২. কাযসংসগ্গসিক্খাপদং

২৬৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মা উদাযী অৰঞ্ঞে ৱিহৰতি. তস্সাযস্মতো ৱিহাৰো অভিৰূপো হোতি দস্সনীযো পাসাদিকো, মজ্ঝেগব্ভো, সমন্তাপৰিযাগাৰো, সুপঞ্ঞত্তং মঞ্চপীঠং ভিসিবিম্বোহনং, পানীযং পৰিভোজনীযং সুপট্ঠিতং, পৰিৱেণং সুসম্মট্ঠং. বহূ মনুস্সা আযস্মতো উদাযিস্স ৱিহাৰপেক্খকা আগচ্ছন্তি. অঞ্ঞতৰোপি ব্ৰাহ্মণো সপজাপতিকো যেনাযস্মা উদাযী তেনুপসঙ্কমি; উপসঙ্কমিত্ৱা আযস্মন্তং উদাযিং এতদৱোচ – ‘‘ইচ্ছাম মযং ভোতো উদাযিস্স ৱিহাৰং পেক্খিতু’’ন্তি. ‘‘তেন হি, ব্ৰাহ্মণ, পেক্খস্সূ’’তি, অৱাপুৰণং [অপাপুৰণং (স্যা.)] আদায ঘটিকং উগ্ঘাটেত্ৱা কৱাটং পণামেত্ৱা ৱিহাৰং পাৱিসি. সোপি খো ব্ৰাহ্মণো আযস্মতো উদাযিস্স পিট্ঠিতো পাৱিসি. সাপি খো ব্ৰাহ্মণী তস্স ব্ৰাহ্মণস্স পিট্ঠিতো পাৱিসি. অথ খো আযস্মা উদাযী একচ্চে ৱাতপানে ৱিৱৰন্তো একচ্চে ৱাতপানে থকেন্তো গব্ভং অনুপৰিগন্ত্ৱা পিট্ঠিতো আগন্ত্ৱা তস্সা ব্ৰাহ্মণিযা অঙ্গমঙ্গানি পৰামসি. অথ খো সো ব্ৰাহ্মণো আযস্মতা উদাযিনা সদ্ধিং পটিসম্মোদিত্ৱা অগমাসি. অথ খো সো ব্ৰাহ্মণো অত্তমনো অত্তমনৱাচং নিচ্ছাৰেসি – ‘‘উড়াৰা ইমে সমণা সক্যপুত্তিযা যে ইমে এৱৰূপে অৰঞ্ঞে ৱিহৰন্তি. ভৱম্পি উদাযী উড়াৰো যো এৱৰূপে অৰঞ্ঞে ৱিহৰতী’’তি.

এৱং ৱুত্তে সা ব্ৰাহ্মণী তং ব্ৰাহ্মণং এতদৱোচ – ‘‘কুতো তস্স উড়াৰত্ততা! যথেৱ মে ত্ৱং অঙ্গমঙ্গানি পৰামসি এৱমেৱ মে সমণো উদাযী অঙ্গমঙ্গানি পৰামসী’’তি. অথ খো সো ব্ৰাহ্মণো উজ্ঝাযতি খিয্যতি ৱিপাচেতি – ‘‘অলজ্জিনো ইমে সমণা সক্যপুত্তিযা দুস্সীলা মুসাৱাদিনো. ইমে হি নাম ধম্মচাৰিনো সমচাৰিনো ব্ৰহ্মচাৰিনো সচ্চৱাদিনো সীলৱন্তো কল্যাণধম্মা পটিজানিস্সন্তি! নত্থি ইমেসং সামঞ্ঞং নত্থি ইমেসং ব্ৰহ্মঞ্ঞং, নট্ঠং ইমেসং সামঞ্ঞং নট্ঠং ইমেসং ব্ৰহ্মঞ্ঞং, কুতো ইমেসং সামঞ্ঞং কুতো ইমেসং ব্ৰহ্মঞ্ঞং, অপগতা ইমে সামঞ্ঞা অপগতা ইমে ব্ৰহ্মঞ্ঞা. কথঞ্হি নাম সমণো উদাযী মম ভৰিযায অঙ্গমঙ্গানি পৰামসিস্সতি! ন হি সক্কা কুলিত্থীহি কুলধীতাহি কুলকুমাৰীহি কুলসুণ্হাহি কুলদাসীহি আৰামং ৱা ৱিহাৰং ৱা গন্তুং. সচে [সচে হি (স্যা.)] কুলিত্থিযো কুলধীতৰো [কুলধীতাযো (সী. স্যা.)] কুলকুমাৰিযো কুলসুণ্হাযো কুলদাসিযো আৰামং ৱা ৱিহাৰং ৱা গচ্ছেয্যুং, তাপি সমণা সক্যপুত্তিযা দূসেয্যু’’ন্তি!

