৫. সঞ্চৰিত্তসিক্খাপদং

২৯৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মা উদাযী সাৱত্থিযং কুলূপকো হোতি. বহুকানি কুলানি উপসঙ্কমতি. যত্থ পস্সতি কুমাৰকং ৱা অপজাপতিকং, কুমাৰিকং ৱা অপতিকং, কুমাৰকস্স মাতাপিতূনং সন্তিকে কুমাৰিকায ৱণ্ণং ভণতি – ‘‘অমুকস্স কুলস্স কুমাৰিকা অভিৰূপা দস্সনীযা পাসাদিকা পণ্ডিতা ব্যত্তা মেধাৱিনী দক্খা অনলসা. ছন্না সা কুমাৰিকা ইমস্স কুমাৰকস্সা’’তি. তে এৱং ৱদন্তি – ‘‘এতে খো, ভন্তে, অম্হে ন জানন্তি – ‘কে ৱা ইমে কস্স ৱা’তি. সচে, ভন্তে, অয্যো দাপেয্য আনেয্যাম মযং তং কুমাৰিকং ইমস্স কুমাৰকস্সা’’তি. কুমাৰিকায মাতাপিতূনং সন্তিকে কুমাৰকস্স ৱণ্ণং ভণতি – ‘‘অমুকস্স কুলস্স কুমাৰকো অভিৰূপো দস্সনীযো পাসাদিকো পণ্ডিতো ব্যত্তো মেধাৱী দক্খো অনলসো. ছন্নাযং কুমাৰিকা তস্স কুমাৰকস্সা’’তি [ছন্নো সো কুমাৰকো ইমিস্সা কুমাৰিকাযাতি (স্যা.)]. তে এৱং ৱদন্তি – ‘‘এতে খো, ভন্তে, অম্হে ন জানন্তি – ‘কে ৱা ইমে কস্স ৱা’তি, কিস্মিং ৱিয কুমাৰিকায ৱত্তুং. সচে, ভন্তে, অয্যো যাচাপেয্য দজ্জেয্যাম মযং ইমং কুমাৰিকং তস্স কুমাৰকস্সা’’তি. এতেনেৱ উপাযেন আৱাহানিপি কাৰাপেতি, ৱিৱাহানিপি কাৰাপেতি, ৱাৰেয্যানিপি কাৰাপেতি.

২৯৭. তেন খো পন সমযেন অঞ্ঞতৰিস্সা পুৰাণগণকিযা ধীতা অভিৰূপা হোতি দস্সনীযা পাসাদিকা. তিৰোগামকা আজীৱকসাৱকা আগন্ত্ৱা তং গণকিং এতদৱোচুং – ‘‘দেহায্যে, ইমং কুমাৰিকং অম্হাকং কুমাৰকস্সা’’তি. সা এৱমাহ – ‘‘অহং খ্ৱয্যো [খ্ৱয্যা (স্যা.), খ্ৱায্যো (ক.)] তুম্হে ন জানামি – ‘কে ৱা ইমে কস্স ৱা’তি. অযঞ্চ মে একধীতিকা, তিৰোগামো চ গন্তব্বো, নাহং দস্সামী’’তি. মনুস্সা তে আজীৱকসাৱকে এতদৱোচুং – ‘‘কিস্স তুম্হে, অয্যো, আগতত্থা’’তি? ‘‘ইধ মযং, অয্যো, অমুকং নাম গণকিং ধীতৰং যাচিম্হা অম্হাকং কুমাৰকস্স. সা এৱমাহ – ‘অহং, খ্ৱয্যো তুম্হে ন জানামি – কে ৱা ইমে কস্স ৱা’তি. অযঞ্চ মে একধীতিকা, তিৰোগামো চ গন্তব্বো, নাহং দস্সামী’’তি. ‘‘কিস্স তুম্হে, অয্যো, তং গণকিং ধীতৰং যাচিত্থ? ননু অয্যো উদাযী ৱত্তব্বো. অয্যো উদাযী দাপেস্সতী’’তি.

অথ খো তে আজীৱকসাৱকা যেনাযস্মা উদাযী তেনুপসঙ্কমিংসু; উপসঙ্কমিত্ৱা আযস্মন্তং উদাযিং এতদৱোচুং – ‘‘ইধ মযং, ভন্তে, অমুকং নাম গণকিং ধীতৰং যাচিম্হা অম্হাকং কুমাৰকস্স. সা এৱমাহ – ‘অহং খ্ৱয্যো তুম্হে ন জানামি – কে ৱা ইমে কস্স ৱাতি. অযঞ্চ মে একধীতিকা, তিৰোগামো চ গন্তব্বো, নাহং দস্সামী’তি. সাধু, ভন্তে, অয্যো তং গণকিং ধীতৰং দাপেতু অম্হাকং কুমাৰকস্সা’’তি. অথ খো আযস্মা উদাযী যেন সা গণকী তেনুপসঙ্কমি; উপসঙ্কমিত্ৱা তং গণকিং এতদৱোচ – ‘‘কিস্সিমেসং ধীতৰং ন দেসী’’তি? ‘‘অহং খ্ৱয্য, ইমে ন জানামি – ‘কে ৱা ইমে কস্স ৱা’তি. অযঞ্চ মে একধীতিকা, তিৰোগামো চ গন্তব্বো, নাহং দস্সামী’’তি. ‘‘দেহিমেসং. অহং ইমে জানামী’’তি. ‘‘সচে, ভন্তে, অয্যো জানাতি, দস্সামী’’তি. অথ খো সা গণকী তেসং আজীৱকসাৱকানং ধীতৰং অদাসি. অথ খো তে আজীৱকসাৱকা তং কুমাৰিকং নেত্ৱা মাসংযেৱ সুণিসভোগেন ভুঞ্জিংসু. ততো অপৰেন দাসিভোগেন ভুঞ্জন্তি.

