিদুতিযেন কম্মেন কুটিৱত্থুং ন দেসাপেত্ৱা, আযামতো ৱা ৱিত্থাৰতো ৱা অন্তমসো কেসগ্গমত্তম্পি অতিক্কামেত্ৱা কৰোতি ৱা কাৰাপেতি ৱা, পযোগে পযোগে দুক্কটং. একং পিণ্ডং অনাগতে আপত্তি থুল্লচ্চযস্স. তস্মিং পিণ্ডে আগতে আপত্তি সঙ্ঘাদিসেসস্স.

সঙ্ঘাদিসেসোতি…পে… তেনপি ৱুচ্চতি সঙ্ঘাদিসেসোতি.

৩৫৪. ভিক্খু কুটিং কৰোতি অদেসিতৱত্থুকং সাৰম্ভং অপৰিক্কমনং, আপত্তি সঙ্ঘাদিসেসেন দ্ৱিন্নং দুক্কটানং. ভিক্খু কুটিং কৰোতি অদেসিতৱত্থুকং সাৰম্ভং সপৰিক্কমনং, আপত্তি সঙ্ঘাদিসেসেন দুক্কটস্স. ভিক্খু কুটিং কৰোতি অদেসিতৱত্থুকং অনাৰম্ভং অপৰিক্কমনং, আপত্তি সঙ্ঘাদিসেসেন দুক্কটস্স. ভিক্খু কুটিং কৰোতি অদেসিতৱত্থুকং অনাৰম্ভং সপৰিক্কমনং, আপত্তি সঙ্ঘাদিসেসস্স.

৩৫৫. ভিক্খু কুটিং কৰোতি দেসিতৱত্থুকং সাৰম্ভং অপৰিক্কমনং, আপত্তি দ্ৱিন্নং দুক্কটানং. ভিক্খু কুটিং কৰোতি দেসিতৱত্থুকং সাৰম্ভং সপৰিক্কমনং, আপত্তি দুক্কটস্স. ভিক্খু কুটিং কৰোতি দেসিতৱত্থুকং অনাৰম্ভং অপৰিক্কমনং, আপত্তি দুক্কটস্স. ভিক্খু কুটিং কৰোতি দেসিতৱত্থুকং অনাৰম্ভং সপৰিক্কমনং, অনাপত্তি.

ভিক্খু কুটিং কৰোতি পমাণাতিক্কন্তং সাৰম্ভং অপৰিক্কমনং, আপত্তি সঙ্ঘাদিসেসেন দ্ৱিন্নং দুক্কটানং. ভিক্খু কুটিং কৰোতি পমাণাতিক্কন্তং সাৰম্ভং সপৰিক্কমনং, আপত্তি সঙ্ঘাদিসেসেন দুক্কটস্স. ভিক্খু কুটিং কৰোতি পমাণাতিক্কন্তং অনাৰম্ভং অপৰিক্কমনং, আপত্তি সঙ্ঘাদিসেসেন দুক্কটস্স. ভিক্খু কুটিং কৰোতি পমাণাতিক্কন্তং অনাৰম্ভং সপৰিক্কমনং, আপত্তি সঙ্ঘাদিসেসস্স.

ভিক্খু কুটিং কৰোতি পমাণিকং সাৰম্ভং অপৰিক্কমনং, আপত্তি দ্ৱিন্নং দুক্কটানং. ভিক্খু কুটিং কৰোতি পমাণিকং সাৰম্ভং সপৰিক্কমনং, আপত্তি দুক্কটস্স. ভিক্খু কুটিং কৰোতি পমাণিকং অনাৰম্ভং অপৰিক্কমনং, আপত্তি দুক্কটস্স. ভিক্খু কুটিং কৰোতি পমাণিকং অনাৰম্ভং সপৰিক্কমনং, অনাপত্তি.