অস্সোসুং খো ভিক্খু তস্স ব্ৰাহ্মণস্স উজ্ঝাযন্তস্স খিয্যন্তস্স ৱিপাচেন্তস্স. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উদাযী মাতুগামেন সদ্ধিং কাযসংসগ্গং সমাপজ্জিস্সতী’’তি! অথ খো তে ভিক্খূ আযস্মন্তং উদাযিং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা আযস্মন্তং উদাযিং পটিপুচ্ছি – ‘‘সচ্চং কিৰ ত্ৱং, উদাযি, মাতুগামেন সদ্ধিং কাযসংসগ্গং সমাপজ্জসী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা – ‘‘অননুচ্ছৱিকং, মোঘপুৰিস, অননুলোমিকং অপ্পতিৰূপং অস্সামণকং অকপ্পিযং অকৰণীযং. কথঞ্হি নাম ত্ৱং, মোঘপুৰিস, মাতুগামেন সদ্ধিং কাযসংসগ্গং সমাপজ্জিস্সসি! ননু মযা, মোঘপুৰিস, অনেকপৰিযাযেন ৱিৰাগায ধম্মো দেসিতো নো সৰাগায…পে… কামপৰিড়াহানং ৱূপসমো অক্খাতো. নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

২৭০. ‘‘যো পন ভিক্খু ওতিণ্ণো ৱিপৰিণতেন চিত্তেন মাতুগামেন সদ্ধিং কাযসংসগ্গং সমাপজ্জেয্য হত্থগ্গাহং ৱা ৱেণিগ্গাহং ৱা অঞ্ঞতৰস্স ৱা অঞ্ঞতৰস্স ৱা অঙ্গস্স পৰামসনং, সঙ্ঘাদিসেসো’’তি.

২৭১. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ওতিণ্ণো নাম সাৰত্তো অপেক্খৱা পটিবদ্ধচিত্তো.

ৱিপৰিণতন্তি ৰত্তম্পি চিত্তং ৱিপৰিণতং. দুট্ঠম্পি চিত্তং ৱিপৰিণতং. মূড়্হম্পি চিত্তং ৱিপৰিণতং. অপিচ, ৰত্তং চিত্তং ইমস্মিং অত্থে অধিপ্পেতং ৱিপৰিণতন্তি.

মাতুগামো নাম মনুস্সিত্থী, ন যক্খী ন পেতী, ন তিৰচ্ছানগতা. অন্তমসো তদহুজাতাপি দাৰিকা, পগেৱ মহত্তৰী.

সদ্ধিন্তি একতো.

কাযসংসগ্গং সমাপজ্জেয্যাতি অজ্ঝাচাৰো ৱুচ্চতি.

হত্থো নাম কপ্পৰং উপাদাযং যাৱ অগ্গনখা.

ৱেণী নাম সুদ্ধকেসা ৱা, সুত্তমিস্সা ৱা, মালামিস্সা ৱা, হিৰঞ্ঞমিস্সা ৱা, সুৱণ্ণমিস্সা ৱা, মুত্তামিস্সা ৱা, মণিমিস্সা ৱা.

অঙ্গং নাম হত্থঞ্চ ৱেণিঞ্চ ঠপেত্ৱা অৱসেসং অঙ্গং নাম.

২৭২. আমসনা, পৰামসনা, ওমসনা, উম্মসনা, ওলঙ্ঘনা, উল্লঙ্ঘনা, আকড্ঢনা, পতিকড্ঢনা, অভিনিগ্গণ্হনা, অভিনিপ্পীড়না, গহণং, ছুপনং.

আমসনা নাম আমট্ঠমত্তা.

পৰামসনা নাম ইতোচিতো চ সংচোপনা.

ওমসনা নাম হেট্ঠা ওৰোপনা.

উম্মসনা নাম উদ্ধং উচ্চাৰণা.

ওলঙ্ঘনা নাম হেট্ঠা ওনমনা.

উল্লঙ্ঘনা নাম উদ্ধং উচ্চাৰণা.

আকড্ঢনা নাম আৱিঞ্ছনা [আৱিঞ্জনা (সী. স্যা.)].

পতিকড্ঢনা নাম পতিপ্পণামনা.

অভিনিগ্গণ্হনা নাম অঙ্গং গহেত্ৱা নিপ্পীড়না.