অথ খো সা কুমাৰিকা মাতুযা সন্তিকে দূতং পাহেসি – ‘‘অহম্হি দুগ্গতা দুক্খিতা, ন সুখং লভামি. মাসংযেৱ মং সুণিসভোগেন ভুঞ্জিংসু. ততো অপৰেন দাসিভোগেন ভুঞ্জন্তি. আগচ্ছতু মে মাতা, মং নেস্সতূ’’তি. অথ খো সা গণকী যেন তে আজীৱকসাৱকা তেনুপসঙ্কমি; উপসঙ্কমিত্ৱা তে আজীৱকসাৱকে এতদৱোচ – ‘‘মায্যো, ইমং কুমাৰিকং দাসিভোগেন ভুঞ্জিত্থ. সুণিসভোগেন ইমং কুমাৰিকং ভুঞ্জথা’’তি. তে এৱমাহংসু – ‘‘নত্থম্হাকং তযা সদ্ধিং আহাৰূপহাৰো, সমণেন সদ্ধিং অম্হাকং আহাৰূপহাৰো. গচ্ছ ত্ৱং. ন মযং তং জানামা’’তি. অথ খো সা গণকী তেহি আজীৱকসাৱকেহি অপসাদিতা পুনদেৱ সাৱত্থিং পচ্চাগঞ্ছি. দুতিযম্পি খো সা কুমাৰিকা মাতুযা সন্তিকে দূতং পাহেসি – ‘‘অহম্হি দুগ্গতা দুক্খিতা, ন সুখং লভামি. মাসংযেৱ মং সুণিসভোগেন ভুঞ্জিংসু. ততো অপৰেন দাসিভোগেন ভুঞ্জন্তি. আগচ্ছতু মে মাতা, মং নেস্সতূ’’তি. অথ খো সা গণকী যেনাযস্মা উদাযী তেনুপসঙ্কমি; উপসঙ্কমিত্ৱা আযস্মন্তং উদাযিং এতদৱোচ – ‘‘সা কিৰ, ভন্তে, কুমাৰিকা দুগ্গতা দুক্খিতা, ন সুখং লভতি. মাসংযেৱ নং সুণিসভোগেন ভুঞ্জিংসু. ততো অপৰেন দাসিভোগেন ভুঞ্জন্তি. ৱদেয্যাথ, ভন্তে – ‘মায্যো, ইমং কুমাৰিকং দাসিভোগেন ভুঞ্জিত্থ. সুণিসভোগেন ইমং কুমাৰিকং ভুঞ্জিথা’’’তি.

অথ খো আযস্মা উদাযী যেন তে আজীৱকসাৱকা তেনুপসঙ্কমি; উপসঙ্কমিত্ৱা তে আজীৱকসাৱকে এতদৱোচ – ‘‘মায্যো, ইমং কুমাৰিকং দাসিভোগেন ভুজ্জিত্থ. সুণিসভোগেন ইমং কুমাৰিকং ভুঞ্জথা’’তি. তে এৱমাহংসু – ‘‘নত্থম্হাকং তযা সদ্ধিং আহাৰূপহাৰো, গণকিযা সদ্ধিং অম্হাকং আহাৰূপহাৰো. সমণেন ভৱিতব্বং অব্যাৱটেন. সমণো অস্স সুসমণো, গচ্ছ ত্ৱং, ন মযং তং জানামা’’তি. অথ খো আযস্মা উদাযী তেহি আজীৱকসাৱকেহি অপসাদিতো পুনদেৱ সাৱত্থিং পচ্চাগঞ্ছি. ততিযম্পি খো সা কুমাৰিকা মাতুযা সন্তিকে দূতং পাহেসি – ‘‘অহম্হি দুগ্গতা দুক্খিতা, ন সুখং লভামি. মাসংযেৱ মং সুণিসভোগেন ভুঞ্জিংসু. ততো অপৰেন দাসিভোগেন ভুঞ্জন্তি. আগচ্ছতু মে মাতা, মং নেস্সতূ’’তি. দুতিযম্পি খো সা গণকী যেনাযস্মা উদাযী তেনুপসঙ্কমি; উপসঙ্কমিত্ৱা আযস্মন্তং উদাযিং এতদৱোচ – ‘‘সা কিৰ, ভন্তে, কুমাৰিকা দুগ্গতা দুক্খিতা, ন সুখং লভতি. মাসংযেৱ নং সুণিসভোগেন ভুঞ্জিংসু. ততো অপৰেন দাসিভোগেন ভুঞ্জন্তি. ৱদেয্যাথ, ভন্তে – ‘মায্যো, ইমং কুমাৰিকং দাসিভোগেন ভুঞ্জিত্থ, সুণিসভোগেন ইমং কুমাৰিকং ভুঞ্জথা’’’তি. ‘‘পঠমংপাহং তেহি আজীৱকসাৱকেহি অপসাদিতো. গচ্ছ ত্ৱং. নাহং গমিস্সামী’’তি.