ভিক্খু কুটিং কৰোতি অদেসিতৱত্থুকং পমাণাতিক্কন্তং সাৰম্ভং অপৰিক্কমনং, আপত্তি দ্ৱিন্নং সঙ্ঘাদিসেসেন দ্ৱিন্নং দুক্কটানং. ভিক্খু কুটিং কৰোতি অদেসিতৱত্থুকং পমাণাতিক্কন্তং সাৰম্ভং সপৰিক্কমনং, আপত্তি দ্ৱিন্নং সঙ্ঘাদিসেসেন দুক্কটস্স. ভিক্খু কুটিং কৰোতি অদেসিতৱত্থুকং পমাণাতিক্কন্তং অনাৰম্ভং অপৰিক্কমনং, আপত্তি দ্ৱিন্নং সঙ্ঘাদিসেসেন দুক্কটস্স. ভিক্খু কুটিং কৰোতি অদেসিতৱত্থুকং পমাণাতিক্কন্তং অনাৰম্ভং সপৰিক্কমনং, আপত্তি দ্ৱিন্নং সঙ্ঘাদিসেসানং.

ভিক্খু কুটিং কৰোতি দেসিতৱত্থুকং পমাণিকং সাৰম্ভং অপৰিক্কমনং, আপত্তি দ্ৱিন্নং দুক্কটানং. ভিক্খু কুটিং কৰোতি দেসিতৱত্থুকং পমাণিকং সাৰম্ভং সপৰিক্কমনং, আপত্তি দুক্কটস্স. ভিক্খু কুটিং কৰোতি দেসিতৱত্থুকং পমাণিকং অনাৰম্ভং অপৰিক্কমনং, আপত্তি দুক্কটস্স. ভিক্খু কুটিং কৰোতি দেসিতৱত্থুকং পমাণিকং অনাৰম্ভং সপৰিক্কমনং, অনাপত্তি.

৩৫৬. ভিক্খু সমাদিসতি – ‘‘কুটিং মে কৰোথা’’তি. তস্স কুটিং কৰোন্তি অদেসিতৱত্থুকং সাৰম্ভং অপৰিক্কমনং, আপত্তি সঙ্ঘাদিসেসেন দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং অপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং সপৰিক্কমনং, আপত্তি সঙ্ঘাদিসেসস্স.

ভিক্খু সমাদিসতি – ‘‘কুটিং মে কৰোথা’’তি. তস্স কুটিং কৰোন্তি দেসিতৱত্থুকং সাৰম্ভং অপৰিক্কমনং, আপত্তি দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দুক্কটস্স…পে… অনাৰম্ভং অপৰিক্কমনং, আপত্তি দুক্কটস্স…পে… অনাৰম্ভং সপৰিক্কমনং, অনাপত্তি.

ভিক্খু সমাদিসতি – ‘‘কুটিং মে কৰোথা’’তি. তস্স কুটিং কৰোন্তি পমাণাতিক্কন্তং সাৰম্ভং অপৰিক্কমনং, আপত্তি সঙ্ঘাদিসেসেন দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং অপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং সপৰিক্কমনং, আপত্তি সঙ্ঘাদিসেসস্স.

ভিক্খু সমাদিসতি – ‘‘কুটিং মে কৰোথা’’তি. তস্স কুটিং কৰোন্তি পমাণিকং সাৰম্ভং অপৰিক্কমনং, আপত্তি দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দুক্কটস্স…পে… অনাৰম্ভং অপৰিক্কমনং, আপত্তি দুক্কটস্স…পে… অনাৰম্ভং সপৰিক্কমনং, অনাপত্তি.

ভিক্খু সমাদিসতি – ‘‘কুটিং মে কৰোথা’’তি. তস্স কুটিং কৰোন্তি অদেসিতৱত্থুকং পমাণাতিক্কন্তং সাৰম্ভং অপৰিক্কমনং, আপত্তি দ্ৱিন্নং সঙ্ঘাদিসেসেন দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দ্ৱিন্নং সঙ্ঘাদিসেসেন দুক্কটস্স…পে… অনাৰম্ভং অপৰিক্কমনং, আপত্তি দ্ৱিন্নং সঙ্ঘাদিসেসেন দুক্কটস্স…পে… অনাৰম্ভং সপৰিক্কমনং, আপত্তি দ্ৱিন্নং সঙ্ঘাদিসেসানং.