অভিনিপ্পীড়না নাম কেনচি সহ নিপ্পীড়না.

গহণং নাম গহিতমত্তং.

ছুপনং নাম ফুট্ঠমত্তং.

সঙ্ঘাদিসেসোতি…পে… তেনপি ৱুচ্চতি সঙ্ঘাদিসেসোতি.

২৭৩. ইত্থী চ হোতি ইত্থিসঞ্ঞী সাৰত্তো চ ভিক্খু চ. নং ইত্থিযা কাযেন কাযং আমসতি পৰামসতি ওমসতি উম্মসতি ওলঙ্ঘেতি উল্লঙ্ঘেতি আকড্ঢতি পতিকড্ঢতি অভিনিগ্গণ্হাতি অভিনিপ্পীড়েতি গণ্হাতি ছুপতি, আপত্তি সঙ্ঘাদিসেসস্স.

ইত্থী চ হোতি ৱেমতিকো সাৰত্তো চ. ভিক্খু চ নং ইত্থিযা কাযেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযস্স.

ইত্থী চ হোতি পণ্ডকসঞ্ঞী সাৰত্তো চ. ভিক্খু চ নং ইত্থিযা কাযেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযস্স.

ইত্থী চ হোতি পুৰিসসঞ্ঞী সাৰত্তো চ. ভিক্খু চ নং ইত্থিযা কাযেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযস্স.

ইত্থী চ হোতি তিৰচ্ছানগতসঞ্ঞী সাৰত্তো চ. ভিক্খু চ নং ইত্থিযা কাযেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযস্স.

পণ্ডকো চ হোতি পণ্ডকসঞ্ঞী সাৰত্তো চ. ভিক্খু চ নং পণ্ডকস্স কাযেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযস্স.

পণ্ডকো চ হোতি ৱেমতিকো সাৰত্তো চ. ভিক্খু চ নং পণ্ডকস্স কাযেন কাযং আমসতি পৰামসতি…পে… গণ্হাতি ছুপতি, আপত্তি দুক্কটস্স.

পণ্ডকো চ হোতি পুৰিসসঞ্ঞী সাৰত্তো চ. ভিক্খু চ নং পণ্ডকস্স কাযেন কাযং আমসতি পৰামসতি…পে… গণ্হাতি ছুপতি, আপত্তি দুক্কটস্স.

পণ্ডকো চ হোতি তিৰচ্ছানগতসঞ্ঞী সাৰত্তো চ. ভিক্খু চ নং পণ্ডকস্স কাযেন কাযং আমসতি পৰামসতি…পে… গণ্হাতি ছুপতি, আপত্তি দুক্কটস্স.

পণ্ডকো চ হোতি ইত্থিসঞ্ঞী সাৰত্তো চ. ভিক্খু চ নং পণ্ডকস্স কাযেন কাযং আমসতি পৰামসতি…পে… গণ্হাতি ছুপতি, আপত্তি দুক্কটস্স.

পুৰিসো চ হোতি পুৰিসসঞ্ঞী সাৰত্তো চ. ভিক্খু চ নং পুৰিসস্স কাযেন কাযং আমসতি পৰামসতি…পে… গণ্হাতি ছুপতি, আপত্তি দুক্কটস্স.

পুৰিসো চ হোতি ৱেমতিকো…পে… পুৰিসো চ হোতি তিৰচ্ছানগতসঞ্ঞী… পুৰিসো চ হোতি ইত্থিসঞ্ঞী… পুৰিসো চ হোতি পণ্ডকসঞ্ঞী সাৰত্তো চ. ভিক্খু চ নং পুৰিসস্স কাযেন কাযং আমসতি পৰামসতি…পে… গণ্হাতি ছুপতি, আপত্তি দুক্কটস্স.

তিৰচ্ছানগতো চ হোতি তিৰচ্ছানগতসঞ্ঞী সাৰত্তো চ. ভিক্খু চ নং তিৰচ্ছানগতস্স কাযেন কাযং আমসতি পৰামসতি…পে… গণ্হাতি ছুপতি, আপত্তি দুক্কটস্স.

তিৰচ্ছানগতো চ হোতি ৱেমতিকো…পে… তিৰচ্ছানগতো চ হোতি ইত্থিসঞ্ঞী… তিৰচ্ছানগতো চ হোতি পণ্ডকসঞ্ঞী… তিৰচ্ছানগতো চ হোতি. পুৰিসসঞ্ঞী সাৰত্তো চ. ভিক্খু চ নং তিৰচ্ছানগতস্স কাযেন কাযং আমসতি পৰামসতি…পে… গণ্হাতি ছুপতি, আপত্তি দুক্কটস্স.