২৯৮. অথ খো সা গণকী উজ্ঝাযতি খিয্যতি ৱিপাচেতি – ‘‘এৱং দুগ্গতো হোতু অয্যো উদাযী, এৱং দুক্খিতো হোতু অয্যো উদাযী, এৱং মা সুখং লভতু অয্যো উদাযী, যথা মে কুমাৰিকা দুগ্গতা দুক্খিতা ন সুখং লভতি পাপিকায সস্সুযা পাপকেন সসুৰেন পাপকেন সামিকেনা’’তি. সাপি খো কুমাৰিকা উজ্ঝাযতি খিয্যতি ৱিপাচেতি – ‘‘এৱং দুগ্গতো হোতু অয্যো উদাযী, এৱং দুক্খিতো হোতু অয্যো উদাযী, এৱং মা সুখং লভতু অয্যো উদাযী, যথাহং দুগ্গতা দুক্খিতা ন সুখং লভামি পাপিকায সস্সুযা পাপকেন সসুৰেন পাপকেন সামিকেনা’’তি. অঞ্ঞাপি ইত্থিযো অসন্তুট্ঠা সস্সূহি ৱা সসুৰেহি ৱা সামিকেহি ৱা, তা এৱং ওযাচন্তি – ‘‘এৱং দুগ্গতো হোতু অয্যো উদাযী, এৱং দুক্খিতো হোতু অয্যো উদাযী, এৱং মা সুখং লভতু অয্যো উদাযী, যথা মযং দুগ্গতা দুক্খিতা ন সুখং লভাম পাপিকাহি সস্সূহি পাপকেহি সসুৰেহি পাপকেহি সামিকেহী’’তি. যা পন তা ইত্থিযো সন্তুট্ঠা সস্সূহি ৱা সসুৰেহি ৱা সামিকেহি ৱা তা এৱং আযাচন্তি – ‘‘এৱং সুখিতো হোতু অয্যো উদাযী, এৱং সজ্জিতো হোতু অয্যো উদাযী, এৱং সুখমেধো [সুখমেধিতো (সী. ক.)] হোতু অয্যো উদাযী, যথা মযং সুখিতা সজ্জিতা সুখমেধা ভদ্দিকাহি সস্সূহি ভদ্দকেহি সসুৰেহি ভদ্দকেহি সামিকেহী’’তি.

অস্সোসুং খো ভিক্খূ একচ্চানং ইত্থীনং ওযাচন্তীনং একচ্চানং ইত্থীনং আযাচন্তীনং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উদাযী সঞ্চৰিত্তং সমাপজ্জিস্সতী’’তি! অথ খো তে ভিক্খূ আযস্মন্তং উদাযিং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা আযস্মন্তং উদাযিং পটিপুচ্ছি – ‘‘সচ্চং কিৰ ত্ৱং, উদাযি, সঞ্চৰিত্তং সমাপজ্জসী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, সঞ্চৰিত্তং সমাপজ্জসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

২৯৯. ‘‘যো পন ভিক্খু সঞ্চৰিত্তং সমাপজ্জেয্য, ইত্থিযা ৱা পুৰিসমতিং পুৰিসস্স ৱা ইত্থিমতিং, জাযত্তনে ৱা জাৰত্তনে ৱা, সঙ্ঘাদিসেসো’’তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

৩০০. তেন খো পন সমযেন সম্বহুলা ধুত্তা উয্যানে পৰিচাৰেন্তা অঞ্ঞতৰিস্সা ৱেসিযা সন্তিকে দূতং পাহেসুং – ‘‘আগচ্ছতু উয্যানে, পৰিচাৰেস্সামা’’তি. সা এৱমাহ – ‘‘অহং খ্ৱয্যো তুম্হে ন জানামি – ‘কে ৱা ইমে কস্স ৱা’তি. অহঞ্চম্হি বহুভণ্ডা বহুপৰিক্খাৰা, বহিনগৰঞ্চ গন্তব্বং. নাহং গমিস্সামী’’তি. অথ খো সো দূতো তেসং ধুত্তানং এতমত্থং আৰোচেসি. এৱং ৱুত্তে, অঞ্ঞতৰো পুৰিসো তে ধুত্তে এতদৱোচ – ‘‘কিস্স তুম্হে অয্যো এতং ৱেসিং যাচিত্থ? ননু অয্যো উদাযী ৱত্তব্বো! অয্যো উদাযী উয্যোজেস্সতী’’তি. এৱং ৱুত্তে, অঞ্ঞতৰো উপাসকো তং পুৰিসং এতদৱোচ – ‘‘মায্যো এৱং অৱচ. ন কপ্পতি সমণানং সক্যপুত্তিযানং এৱৰূপং কাতুং. নায্যো উদাযী এৱং কৰিস্সতী’’তি. এৱং ৱুত্তে, ‘‘কৰিস্সতি ন কৰিস্সতী’’তি অব্ভুতমকংসু. অথ খো তে ধুত্তা যেনাযস্মা উদাযী তেনুপসঙ্কমিংসু; উপসঙ্কমিত্ৱা আযস্মন্তং উদাযিং এতদৱোচুং – ‘‘ইধ মযং, ভন্তে, উয্যানে পৰিচাৰেন্তা অসুকায নাম ৱেসিযা সন্তিকে দূতং পহিণিম্হা – ‘আগচ্ছতু উয্যানে, পৰিচাৰেস্সামা’তি. সা এৱমাহ – ‘অহং খ্ৱয্যো তুম্হে ন জানামি – কে ৱা ইমে কস্স ৱাতি, অহঞ্চম্হি বহুভণ্ডা বহুপৰিক্খাৰা, বহিনগৰঞ্চ গন্তব্বং. নাহং গমিস্সামী’তি. সাধু, ভন্তে, অয্যো তং ৱসিং উয্যোজেতূ’’তি.