ভিক্খু সমাদিসতি – ‘‘কুটিং মে কৰোথা’’তি. তস্স কুটিং কৰোন্তি দেসিতৱত্থুকং পমাণিকং সাৰম্ভং অপৰিক্কমনং, আপত্তি দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দুক্কটস্স…পে… অনাৰম্ভং অপৰিক্কমনং, আপত্তি দুক্কটস্স…পে… অনাৰম্ভং সপৰিক্কমনং, অনাপত্তি.

৩৫৭. ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. ন চ সমাদিসতি – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি অদেসিতৱত্থুকং সাৰম্ভং অপৰিক্কমনং, আপত্তি সঙ্ঘাদিসেসেন দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং অপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং সপৰিক্কমনং, আপত্তি সঙ্ঘাদিসেসস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. ন চ সমাদিসতি – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি দেসিতৱত্থুকং সাৰম্ভং অপৰিক্কমনং, আপত্তি দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দুক্কটস্স…পে… অনাৰম্ভং অপৰিক্কমনং, আপত্তি দুক্কটস্স…পে… অনাৰম্ভং সপৰিক্কমনং, অনাপত্তি.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. ন চ সমাদিসতি – ‘‘পমাণিকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি পমাণাতিক্কন্তং সাৰম্ভং অপৰিক্কমনং, আপত্তি সঙ্ঘাদিসেসেন দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং অপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং সপৰিক্কমনং, আপত্তি সঙ্ঘাদিসেসস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. ন চ সমাদিসতি – ‘‘পমাণিকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি পমাণিকং সাৰম্ভং অপৰিক্কমনং, আপত্তি দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দুক্কটস্স…পে… অনাৰম্ভং অপৰিক্কমনং, আপত্তি দুক্কটস্স…পে… অনাৰম্ভং সপৰিক্কমনং, অনাপত্তি.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. ন চ সমাদিসতি – ‘‘দেসিতৱত্থুকা চ হোতু পমাণিকা চ অনাৰম্ভা চ সপৰিক্কমনা চা’’তি. তস্স কুটিং কৰোন্তি অদেসিতৱত্থুকং পমাণাতিক্কন্তং সাৰম্ভং অপৰিক্কমনং, আপত্তি দ্ৱিন্নং সঙ্ঘাদিসেসেন দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দ্ৱিন্নং সঙ্ঘাদিসেসেন দুক্কটস্স…পে… অনাৰম্ভং অপৰিক্কমনং, আপত্তি দ্ৱিন্নং সঙ্ঘাদিসেসেন দুক্কটস্স …পে… অনাৰম্ভং সপৰিক্কমনং, আপত্তি দ্ৱিন্নং সঙ্ঘাদিসেসানং.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. ন চ সমাদিসতি – ‘‘দেসিতৱত্থুকা চ হোতু পমাণিকা চ অনাৰম্ভা চ সপৰিক্কমনা চা’’তি. তস্স কুটিং কৰোন্তি দেসিতৱত্থুকং পমাণিকং সাৰম্ভং অপৰিক্কমনং, আপত্তি দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দুক্কটস্স…পে… অনাৰম্ভং অপৰিক্কমনং, আপত্তি দুক্কটস্স…পে… অনাৰম্ভং সপৰিক্কমনং, অনাপত্তি.

