২. দুতিযপাৰাজিকং

৮৪. তেন সমযেন বুদ্ধো ভগৱা ৰাজগহে ৱিহৰতি গিজ্ঝকূটে পব্বতে. তেন খো পন সমযেন সম্বহুলা সন্দিট্ঠা সম্ভত্তা ভিক্খূ ইসিগিলিপস্সে তিণকুটিযো কৰিত্ৱা ৱস্সং উপগচ্ছিংসু. আযস্মাপি ধনিযো কুম্ভকাৰপুত্তো তিণকুটিকং কৰিত্ৱা ৱস্সং উপগচ্ছি. অথ খো তে ভিক্খূ ৱস্সংৱুট্ঠা তেমাসচ্চযেন তিণকুটিযো ভিন্দিত্ৱা তিণঞ্চ কট্ঠঞ্চ পটিসামেত্ৱা জনপদচাৰিকং পক্কমিংসু. আযস্মা পন ধনিযো কুম্ভকাৰপুত্তো তত্থেৱ ৱস্সং ৱসি, তত্থ হেমন্তং, তত্থ গিম্হং. অথ খো আযস্মতো ধনিযস্স কুম্ভকাৰপুত্তস্স গামং পিণ্ডায পৱিট্ঠস্স তিণহাৰিযো কট্ঠহাৰিযো তিণকুটিকং ভিন্দিত্ৱা তিণঞ্চ কট্ঠঞ্চ আদায অগমংসু. দুতিযম্পি খো আযস্মা ধনিযো কুম্ভকাৰপুত্তো তিণঞ্চ কট্ঠঞ্চ সংকড্ঢিত্ৱা তিণকুটিকং অকাসি. দুতিযম্পি খো আযস্মতো ধনিযস্স কুম্ভকাৰপুত্তস্স গামং পিণ্ডায পৱিট্ঠস্স তিণহাৰিযো কট্ঠহাৰিযো তিণকুটিকং ভিন্দিত্ৱা তিণঞ্চ কট্ঠঞ্চ আদায অগমংসু. ততিযম্পি খো আযস্মা ধনিযো কুম্ভকাৰপুত্তো তিণঞ্চ কট্ঠঞ্চ সংকড্ঢিত্ৱা তিণকুটিকং অকাসি. ততিযম্পি খো আযস্মতো ধনিযস্স কুম্ভকাৰপুত্তস্স গামং পিণ্ডায পৱিট্ঠস্স তিণহাৰিযো কট্ঠহাৰিযো তিণকুটিকং ভিন্দিত্ৱা তিণঞ্চ কট্ঠঞ্চ আদায অগমংসু.

অথ খো আযস্মতো ধনিযস্স কুম্ভকাৰপুত্তস্স এতদহোসি – ‘‘যাৱততিযকং খো মে গামং পিণ্ডায পৱিট্ঠস্স তিণহাৰিযো কট্ঠহাৰিযো তিণকুটিকং ভিন্দিত্ৱা তিণঞ্চ কট্ঠঞ্চ আদায অগমংসু. অহং খো পন সুসিক্খিতো অনৱযো সকে আচৰিযকে কুম্ভকাৰকম্মে পৰিযোদাতসিপ্পো. যংনূনাহং সামং চিক্খল্লং মদ্দিত্ৱা সব্বমত্তিকামযং কুটিকং কৰেয্য’’ন্তি! অথ খো আযস্মা ধনিযো কুম্ভকাৰপুত্তো সামং চিক্খল্লং মদ্দিত্ৱা সব্বমত্তিকামযং কুটিকং কৰিত্ৱা তিণঞ্চ কট্ঠঞ্চ গোমযঞ্চ সংকড্ঢিত্ৱা তং কুটিকং পচি. সা অহোসি কুটিকা অভিৰূপা দস্সনীযা পাসাদিকা লোহিতিকা [লোহিতকা (স্যা.)], সেয্যথাপি ইন্দগোপকো. সেয্যথাপি নাম কিঙ্কণিকসদ্দো [কিঙ্কিণিকসদ্দো (সী. স্যা.)] এৱমেৱং তস্সা কুটিকায সদ্দো অহোসি.

৮৫. অথ খো ভগৱা সম্বহুলেহি ভিক্খূহি সদ্ধিং গিজ্ঝকূটা পব্বতা ওৰোহন্তো অদ্দস তং কুটিকং অভিৰূপং দস্সনীযং পাসাদিকং লোহিতিকং. দিস্ৱান ভিক্খূ আমন্তেসি – ‘‘কিং এতং, ভিক্খৱে, অভিৰূপং দস্সনীযং পাসাদিকং লোহিতিকং, সেয্যথাপি ইন্দগোপকো’’তি? অথ খো তে ভিক্খূ ভগৱতো এতমত্থং আৰোচেসুং. ৱিগৰহি বুদ্ধো ভগৱা – ‘‘অননুচ্ছৱিকং, ভিক্খৱে, তস্স মোঘপুৰিসস্স অননুলোমিকং অপ্পতিৰূপং অস্সামণকং অকপ্পিযং অকৰণীযং. কথঞ্হি নাম সো, ভিক্খৱে, মোঘপুৰিসো সব্বমত্তিকামযং কুটিকং কৰিস্সতি! ন হি নাম, ভিক্খৱে, তস্স মোঘপুৰিসস্স পাণেসু অনুদ্দযা অনুকম্পা অৱিহেসা ভৱিস্সতি! গচ্ছথেতং, ভিক্খৱে, কুটিকং ভিন্দথ. মা পচ্ছিমা জনতা পাণেসু পাতব্যতং আপজ্জি. ন চ, ভিক্খৱে, সব্বমত্তিকামযা কুটিকা কাতব্বা. যো কৰেয্য, আপত্তি দুক্কটস্সা’’তি. ‘‘এৱং, ভন্তে’’তি, খো তে ভিক্খূ ভগৱতো পটিস্সুণিত্ৱা যেন সা কুটিকা তেনুপসঙ্কমিংসু; উপসঙ্কমিত্ৱা তং কুটিকং ভিন্দিংসু. অথ খো আযস্মা ধনিযো কুম্ভকাৰপুত্তো তে ভিক্খূ এতদৱোচ – ‘‘কিস্স মে তুম্হে, আৱুসো, কুটিকং ভিন্দথা’’তি? ‘‘ভগৱা, আৱুসো, ভেদাপেতী’’তি. ‘‘ভিন্দথাৱুসো, সচে ধম্মস্সামী ভেদাপেতী’’তি.