অথ খো আযস্মা উদাযী যেন সা ৱেসী তেনুপসঙ্কমি; উপসঙ্কমিত্ৱা তং ৱেসিং এতদৱোচ – ‘‘কিস্সিমেসং ন গচ্ছসী’’তি? ‘‘অহং খ্ৱয্য ইমে ন জানামি – ‘কে ৱা ইমে কস্স ৱা’তি. অহঞ্চম্হি বহুভণ্ডা বহুপৰিক্খাৰা, বহিনগৰঞ্চ গন্তব্বং. নাহং গমিস্সামী’’তি. ‘‘গচ্ছিমেসং. অহং ইমে জানামী’’তি. ‘‘সচে, ভন্তে, অয্যো জানাতি অহং গমিস্সামী’’তি. অথ খো তে ধুত্তা তং ৱেসিং আদায উয্যানং অগমংসু. অথ খো সো উপাসকো উজ্ঝাযতি খিয্যতি ৱিপাচেতি – ‘‘কথঞ্হি নাম অয্যো উদাযী তঙ্খণিকং সঞ্চৰিত্তং সমাপজ্জিস্সতী’’তি. অস্সোসুং খো ভিক্খূ তস্স উপাসকস্স উজ্ঝাযন্তস্স খিয্যন্তস্স ৱিপাচেন্তস্স. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উদাযী তঙ্খণিকং সঞ্চৰিত্তং সমাপজ্জিস্সতী’’তি! অথ খো তে ভিক্খূ আযস্মন্তং উদাযিং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ ত্ৱং, উদাযি, তঙ্খণিকং সঞ্চৰিত্তং সমাপজ্জসী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… ‘‘কথঞ্হি নাম ত্ৱং, মোঘপুৰিস, তঙ্খণিকং সঞ্চৰিত্তং সমাপজ্জিস্সসি? নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৩০১. ‘‘যো পন ভিক্খু সঞ্চৰিত্তং সমাপজ্জেয্য, ইত্থিযা ৱা পুৰিসমতিং পুৰিসস্স ৱা ইত্থিমতিং, জাযত্তনে ৱা জাৰত্তনে ৱা, অন্তমসো তঙ্খণিকাযপি, সঙ্ঘাদিসেসো’’তি.

৩০২. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

সঞ্চৰিত্তং সমাপজ্জেয্যাতি ইত্থিযা ৱা পহিতো পুৰিসস্স সন্তিকে গচ্ছতি, পুৰিসেন ৱা পহিতো ইত্থিযা সন্তিকে গচ্ছতি.

ইত্থিযা ৱা পুৰিসমতিন্তি পুৰিসস্স মতিং ইত্থিযা আৰোচেতি.

পুৰিসস্স ৱা ইত্থিমতিন্তি ইত্থিযা মতিং পুৰিসস্স আৰোচেতি.

জাযত্তনে ৱাতি জাযা ভৱিস্সসি.

জাৰত্তনে ৱাতি জাৰী ভৱিস্সসি.

অন্তমসো তঙ্খণিকাযপীতি মুহুত্তিকা ভৱিস্সসি.

সঙ্ঘাদিসেসোতি…পে… তেনপি ৱুচ্চতি সঙ্ঘাদিসেসোতি.

৩০৩. দস ইত্থিযো – মাতুৰক্খিতা পিতুৰক্খিতা মাতাপিতুৰক্খিতা ভাতুৰক্খিতা ভগিনিৰক্খিতা ঞাতিৰক্খিতা গোত্তৰক্খিতা ধম্মৰক্খিতা সাৰক্খা সপৰিদণ্ডা.

দস ভৰিযাযো – ধনক্কীতা ছন্দৱাসিনী ভোগৱাসিনী পটৱাসিনী ওদপত্তকিনী ওভটচুম্বটা দাসী চ ভৰিযা চ কম্মকাৰী চ ভৰিযা চ ধজাহটা মুহুত্তিকা.

৩০৪. মাতুৰক্খিতা নাম মাতা ৰক্খতি গোপেতি ইস্সৰিযং কাৰেতি ৱসং ৱত্তেতি.

পিতুৰক্খিতা নাম পিতা ৰক্খতি গোপেতি ইস্সৰিযং কাৰেতি ৱসং ৱত্তেতি.

মাতাপিতুৰক্খিতা নাম মাতাপিতৰো ৰক্খন্তি গোপেন্তি ইস্সৰিযং কাৰেন্তি ৱসং ৱত্তেন্তি.

ভাতুৰক্খিতা নাম ভাতা ৰক্খতি গোপেতি ইস্সৰিযং কাৰেতি ৱসং ৱত্তেতি.

ভগিনিৰক্খিতা নাম ভগিনী ৰক্খতি গোপেতি ইস্সৰিযং কাৰেতি ৱসং ৱত্তেতি.

ঞাতিৰক্খিতা নাম ঞাতকা ৰক্খন্তি গোপেন্তি ইস্সৰিযং কাৰেন্তি ৱসং ৱত্তেন্তি.

গোত্তৰক্খিতা নাম সগোত্তা ৰক্খন্তি গোপেন্তি ইস্সৰিযং কাৰেন্তি ৱসং ৱত্তেন্তি.

ধম্মৰক্খিতা নাম সহধম্মিকা ৰক্খন্তি গোপেন্তি ইস্সৰিযং কাৰেন্তি ৱসং ৱত্তেন্তি.

সাৰক্খা নাম গব্ভেপি পৰিগ্গহিতা হোতি – ময্হং এসাতি. অন্তমসো মালাগুড়পৰিক্খিত্তাপি.

সপৰিদণ্ডা নাম কেহিচি দণ্ডো ঠপিতো হোতি – যো ইত্থন্নামং ইত্থিং গচ্ছতি এত্তকো দণ্ডোতি.

ধনক্কীতা নাম ধনেন কিণিত্ৱা ৱাসেতি.

ছন্দৱাসিনী নাম পিযো পিযং ৱাসেতি.

ভোগৱাসিনী নাম ভোগং দত্ৱা ৱাসেতি.

পটৱাসিনী নাম পটং দত্ৱা ৱাসেতি.

ওদপত্তকিনী নাম উদকপত্তং আমসিত্ৱা ৱাসেতি.

ওভটচুম্বটা নাম চুম্বটং ওৰোপেত্ৱা ৱাসেতি.

দাসী নাম দাসী চেৱ হোতি ভৰিযা চ.

কম্মকাৰী নাম কম্মকাৰী চেৱ হোতি ভৰিযা চ.

ধজাহটা নাম কৰমৰানীতা ৱুচ্চতি.

মুহুত্তিকা নাম তঙ্খণিকা ৱুচ্চতি.

