১২. দুব্বচসিক্খাপদং

৪২৪. তেন সমযেন বুদ্ধো ভগৱা কোসম্বিযং ৱিহৰতি ঘোসিতাৰামে. তেন খো পন সমযেন আযস্মা ছন্নো অনাচৰং আচৰতি. ভিক্খূ এৱমাহংসু – ‘‘মাৱুসো, ছন্ন, এৱৰূপং অকাসি. নেতং কপ্পতী’’তি. সো এৱং ৱদেতি – ‘‘কিং নু খো নাম তুম্হে, আৱুসো, মং ৱত্তব্বং মঞ্ঞথ? অহং খো নাম তুম্হে ৱদেয্যং. অম্হাকং বুদ্ধো অম্হাকং ধম্মো অম্হাকং অয্যপুত্তেন ধম্মো অভিসমিতো. সেয্যথাপি নাম মহাৱাতো ৱাযন্তো তিণকট্ঠপণ্ণসটং [তিণকট্ঠপণ্ণকসটং (ক.)] একতো উস্সাৰেয্য, সেয্যথা ৱা পন নদী পব্বতেয্যা সঙ্খসেৱালপণকং একতো উস্সাৰেয্য, এৱমেৱ তুম্হে নানানামা নানাগোত্তা নানাজচ্চা নানাকুলা পব্বজিতা একতো উস্সৰিতা. কিং নু খো নাম তুম্হে, আৱুসো, মং ৱত্তব্বং মঞ্ঞথ? অহং খো নাম তুম্হে ৱদেয্যং! অম্হাকং বুদ্ধো অম্হাকং ধম্মো অম্হাকং অয্যপুত্তেন ধম্মো অভিসমিতো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা ছন্নো ভিক্খূহি সহধম্মিকং ৱুচ্চমানো অত্তানং অৱচনীযং কৰিস্সতী’’তি! অথ খো তে ভিক্খূ আযস্মন্তং ছন্নং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ ত্ৱং, ছন্ন, ভিক্খূহি সহধম্মিকং ৱুচ্চমানো অত্তানং অৱচনীযং কৰোসী’’তি? ‘‘সচ্চং ভগৱা’’তি. ৱিগৰহি বুদ্ধো ভগৱা…পে… ‘‘কথঞ্হি নাম ত্ৱং, মোঘপুৰিস, ভিক্খূহি সহধম্মিকং ৱুচ্চমানো অত্তানং অৱচনীযং কৰিস্সসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৪২৫. ‘‘ভিক্খু পনেৱ দুব্বচজাতিকো হোতি উদ্দেসপৰিযাপন্নেসু সিক্খাপদেসু ভিক্খূহি সহধম্মিকং ৱুচ্চমানো অত্তানং অৱচনীযং কৰোতি – ‘মা মং আযস্মন্তো কিঞ্চি অৱচুত্থ কল্যাণং ৱা পাপকং ৱা, অহংপাযস্মন্তে ন কিঞ্চি ৱক্খামি কল্যাণং ৱা পাপকং ৱা, ৱিৰমথাযস্মন্তো মম ৱচনাযা’তি, সো ভিক্খু ভিক্খূহি এৱমস্স ৱচনীযো – ‘মাযস্মা অত্তানং অৱচনীযং অকাসি, ৱচনীযমেৱাযস্মা অত্তানং কৰোতু, আযস্মাপি ভিক্খূ ৱদেতু সহধম্মেন, ভিক্খূপি আযস্মন্তং ৱক্খন্তি সহধম্মেন. এৱং সংৱদ্ধা হি তস্স ভগৱতো পৰিসা যদিদং অঞ্ঞমঞ্ঞৱচনেন অঞ্ঞমঞ্ঞৱুট্ঠাপনেনাতি. এৱঞ্চ সো ভিক্খুং ভিক্খূহি ৱুচ্চমানো তথেৱ পগ্গণ্হেয্য, সো ভিক্খু ভিক্খূহি যাৱততিযং সমনুভাসিতব্বো তস্স পটিনিস্সগ্গায. যাৱততিযঞ্চে সমনুভাসীযমানো তং পটিনিস্সজ্জেয্য, ইচ্চেতং কুসলং; নো চে পটিনিস্সজ্জেয্য, সঙ্ঘাদিসেসো’’তি.

৪২৬. ভিক্খূ পনেৱ দুব্বচজাতিকো হোতীতি দুব্বচো হোতি দোৱচস্সকৰণেহি ধম্মেহি সমন্নাগতো অক্খমো অপ্পদক্খিণগ্গাহী অনুসাসনিং.

উদ্দেসপৰিযাপন্নেসু সিক্খাপদেসূতি পাতিমোক্খপৰিযাপন্নেসু সিক্খাপদেসু.

ভিক্খূহীতি অঞ্ঞেহি ভিক্খূহি.

সহধম্মিকং নাম যং ভগৱতা পঞ্ঞত্তং সিক্খাপদং, এতং সহধম্মিকং নাম.

তেন ৱুচ্চমানো অত্তানং অৱচনীযং কৰোতি – ‘‘মা মং আযস্মন্তো কিঞ্চি অৱচুত্থ কল্যাণং ৱা পাপকং ৱা, অহংপাযস্মন্তে ন কিঞ্চি ৱক্খামি কল্যাণং ৱা পাপকং ৱা. ৱিৰমথাযস্মন্তো মম ৱচনাযা’’তি.