একমূলকং নিট্ঠিতং.

২৭৪. দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ভিক্খু চ নং দ্ৱিন্নং ইত্থীনং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং সঙ্ঘাদিসেসানং.

দ্ৱে ইত্থিযো দ্ৱিন্নং ইত্থীনং ৱেমতিকো সাৰত্তো চ. ভিক্খু চ নং দ্ৱিন্নং ইত্থীনং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং থুল্লচ্চযানং.

দ্ৱে ইত্থিযো দ্ৱিন্নং ইত্থীনং পণ্ডকসঞ্ঞী…পে… পুৰিসসঞ্ঞী… তিৰচ্ছানগতসঞ্ঞী সাৰত্তো চ. ভিক্খু চ দ্ৱিন্নং ইত্থীনং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং থুল্লচ্চযানং.

দ্ৱে পণ্ডকা দ্ৱিন্নং পণ্ডকানং পণ্ডকসঞ্ঞী সাৰত্তো চ ভিক্খু চ নং দ্ৱিন্নং পণ্ডকানং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং থুল্লচ্চযানং.

দ্ৱে পণ্ডকা দ্ৱিন্নং পণ্ডকানং ৱেমতিকো…পে… পুৰিসসঞ্ঞী… তিৰচ্ছানগতসঞ্ঞী… ইত্থিসঞ্ঞী সাৰত্তো চ. ভিক্খু চ নং দ্ৱিন্নং পণ্ডকানং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং দুক্কটানং.

দ্ৱে পুৰিসা দ্ৱিন্নং পুৰিসানং পুৰিসসঞ্ঞী সাৰত্তো চ ভিক্খু চ নং দ্ৱিন্নং পুৰিসানং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং দুক্কটানং.

দ্ৱে পুৰিসা দ্ৱিন্নং পুৰিসানং ৱেমতিকো…পে… তিৰচ্ছানগতসঞ্ঞী… ইত্থিসঞ্ঞী… পণ্ডকসঞ্ঞী সাৰত্তো চ. ভিক্খু চ নং দ্ৱিন্নং পুৰিসানং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং দুক্কটানং.

দ্ৱে তিৰচ্ছানগতা দ্ৱিন্নং তিৰচ্ছানগতানং তিৰচ্ছানগতসঞ্ঞী সাৰত্তো চ. ভিক্খু চ নং দ্ৱিন্নং তিৰচ্ছানগতানং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং দুক্কটানং.

দ্ৱে তিৰচ্ছানগতা দ্ৱিন্নং তিৰচ্ছানগতানং ৱেমতিকো…পে… ইত্থিসঞ্ঞী… পণ্ডকসঞ্ঞী … পুৰিসসঞ্ঞী সাৰত্তো চ. ভিক্খু চ নং দ্ৱিন্নং তিৰচ্ছানগতানং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং দুক্কটানং.

২৭৫. ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি সঙ্ঘাদিসেসেন দুক্কটস্স.

ইত্থী চ পণ্ডকো চ উভিন্নং ৱেমতিকো সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযেন দুক্কটস্স.

ইত্থী চ পণ্ডকো চ উভিন্নং পণ্ডকসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং থুল্লচ্চযানং.

ইত্থী চ পণ্ডকো চ উভিন্নং পুৰিসসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযেন দুক্কটস্স.

ইত্থী চ পণ্ডকো চ উভিন্নং তিৰচ্ছানগতসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযেন দুক্কটস্স.

ইত্থী চ পুৰিসো চ উভিন্নং ইত্থিসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি সঙ্ঘাদিসেসেন দুক্কটস্স.

ইত্থী চ পুৰিসো চ উভিন্নং ৱেমতিকো…পে… পণ্ডকসঞ্ঞী… পুৰিসসঞ্ঞী… তিৰচ্ছানগতসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযেন দুক্কটস্স.

ইত্থী চ তিৰচ্ছানগতো চ উভিন্নং ইত্থিসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি সঙ্ঘাদিসেসেন দুক্কটস্স.

ইত্থী চ তিৰচ্ছানগতো চ উভিন্নং ৱেমতিকো…পে… পণ্ডকসঞ্ঞী… পুৰিসসঞ্ঞী … তিৰচ্ছানগতসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযেন দুক্কটস্স.

পণ্ডকো চ পুৰিসো চ উভিন্নং পণ্ডকসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযেন দুক্কটস্স.

পণ্ডকো চ পুৰিসো চ উভিন্নং ৱেমতিকো…পে… পুৰিসসঞ্ঞী… তিৰচ্ছানগতসঞ্ঞী… ইত্থিসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং দুক্কটানং.