৩০৫. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতং ব্ৰূহি – ‘হোহি কিৰ ইত্থন্নামস্স ভৰিযা ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুৰক্খিতং ব্ৰূহি…পে… মাতাপিতুৰক্খিতং ব্ৰূহি… ভাতুৰক্খিতং ব্ৰূহি… ভগিনিৰক্খিতং ব্ৰূহি… ঞাতিৰক্খিতং ব্ৰূহি… গোত্তৰক্খিতং ব্ৰূহি… ধম্মৰক্খিতং ব্ৰূহি… সাৰক্খং ব্ৰূহি… সপৰিদণ্ডং ব্ৰূহি – ‘হোহি কিৰ ইত্থন্নামস্স ভৰিযা ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

নিক্খেপপদানি.

৩০৬. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতঞ্চ পিতুৰক্খিতঞ্চ ব্ৰূহি – ‘হোথ কিৰ ইত্থন্নামস্স ভৰিযাযো ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতঞ্চ মাতাপিতুৰঅখতঞ্চ…পে…

মাতুৰক্খিতঞ্চ ভাতুৰক্খিতঞ্চ… মাতুৰক্খিতঞ্চ ভগিনিৰক্খিতঞ্চ… মাতুৰক্খিতঞ্চ ঞাতিৰক্খিতঞ্চ… মাতুৰক্খিতঞ্চ গোত্তৰক্খিতঞ্চ… মাতুৰক্খিতঞ্চ ধম্মৰক্খিতঞ্চ… মাতুৰক্খিতঞ্চ সাৰক্খঞ্চ… মাতুৰক্খিতঞ্চ সপৰিদণ্ডঞ্চ ব্ৰূহি – ‘হোথ কিৰ ইত্থন্নামস্স ভৰিযাযো ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

খণ্ডচক্কং.

৩০৭. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুৰক্খিতঞ্চ মাতাপিতুৰক্খিতঞ্চ ব্ৰূহি – ‘হোথ কিৰ ইত্থন্নামস্স ভৰিযাযো ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুৰক্খিতঞ্চ ভাতুৰক্খিতঞ্চ…পে… পিতুৰক্খিতঞ্চ ভগিনিৰক্খিতঞ্চ… পিতুৰক্খিতঞ্চ ঞাতিৰক্খিতঞ্চ… পিতুৰক্খিতঞ্চ গোত্তৰক্খিতঞ্চ… পিতুৰক্খিতঞ্চ ধম্মৰক্খিতঞ্চ… পিতুৰক্খিতঞ্চ সাৰক্খঞ্চ… পিতুৰক্খিতঞ্চ সপৰিদণ্ডঞ্চ ব্ৰূহি – ‘হোথ কিৰ ইত্থন্নামস্স ভৰিযাযো ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুৰক্খিতঞ্চ মাতুৰক্খিতঞ্চ ব্ৰূহি – ‘হোথ কিৰ ইত্থন্নামস্স ভৰিযাযো ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

বদ্ধচক্কং মূলং সংখিত্তং.

৩০৮. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপৰিদণ্ডঞ্চ মাতুৰক্খিতঞ্চ ব্ৰূহি – ‘হোথ কিৰ ইত্থন্নামস্স ভৰিযাযো ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপৰিদণ্ডঞ্চ পিতুৰঅখতঞ্চ…পে…

সপৰিদণ্ডঞ্চ মাতাপিতুৰক্খিতঞ্চ… সপৰিদণ্ডঞ্চ ভাতুৰক্খিতঞ্চ… সপৰিদণ্ডঞ্চ ভগিনিৰক্খিতঞ্চ… সপৰিদণ্ডঞ্চ ঞাতিৰক্খিতঞ্চ… সপৰিদণ্ডঞ্চ গোত্তৰক্খিতঞ্চ… সপৰিদণ্ডঞ্চ ধম্মৰক্খিতঞ্চ… সপৰিদণ্ডঞ্চ সাৰক্খঞ্চ ব্ৰূহি – ‘হোথ কিৰ ইত্থন্নামস্স ভৰিযাযো ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

একমূলকং নিট্ঠিতং.

এৱং দুমূলকম্পি তিমূলকম্পি যাৱ নৱমূলকং কাতব্বং.

ইদং দসমূলকং

৩০৯. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতঞ্চ পিতুৰক্খিতঞ্চ মাতাপিতুৰক্খিতঞ্চ ভাতুৰক্খিতঞ্চ ভগিনিৰক্খিতঞ্চ ঞাতিৰক্খিতঞ্চ গোত্তৰক্খিতঞ্চ ধম্মৰক্খিতঞ্চ সাৰক্খঞ্চ সপৰিদণ্ডঞ্চ ব্ৰূহি – ‘হোথ কিৰ ইত্থন্নামস্স ভৰিযাযো ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

ধনক্কীতাচক্কং নিট্ঠিতং.

৩১০. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতং ব্ৰূহি – ‘হোহি কিৰ ইত্থন্নামস্স ভৰিযা ছন্দৱাসিনী…পে… ভোগৱাসিনী… পটৱাসিনী… ওদপত্তকিনী… ওভটচুম্বটা… দাসী চ ভৰিযা চ… কম্মকাৰী চ ভৰিযা চ… ধজাহটা… মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুৰক্খিতং ব্ৰূহি…পে… মাতাপিতুৰক্খিতং ব্ৰূহি… ভাতুৰক্খিতং ব্ৰূহি… ভগিনিৰক্খিতং ব্ৰূহি… ঞাতিৰক্খিতং ব্ৰূহি… গোত্তৰক্খিতং ব্ৰূহি… ধম্মৰক্খিতং ব্ৰূহি… সাৰক্খং ব্ৰূহি… সপৰিদণ্ডং ব্ৰূহি – ‘হোহি কিৰ ইত্থন্নামস্স ভৰিযা মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

নিক্খেপপদানি.

৩১১. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতঞ্চ পিতুৰক্খিতঞ্চ ব্ৰূহি – ‘হোথ কিৰ ইত্থন্নামস্স ভৰিযাযো মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতঞ্চ মাতাপিতুৰক্খিতঞ্চ…পে… মাতুৰক্খিতঞ্চ সপৰিদণ্ডঞ্চ ব্ৰূহি – ‘হোথ কিৰ ইত্থন্নামস্স ভৰিযাযো মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

খণ্ডচক্কং.