সো ভিক্খূতি যো সো দুব্বচজাতিকো ভিক্খু.

ভিক্খূহীতি অঞ্ঞেহি ভিক্খূহি. যে পস্সন্তি যে সুণন্তি তেহি ৱত্তব্বো – ‘‘মাযস্মা অত্তানং অৱচনীযং অকাসি. ৱচনীযমেৱ আযস্মা অত্তানং কৰোতু. আযস্মাপি ভিক্খূ ৱদেতু সহধম্মেন, ভিক্খূপি আযস্মন্তং ৱক্খন্তি সহধম্মেন. এৱং সংৱদ্ধা হি তস্স ভগৱতো পৰিসা যদিদং অঞ্ঞমঞ্ঞৱচনেন অঞ্ঞমঞ্ঞৱুট্ঠাপনেনা’’তি. দুতিযম্পি ৱত্তব্বো. ততিযম্পি ৱত্তব্বো. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সুত্ৱা ন ৱদন্তি, আপত্তি দুক্কটস্স. সো ভিক্খু সঙ্ঘমজ্ঝম্পি আকড্ঢিত্ৱা ৱত্তব্বো – ‘‘মাযস্মা অত্তানং অৱচনীযং অকাসি…পে… অঞ্ঞমঞ্ঞৱুট্ঠাপনেনা’’তি. দুতিযম্পি ৱত্তব্বো. ততিযম্পি ৱত্তব্বো. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সো ভিক্খু সমনুভাসিতব্বো. এৱঞ্চ পন, ভিক্খৱে, সমনুভাসিতব্বো. ব্যত্তেন ভিক্খুনা পটিবলেন সঙ্ঘো ঞাপেতব্বো –

৪২৭. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু ভিক্খূহি সহধম্মিকং ৱুচ্চমানো অত্তানং অৱচনীযং কৰোতি. সো তং ৱত্থুং ন পটিনিস্সজ্জতি. যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুং সমনুভাসেয্য তস্স ৱত্থুস্স পটিনিস্সগ্গায. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু ভিক্খূহি সহধম্মিকং ৱুচ্চমানো অত্তানং অৱচনীযং কৰোতি. সো তং ৱত্থুং ন পটিনিস্সজ্জতি. সঙ্ঘো ইত্থন্নামং ভিক্খুং সমনুভাসতি তস্স ৱত্থুস্স পটিনিস্সগ্গায. যস্সাযস্মতো খমতি ইত্থন্নামস্স ভিক্খুনো সমনুভাসনা তস্স ৱত্থুস্স পটিনিস্সগ্গায, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি – ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু ভিক্খূহি সহধম্মিকং ৱুচ্চমানো অত্তানং অৱচনীযং কৰোতি. সো তং ৱত্থুং ন পটিনিস্সজ্জতি. সঙ্ঘো ইত্থন্নামং ভিক্খুং সমনুভাসতি তস্স ৱত্থুস্স পটিনিস্সগ্গায. যস্সাযস্মতো খমতি ইত্থন্নামস্স ভিক্খুনো সমনুভাসনা তস্স ৱত্থুস্স পটিনিস্সগ্গায, সো তুণ্হস্স; যস্স নক্খমতি, সো ভাসেয্য.

‘‘সমনুভট্ঠো সঙ্ঘেন ইত্থন্নামো ভিক্খু তস্স ৱত্থুস্স পটিনিস্সগ্গায. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

৪২৮. ঞত্তিযা দুক্কটং, দ্ৱীহি কম্মৱাচাহি থুল্লচ্চযা, কম্মৱাচাপৰিযোসানে আপত্তি সঙ্ঘাদিসেসস্স. সঙ্ঘাদিসেসং অজ্ঝাপজ্জন্তস্স ঞত্তিযা দুক্কটং, দ্ৱীহি কম্মৱাচাহি থুল্লচ্চযা পটিপ্পস্সম্ভন্তি.

সঙ্ঘাদিসেসোতি…পে… তেনপি ৱুচ্চতি সঙ্ঘাদিসেসোতি.

৪২৯. ধম্মকম্মে ধম্মকম্মসঞ্ঞী ন পটিনিস্সজ্জতি, আপত্তি সঙ্ঘাদিসেসস্স.

ধম্মকম্মে ৱেমতিকো ন পটিনিস্সজ্জতি, আপত্তি সঙ্ঘাদিসেসস্স.

ধম্মকম্মে অধম্মকম্মসঞ্ঞী ন পটিনিস্সজ্জতি, আপত্তি সঙ্ঘাদিসেসস্স.

অধম্মকম্মে ধম্মকম্মসঞ্ঞী, আপত্তি দুক্কটস্স.

অধম্মকম্মে ৱেমতিকো, আপত্তি দুক্কটস্স.

অধম্মকম্মে অধম্মকম্মসঞ্ঞী, আপত্তি দুক্কটস্স.

৪৩০. অনাপত্তি অসমনুভাসন্তস্স, পটিনিস্সজ্জন্তস্স, উম্মত্তকস্স, আদিকম্মিকস্সাতি.

দুব্বচসিক্খাপদং নিট্ঠিতং দ্ৱাদসমং.