১১. ভেদানুৱত্তকসিক্খাপদং

৪১৭. তেন সমযেন বুদ্ধো ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন দেৱদত্তো সঙ্ঘভেদায পৰক্কমতি চক্কভেদায. ভিক্খূ এৱমাহংসু – ‘‘অধম্মৱাদী দেৱদত্তো, অৱিনযৱাদী দেৱদত্তো. কথঞ্হি নাম দেৱদত্তো সঙ্ঘভেদায পৰক্কমিস্সতি চক্কভেদাযা’’তি! এৱং ৱুত্তে কোকালিকো কটমোদকতিস্সকো খণ্ডদেৱিযা পুত্তো সমুদ্দদত্তো তে ভিক্খূ এতদৱোচুং – ‘‘মাযস্মন্তো এৱং অৱচুত্থ. ধম্মৱাদী দেৱদত্তো, ৱিনযৱাদী দেৱদত্তো. অম্হাকঞ্চ দেৱদত্তো ছন্দঞ্চ ৰুচিঞ্চ আদায ৱোহৰতি জানাতি নো ভাসতি অম্হাকংপেতং খমতী’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খূ দেৱদত্তস্স সঙ্ঘভেদায পৰক্কমন্তস্স অনুৱত্তকা ভৱিস্সন্তি ৱগ্গৱাদকা’’তি! অথ খো তে ভিক্খূ তে অনুৱত্তকে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ, ভিক্খৱে, ভিক্খূ দেৱদত্তস্স সঙ্ঘভেদায পৰক্কমন্তস্স অনুৱত্তকা হোন্তি ৱগ্গৱাদকা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… ‘‘কথঞ্হি নাম তে, ভিক্খৱে, মোঘপুৰিসা দেৱদত্তস্স সঙ্ঘভেদায পৰক্কমন্তস্স অনুৱত্তকা ভৱিস্সন্তি ৱগ্গৱাদকা! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৪১৮. ‘‘তস্সেৱ খো পন ভিক্খুস্স ভিক্খূ হোন্তি অনুৱত্তকা ৱগ্গৱাদকা একো ৱা দ্ৱে ৱা তযো ৱা. তে এৱং ৱদেয্যুং – ‘মাযস্মন্তো এতং ভিক্খুং কিঞ্চি অৱচুত্থ. ধম্মৱাদী চেসো ভিক্খু, ৱিনযৱাদী চেসো ভিক্খু. অম্হাকঞ্চেসো ভিক্খু ছন্দঞ্চ ৰুচিঞ্চ আদায ৱোহৰতি জানাতি নো ভাসতি অম্হাকম্পেতং খমতী’তি, তে ভিক্খূ ভিক্খূহি এৱমস্সু ৱচনীযা – ‘মাযস্মন্তো এৱং অৱচুত্থ, ন চেসো ভিক্খু ধম্মৱাদী, ন চেসো ভিক্খু ৱিনযৱাদী, মাযস্মন্তানম্পি সঙ্ঘভেদো ৰুচ্চিত্থ, সমেতাযস্মন্তানং সঙ্ঘেন, সমগ্গো হি সঙ্ঘো সম্মোদমানো অৱিৱদমানো একুদ্দেসো ফাসু ৱিহৰতী’তি. এৱঞ্চ তে ভিক্খূ ভিক্খূহি ৱুচ্চমানা তথেৱ পগ্গণ্হেয্যুং, তে ভিক্খূ ভিক্খূহি যাৱততিযং সমনুভাসিতব্বা তস্স পটিনিস্সগ্গায. যাৱততিযঞ্চে সমনুভাসিযমানা তং পটিনিস্সজ্জেয্যুং, ইচ্চেতং কুসলং, নো চে পটিনিস্সজ্জেয্যুং, সঙ্ঘাদিসেসো’’তি.

৪১৯. তস্সেৱ খো পনাতি তস্স সঙ্ঘভেদকস্স ভিক্খুনো.