৮৬. অথ খো আযস্মতো ধনিযস্স কুম্ভকাৰপুত্তস্স এতদহোসি – ‘‘যাৱততিযকং খো মে গামং পিণ্ডায পৱিট্ঠস্স তিণহাৰিযো কট্ঠহাৰিযো তিণকুটিকং ভিন্দিত্ৱা তিণঞ্চ কট্ঠঞ্চ আদায অগমংসু. যাপি মযা সব্বমত্তিকামযা কুটিকা কতা সাপি ভগৱতা ভেদাপিতা. অত্থি চ মে দাৰুগহে গণকো সন্দিট্ঠো. যংনূনাহং দাৰুগহে গণকং দাৰূনি যাচিত্ৱা দাৰুকুটিকং কৰেয্য’’ন্তি. অথ খো আযস্মা ধনিযো কুম্ভকাৰপুত্তো যেন দাৰুগহে গণকো তেনুপসঙ্কমি; উপসঙ্কমিত্ৱা দাৰুগহে গণকং এতদৱোচ – ‘‘যাৱততিযকং খো মে, আৱুসো, গামং পিণ্ডায পৱিট্ঠস্স তিণহাৰিযো কট্ঠহাৰিযো তিণকুটিকং ভিন্দিত্ৱা তিণঞ্চ কট্ঠঞ্চ আদায অগমংসু. যাপি মযা সব্বমত্তিকামযা কুটিকা কতা সাপি ভগৱতা ভেদাপিতা. দেহি মে, আৱুসো, দাৰূনি. ইচ্ছামি দাৰুকুটিকং [দাৰুকুড্ডিকং কুটিকং (সী.)] কাতু’’ন্তি. ‘‘নত্থি, ভন্তে, তাদিসানি দাৰূনি যানাহং অয্যস্স দদেয্যং. অত্থি, ভন্তে, দেৱগহদাৰূনি নগৰপটিসঙ্খাৰিকানি আপদত্থায নিক্খিত্তানি. সচে তানি দাৰূনি ৰাজা দাপেতি হৰাপেথ, ভন্তে’’তি. ‘‘দিন্নানি, আৱুসো, ৰঞ্ঞা’’তি. অথ খো দাৰুগহে গণকস্স এতদহোসি – ‘‘ইমে খো সমণা সক্যপুত্তিযা ধম্মচাৰিনো সমচাৰিনো [সম্মচাৰিনো (ক.)] ব্ৰহ্মচাৰিনো সচ্চৱাদিনো সীলৱন্তো কল্যাণধম্মা. ৰাজাপিমেসং অভিপ্পসন্নো. নাৰহতি অদিন্নং দিন্নন্তি ৱত্তু’’ন্তি. অথ খো দাৰুগহে গণকো আযস্মন্তং ধনিযং কুম্ভকাৰপুত্তং এতদৱোচ – ‘‘হৰাপেথ, ভন্তে’’তি. অথ খো আযস্মা ধনিযো কুম্ভকাৰপুত্তো তানি দাৰূনি খণ্ডাখণ্ডিকং ছেদাপেত্ৱা সকটেহি নিব্বাহাপেত্ৱা দাৰুকুটিকং অকাসি.

৮৭. অথ খো ৱস্সকাৰো ব্ৰাহ্মণো মগধমহামত্তো ৰাজগহে কম্মন্তে অনুসঞ্ঞাযমানো যেন দাৰুগহে গণকো তেনুপসঙ্কমি; উপসঙ্কমিত্ৱা দাৰুগহে গণকং এতদৱোচ – ‘‘যানি তানি, ভণে, দেৱগহদাৰূনি নগৰপটিসঙ্খাৰিকানি আপদত্থায নিক্খিত্তানি কহং তানি দাৰূনী’’তি? ‘‘তানি, সামি, দাৰূনি দেৱেন অয্যস্স ধনিযস্স কুম্ভকাৰপুত্তস্স দিন্নানী’’তি. অথ খো ৱস্সকাৰো ব্ৰাহ্মণো মগধমহামত্তো অনত্তমনো অহোসি – ‘‘কথঞ্হি নাম দেৱো দেৱগহদাৰূনি নগৰপটিসঙ্খাৰিকানি আপদত্থায নিক্খিত্তানি ধনিযস্স কুম্ভকাৰপুত্তস্স দস্সতী’’তি! অথ খো ৱস্সকাৰো ব্ৰাহ্মণো মগধমহামত্তো যেন ৰাজা মাগধো সেনিযো বিম্বিসাৰো তেনুপসঙ্কমি; উপসঙ্কমিত্ৱা ৰাজানং মাগধং সেনিযং বিম্বিসাৰং এতদৱোচ – ‘‘সচ্চং কিৰ, দেৱেন [সচ্চং কিৰ দেৱ দেৱেন (সী.)] দেৱগহদাৰূনি নগৰপটিসঙ্খাৰিকানি আপদত্থায নিক্খিত্তানি ধনিযস্স কুম্ভকাৰপুত্তস্স দিন্নানী’’তি? ‘‘কো এৱমাহা’’তি? ‘‘দাৰুগহে গণকো, দেৱা’’তি. ‘‘তেন হি, ব্ৰাহ্মণ, দাৰুগহে গণকং আণাপেহী’’তি. অথ খো ৱস্সকাৰো ব্ৰাহ্মণো মগধমহামত্তো দাৰুগহে গণকং বন্ধং [বদ্ধং (সী.)] আণাপেসি. অদ্দস খো আযস্মা ধনিযো কুম্ভকাৰপুত্তো দাৰুগহে গণকং বন্ধং নিয্যমানং. দিস্ৱান দাৰুগহে গণকং এতদৱোচ – ‘‘কিস্স ত্ৱং, আৱুসো, বন্ধো নিয্যাসী’’তি? ‘‘তেসং, ভন্তে, দাৰূনং কিচ্চা’’তি. ‘‘গচ্ছাৱুসো, অহম্পি আগচ্ছামী’’তি. ‘‘এয্যাসি, ভন্তে, পুৰাহং হঞ্ঞামী’’তি.