পণ্ডকো চ তিৰচ্ছানগতো চ উভিন্নং পণ্ডকসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযেন দুক্কটস্স.

পণ্ডকো চ তিৰচ্ছানগতো চ উভিন্নং ৱেমতিকো…পে… পুৰিসসঞ্ঞী… তিৰচ্ছানগতসঞ্ঞী… ইত্থিসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং দুক্কটানং.

পুৰিসো চ তিৰচ্ছানগতো চ উভিন্নং পুৰিসসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং দুক্কটানং.

পুৰিসো চ তিৰচ্ছানগতো চ উভিন্নং ৱেমতিকো…পে… তিৰচ্ছানগতসঞ্ঞী… ইত্থিসঞ্ঞী… পণ্ডকসঞ্ঞী সাৰত্তো চ. ভিক্খু চ নং উভিন্নং কাযেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং দুক্কটানং.

দুমূলকং নিট্ঠিতং.

২৭৬. ইত্থী চ হোতি ইত্থিসঞ্ঞী সাৰত্তো চ. ভিক্খু চ নং ইত্থিযা কাযেন কাযপটিবদ্ধং আমসতি পৰামসতি…পে… গণ্হাতি ছুপতি, আপত্তি থুল্লচ্চযস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ভিক্খু চ নং দ্ৱিন্নং ইত্থীনং কাযেন কাযপটিবদ্ধং আমসতি পৰামসতি…পে… গণ্হাতি ছুপতি, আপত্তি দ্ৱিন্নং থুল্লচ্চযানং …পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. ভিক্খু চ নং উভিন্নং কাযেন কাযপটিবদ্ধং আমসতি পৰামসতি…পে… গণ্হাতি ছুপতি, আপত্তি থুল্লচ্চযেন দুক্কটস্স…পে….

ইত্থী চ হোতি ইত্থিসঞ্ঞী সাৰত্তো চ. ভিক্খু চ নং ইত্থিযা কাযপটিবদ্ধেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ভিক্খু চ নং দ্ৱিন্নং ইত্থীনং কাযপটিবদ্ধেন কাযং আমসতি পৰামসতি…পে… গণ্হাতি ছুপতি, আপত্তি দ্ৱিন্নং থুল্লচ্চযানং…পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. ভিক্খু চ নং উভিন্নং কাযপটিবদ্ধেন কাযং আমসতি পৰামসতি…পে… গণ্হাতি ছুপতি, আপত্তি থুল্লচ্চযেন দুক্কটস্স…পে….

ইত্থী চ হোতি ইত্থিসঞ্ঞী সাৰত্তো চ. ভিক্খু চ নং ইত্থিযা কাযপটিবদ্ধেন কাযপটিবদ্ধং আমসতি পৰামসতি…পে… গণ্হাতি ছুপতি, আপত্তি দুক্কটস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ভিক্খু চ নং দ্ৱিন্নং ইত্থীনং কাযপটিবদ্ধেন কাযপটিবদ্ধং আমসতি পৰামসতি…পে… গণ্হাতি ছুপতি, আপত্তি দ্ৱিন্নং দুক্কটানং…পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. ভিক্খু চ নং উভিন্নং কাযপটিবদ্ধেন কাযপটিবদ্ধং আমসতি পৰামসতি…পে… গণ্হাতি ছুপতি, আপত্তি দ্ৱিন্নং দুক্কটানং…পে….

ইত্থী চ হোতি ইত্থিসঞ্ঞী সাৰত্তো চ. ভিক্খু চ নং ইত্থিযা নিস্সগ্গিযেন কাযং আমসতি আপত্তি দুক্কটস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ভিক্খু চ নং দ্ৱিন্নং ইত্থীনং নিস্সগ্গিযেন কাযং আমসতি, আপত্তি দ্ৱিন্নং দুক্কটানং…পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. ভিক্খু চ নং উভিন্নং নিস্সগ্গিযেন কাযং আমসতি, আপত্তি দ্ৱিন্নং দুক্কটানং…পে….

ইত্থী চ হোতি ইত্থিসঞ্ঞী সাৰত্তো চ. ভিক্খু চ নং ইত্থিযা নিস্সগ্গিযেন কাযপটিবদ্ধং আমসতি, আপত্তি দুক্কটস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ভিক্খু চ নং দ্ৱিন্নং ইত্থীনং নিস্সগ্গিযেন কাযপটিবদ্ধং আমসতি, আপত্তি দ্ৱিন্নং দুক্কটানং…পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. ভিক্খু চ নং উভিন্নং নিস্সগ্গিযেন কাযপটিবদ্ধং আমসতি, আপত্তি দ্ৱিন্নং দুক্কটানং…পে….