ভিক্খূ হোন্তীতি অঞ্ঞে ভিক্খূ হোন্তি.

অনুৱত্তকাতি যংদিট্ঠিকো সো হোতি যংখন্তিকো যংৰুচিকো তেপি তংদিট্ঠিকা হোন্তি তংখন্তিকা তংৰুচিকা.

ৱগ্গৱাদকাতি তস্স ৱণ্ণায পক্খায ঠিতা হোন্তি.

একো ৱা দ্ৱে ৱা তযো ৱাতি একো ৱা হোতি দ্ৱে ৱা তযো ৱা. তে এৱং ৱদেয্যুং – ‘‘মাযস্মন্তো এতং ভিক্খুং কিঞ্চি অৱচুত্থ, ধম্মৱাদী চেসো ভিক্খু, ৱিনযৱাদী চেসো ভিক্খু, অম্হাকঞ্চেসো ভিক্খু ছন্দঞ্চ ৰুচিঞ্চ আদায ৱোহৰতি জানাতি নো ভাসতি অম্হাকংপেতং খমতী’তি.

তে ভিক্খূতি যে তে অনুৱত্তকা ভিক্খূ.

ভিক্খূহীতি অঞ্ঞেহি ভিক্খূহি.

যে পস্সন্তি যে সুণন্তি তেহি ৱত্তব্বা – ‘‘মাযস্মন্তো এৱং অৱচুত্থ. ন চেসো ভিক্খু ধম্মৱাদী, ন চেসো ভিক্খু ৱিনযৱাদী. মাযস্মন্তানম্পি সঙ্ঘভেদো ৰুচ্চিত্থ. সমেতাযস্মন্তানং সঙ্ঘেন. সমগ্গো হি সঙ্ঘো সম্মোদমানো অৱিৱদমানো একুদ্দেসো ফাসু ৱিহৰতী’’তি. দুতিযম্পি ৱত্তব্বা. ততিযম্পি ৱত্তব্বা. সচে পটিনিস্সজ্জন্তি, ইচ্চেতং কুসলং; নো চে পটিনিস্সজ্জন্তি, আপত্তি দুক্কটস্স. সুত্ৱা ন ৱদন্তি, আপত্তি দুক্কটস্স. তে ভিক্খূ সঙ্ঘমজ্ঝম্পি আকড্ঢিত্ৱা ৱত্তব্বা – ‘‘মাযস্মন্তো এৱং অৱচুত্থ. ন চেসো ভিক্খু ধম্মৱাদী, ন চেসো ভিক্খু ৱিনযৱাদী. মাযস্মন্তানম্পি সঙ্ঘভেদো ৰুচ্চিত্থ. সমেতাযস্মন্তানং সঙ্ঘেন. সমগ্গো হি সঙ্ঘো সম্মোদমানো অৱিৱদমানো একুদ্দেসো ফাসু ৱিহৰতী’’তি. দুতিযম্পি ৱত্তব্বা. ততিযম্পি ৱত্তব্বা. সচে পটিনিস্সজ্জন্তি, ইচ্চেতং কুসলং; নো চে পটিনিস্সজ্জন্তি, আপত্তি দুক্কটস্স. তে ভিক্খূ সমনুভাসিতব্বা. এৱঞ্চ পন, ভিক্খৱে, সমনুভাসিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

৪২০. ‘‘সুণাতু মে, ভন্তে, সঙ্ঘো. ইত্থন্নামো চ ইত্থনামো চ ভিক্খূ ইত্থন্নামস্স ভিক্খুনো সঙ্ঘভেদায পৰক্কমন্তস্স অনুৱত্তকা ৱগ্গৱাদকা. তে তং ৱত্থুং ন পটিনিস্সজ্জন্তি. যদি সঙ্ঘস্স পত্তকল্লং, সঙ্ঘো ইত্থন্নামঞ্চ ইত্থন্নামঞ্চ ভিক্খূ সমনুভাসেয্য তস্স ৱত্থুস্স পটিনিস্সগ্গায. এসা ঞত্তি.