৮৮. অথ খো আযস্মা ধনিযো কুম্ভকাৰপুত্তো যেন ৰঞ্ঞো মাগধস্স সেনিযস্স বিম্বিসাৰস্স নিৱেসনং তেনুপসঙ্কমি; উপসঙ্কমিত্ৱা পঞ্ঞত্তে আসনে নিসীদি. অথ খো ৰাজা মাগধো সেনিযো বিম্বিসাৰো যেনাযস্মা ধনিযো কুম্ভকাৰপুত্তো তেনুপসঙ্কমি; উপসঙ্কমিত্ৱা আযস্মন্তং ধনিযং কুম্ভকাৰপুত্তং অভিৱাদেত্ৱা একমন্তং নিসীদি. একমন্তং নিসিন্নো খো ৰাজা মাগধো সেনিযো বিম্বিসাৰো আযস্মন্তং ধনিযং কুম্ভকাৰপুত্তং এতদৱোচ – ‘‘সচ্চং কিৰ মযা, ভন্তে, দেৱগহদাৰূনি নগৰপটিসঙ্খাৰিকানি আপদত্থায নিক্খিত্তানি অয্যস্স দিন্নানী’’তি? ‘‘এৱং, মহাৰাজা’’তি. ‘‘মযং খো, ভন্তে, ৰাজানো নাম বহুকিচ্চা বহুকৰণীযা, দত্ৱাপি ন সৰেয্যাম; ইঙ্ঘ, ভন্তে, সৰাপেহী’’তি. ‘‘সৰসি ত্ৱং, মহাৰাজ, পঠমাভিসিত্তো এৱৰূপিং ৱাচং ভাসিতা – ‘‘দিন্নঞ্ঞেৱ সমণব্ৰাহ্মণানং তিণকট্ঠোদকং পৰিভুঞ্জন্তূ’’তি. ‘‘সৰামহং, ভন্তে. সন্তি, ভন্তে, সমণব্ৰাহ্মণা লজ্জিনো কুক্কুচ্চকা সিক্খাকামা. তেসং অপ্পমত্তকেপি কুক্কুচ্চং উপ্পজ্জতি. তেসং মযা সন্ধায ভাসিতং, তঞ্চ খো অৰঞ্ঞে অপৰিগ্গহিতং. সো ত্ৱং, ভন্তে, তেন লেসেন দাৰূনি অদিন্নং হৰিতুং মঞ্ঞসি! কথঞ্হি নাম মাদিসো সমণং ৱা ব্ৰাহ্মণং ৱা ৱিজিতে ৱসন্তং হনেয্য ৱা বন্ধেয্য ৱা পব্বাজেয্য ৱা! গচ্ছ, ভন্তে, লোমেন ত্ৱং মুত্তোসি. মাস্সু পুনপি এৱৰূপং অকাসী’’তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘অলজ্জিনো ইমে সমণা সক্যপুত্তিযা দুস্সীলা মুসাৱাদিনো. ইমে হি নাম ধম্মচাৰিনো সমচাৰিনো ব্ৰাহ্মচাৰিনো সচ্চৱাদিনো সীলৱন্তো কল্যাণধম্মা পটিজানিস্সন্তি! নত্থি ইমেসং সামঞ্ঞং, নত্থি ইমেসং ব্ৰহ্মঞ্ঞং. নট্ঠং ইমেসং সামঞ্ঞং, নট্ঠং ইমেসং ব্ৰহ্মঞ্ঞং. কুতো ইমেসং সামঞ্ঞং, কুতো ইমেসং ব্ৰহ্মঞ্ঞং! অপগতা ইমে সামঞ্ঞা, অপগতা ইমে ব্ৰহ্মঞ্ঞা. ৰাজানম্পি ইমে ৱঞ্চেন্তি, কিং পনঞ্ঞে মনুস্সে’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা সন্তুট্ঠা লজ্জিনো কুক্কুচ্চকা সিক্খাকামা তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা ধনিযো কুম্ভকাৰপুত্তো ৰঞ্ঞো দাৰূনি অদিন্নং আদিযিস্সতী’’তি! অথ খো তে ভিক্খূ আযস্মন্তং ধনিযং কুম্ভকাৰপুত্তং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা আযস্মন্তং ধনিযং কুম্ভকাৰপুত্তং পটিপুচ্ছি – ‘‘সচ্চং কিৰ ত্ৱং, ধনিয, ৰঞ্ঞো দাৰূনি অদিন্নং আদিযী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা – ‘‘অননুচ্ছৱিকং, মোঘপুৰিস, অননুলোমিকং অপ্পতিৰূপং অস্সামণকং অকপ্পিযং অকৰণীযং. কথঞ্হি নাম ত্ৱং, মোঘপুৰিস, ৰঞ্ঞো দাৰূনি অদিন্নং আদিযিস্সসি! নেতং, মোঘপুৰিস, অপ্পসন্নানং ৱা পসাদায পসন্নানং ৱা ভিয্যোভাৱায; অথখ্ৱেতং, মোঘপুৰিস, অপ্পসন্নানঞ্চেৱ অপ্পসাদায পসন্নানঞ্চ একচ্চানং অঞ্ঞথত্তাযা’’তি.

তেন খো পন সমযেন অঞ্ঞতৰো পুৰাণৱোহাৰিকো মহামত্তো ভিক্খূসু পব্বজিতো ভগৱতো অৱিদূৰে নিসিন্নো হোতি. অথ খো ভগৱা তং ভিক্খুং এতদৱোচ – ‘‘কিত্তকেন খো ভিক্খু ৰাজা মাগধো সেনিযো বিম্বিসাৰো চোৰং গহেত্ৱা হনতি ৱা বন্ধতি ৱা পব্বাজেতি ৱা’’তি? ‘‘পাদেন ৱা, ভগৱা, পাদাৰহেন ৱা’’তি [পাদাৰহেনৱা অতিৰেকপাদেনৱাতি (স্যা.)]. তেন খো পন সমযেন ৰাজগহে পঞ্চমাসকো পাদো হোতি. অথ খো ভগৱা আযস্মন্তং ধনিযং কুম্ভকাৰপুত্তং অনেকপৰিযাযেন ৱিগৰহিত্ৱা দুব্ভৰতায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৮৯. ‘‘যো পন ভিক্খু অদিন্নং থেয্যসঙ্খাতং আদিযেয্য, যথাৰূপে অদিন্নাদানে ৰাজানো চোৰং গহেত্ৱা হনেয্যুং ৱা বন্ধেয্যুং ৱা পব্বাজেয্যুং ৱা – ‘চোৰোসি বালোসি মূড়্হোসি থেনোসী’তি, তথাৰূপং ভিক্খু অদিন্নং আদিযমানো অযম্পি পাৰাজিকো হোতি অসংৱাসো’’তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

৯০. তেন খো পন সমযেন ছব্বগ্গিযা ভিক্খূ ৰজকত্থৰণং গন্ত্ৱা ৰজকভণ্ডিকং অৱহৰিত্ৱা আৰামং হৰিত্ৱা ভাজেসুং. ভিক্খূ এৱমাহংসু – ‘‘মহাপুঞ্ঞত্থ তুম্হে, আৱুসো. বহুং তুম্হাকং চীৱৰং উপ্পন্ন’’ন্তি. ‘‘কুতো আৱুসো, অম্হাকং পুঞ্ঞং, ইদানি মযং ৰজকত্থৰণং গন্ত্ৱা ৰজকভণ্ডিকং অৱহৰিম্হা’’তি. ‘‘ননু, আৱুসো, ভগৱতা সিক্খাপদং পঞ্ঞত্তং. কিস্স তুম্হে, আৱুসো, ৰজকভণ্ডিকং অৱহৰিত্থা’’তি? ‘‘সচ্চং, আৱুসো, ভগৱতা সিক্খাপদং পঞ্ঞত্তং. তঞ্চ খো গামে, নো অৰঞ্ঞে’’তি. ‘‘ননু, আৱুসো, তথেৱেতং হোতি. অননুচ্ছৱিকং, আৱুসো, অননুলোমিকং অপ্পতিৰূপং অস্সামণকং অকপ্পিযং অকৰণীযং. কথঞ্হি নাম তুম্হে, আৱুসো, ৰজকভণ্ডিকং অৱহৰিস্সথ! নেতং, আৱুসো, অপ্পসন্নানং ৱা পসাদায পসন্নানং ৱা ভিয্যোভাৱায; অথখ্ৱেতং, আৱুসো, অপ্পসন্নানঞ্চেৱ অপ্পসাদায পসন্নানঞ্চ একচ্চানং অঞ্ঞথত্তাযা’’তি. অথ খো তে ভিক্খূ ছব্বগ্গিযে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা ছব্বগ্গিযে ভিক্খূ পটিপুচ্ছি – ‘‘সচ্চং কিৰ তুম্হে, ভিক্খৱে, ৰজকত্থৰণং গন্ত্ৱা ৰজকভণ্ডিকং অৱহৰিত্থা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা – ‘‘অননুচ্ছৱিকং, মোঘপুৰিসা, অননুলোমিকং অপ্পটিৰূপং অস্সামণকং অকপ্পিযং অকৰণীযং. কথঞ্হি নাম তুম্হে, মোঘপুৰিসা, ৰজকভণ্ডিকং অৱহৰিস্সথ! নেতং, মোঘপুৰিসা, অপ্পসন্নানং ৱা পসাদায পসন্নানং ৱা ভিয্যোভাৱায; অথ খ্ৱেতং, মোঘপুৰিসা, অপ্পসন্নানঞ্চেৱ অপ্পসাদায পসন্নানঞ্চ একচ্চানং অঞ্ঞথত্তাযা’’তি. অথ খো ভগৱা ছব্বগ্গিযে ভিক্খূ অনেকপৰিযাযেন ৱিগৰহিত্ৱা দুব্ভৰতায…পে… ৱীৰিযাৰম্ভস্স ৱণ্ণং ভাসিত্ৱা ভিক্খূনং তদনুচ্ছৱিকং তদনুলোমিকং ধম্মিং কথং কত্ৱা ভিক্খূ আমন্তেসি…পে… ‘‘এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৯১. ‘‘যো পন ভিক্খু গামা ৱা অৰঞ্ঞা ৱা অদিন্নং থেয্যসঙ্খাতং আদিযেয্য, যথাৰূপে অদিন্নাদানে ৰাজানো চোৰং গহেত্ৱা হনেয্যুং ৱা বন্ধেয্যুং ৱা পব্বাজেয্যুং ৱা – ‘চোৰোসি বালোসি মূড়্হোসি থেনোসী’তি, তথাৰূপং ভিক্খু অদিন্নং আদিযমানো অযম্পি পাৰাজিকো হোতি অসংৱাসো’’তি.