৩৫৮. ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি অদেসিতৱত্থুকং সাৰম্ভং অপৰিক্কমনং. সো সুণাতি – ‘‘কুটি কিৰ মে কযিৰতি অদেসিতৱত্থুকা সাৰম্ভা অপৰিক্কমনা’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. নো চে সামং ৱা গচ্ছেয্য দূতং ৱা পহিণেয্য, আপত্তি দুক্কটস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি অদেসিতৱত্থুকং সাৰম্ভং সপৰিক্কমনং. সো সুণাতি – ‘‘কুটি কিৰ মে কযিৰতি অদেসিতৱত্থুকা সাৰম্ভা সপৰিক্কমনা’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘দেসিতৱত্থুকা চ হোতু অনাৰম্ভা চা’’তি. নো চে সামং ৱা গচ্ছেয্য দূতং ৱা পহিণেয্য, আপত্তি দুক্কটস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি অদেসিতৱত্থুকং অনাৰম্ভং অপৰিক্কমনং. সো সুণাতি – ‘‘কুটি কিৰ মে কযিৰতি অদেসিতৱত্থুকা অনাৰম্ভা অপৰিক্কমনা’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘দেসিতৱত্থুকা চ হোতু সপৰিক্কমনা চা’’তি. নো চে সামং ৱা গচ্ছেয্য দূতং ৱা পহিণেয্য, আপত্তি দুক্কটস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি অদেসিতৱত্থুকং অনাৰম্ভং সপৰিক্কমনং. সো সুণাতি – ‘‘কুটি কিৰ মে কযিৰতি অদেসিতৱত্থুকা অনাৰম্ভা সপৰিক্কমনা’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘দেসিতৱত্থুকা হোতূ’’তি. নো চে সামং ৱা গচ্ছেয্য দূতং ৱা পহিণেয্য, আপত্তি দুক্কটস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি দেসিতৱত্থুকং সাৰম্ভং অপৰিক্কমনং. সো সুণাতি – ‘‘কুটি কিৰ মে কযিৰতি দেসিতৱত্থুকা সাৰম্ভা অপৰিক্কমনা’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘অনাৰম্ভা চ হোতু সপৰিক্কমনা চা’’তি. নো চে সামং ৱা গচ্ছেয্য দূতং ৱা পহিণেয্য, আপত্তি দুক্কটস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি দেসিতৱত্থুকং সাৰম্ভং সপৰিক্কমনং. সো সুণাতি – ‘‘কুটি কিৰ মে কযিৰতি দেসিতৱত্থুকা সাৰম্ভা সপৰিক্কমনা’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘অনাৰম্ভা হোতূ’’তি. নো চে সামং ৱা গচ্ছেয্য দূতং ৱা পহিণেয্য, আপত্তি দুক্কটস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি দেসিতৱত্থুকং অনাৰম্ভং অপৰিক্কমনং. সো সুণাতি – ‘‘কুটি কিৰ মে কযিৰতি দেসিতৱত্থুকা অনাৰম্ভা অপৰিক্কমনা’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘সপৰিক্কমনা হোতূ’’তি. নো চে সামং ৱা গচ্ছেয্য দূতং ৱা পহিণেয্য, আপত্তি দুক্কটস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি দেসিতৱত্থুকং অনাৰম্ভং সপৰিক্কমনং, অনাপত্তি.

৩৫৯. ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘পমাণিকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি পমাণাতিক্কন্তং সাৰম্ভং অপৰিক্কমনং. সো সুণাতি – ‘‘কুটি কিৰ মে কযিৰতি পমাণাতিক্কন্তা সাৰম্ভা অপৰিক্কমনা’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘পমাণিকা চ হোতু অনাৰম্ভা চ সপৰিক্কমনা চা’’তি…পে… ‘‘পমাণিকা চ হোতু অনাৰম্ভা চা’’তি…পে… ‘‘পমাণিকা চ হোতু সপৰিক্কমনা চা’’তি…পে… ‘‘পমাণিকা হোতূ’’তি. নো চে সামং ৱা গচ্ছেয্য দূতং ৱা পহিণেয্য, আপত্তি দুক্কটস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘পমাণিকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি পমাণিকং সাৰম্ভং অপৰিক্কমনং. সো সুণাতি – ‘‘কুটি কিৰ মে কযিৰতি পমাণিকা সাৰম্ভা অপৰিক্কমনা’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘অনাৰম্ভা চ হোতু সপৰিক্কমনা চা’’তি…পে… ‘‘অনাৰম্ভা হোতূ’’তি…পে… ‘‘সপৰিক্কমনা হোতূ’’তি…পে… অনাপত্তি.