‘‘সুণাতু মে, ভন্তে, সঙ্ঘো. ইত্থন্নামো চ ইত্থন্নামো চ ভিক্খূ ইত্থন্নামস্স ভিক্খুনো সঙ্ঘভেদায পৰক্কমন্তস্স অনুৱত্তকা ৱগ্গৱাদকা. তে তং ৱত্থুং ন পটিনিস্সজ্জন্তি. সঙ্ঘো ইত্থন্নামঞ্চ ইত্থন্নামঞ্চ ভিক্খূ সমনুভাসতি তস্স ৱত্থুস্স পটিনিস্সগ্গায. যস্সাযস্মতো খমতি ইত্থন্নামস্স চ ইত্থন্নামস্স চ ভিক্খূনং সমনুভাসনা তস্স ৱত্থুস্স পটিনিস্সগ্গায, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি – সুণাতু মে, ভন্তে, সঙ্ঘো. ইত্থন্নামো চ ইত্থন্নামো চ ভিক্খূ ইত্থন্নামস্স ভিক্খুনো সঙ্ঘভেদায পৰক্কমন্তস্স অনুৱত্তকা ৱগ্গৱাদকা. তে তং ৱত্থুং ন পটিনিস্সজ্জন্তি. সঙ্ঘো ইত্থন্নামঞ্চ ইত্থন্নামঞ্চ ভিক্খূ সমনুভাসতি তস্স ৱত্থুস্স পটিনিস্সগ্গায. যস্সাযস্মতো খমতি ইত্থন্নামস্স চ ইত্থন্নামস্স চ ভিক্খূনং সমনুভাসনা তস্স ৱত্থুস্স পটিনিস্সগ্গায, সো তুণ্হস্স; যস্স নক্খমতি, সো ভাসেয্য.

‘‘সমনুভট্ঠা সঙ্ঘেন ইত্থন্নামো চ ইত্থন্নামো চ ভিক্খূ তস্স ৱত্থুস্স পটিনিস্সগ্গায. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

৪২১. ঞত্তিযা দুক্কটং, দ্ৱীহি কম্মৱাচাহি থুল্লচ্চযা, কম্মৱাচাপৰিযোসানে আপত্তি সঙ্ঘাদিসেসস্স. সঙ্ঘাদিসেসং অজ্ঝাপজ্জন্তানং ঞত্তিযা দুক্কটং, দ্ৱীহি কম্মৱাচাহি থুল্লচ্চযা পটিপ্পস্সম্ভন্তি. দ্ৱে তযো একতো সমনুভাসিতব্বা, তদুত্তৰি ন সমনুভাসিতব্বা.

সঙ্ঘাদিসেসোতি…পে… তেনপি ৱুচ্চতি ‘‘সঙ্ঘাদিসেসো’’তি.

৪২২. ধম্মকম্মে ধম্মকম্মসঞ্ঞী ন পটিনিস্সজ্জন্তি, আপত্তি সঙ্ঘাদিসেসস্স.

ধম্মকম্মে ৱেমতিকা ন পটিনিস্সজ্জন্তি, আপত্তি সঙ্ঘাদিসেসস্স.

ধম্মকম্মে অধম্মকম্মসঞ্ঞী ন পটিনিস্সজ্জন্তি, আপত্তি সঙ্ঘাদিসেসস্স.

অধম্মকম্মে ধম্মকম্মসঞ্ঞী, আপত্তি দুক্কটস্স.

অধম্মকম্মে ৱেমতিকা, আপত্তি দুক্কটস্স.

অধম্মকম্মে অধম্মকম্মসঞ্ঞী, আপত্তি দুক্কটস্স.

৪২৩. অনাপত্তি অসমনুভাসন্তানং, পটিনিস্সজ্জন্তানং, উম্মত্তকানং, খিত্তচিত্তানং, ৱেদনাট্টানং, আদিকম্মিকানন্তি.

ভেদানুৱত্তকসিক্খাপদং নিট্ঠিতং একাদসমং.