ইত্থী চ হোতি ইত্থিসঞ্ঞী সাৰত্তো চ. ভিক্খু চ নং ইত্থিযা নিস্সগ্গিযেন নিস্সগ্গিযং আমসতি, আপত্তি দুক্কটস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ভিক্খু চ নং দ্ৱিন্নং ইত্থীনং নিস্সগ্গিযেন নিস্সগ্গিযং আমসতি, আপত্তি দ্ৱিন্নং দুক্কটানং…পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. ভিক্খু চ নং উভিন্নং নিস্সগ্গিযেন নিস্সগ্গিযং আমসতি, আপত্তি দ্ৱিন্নং দুক্কটানং…পে….

ভিক্খুপেয্যালো নিট্ঠিতো.

২৭৭. ইত্থী চ হোতি ইত্থিসঞ্ঞী সাৰত্তো চ. ইত্থী চ নং ভিক্খুস্স কাযেন কাযং আমসতি পৰামসতি ওমসতি উম্মসতি ওলঙ্ঘেতি উল্লঙ্ঘেতি আকড্ঢতি পতিকড্ঢতি অভিনিগ্গণ্হাতি অভিনিপ্পীড়েতি গণ্হাতি ছুপতি, সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি সঙ্ঘাদিসেসস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ইত্থিযো চ নং ভিক্খুস্স কাযেন কাযং আমসন্তি পৰামসন্তি ওমসন্তি উম্মসন্তি ওলঙ্ঘেন্তি উল্লঙ্ঘেন্তি আকড্ঢন্তি পতিকড্ঢন্তি অভিনিগ্গণ্হন্তি অভিনিপ্পীড়েন্তি গণ্হন্তি ছুপন্তি, সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি দ্ৱিন্নং সঙ্ঘাদিসেসানং…পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. উভো চ নং ভিক্খুস্স কাযেন কাযং আমসন্তি পৰামসন্তি…পে… গণ্হন্তি ছুপন্তি, সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি সঙ্ঘাদিসেসেন দুক্কটস্স…পে….

ইত্থী চ হোতি ইত্থিসঞ্ঞী সাৰত্তো চ. ইত্থী চ নং ভিক্খুস্স কাযেন কাযপটিবদ্ধং আমসতি পৰামসতি…পে… গণ্হাতি ছুপতি, সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি থুল্লচ্চযস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ইত্থিযো চ নং ভিক্খুস্স কাযেন কাযপটিবদ্ধং আমসন্তি পৰামসন্তি…পে… গণ্হন্তি ছুপন্তি, সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি দ্ৱিন্নং থুল্লচ্চযানং…পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. উভো চ নং ভিক্খুস্স কাযেন কাযপটিবদ্ধং আমসন্তি পৰামসন্তি…পে… গণ্হন্তি ছুপন্তি, সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি থুল্লচ্চযেন দুক্কটস্স…পে….

ইত্থী চ হোতি ইত্থিসঞ্ঞী সাৰত্তো চ. ইত্থী চ নং ভিক্খুস্স কাযপটিবদ্ধেন কাযং আমসতি পৰামসতি…পে… গণ্হাতি ছুপতি সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি থুল্লচ্চযস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ইত্থিযো চ নং ভিক্খুস্স কাযপটিবদ্ধেন কাযং আমসন্তি পৰামসন্তি…পে… গণ্হন্তি ছুপন্তি, সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি দ্ৱিন্নং থুল্লচ্চযানং…পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. উভো চ নং ভিক্খুস্স কাযপটিবদ্ধেন কাযং আমসন্তি পৰামসন্তি…পে… গণ্হন্তি ছুপন্তি, সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি থুল্লচ্চযেন দুক্কটস্স…পে….

২৭৮. ইত্থী চ হোতি ইত্থিসঞ্ঞী সাৰত্তো চ. ইত্থী চ নং ভিক্খুস্স কাযপটিবদ্ধেন কাযপটিবদ্ধং আমসতি পৰামসতি…পে… গণ্হাতি ছুপতি, সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি দুক্কটস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ইত্থিযো চ নং ভিক্খুস্স কাযপটিবদ্ধেন কাযপটিবদ্ধং আমসন্তি পৰামসন্তি…পে… গণ্হন্তি ছুপন্তি, সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি দ্ৱিন্নং দুক্কটানং…পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. উভো চ নং ভিক্খুস্স কাযপটিবদ্ধেন কাযপটিবদ্ধং আমসন্তি পৰামসন্তি…পে… গণ্হন্তি ছুপন্তি, সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি দ্ৱিন্নং দুক্কটানং…পে….