৩৬০. ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু পমাণিকা চ অনাৰম্ভা চ সপৰিক্কমনা চা’’তি. তস্স কুটিং কৰোন্তি অদেসিতৱত্থুকং পমাণাতিক্কন্তং সাৰম্ভং অপৰিক্কমনং. সো সুণাতি – ‘‘কুটি কিৰ মে কযিৰতি অদেসিতৱত্থুকা পমাণাতিক্কন্তা সাৰম্ভা অপৰিক্কমনা’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘দেসিতৱত্থুকা চ হোতু পমাণিকা চ অনাৰম্ভা চ সপৰিক্কমনা চা’’তি…পে… ‘‘দেসিতৱত্থুকা চ হোতু পমাণিকা চ অনাৰম্ভা চা’’তি…পে… ‘‘দেসিতৱত্থুকা চ হোতু পমাণিকা চ সপৰিক্কমনা চা’’তি…পে… ‘‘দেসিতৱত্থুকা চ হোতু পমাণিকা চা’’তি. নো চে সামং ৱা গচ্ছেয্য দূতং ৱা পহিণেয্য, আপত্তি দুক্কটস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু পমাণিকা চ অনাৰম্ভা চ সপৰিক্কমনা চা’’তি. তস্স কুটিং কৰোন্তি দেসিতৱত্থুকং পমাণিকং সাৰম্ভং অপৰিক্কমনং. সো সুণাতি – ‘‘কুটি কিৰ মে কযিৰতি দেসিতৱত্থুকা পমাণিকা সাৰম্ভা অপৰিক্কমনা’’তি. তেন ভিক্খুনা সামং ৱা গন্তব্বং দূতো ৱা পাহেতব্বো – ‘‘অনাৰম্ভা চ হোতু সপৰিক্কমনা চা’’তি…পে… ‘‘অনাৰম্ভা হোতূ’’তি…পে… ‘‘সপৰিক্কমনা হোতূ’’তি…পে… অনাপত্তি.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি অদেসিতৱত্থুকং সাৰম্ভং অপৰিক্কমনং, আপত্তি কাৰুকানং তিণ্ণং দুক্কটানং…পে… সাৰম্ভং সপৰিক্কমনং, আপত্তি কাৰুকানং দ্ৱিন্নং দুক্কটানং…পে… অনাৰম্ভং অপৰিক্কমনং, আপত্তি কাৰুকানং দ্ৱিন্নং দুক্কটানং…পে… অনাৰম্ভং সপৰিক্কমনং, আপত্তি কাৰুকানং দুক্কটস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি দেসিতৱত্থুকং সাৰম্ভং অপৰিক্কমনং, আপত্তি কাৰুকানং দ্ৱিন্নং দুক্কাটনং…পে… সাৰম্ভং সপৰিক্কমনং, আপত্তি কাৰুকানং দুক্কটস্স…পে… অনাৰম্ভং অপৰিক্কমনং, আপত্তি কাৰুকানং দুক্কটস্স…পে… অনাৰম্ভং সপৰিক্কমনং, অনাপত্তি.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘পমাণিকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি পমাণাতিক্কন্তং সাৰম্ভং অপৰিক্কমনং, আপত্তি কাৰুকানং তিণ্ণং দুক্কটানং…পে… সাৰম্ভং সপৰিক্কমনং, আপত্তি কাৰুকানং দ্ৱিন্নং দুক্কটানং…পে… অনাৰম্ভং অপৰিক্কমনং, আপত্তি কাৰুকানং দ্ৱিন্নং দুক্কটানং…পে… অনাৰম্ভং সপৰিক্কমনং আপত্তি কাৰুকানং দুক্কটস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘পমাণিকা চ হোতু অনাৰম্ভা চ সপৰিক্কমনা চা’’তি. তস্স কুটিং কৰোন্তি পমাণিকং সাৰম্ভং অপৰিক্কমনং, আপত্তি কাৰুকানং দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি কাৰুকানং দুক্কটস্স…পে… অনাৰম্ভং অপৰিক্কমনং, আপত্তি কাৰুকানং দুক্কটস্স…পে… অনাৰম্ভং সপৰিক্কমনং, অনাপত্তি.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু পমাণিকা চ অনাৰম্ভা চ সপৰিক্কমনা চা’’তি. তস্স কুটিং কৰোন্তি অদেসিতৱত্থুকং পমাণাতিক্কন্তং সাৰম্ভং অপৰিক্কমনং, আপত্তি কাৰুকানং চতুন্নং দুক্কটানং…পে… সাৰম্ভং সপৰিক্কমনং, আপত্তি কাৰুকানং তিণ্ণং দুক্কটানং…পে… অনাৰম্ভং অপৰিক্কমনং, আপত্তি কাৰুকানং তিণ্ণং দুক্কটানং…পে… অনাৰম্ভং সপৰিক্কমনং, আপত্তি কাৰুকানং দ্ৱিন্নং দুক্কটানং.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. সমাদিসতি চ – ‘‘দেসিতৱত্থুকা চ হোতু পমাণিকা চ অনাৰম্ভা চ সপৰিক্কমনা চা’’তি. তস্স কুটিং কৰোন্তি দেসিতৱত্থুকং পমাণিকং সাৰম্ভং অপৰিক্কমনং, আপত্তি কাৰুকানং দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি কাৰুকানং দুক্কটস্স…পে… অনাৰম্ভং অপৰিক্কমনং, আপত্তি কাৰুকানং দুক্কটস্স…পে… অনাৰম্ভং সপৰিক্কমনং, অনাপত্তি.