৯২. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

গামো নাম এককুটিকোপি গামো, দ্ৱিকুটিকোপি গামো, তিকুটিকোপি গামো, চতুকুটিকোপি গামো, সমনুস্সোপি গামো, অমনুস্সোপি গামো, পৰিক্খিত্তোপি গামো, অপৰিক্খিত্তোপি গামো, গোনিসাদিনিৱিট্ঠোপি গামো, যোপি সত্থো অতিৰেকচতুমাসনিৱিট্ঠো সোপি ৱুচ্চতি গামো.

গামূপচাৰো নাম পৰিক্খিত্তস্স গামস্স ইন্দখীলে [ইন্দখিলে (ক.)] ঠিতস্স মজ্ঝিমস্স পুৰিসস্স লেড্ডুপাতো, অপৰিক্খিত্তস্স গামস্স ঘৰূপচাৰে ঠিতস্স মজ্ঝিমস্স পুৰিসস্স লেড্ডুপাতো.

অৰঞ্ঞং নাম ঠপেত্ৱা গামঞ্চ গামূপচাৰঞ্চ অৱসেসং অৰঞ্ঞং নাম.

অদিন্নং নামং যং অদিন্নং অনিস্সট্ঠং অপৰিচ্চত্তং ৰক্খিতং গোপিতং মমাযিতং পৰপৰিগ্গহিতং. এতং অদিন্নং নাম.

থেয্যসঙ্খাতন্তি থেয্যচিত্তো অৱহৰণচিত্তো.

আদিযেয্যাতি আদিযেয্য হৰেয্য অৱহৰেয্য ইৰিযাপথং ৱিকোপেয্য ঠানা চাৱেয্য সঙ্কেতং ৱীতিনামেয্য.

যথাৰূপং নাম পাদং ৱা পাদাৰহং ৱা অতিৰেকপাদং ৱা.

ৰাজানো নাম পথব্যাৰাজা পদেসৰাজা মণ্ডলিকা অন্তৰভোগিকা অক্খদস্সা মহামত্তা, যে ৱা পন ছেজ্জভেজ্জং কৰোন্তা অনুসাসন্তি. এতে ৰাজানো নাম.

চোৰো নাম যো পঞ্চমাসকং ৱা অতিৰেকপঞ্চমাসকং ৱা অগ্ঘনকং অদিন্নং থেয্যসঙ্খাতং আদিযতি. এসো চোৰো নাম.

হনেয্যুং ৱাতি হত্থেন ৱা পাদেন ৱা কসায ৱা ৱেত্তেন ৱা অড্ঢদণ্ডকেন ৱা ছেজ্জায ৱা হনেয্যুং.

বন্ধেয্যুং ৱাতি ৰজ্জুবন্ধনেন ৱা অন্দুবন্ধনেন ৱা সঙ্খলিকবন্ধনেন ৱা ঘৰবন্ধনেন ৱা নগৰবন্ধনেন ৱা গামবন্ধনেন ৱা নিগমবন্ধনেন ৱা বন্ধেয্যুং, পুৰিসগুত্তিং ৱা কৰেয্যুং.

পব্বাজেয্যুং ৱাতি গামা ৱা নিগমা ৱা নগৰা ৱা জনপদা ৱা জনপদপদেসা ৱা পব্বাজেয্যুং.

চোৰোসি বালোসি মূড়্হোসি থেনোসীতি পৰিভাসো এসো.

তথাৰূপং নাম পাদং ৱা পাদাৰহং ৱা অতিৰেকপাদং ৱা.

আদিযমানোতি আদিযমানো হৰমানো অৱহৰমানো ইৰিযাপথং ৱিকোপযমানো ঠানা চাৱযমানো সঙ্কেতং ৱীতিনামযমানো.

অযম্পীতি পুৰিমং উপাদায ৱুচ্চতি.

পাৰাজিকো হোতীতি সেয্যথাপি নাম পণ্ডুপলাসো বন্ধনা পৱুত্তো [হৰিতত্তায (সী. স্যা.)] অভব্বো হৰিতত্থায [হৰিতত্তায (সী. স্যা.)], এৱমেৱ ভিক্খু পাদং ৱা পাদাৰহং ৱা অতিৰেকপাদং ৱা অদিন্নং থেয্যসঙ্খাতং আদিযিত্ৱা অস্সমণো হোতি অসক্যপুত্তিযো. তেন ৱুচ্চতি – ‘পাৰাজিকো হোতী’তি.

অসংৱাসোতি সংৱাসো নাম এককম্মং একুদ্দেসো সমসিক্খতা. এসো সংৱাসো নাম. সো তেন সদ্ধিং নত্থি. তেন ৱুচ্চতি – ‘অসংৱাসো’তি.

৯৩. ভূমট্ঠং থলট্ঠং আকাসট্ঠং ৱেহাসট্ঠং উদকট্ঠং নাৱট্ঠং যানট্ঠং ভাৰট্ঠং আৰামট্ঠং ৱিহাৰট্ঠং খেত্তট্ঠং ৱত্থুট্ঠং গামট্ঠং অৰঞ্ঞট্ঠং উদকং দন্তপোণং [দন্তপোনং (সী. ক.)] ৱনপ্পতি হৰণকং উপনিধি সুঙ্কঘাতং পাণো অপদং দ্ৱিপদং চতুপ্পদং বহুপ্পদং ওচৰকো ওণিৰক্খো সংৱিদাৱহাৰো সঙ্কেতকম্মং নিমিত্তকম্মন্তি.

৯৪. ভূমট্ঠং নাম ভণ্ডং ভূমিযং নিক্খিত্তং হোতি নিখাতং পটিচ্ছন্নং. ভূমট্ঠং ভণ্ডং অৱহৰিস্সামীতি থেয্যচিত্তো দুতিযং ৱা পৰিযেসতি কুদালং ৱা পিটকং ৱা পৰিযেসতি গচ্ছতি ৱা, আপত্তি দুক্কটস্স. তত্থ জাতকং কট্ঠং ৱা লতং ৱা ছিন্দতি, আপত্তি দুক্কটস্স. তত্থ পংসুং খণতি ৱা ব্যূহতি [ৱিযূহতি (স্যা.)] ৱা উদ্ধৰতি ৱা, আপত্তি দুক্কটস্স. কুম্ভিং আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. অত্তনো ভাজনং পৱেসেত্ৱা পঞ্চমাসকং ৱা অতিৰেকপঞ্চমাসকং ৱা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. অত্তনো ভাজনগতং ৱা কৰোতি মুট্ঠিং ৱা ছিন্দতি, আপত্তি পাৰাজিকস্স. সুত্তাৰুড়্হং ভণ্ডং পামঙ্গং ৱা কণ্ঠসুত্তকং ৱা কটিসুত্তকং ৱা সাটকং ৱা ৱেঠনং ৱা থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. কোটিযং গহেত্ৱা উচ্চাৰেতি, আপত্তি থুল্লচ্চযস্স. ঘংসন্তো নীহৰতি, আপত্তি থুল্লচ্চযস্স. অন্তমসো কেসগ্গমত্তম্পি কুম্ভিমুখা মোচেতি, আপত্তি পাৰাজিকস্স. সপ্পিং ৱা তেলং ৱা মধুং ৱা ফাণিতং ৱা পঞ্চমাসকং ৱা অতিৰেকপঞ্চমাসকং ৱা অগ্ঘনকং থেয্যচিত্তো একেন পযোগেন পিৱতি, আপত্তি পাৰাজিকস্স. তত্থেৱ ভিন্দতি ৱা ছড্ডেতি ৱা ঝাপেতি ৱা অপৰিভোগং ৱা কৰোতি, আপত্তি দুক্কটস্স.