ইত্থী চ হোতি ইত্থিসঞ্ঞী সাৰত্তো চ. ইত্থী চ নং ভিক্খুস্স নিস্সগ্গিযেন কাযং আমসতি. সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি দুক্কটস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ইত্থিযো চ নং ভিক্খুস্স নিস্সগ্গিযেন কাযং আমসন্তি. সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি দ্ৱিন্নং দুক্কটানং…পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. উভো চ নং ভিক্খুস্স নিস্সগ্গিযেন কাযং আমসন্তি. সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি দ্ৱিন্নং দুক্কটানং…পে….

ইত্থী চ হোতি ইত্থিসঞ্ঞী সাৰত্তো চ. ইত্থী চ নং ভিক্খুস্স নিস্সগ্গিযেন কাযপটিবদ্ধং আমসতি. সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি দুক্কটস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ইত্থিযো চ নং ভিক্খুস্স নিস্সগ্গিযেন কাযপটিবদ্ধং আমসন্তি. সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি দ্ৱিন্নং দুক্কটানং…পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. উভো চ নং ভিক্খুস্স নিস্সগ্গিযেন কাযপটিবদ্ধং আমসন্তি. সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি দ্ৱিন্নং দুক্কটানং…পে….

ইত্থী চ হোতি ইত্থিসঞ্ঞী সাৰত্তো চ. ইত্থী চ নং ভিক্খুস্স নিস্সগ্গিযেন নিস্সগ্গিযং আমসতি. সেৱনাধিপ্পাযো কাযেন ৱাযমতি, ন চ ফস্সং পটিৱিজানাতি, আপত্তি দুক্কটস্স…পে….

দ্ৱে ইত্থিযো দ্ৱিন্নং ইত্থীনং ইত্থিসঞ্ঞী সাৰত্তো চ. ইত্থিযো চ নং ভিক্খুস্স নিস্সগ্গিযেন নিস্সগ্গিযং আমসন্তি. সেৱনাধিপ্পাযো কাযেন ৱাযমতি, ন চ ফস্সং পটিৱিজানাতি, আপত্তি দ্ৱিন্নং দুক্কটানং…পে….

ইত্থী চ পণ্ডকো চ উভিন্নং ইত্থিসঞ্ঞী সাৰত্তো চ. উভো চ নং ভিক্খুস্স নিস্সগ্গিযেন নিস্সগ্গিযং আমসন্তি. সেৱনাধিপ্পাযো কাযেন ৱাযমতি, ন চ ফস্সং পটিৱিজানাতি, আপত্তি দ্ৱিন্নং দুক্কটানং…পে….

২৭৯. সেৱনাধিপ্পাযো কাযেন ৱাযমতি ফস্সং পটিৱিজানাতি, আপত্তি সঙ্ঘাদিসেসস্স.

সেৱনাধিপ্পাযো কাযেন ৱাযমতি, ন চ ফস্সং পটিৱিজানাতি, আপত্তি দুক্কটস্স.

সেৱনাধিপ্পাযো ন চ কাযেন ৱাযমতি, ফস্সং পটিৱিজানাতি, অনাপত্তি.

সেৱনাধিপ্পাযো ন চ কাযেন ৱাযমতি, ন চ ফস্সং পটিৱিজানাতি, অনাপত্তি.

মোক্খাধিপ্পাযো কাযেন ৱাযমতি, ফস্সং পটিৱিজানাতি, অনাপত্তি.

মোক্খাধিপ্পাযো কাযেন ৱাযমতি, ন চ ফস্সং পটিৱিজানাতি, অনাপত্তি.

মোক্খাধিপ্পাযো ন চ কাযেন ৱাযমতি, ফস্সং পটিৱিজানাতি, অনাপত্তি.

মোক্খাধিপ্পাযো ন চ কাযেন ৱাযমতি, ন চ ফস্সং পটিৱিজানাতি, অনাপত্তি.

২৮০. অনাপত্তি অসঞ্চিচ্চ, অসতিযা, অজানন্তস্স, অসাদিযন্তস্স, উম্মত্তকস্স, খিত্তচিত্তস্স, ৱেদনাট্টস্স, আদিকম্মিকস্সাতি.

ৱিনীতৱত্থুউদ্দানগাথা

মাতা ধীতা ভগিনী চ, জাযা যক্খী চ পণ্ডকো;

সুত্তা মতা তিৰচ্ছানা, দাৰুধিতলিকায চ.