৩৬১. ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. তস্স কুটিং কৰোন্তি অদেসিতৱত্থুকং সাৰম্ভং অপৰিক্কমনং. সো চে ৱিপ্পকতে আগচ্ছতি, তেন ভিক্খুনা সা কুটি অঞ্ঞস্স ৱা দাতব্বা ভিন্দিত্ৱা ৱা পুন কাতব্বা. নো চে অঞ্ঞস্স ৱা দদেয্য ভিন্দিত্ৱা ৱা পুন কাৰেয্য, আপত্তি সঙ্ঘাদিসেসেন দ্ৱিন্নং দুক্কটানং.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. তস্স কুটিং কৰোন্তি অদেসিতৱত্থুকং সাৰম্ভং সপৰিক্কমনং. সো চে ৱিপ্পকতে আগচ্ছতি, তেন ভিক্খুনা সা কুটি অঞ্ঞস্স ৱা দাতব্বা ভিন্দিত্ৱা ৱা পুন কাতব্বা. নো চে অঞ্ঞস্স ৱা দদেয্য ভিন্দিত্ৱা ৱা পুন কাৰেয্য, আপত্তি সঙ্ঘাদিসেসেন দুক্কটস্স…পে… অনাৰম্ভং অপৰিক্কমনং…পে… আপত্তি সঙ্ঘাদিসেসেন দুক্কটস্স…পে… অনাৰম্ভং সপৰিক্কমনং…পে… আপত্তি সঙ্ঘাদিসেসস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. তস্স কুটিং কৰোন্তি দেসিতৱত্থুকং সাৰম্ভং অপৰিক্কমনং. সো চে ৱিপ্পকতে আগচ্ছতি, তেন ভিক্খুনা সা কুটি অঞ্ঞস্স ৱা দাতব্বা ভিন্দিত্ৱা ৱা পুন কাতব্বা. নো চে অঞ্ঞস্স ৱা দদেয্য ভিন্দিত্ৱা ৱা পুন কাৰেয্য, আপত্তি দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দুক্কটস্স…পে… অনাৰম্ভং অপৰিক্কমনং, আপত্তি দুক্কটস্স…পে… অনাৰম্ভং সপৰিক্কমনং, অনাপত্তি.