৯৫. থলট্ঠং নাম ভণ্ডং থলে নিক্খিত্তং হোতি. থলট্ঠং ভণ্ডং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

৯৬. আকাসট্ঠং নাম ভণ্ডং আকাসগতং হোতি. মোৰো ৱা কপিঞ্জৰো ৱা তিত্তিৰো ৱা ৱট্টকো ৱা, সাটকং ৱা ৱেঠনং ৱা হিৰঞ্ঞং ৱা সুৱণ্ণং ৱা ছিজ্জমানং পততি. আকাসট্ঠং ভণ্ডং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. গমনং উপচ্ছিন্দতি, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

৯৭. ৱেহাসট্ঠং নাম ভণ্ডং ৱেহাসগতং হোতি. মঞ্চে ৱা পীঠে ৱা চীৱৰৱংসে ৱা চীৱৰৰজ্জুযা ৱা ভিত্তিখিলে ৱা নাগদন্তে ৱা ৰুক্খে ৱা লগ্গিতং হোতি, অন্তমসো পত্তাধাৰকেপি. ৱেহাসট্ঠং ভণ্ডং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

৯৮. উদকট্ঠং নাম ভণ্ডং উদকে নিক্খিত্তং হোতি. উদকট্ঠং ভণ্ডং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. নিমুজ্জতি ৱা উম্মুজ্জতি ৱা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. তত্থ জাতকং উপ্পলং ৱা পদুমং ৱা পুণ্ডৰীকং ৱা ভিসং ৱা মচ্ছং ৱা কচ্ছপং ৱা পঞ্চমাসকং ৱা অতিৰেকপঞ্চমাসকং ৱা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

৯৯. নাৱা নাম যায তৰতি. নাৱট্ঠং নাম ভণ্ডং নাৱায নিক্খিত্তং হোতি. ‘‘নাৱট্ঠং ভণ্ডং অৱহৰিস্সামী’’তি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. নাৱং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. বন্ধনং মোচেতি, আপত্তি দুক্কটস্স. বন্ধনং মোচেত্ৱা আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. উদ্ধং ৱা অধো ৱা তিৰিযং ৱা অন্তমসো কেসগ্গমত্তম্পি সঙ্কামেতি, আপত্তি পাৰাজিকস্স.

১০০. যানং নাম ৱয্হং ৰথো সকটং সন্দমানিকা. যানট্ঠং নাম ভণ্ডং যানে নিক্খিত্তং হোতি. যানট্ঠং ভণ্ডং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. যানং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

১০১. ভাৰো নাম সীসভাৰো খন্ধভাৰো কটিভাৰো ওলম্বকো. সীসে ভাৰং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. খন্ধং ওৰোপেতি, আপত্তি পাৰাজিকস্স. খন্ধে ভাৰং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. কটিং ওৰোপেতি, আপত্তি পাৰাজিকস্স. কটিযা ভাৰং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. হত্থেন গণ্হাতি, আপত্তি পাৰাজিকস্স. হত্থে ভাৰং থেয্যচিত্তো ভূমিযং নিক্খিপতি, আপত্তি পাৰাজিকস্স. থেয্যচিত্তো ভূমিতো গণ্হাতি, আপত্তি পাৰাজিকস্স.

১০২. আৰামো নাম পুপ্ফাৰামো ফলাৰামো. আৰামট্ঠং নাম ভণ্ডং আৰামে চতূহি ঠানেহি নিক্খিত্তং হোতি – ভূমট্ঠং থলট্ঠং, আকাসট্ঠং, ৱেহাসট্ঠং. আৰামট্ঠং ভণ্ডং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. তত্থ জাতকং মূলং ৱা তচং ৱা পত্তং ৱা পুপ্ফং ৱা ফলং ৱা পঞ্চমাসকং ৱা অতিৰেকপঞ্চমাসকং ৱা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. আৰামং অভিযুঞ্জতি, আপত্তি দুক্কটস্স. সামিকস্স ৱিমতিং উপ্পাদেতি, আপত্তি থুল্লচ্চযস্স. সামিকো ন ময্হং ভৱিস্সতীতি ধুৰং নিক্খিপতি, আপত্তি পাৰাজিকস্স. ধম্মং চৰন্তো সামিকং পৰাজেতি, আপত্তি পাৰাজিকস্স. ধম্মং চৰন্তো পৰজ্জতি, আপত্তি থুল্লচ্চযস্স.

১০৩. ৱিহাৰট্ঠং নাম ভণ্ডং ৱিহাৰে চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৱেহাসট্ঠং. ৱিহাৰট্ঠং ভণ্ডং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. ৱিহাৰং অভিযুঞ্জতি, আপত্তি দুক্কটস্স. সামিকস্স ৱিমতিং উপ্পাদেতি, আপত্তি থুল্লচ্চযস্স. সামিকো ন ময্হং ভৱিস্সতীতি ধুৰং নিক্খিপতি, আপত্তি পাৰাজিকস্স. ধম্মং চৰন্তো সামিকং পৰাজেতি, আপত্তি পাৰাজিকস্স. ধম্মং চৰন্তো পৰজ্জতি, আপত্তি থুল্লচ্চযস্স.

১০৪. খেত্তং নাম যত্থ পুব্বণ্ণং ৱা অপৰণ্ণং ৱা জাযতি. খেত্তট্ঠং নাম ভণ্ডং খেত্তে চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৱেহাসট্ঠং. খেত্তট্ঠং ভণ্ডং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি, দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. তত্থ জাতকং পুব্বণ্ণং ৱা অপৰণ্ণং ৱা পঞ্চমাসকং ৱা অতিৰেকপঞ্চমাসকং ৱা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. খেত্তং অভিযুঞ্জতি, আপত্তি দুক্কটস্স. সামিকস্স ৱিমতিং উপ্পাদেতি, আপত্তি থুল্লচ্চযস্স. সামিকো ন ময্হং ভৱিস্সতীতি ধুৰং নিক্খিপতি, আপত্তি পাৰাজিকস্স. ধম্মং চৰন্তো সামিকং পৰাজেতি, আপত্তি পাৰাজিকস্স. ধম্মং চৰন্তো পৰজ্জতি, আপত্তি থুল্লচ্চযস্স. খিলং ৱা ৰজ্জুং ৱা ৱতিং ৱা মৰিযাদং ৱা সঙ্কামেতি, আপত্তি দুক্কটস্স. একং পযোগং অনাগতে, আপত্তি থুল্লচ্চযস্স. তস্মিং পযোগে আগতে, আপত্তি পাৰাজিকস্স.