সম্পীড়ে সঙ্কমো মগ্গো, ৰুক্খো নাৱা চ ৰজ্জু চ;

দণ্ডো পত্তং পণামেসি, ৱন্দে ৱাযমি নচ্ছুপেতি.

ৱিনীতৱত্থু

২৮১. তেন খো পন সমযেন অঞ্ঞতৰো ভিক্খু মাতুযা মাতুপেমেন আমসি. তস্স কুক্কুচ্চং অহোসি – ‘‘ভগৱতা সিক্খাপদং পঞ্ঞত্তং, কচ্চি নু খো অহং সঙ্ঘাদিসেসং আপত্তিং আপন্নো’’তি? ভগৱতো এতমত্থং আৰোচেসি. ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু ধীতুযা ধীতুপেমেন আমসি…পে… ভগিনিযা ভগিনিপেমেন আমসি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু পুৰাণদুতিযিকায কাযসংসগ্গং সমাপজ্জি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো সঙ্ঘাদিসেস’’ন্তি.

তেন খো পন সমযেন অঞ্ঞতৰো ভিক্খু যক্খিনিযা কাযসংসগ্গং সমাপজ্জি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি.

তেন খো পন সমযেন অঞ্ঞতৰো ভিক্খু পণ্ডকস্স কাযসংসগ্গং সমাপজ্জি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি.

তেন খো পন সমযেন অঞ্ঞতৰো ভিক্খু সুত্তিত্থিযা কাযসংসগ্গং সমাপজ্জি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো সঙ্ঘাদিসেস’’ন্তি.

তেন খো পন সমযেন অঞ্ঞতৰো ভিক্খু মতিত্থিযা কাযসংসগ্গং সমাপজ্জি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি.

তেন খো পন সমযেন অঞ্ঞতৰো ভিক্খু তিৰচ্ছানগতিত্থিযা কাযসংসগ্গং সমাপজ্জি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু দাৰুধীতলিকায কাযসংসগ্গং সমাপজ্জি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

২৮২. তেন খো পন সমযেন সম্বহুলা ইত্থিযো অঞ্ঞতৰং ভিক্খুং সম্পীড়েত্ৱা বাহাপৰম্পৰায আনেসুং. তস্স কুক্কুচ্চং অহোসি…পে… ‘‘সাদিযি ত্ৱং, ভিক্খূ’’তি? ‘‘নাহং, ভগৱা, সাদিযি’’ন্তি. ‘‘অনাপত্তি, ভিক্খূ, অসাদিযন্তস্সা’’তি.

তেন খো পন সমযেন অঞ্ঞতৰো ভিক্খু ইত্থিযা অভিৰূড়্হং সঙ্কমং সাৰত্তো সঞ্চালেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু ইত্থিং পটিপথে পস্সিত্ৱা সাৰত্তো অংসকূটেন পহাৰং অদাসি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো সঙ্ঘাদিসেস’’ন্তি.

তেন খো পন সমযেন অঞ্ঞতৰো ভিক্খু ইত্থিযা অভিৰূড়্হং ৰুক্খং সাৰত্তো সঞ্চালেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু ইত্থিযা অভিৰূড়্হং নাৱং সাৰত্তো সঞ্চালেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু ইত্থিযা গহিতং ৰজ্জুং সাৰত্তো আৱিঞ্ছি [আৱিঞ্জি (সী. স্যা.)]. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি.

তেন খো পন সমযেন অঞ্ঞতৰো ভিক্খু ইত্থিযা গহিতং দণ্ডং সাৰত্তো আৱিঞ্ছি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি.

তেন খো পন সমযেন অঞ্ঞতৰো ভিক্খু সাৰত্তো ইত্থিং পত্তেন পণামেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি থুল্লচ্চযস্সা’’তি.

তেন খো পন সমযেন অঞ্ঞতৰো ভিক্খু ইত্থিযা ৱন্দন্তিযা সাৰত্তো পাদং উচ্চাৰেসি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো সঙ্ঘাদিসেস’’ন্তি.

তেন খো পন সমযেন অঞ্ঞতৰো ভিক্খু ইত্থিং গহেস্সামীতি ৱাযমিত্ৱা ন ছুপি.

তস্স কুক্কুচ্চং অহোসি…পে… ‘‘অনাপত্তি, ভিক্খু, সঙ্ঘাদিসেসস্স; আপত্তি দুক্কটস্সা’’তি.

কাযসংসগ্গসিক্খাপদং নিট্ঠিতং দুতিযং.