৩১২. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুৰক্খিতঞ্চ মাতাপিতুৰক্খিতঞ্চ ব্ৰূহি – ‘হোথ কিৰ ইত্থন্নামস্স ভৰিযাযো মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুৰক্খিতঞ্চ ভাতুৰক্খিতঞ্চ…পে… পিতুৰক্খিতঞ্চ সপৰিদণ্ডঞ্চ ব্ৰূহি – ‘হোথ কিৰ ইত্থন্নামস্স ভৰিযাযো মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুৰক্খিতঞ্চ মাতুৰক্খিতঞ্চ ব্ৰূহি – ‘হোথ কিৰ ইত্থন্নামস্স ভৰিযাযো মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

বদ্ধচক্কং মূলং সংখিত্তং.

৩১৩. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপৰিদণ্ডঞ্চ মাতুৰক্খিতঞ্চ ব্ৰূহি – ‘হোথ কিৰ ইত্থন্নামস্স ভৰিযাযো মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপৰিদণ্ডঞ্চ পিতুৰক্খিতঞ্চ…পে… সপৰিদণ্ডঞ্চ সাৰক্খঞ্চ ব্ৰূহি – ‘হোথ কিৰ ইত্থন্নামস্স ভৰিযাযো মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

একমূলকং নিট্ঠিতং.

দুমূলকাদীনিপি এৱমেৱ কাতব্বানি.

ইদং দসমূলকং

৩১৪. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতঞ্চ পিতুৰক্খিতঞ্চ মাতাপিতুৰক্খিতঞ্চ ভাতুৰক্খিতঞ্চ ভগিনিৰক্খিতঞ্চ ঞাতিৰক্খিতঞ্চ গোত্তৰক্খিতঞ্চ ধম্মৰক্খিতঞ্চ সাৰক্খঞ্চ সপৰিদণ্ডঞ্চ ব্ৰূহি – ‘হোথ কিৰ ইত্থন্নামস্স ভৰিযাযো মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

মুহুত্তিকাচক্কং নিট্ঠিতং.

৩১৫. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতং ব্ৰূহি – ‘হোহি কিৰ ইত্থন্নামস্স ভৰিযা ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতং ব্ৰূহি – ‘হোহি কিৰ ইত্থন্নামস্স ভৰিযা ছন্দৱাসিনী…পে… ভোগৱাসিনী… পটৱাসিনী… ওদপত্তকিনী… ওভটচুম্বটা… দাসী চ ভৰিযা চ… কম্মকাৰী চ ভৰিযা চ… ধজাহটা… মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

নিক্খেপপদানি.

৩১৬. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতং ব্ৰূহি – ‘হোহি কিৰ ইত্থন্নামস্স ভৰিযা ধনক্কীতা চ ছন্দৱাসিনী চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতং ব্ৰূহি – ‘হোহি কিৰ ইত্থন্নামস্স ভৰিযা ধনক্কীতা চ ভোগৱাসিনী চ…পে… ধনক্কীতা চ পটৱাসিনী চ… ধনক্কীতা চ ওদপত্তকিনী চ… ধনক্কীতা চ ওভটচুম্বটা চ… ধনক্কীতা চ দাসী চ ভৰিযা চ… ধনক্কীতা চ কম্মকাৰী চ ভৰিযা চ… ধনক্কীতা চ ধজাহটা চ… ধনক্কীতা চ মুহুত্তিকা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

খণ্ডচক্কং.

৩১৭. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতং ব্ৰূহি – ‘হোহি কিৰ ইত্থন্নামস্স ভৰিযা ছন্দৱাসিনী চ ভোগৱাসিনী চ…পে… ছন্দৱাসিনী চ মুহুত্তিকা চ… ছন্দৱাসিনী চ ধনক্কীতা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

বদ্ধচক্কং মূলং সংখিত্তং.

৩১৮. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতং ব্ৰূহি – ‘হোহি কিৰ ইত্থন্নামস্স ভৰিযা মুহুত্তিকা চ ধনক্কীতা চ…পে… মুহুত্তিকা চ ছন্দৱাসিনী চ…পে… মুহুত্তিকা চ ধজাহটা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

একমূলকং নিট্ঠিতং.

দুমূলকাদীনিপি এৱমেৱ কাতব্বানি.

ইদং দসমূলকং

৩১৯. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতং ব্ৰূহি – ‘হোহি কিৰ ইত্থন্নামস্স ভৰিযা ধনক্কীতা চ ছন্দৱাসিনী চ ভোগৱাসিনী চ পটৱাসিনী চ ওদপত্তকিনী চ ওভটচুম্বটা চ দাসী চ ভৰিযা চ কম্মকাৰী চ ভৰিযা চ ধজাহটা চ মুহুত্তিকা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

মাতুৰক্খিতাচক্কং নিট্ঠিতং.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুৰক্খিতং…পে… মাতাপিতুৰক্খিতং… ভাতুৰক্খিতং… ভগিনিৰক্খিতং … ঞাতিৰক্খিতং… গোত্তৰক্খিতং… ধম্মৰক্খিতং … সাৰক্খং… সপৰিদণ্ডং ব্ৰূহি – ‘হোহি কিৰ ইত্থন্নামস্স ভৰিযা ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপৰিদণ্ডং ব্ৰূহি – ‘হোহি কিৰ ইত্থন্নামস্স ভৰিযা ছন্দৱাসিনী…পে… ভোগৱাসিনী, পটৱাসিনী, ওদপত্তকিনী, ওভটচুম্বটা, দাসী চ ভৰিযা চ, কম্মকাৰী চ ভৰিযা চ, ধজাহটা, মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

নিক্খেপপদানি.