১০৫. ৱত্থু নাম আৰামৱত্থু ৱিহাৰৱত্থু. ৱত্থুট্ঠং নাম ভণ্ডং ৱত্থুস্মিং চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৱেহাসট্ঠং. ৱত্থুট্ঠং ভণ্ডং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. ৱত্থুং অভিযুঞ্জতি, আপত্তি দুক্কটস্স. সামিকস্স ৱিমতিং উপ্পাদেতি, আপত্তি থুল্লচ্চযস্স. সামিকো ন ময্হং ভৱিস্সতীতি ধুৰং নিক্খিপতি, আপত্তি পাৰাজিকস্স. ধম্মং চৰন্তো সামিকং পৰাজেতি, আপত্তি পাৰাজিকস্স. ধম্মং চৰন্তো পৰজ্জতি, আপত্তি থুল্লচ্চযস্স. খীলং ৱা ৰজ্জুং ৱা ৱতিং ৱা পাকাৰং ৱা সঙ্কামেতি, আপত্তি দুক্কটস্স. একং পযোগং অনাগতে আপত্তি থুল্লচ্চযস্স. তস্মিং পযোগে আগতে আপত্তি পাৰাজিকস্স.

১০৬. গামট্ঠং নাম ভণ্ডং গামে চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৱেহাসট্ঠং. গামট্ঠং ভণ্ডং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

১০৭. অৰঞ্ঞং নাম যং মনুস্সানং পৰিগ্গহিতং হোতি, তং অৰঞ্ঞং. অৰঞ্ঞট্ঠং নাম ভণ্ডং অৰঞ্ঞে চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৱেহাসট্ঠং. অৰঞ্ঞট্ঠং ভণ্ডং অৱহৰিস্সামীতি থেয্যচিত্তো দুতিযং ৱা পৰিযেসতি গচ্ছতি ৱা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. তত্থ জাতকং কট্ঠং ৱা লতং ৱা তিণং ৱা পঞ্চমাসকং ৱা অতিৰেকপঞ্চমাসকং ৱা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

১০৮. উদকং নাম ভাজনগতং ৱা হোতি পোক্খৰণিযা ৱা তড়াকে ৱা. থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. অত্তনো ভাজনং পৱেসেত্ৱা পঞ্চমাসকং ৱা অতিৰেকপঞ্চমাসকং ৱা অগ্ঘনকং উদকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. অত্তনো ভাজনগতং কৰোতি, আপত্তি পাৰাজিকস্স. মৰিযাদং ভিন্দতি, আপত্তি দুক্কটস্স. মৰিযাদং ভিন্দিত্ৱা পঞ্চমাসকং ৱা অতিৰেকপঞ্চমাসকং ৱা অগ্ঘনকং উদকং নিক্খামেতি, আপত্তি পাৰাজিকস্স. অতিৰেকমাসকং ৱা ঊনপঞ্চমাসকং ৱা অগ্ঘনকং উদকং নিক্খামেতি, আপত্তি থুল্লচ্চযস্স. মাসকং ৱা ঊনমাসকং ৱা অগ্ঘনকং উদকং নিক্খামেতি, আপত্তি দুক্কটস্স.

১০৯. দন্তপোণং নাম ছিন্নং ৱা অচ্ছিন্নং ৱা. পঞ্চমাসকং ৱা অতিৰেকপঞ্চমাসকং ৱা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

১১০. ৱনপ্পতি নাম যো মনুস্সানং পৰিগ্গহিতো হোতি ৰুক্খো পৰিভোগো. থেয্যচিত্তো ছিন্দতি, পহাৰে পহাৰে আপত্তি দুক্কটস্স. একং পহাৰং অনাগতে, আপত্তি থুল্লচ্চযস্স. তস্মিং পহাৰে আগতে, আপত্তি পাৰাজিকস্স.

১১১. হৰণকং নাম অঞ্ঞস্স হৰণকং ভণ্ডং. থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. সহভণ্ডহাৰকং পদসা নেস্সামীতি পঠমং পাদং সঙ্কামেতি, আপত্তি থুল্লচ্চযস্স. দুতিযং পাদং সঙ্কামেতি, আপত্তি পাৰাজিকস্স. পতিতং ভণ্ডং গহেস্সামীতি পাতাপেতি, আপত্তি দুক্কটস্স. পতিতং ভণ্ডং পঞ্চমাসকং ৱা অতিৰেকপঞ্চমাসকং ৱা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

১১২. উপনিধি নাম উপনিক্খিত্তং ভণ্ডং. দেহি মে ভণ্ডন্তি ৱুচ্চমানো নাহং গণ্হামীতি ভণতি, আপত্তি দুক্কটস্স. সামিকস্স ৱিমতিং উপ্পাদেতি, আপত্তি থুল্লচ্চযস্স. সামিকো ন ময্হং দস্সতীতি ধুৰং নিক্খিপতি, আপত্তি পাৰাজিকস্স. ধম্মং চৰন্তো সামিকং পৰাজেতি, আপত্তি পাৰাজিকস্স. ধম্মং চৰন্তো পৰজ্জতি, আপত্তি থুল্লচ্চযস্স.

১১৩. সুঙ্কঘাতং নাম ৰঞ্ঞা ঠপিতং হোতি পব্বতখণ্ডে ৱা নদীতিত্থে ৱা গামদ্ৱাৰে ৱা – ‘অত্ৰ পৱিট্ঠস্স সুঙ্কং গণ্হন্তূ’তি. তত্ৰ পৱিসিত্ৱা ৰাজগ্গং [ৰাজগ্ঘং (সী. স্যা.)] ভণ্ডং পঞ্চমাসকং ৱা অতিৰেকপঞ্চমাসকং ৱা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. পঠমং পাদং সুঙ্কঘাতং অতিক্কামেতি, আপত্তি থুল্লচ্চযস্স. দুতিযং পাদং অতিক্কামেতি, আপত্তি পাৰাজিকস্স. অন্তোসুঙ্কঘাতে ঠিতো বহিসুঙ্কঘাতং পাতেতি, আপত্তি পাৰাজিকস্স. সুঙ্কং পৰিহৰতি, আপত্তি দুক্কটস্স.

১১৪. পাণো নাম মনুস্সপাণো ৱুচ্চতি. থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. পদসা নেস্সামীতি পঠমং পাদং সঙ্কামেতি, আপত্তি থুল্লচ্চযস্স. দুতিযং পাদং সঙ্কামেতি, আপত্তি পাৰাজিকস্স.

অপদং নাম অহি মচ্ছা. পঞ্চমাসকং ৱা অতিৰেকপঞ্চমাসকং ৱা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

১১৫. দ্ৱিপদং নাম মনুস্সা, পক্খজাতা. থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. পদসা নেস্সামীতি পঠমং পাদং সঙ্কামেতি, আপত্তি থুল্লচ্চযস্স. দুতিযং পাদং সঙ্কামেতি, আপত্তি পাৰাজিকস্স.

১১৬. চতুপ্পদং নাম – হত্থী অস্সা ওট্ঠা গোণা গদ্ৰভা পসুকা. থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. পদসা নেস্সামীতি পঠমং পাদং সঙ্কামেতি, আপত্তি থুল্লচ্চযস্স. দুতিযং পাদং সঙ্কামেতি, আপত্তি থুল্লচ্চযস্স. ততিযং পাদং সঙ্কামেতি, আপত্তি থুল্লচ্চযস্স. চতুত্থং পাদং সঙ্কামেতি, আপত্তি পাৰাজিকস্স.