৩৬২. ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. তস্স কুটিং কৰোন্তি পমাণাতিক্কন্তং সাৰম্ভং অপৰিক্কমনং. সো চে ৱিপ্পকতে আগচ্ছতি, তেন ভিক্খুনা সা কুটি অঞ্ঞস্স ৱা দাতব্বা ভিন্দিত্ৱা ৱা পুন কাতব্বা. নো চে অঞ্ঞস্স ৱা দদেয্য ভিন্দিত্ৱা ৱা পুন কাৰেয্য, আপত্তি সঙ্ঘাদিসেসেন দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং অপৰিক্কমনং, আপত্তি সঙ্ঘাদিসেসেন দুক্কটস্স…পে… অনাৰম্ভং সপৰিক্কমনং, আপত্তি সঙ্ঘাদিসেসস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. তস্স কুটিং কৰোন্তি পমাণিকং সাৰম্ভং অপৰিক্কমনং. সো চে ৱিপ্পকতে আগচ্ছতি, তেন ভিক্খুনা সা কুটি অঞ্ঞস্স ৱা দাতব্বা ভিন্দিত্ৱা ৱা পুন কাতব্বা. নো চে অঞ্ঞস্স ৱা দদেয্য ভিন্দিত্ৱা ৱা পুন কাৰেয্য, আপত্তি দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দুক্কটস্স…পে… অনাৰম্ভং অপৰিক্কমনং, আপত্তি দুক্কটস্স…পে… অনাৰম্ভং সপৰিক্কমনং, অনাপত্তি.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. তস্স কুটিং কৰোন্তি অদেসিতৱত্থুকং পমাণাতিক্কন্তং সাৰম্ভং অপৰিক্কমনং. সো চে ৱিপ্পকতে আগচ্ছতি, তেন ভিক্খুনা সা কুটি অঞ্ঞস্স ৱা দাতব্বা ভিন্দিত্ৱা ৱা পুন কাতব্বা. নো চে অঞ্ঞস্স ৱা দদেয্য ভিন্দিত্ৱা ৱা পুন কাৰেয্য, আপত্তি দ্ৱিন্নং সঙ্ঘাদিসেসেন দ্ৱিন্নং দুক্কটানং…পে… সাৰম্ভং সপৰিক্কমনং, আপত্তি দ্ৱিন্নং সঙ্ঘাদিসেসেন দুক্কটস্স…পে… অনাৰম্ভং অপৰিক্কমনং, আপত্তি দ্ৱিন্নং সঙ্ঘাদিসেসেন দুক্কটস্স…পে… অনাৰম্ভং সপৰিক্কমনং, আপত্তি দ্ৱিন্নং সঙ্ঘাদিসেসানং.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. তস্স কুটিং কৰোন্তি দেসিতৱত্থুকং পমাণিকং সাৰম্ভং অপৰিক্কমনং. সো চে ৱিপ্পকতে আগচ্ছতি, তেন ভিক্খুনা সা কুটি অঞ্ঞস্স ৱা দাতব্বা ভিন্দিত্ৱা ৱা পুন কাতব্বা. নো চে অঞ্ঞস্স ৱা দদেয্য ভিন্দিত্ৱা ৱা পুন কাৰেয্য, আপত্তি দ্ৱিন্নং দুক্কাটানং…পে… সাৰম্ভং সপৰিক্কমনং, আপত্তি দুক্কটস্স…পে… অনাৰম্ভং অপৰিক্কমনং, আপত্তি দুক্কটস্স.

ভিক্খু সমাদিসিত্ৱা পক্কমতি – ‘‘কুটিং মে কৰোথা’’তি. তস্স কুটিং কৰোন্তি দেসিতৱত্থুকং পমাণিকং অনাৰম্ভং সপৰিক্কমনং, অনাপত্তি.

৩৬৩. অত্তনা ৱিপ্পকতং অত্তনা পৰিযোসাপেতি, আপত্তি সঙ্ঘাদিসেসস্স.

অত্তনা ৱিপ্পকতং পৰেহি পৰিযোসাপেতি [পৰিযোসাৱাপেতি (ক.)], আপত্তি সঙ্ঘাদিসেসস্স.

পৰেহি ৱিপ্পকতং অত্তনা পৰিযোসাপেতি, আপত্তি সঙ্ঘাদিসেসস্স.

পৰেহি ৱিপ্পকতং পৰেহি পৰিযোসাপেতি [পৰিযোসাৱাপেতি (ক.)], আপত্তি সঙ্ঘাদিসেসস্স.

৩৬৪. অনাপত্তি লেণে গুহায তিণকুটিকায অঞ্ঞস্সত্থায ৱাসাগাৰং ঠপেত্ৱা সব্বত্থ, অনাপত্তি উম্মত্তকস্স আদিকম্মিকস্সাতি.

কুটিকাৰসিক্খাপদং নিট্ঠিতং ছট্ঠং.