৩২০. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপৰিদণ্ডং ব্ৰূহি – ‘হোহি কিৰ ইত্থন্নামস্স ভৰিযা ধনক্কীতা চ ছন্দৱাসিনী চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপৰিদণ্ডং ব্ৰূহি – ‘হোহি কিৰ ইত্থন্নামস্স ভৰিযা ধনক্কীতা চ ভোগৱাসিনী চ…পে… ধনক্কীতা চ মুহুত্তিকা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

খণ্ডচক্কং.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপৰিদণ্ডং ব্ৰূহি – ‘হোহি কিৰ ইত্থন্নামস্স ভৰিযা ছন্দৱাসিনী চ ভোগৱাসিনী চ…পে… ছন্দৱাসিনী চ মুহুত্তিকা চ, ছন্দৱাসিনী চ ধনক্কীতা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

বদ্ধচক্কং মূলং সংখিত্তং.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপৰিদণ্ডং ব্ৰূহি – ‘হোহি কিৰ ইত্থন্নামস্স ভৰিযা মুহুত্তিকা চ ধনক্কীতা চ…পে… মুহুত্তিকা চ ছন্দৱাসিনী চ, মুহুত্তিকা চ ধজাহটা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

একমূলকং নিট্ঠিতং.

দুমূলকম্পি তিমূলকম্পি যাৱ নৱমূলকং এৱমেৱ কাতব্বং.

ইদং দসমূলকং.

৩২১. পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপৰিদণ্ডং ব্ৰূহি – ‘হোহি কিৰ ইত্থন্নামস্স ভৰিযা ধনক্কীতা চ ছন্দৱাসিনী চ ভোগৱাসিনী চ পটৱাসিনী চ ওদপত্তকিনী চ ওভটচুম্বটা চ দাসী চ ভৰিযা চ কম্মকাৰী চ ভৰিযা চ ধজাহটা চ মুহুত্তিকা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

সপৰিদণ্ডাচক্কং নিট্ঠিতং.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতং ব্ৰূহি – ‘হোহি কিৰ ইত্থন্নামস্স ভৰিযা ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতঞ্চ পিতুৰক্খিতঞ্চ ব্ৰূহি – ‘হোথ কিৰ ইত্থন্নামস্স ভৰিযাযো ধনক্কীতা চ ছন্দৱাসিনী চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতঞ্চ পিতুৰক্খিতঞ্চ মাতাপিতুৰক্খিতঞ্চ ব্ৰূহি – ‘হোথ কিৰ ইত্থন্নামস্স ভৰিযাযো ধনক্কীতা চ ছন্দৱাসিনী চ ভোগৱাসিনী চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

এৱং উভতোৱড্ঢকং কাতব্বং.

পুৰিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুৰক্খিতঞ্চ পিতুৰক্খিতঞ্চ মাতাপিতুৰক্খিতঞ্চ ভাতুৰক্খিতঞ্চ ভগিনিৰক্খিতঞ্চ ঞাতিৰক্খিতঞ্চ গোত্তৰক্খিতঞ্চ ধম্মৰক্খিতঞ্চ সাৰক্খঞ্চ সপৰিদণ্ডঞ্চ ব্ৰূহি – ‘হোথ কিৰ ইত্থন্নামস্স ভৰিযাযো ধনক্কীতা চ ছন্দৱাসিনী চ ভোগৱাসিনী চ পটৱাসিনী চ ওদপত্তকিনী চ ওভটচুম্বটা চ দাসী চ ভৰিযা চ কম্মকাৰী চ ভৰিযা চ ধজাহটা চ মুহুত্তিকা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

উভতোৱড্ঢকং নিট্ঠিতং.

পুৰিসস্স মাতা ভিক্খুং পহিণতি…পে… পুৰিসস্স পিতা ভিক্খুং পহিণতি…পে… পুৰিসস্স মাতাপিতৰো ভিক্খুং পহিণন্তি…পে… পুৰিসস্স ভাতা ভিক্খুং পহিণতি…পে… পুৰিসস্স ভগিনী ভিক্খুং পহিণতি…পে… পুৰিসস্স ঞাতকা ভিক্খুং পহিণন্তি…পে… পুৰিসস্স গোত্তা ভিক্খুং পহিণন্তি…পে… পুৰিসস্স সহধম্মিকা ভিক্খুং পহিণন্তি…পে….

পুৰিসস্স পেয্যালো ৱিত্থাৰেতব্বো.

উভতোৱড্ঢকং যথা পুৰিমনযো তথেৱ ৱিত্থাৰেতব্বং.

৩২২. মাতুৰক্খিতায মাতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোতু ইত্থন্নামস্স ভৰিযা ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

মাতুৰক্খিতায মাতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোতু ইত্থন্নামস্স ভৰিযা ছন্দৱাসিনী…পে… ভোগৱাসিনী, পটৱাসিনী, ওদপত্তকিনী, ওভটচুম্বটা, দাসী চ ভৰিযা চ, কম্মকাৰী চ ভৰিযা চ, ধজাহটা, মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

নিক্খেপপদানি.

৩২৩. মাতুৰক্খিতায মাতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোতু ইত্থন্নামস্স ভৰিযা ধনক্কীতা চ ছন্দৱাসিনী চ…পে… ধনক্কীতা চ ভোগৱাসিনী চ, ধনক্কীতা চ মুহুত্তিকা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

খণ্ডচক্কং.

৩২৪. মাতুৰক্খিতায মাতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোতু ইত্থন্নামস্স ভৰিযা ছন্দৱাসিনী চ ভোগৱাসিনী চ…পে… ছন্দৱাসিনী চ মুহুত্তিকা চ, ছন্দৱাসিনী চ ধনক্কীতা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

বদ্ধচক্কং মূলং সংখিত্তং.