১১৭. বহুপ্পদং নাম – ৱিচ্ছিকা সতপদী উচ্চালিঙ্গপাণকা. পঞ্চমাসকং ৱা অতিৰেকপঞ্চমাসকং ৱা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স. পদসা নেস্সামীতি সঙ্কামেতি, পদে পদে আপত্তি থুল্লচ্চযস্স. পচ্ছিমং পাদং সঙ্কামেতি, আপত্তি পাৰাজিকস্স.

১১৮. ওচৰকো নাম ভণ্ডং ওচৰিত্ৱা আচিক্খতি – ‘‘ইত্থন্নামং ভণ্ডং অৱহৰা’’তি, আপত্তি দুক্কটস্স. সো তং ভণ্ডং অৱহৰতি, আপত্তি উভিন্নং পাৰাজিকস্স.

ওণিৰক্খো নাম আহটং ভণ্ডং গোপেন্তো পঞ্চমাসকং ৱা অতিৰেকপঞ্চমাসকং ৱা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

সংৱিদাৱহাৰো নাম সম্বহুলা সংৱিদহিত্ৱা একো ভণ্ডং অৱহৰতি, আপত্তি সব্বেসং পাৰাজিকস্স.

১১৯. সঙ্কেতকম্মং নাম সঙ্কেতং কৰোতি – ‘‘পুৰেভত্তং ৱা পচ্ছাভত্তং ৱা ৰত্তিং ৱা দিৱা ৱা তেন সঙ্কেতেন তং ভণ্ডং অৱহৰা’’তি, আপত্তি দুক্কটস্স. তেন সঙ্কেতেন তং ভণ্ডং অৱহৰতি, আপত্তি উভিন্নং পাৰাজিকস্স. তং সঙ্কেতং পুৰে ৱা পচ্ছা ৱা তং ভণ্ডং অৱহৰতি, মূলট্ঠস্স অনাপত্তি. অৱহাৰকস্স আপত্তি পাৰাজিকস্স.

১২০. নিমিত্তকম্মং নাম নিমিত্তং কৰোতি. অক্খিং ৱা নিখণিস্সামি ভমুকং ৱা উক্খিপিস্সামি সীসং ৱা উক্খিপিস্সামি, তেন নিমিত্তেন তং ভণ্ডং অৱহৰাতি, আপত্তি দুক্কটস্স. তেন নিমিত্তেন তং ভণ্ডং অৱহৰতি, আপত্তি উভিন্নং পাৰাজিকস্স. তং নিমিত্তং পুৰে ৱা পচ্ছা ৱা তং ভণ্ডং অৱহৰতি, মূলট্ঠস্স অনাপত্তি. অৱহাৰকস্স আপত্তি পাৰাজিকস্স.

১২১. ভিক্খু ভিক্খুং আণাপেতি – ‘‘ইত্থন্নামং ভণ্ডং অৱহৰা’’তি, আপত্তি দুক্কটস্স. সো তং মঞ্ঞমানো তং অৱহৰতি, আপত্তি উভিন্নং পাৰাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৱহৰা’’তি, আপত্তি দুক্কটস্স. সো তং মঞ্ঞমানো অঞ্ঞং অৱহৰতি, মূলট্ঠস্স অনাপত্তি. অৱহাৰকস্স আপত্তি পাৰাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৱহৰা’’তি, আপত্তি দুক্কটস্স. সো অঞ্ঞং মঞ্ঞমানো তং অৱহৰতি, আপত্তি উভিন্নং পাৰাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৱহৰা’’তি, আপত্তি দুক্কটস্স. সো অঞ্ঞং মঞ্ঞমানো অঞ্ঞং অৱহৰতি, মূলট্ঠস্স অনাপত্তি. অৱহাৰকস্স আপত্তি পাৰাজিকস্স.

ভিক্খু ভিক্খুং আণাপেতি – ‘‘ইত্থন্নামস্স পাৱদ – ‘ইত্থন্নামো ইত্থন্নামস্স পাৱদতু – ইত্থন্নামো ইত্থন্নামং ভণ্ডং অৱহৰতূ’’’তি, আপত্তি দুক্কটস্স. সো ইতৰস্স আৰোচেতি, আপত্তি দুক্কটস্স. অৱহাৰকো পটিগ্গণ্হাতি, মূলট্ঠস্স আপত্তি থুল্লচ্চযস্স. সো তং ভণ্ডং অৱহৰতি, আপত্তি সব্বেসং পাৰাজিকস্স.

ভিক্খু ভিক্খুং আণাপেতি – ‘‘ইত্থন্নামস্স পাৱদ – ‘ইত্থন্নামো ইত্থন্নামস্স পাৱদতু – ইত্থন্নামো ইত্থন্নামং ভণ্ডং অৱহৰতূ’’’তি, আপত্তি দুক্কটস্স. সো অঞ্ঞং আণাপেতি, আপত্তি দুক্কটস্স. অৱহাৰকো পটিগ্গণ্হাতি, আপত্তি দুক্কটস্স. সো তং ভণ্ডং অৱহৰতি, মূলট্ঠস্স অনাপত্তি. আণাপকস্স চ অৱহাৰকস্স চ আপত্তি পাৰাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৱহৰা’’তি, আপত্তি দুক্কটস্স. সো গন্ত্ৱা পুন পচ্চাগচ্ছতি – ‘‘নাহং সক্কোমি তং ভণ্ডং অৱহৰিতু’’ন্তি. সো পুন আণাপেতি – ‘‘যদা সক্কোসি তদা তং ভণ্ডং অৱহৰা’’তি, আপত্তি দুক্কটস্স. সো তং ভণ্ডং অৱহৰতি, আপত্তি উভিন্নং পাৰাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৱহৰা’’তি, আপত্তি দুক্কটস্স. সো আণাপেত্ৱা ৱিপ্পটিসাৰী ন সাৱেতি – ‘‘মা অৱহৰী’’তি. সো তং ভণ্ডং অৱহৰতি, আপত্তি উভিন্নং পাৰাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৱহৰা’’তি, আপত্তি দুক্কটস্স. সো আণাপেত্ৱা ৱিপ্পটিসাৰী সাৱেতি – ‘‘মা অৱহৰী’’তি. সো ‘‘আণত্তো অহং তযা’’তি, তং ভণ্ডং অৱহৰতি, মূলট্ঠস্স অনাপত্তি. অৱহাৰকস্স আপত্তি পাৰাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৱহৰা’’তি, আপত্তি দুক্কটস্স. সো আণাপেত্ৱা ৱিপ্পটিসাৰী সাৱেতি – ‘‘মা অৱহৰী’’তি. সো ‘‘সাধূ’’তি [সুট্ঠূতি (ক.)]? ওৰমতি, উভিন্নং অনাপত্তি.

১২২. পঞ্চহি আকাৰেহি অদিন্নং আদিযন্তস্স আপত্তি পাৰাজিকস্স – পৰপৰিগ্গহিতঞ্চ হোতি, পৰপৰিগ্গহিতসঞ্ঞী চ, গৰুকো চ হোতি পৰিক্খাৰো, পঞ্চমাসকো ৱা অতিৰেকপঞ্চমাসকো ৱা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

১২৩. পঞ্চহি আকাৰেহি অদিন্নং আদিযন্তস্স আপত্তি থুল্লচ্চযস্স – পৰপৰিগ্গহিতঞ্চ হোতি, পৰপৰিগ্গহিতসঞ্ঞী চ, লহুকো চ হোতি পৰিক্খাৰো, অতিৰেকমাসকো ৱা ঊনপঞ্চমাসকো ৱা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৱেতি, আপত্তি থুল্লচ্চযস্স.