৩২৫. মাতুৰক্খিতায মাতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোতু ইত্থন্নামস্স ভৰিযা মুহুত্তিকা চ ধনক্কীতা চ…পে… মুহুত্তিকা চ ছন্দৱাসিনী চ…পে… মুহুত্তিকা চ ধজাহটা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

একমূলকং নিট্ঠিতং.

দুমূলকম্পি তিমূলকম্পি যাৱ নৱমূলকং এৱমেৱ কাতব্বং.

ইদং দসমূলকং

৩২৬. মাতুৰক্খিতায মাতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোতু ইত্থন্নামস্স ভৰিযা ধনক্কীতা চ ছন্দৱাসিনী চ ভোগৱাসিনী চ পটৱাসিনী চ ওদপত্তকিনী চ ওভটচুম্বটা চ দাসী চ ভৰিযা চ কম্মকাৰী চ ভৰিযা চ ধজাহটা চ মুহুত্তিকা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

মাতুচক্কং নিট্ঠিতং.

পিতুৰক্খিতায পিতা ভিক্খুং পহিণতি…পে… মাতাপিতুৰক্খিতায মাতাপিতৰো ভিক্খুং পহিণন্তি… ভাতুৰক্খিতায ভাতা ভিক্খুং পহিণতি… ভগিনিৰক্খিতায ভগিনী ভিক্খুং পহিণতি… ঞাতিৰক্খিতায ঞাতকা ভিক্খুং পহিণন্তি… গোত্তৰক্খিতায গোত্তা [সগোত্তা (?)] ভিক্খুং পহিণন্তি… ধম্মৰক্খিতায সহধম্মিকা ভিক্খুং পহিণন্তি… সাৰক্খায যেন পৰিগ্গহিতা হোতি সো ভিক্খুং পহিণতি… সপৰিদণ্ডায যেন দণ্ডো ঠপিতো হোতি সো ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোতু ইত্থন্নামস্স ভৰিযা ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

সপৰিদণ্ডায যেন দণ্ডো ঠপিতো হোতি সো ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোতু ইত্থন্নামস্স ভৰিযা ছন্দৱাসিনী…পে… ভোগৱাসিনী… পটৱাসিনী… ওদপত্তকিনী… ওভটচুম্বটা… দাসী চ ভৰিযা চ… কম্মকাৰী চ ভৰিযা চ… ধজাহটা… মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

নিক্খেপপদানি.

৩২৭. সপৰিদণ্ডায যেন দণ্ডো ঠপিতো হোতি সো ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোতু ইত্থন্নামস্স ভৰিযা ধনক্কীতা চ ছন্দৱাসিনী চ…পে… ধনক্কীতা চ ভোগৱাসিনী চ… ধনক্কীতা চ মুহুত্তিকা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

খণ্ডচক্কং.

৩২৮. সপৰিদণ্ডায যেন দণ্ডো ঠপিতো হোতি সো ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোতু ইত্থন্নামস্স ভৰিযা ছন্দৱাসিনী চ ভোগৱাসিনী চ…পে… ছন্দৱাসিনী চ মুহুত্তিকা চ… ছন্দৱাসিনী চ ধনক্কীতা চা’’’ তি. পটিগ্গণ্হাতি ৱীমংসতি পচ্চাহৰতি আপত্তি সঙ্ঘাদিসেসস্স.

বদ্ধচক্কং মূলং সংখিত্তং.

৩২৯. সপৰিদণ্ডায যেন দণ্ডো, ঠপিতো হোতি সো ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোতু ইত্থন্নামস্স ভৰিযা মুহুত্তিকা চ ধনক্কীতা চ…পে… মুহুত্তিকা চ ছন্দৱাসিনী চ…পে… মুহুত্তিকা চ ধজাহটা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

একমূলকং নিট্ঠিতং.

দুমূলকম্পি তিমূলকম্পি যাৱ নৱমূলকং এৱমেৱ কাতব্বং.

ইদং দসমূলকং

৩৩০. সপৰিদণ্ডায যেন দণ্ডো ঠপিতো হোতি সো ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোতু ইত্থন্নামস্স ভৰিযা ধনক্কীতা চ ছন্দৱাসিনী চ ভোগৱাসিনী চ পটৱাসিনী চ ওদপত্তকিনী চ ওভটচুম্বটা চ দাসী চ ভৰিযা চ কম্মকাৰী চ ভৰিযা চ ধজাহটা চ মুহুত্তিকা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

দণ্ডঠপিতচক্কং নিট্ঠিতং.

মাতুৰক্খিতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোমি ইত্থন্নামস্স ভৰিযা ধনক্কীতা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

মাতুৰক্খিতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোমি ইত্থন্নামস্স ভৰিযা ছন্দৱাসিনী…পে… ভোগৱাসিনী… পটৱাসিনী… ওদপত্তকিনী… ওভটচুম্বটা… দাসী চ ভৰিযা চ… কম্মকাৰী চ ভৰিযা চ… ধজাহটা… মুহুত্তিকা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

নিক্খেপপদানি.

৩৩১. মাতুৰক্খিতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোমি ইত্থন্নামস্স ভৰিযা ধনক্কীতা চ ছন্দৱাসিনী চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

মাতুৰক্খিতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোমি ইত্থন্নামস্স ভৰিযা ধনক্কীতা চ ভোগৱাসিনী চ…পে… ধনক্কীতা চ পটৱাসিনী চ…পে… ধনক্কীতা চ মুহুত্তিকা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

খণ্ডচক্কং.

৩৩২. মাতুৰক্খিতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্ৰূহি – ‘হোমি ইত্থন্নামস্স ভৰিযা ছন্দৱাসিনী চ ভোগৱাসিনী চ…পে… ছন্দৱাসিনী চ মুহুত্তিকা চ… ছন্দৱাসিনী চ ধনক্কীতা চা’’’তি. পটিগ্গণ্হাতি ৱীমংসতি পচ্চাহৰতি, আপত্তি সঙ্ঘাদিসেসস্স.

বদ্ধচক্কং মূলং সংখিত্তং.