১২৪. পঞ্চহি আকাৰেহি অদিন্নং আদিযন্তস্স আপত্তি দুক্কটস্স. পৰপৰিগ্গহিতঞ্চ হোতি, পৰপৰিগ্গহিতসঞ্ঞী চ, লহুকো চ হোতি পৰিক্খাৰো, মাসকো ৱা ঊনমাসকো ৱা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৱেতি, আপত্তি দুক্কটস্স.

১২৫. ছহি আকাৰেহি অদিন্নং আদিযন্তস্স আপত্তি পাৰাজিকস্স. ন চ সকসঞ্ঞী, ন চ ৱিস্সাসগ্গাহী, ন চ তাৱকালিকং, গৰুকো চ হোতি পৰিক্খাৰো, পঞ্চমাসকো ৱা অতিৰেকপঞ্চমাসকো ৱা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস. ফন্দাপেতি, আপত্তি থুল্লচ্চযস্স. ঠানা চাৱেতি, আপত্তি পাৰাজিকস্স.

১২৬. ছহি আকাৰেহি অদিন্নং আদিযন্তস্স আপত্তি থুল্লচ্চযস্স. ন চ সকসঞ্ঞী, ন চ ৱিস্সাসগ্গাহী, ন চ তাৱকালিকং, লহুকো চ হোতি পৰিক্খাৰো অতিৰেকমাসকো ৱা ঊনপঞ্চমাসকো ৱা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৱেতি, আপত্তি থুল্লচ্চযস্স.

১২৭. ছহি আকাৰেহি অদিন্নং আদিযন্তস্স আপত্তি দুক্কটস্স. ন চ সকসঞ্ঞী, ন চ ৱিস্সাসগ্গাহী, ন চ তাৱকালিকং, লহুকো চ হোতি পৰিক্খাৰো, মাসকো ৱা ঊনমাসকো ৱা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৱেতি, আপত্তি দুক্কটস্স.

১২৮. পঞ্চহি আকাৰেহি অদিন্নং আদিযন্তস্স আপত্তি দুক্কটস্স. ন চ পৰপৰিগ্গহিতং হোতি, পৰপৰিগ্গহিতসঞ্ঞী চ, গৰুকো চ হোতি পৰিক্খাৰো, পঞ্চমাসকো ৱা অতিৰেকপঞ্চমাসকো ৱা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৱেতি, আপত্তি দুক্কটস্স.

১২৯. পঞ্চহি আকাৰেহি অদিন্নং আদিযন্তস্স আপত্তি দুক্কটস্স. ন চ পৰপৰিগ্গহিতং হোতি, পৰপৰিগ্গহিতসঞ্ঞী চ, লহুকো চ হোতি পৰিক্খাৰো, অতিৰেকমাসকো ৱা ঊনপঞ্চমাসকো ৱা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৱেতি, আপত্তি দুক্কটস্স.

১৩০. পঞ্চহি আকাৰেহি অদিন্নং আদিযন্তস্স আপত্তি দুক্কটস্স. ন চ পৰপৰিগ্গহিতং হোতি, পৰপৰিগ্গহিতসঞ্ঞী চ, লহুকো চ হোতি পৰিক্খাৰো, মাসকো ৱা ঊনমাসকো ৱা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৱেতি, আপত্তি দুক্কটস্স.

১৩১. অনাপত্তি সসঞ্ঞিস্স, ৱিস্সাসগ্গাহে, তাৱকালিকে, পেতপৰিগ্গহে, তিৰচ্ছানগতপৰিগ্গহে, পংসুকূলসঞ্ঞিস্স, উম্মত্তকস্স, (খিত্তচিত্তস্স ৱেদনাট্টস্স) [(খিত্তচিত্তস্স ৱেদনাট্টস্স) কত্থচি নত্থি] আদিকম্মিকস্সাতি.

অদিন্নাদানম্হি পঠমভাণৱাৰো নিট্ঠিতো.

ৱিনীতৱত্থুউদ্দানগাথা

ৰজকেহি পঞ্চ অক্খাতা, চতুৰো অত্থৰণেহি চ;

অন্ধকাৰেন ৱে পঞ্চ, পঞ্চ হাৰণকেন চ.

নিৰুত্তিযা পঞ্চ অক্খাতা, ৱাতেহি অপৰে দুৱে;

অসম্ভিন্নে কুসাপাতো, জন্তগ্গেন [জন্তাঘৰেন (স্যা.)] সহা দস.

ৱিঘাসেহি পঞ্চ অক্খাতা, পঞ্চ চেৱ অমূলকা;

দুব্ভিক্খে কুৰমংসঞ্চ [কূৰমংসঞ্চ (স্যা.)], পূৱসক্খলিমোদকা.

ছপৰিক্খাৰথৱিকা, ভিসিৱংসা ন নিক্খমে;

খাদনীযঞ্চ ৱিস্সাসং, সসঞ্ঞাযপৰে দুৱে.

সত্ত নাৱহৰামাতি, সত্ত চেৱ অৱাহৰুং;

সঙ্ঘস্স অৱহৰুং সত্ত, পুপ্ফেহি অপৰে দুৱে.

তযো চ ৱুত্তৱাদিনো, মণি তীণি অতিক্কমে;

সূকৰা চ মিগা মচ্ছা, যানঞ্চাপি পৱত্তযি.

দুৱে পেসী দুৱে দাৰূ, পংসুকূলং দুৱে দকা;

অনুপুব্বৱিধানেন, তদঞ্ঞো ন পৰিপূৰযি.

সাৱত্থিযা চতুৰো মুট্ঠী, দ্ৱে ৱিঘাসা দুৱে তিণা;

সঙ্ঘস্স ভাজযুং সত্ত, সত্ত চেৱ অস্সামিকা.

দাৰুদকা মত্তিকা দ্ৱে তিণানি;

সঙ্ঘস্স সত্ত অৱহাসি সেয্যং;

সস্সামিকং ন চাপি নীহৰেয্য;

হৰেয্য সস্সামিকং তাৱকালিকং.

চম্পা ৰাজগহে চেৱ, ৱেসালিযা চ অজ্জুকো;

বাৰাণসী চ কোসম্বী, সাগলা দড়্হিকেন চাতি.

ৱিনীতৱত্থু

১৩২. তেন খো পন সমযেন ছব্বগ্গিযা ভিক্খূ ৰজকত্থৰণং গন্ত্ৱা ৰজকভণ্ডিকং অৱহৰিংসু. তেসং কুক্কুচ্চং অহোসি – ‘‘ভগৱতা সিক্খাপদং পঞ্ঞত্তং. কচ্চি নু খো মযং পাৰাজিকং আপত্তিং আপন্না’’তি. ভগৱতো এতমত্থং আৰোচেসুং. ‘‘আপত্তিং তুম্হে, ভিক্খৱে, আপন্না পাৰাজিক’’ন্তি.

তেন খো পন সমযেন অঞ্ঞতৰো ভিক্খু ৰজকত্থৰণং গন্ত্ৱা মহগ্ঘং দুস্সং পস্সিত্ৱা থেয্যচিত্তং উপ্পাদেসি. তস্স কুক্কুচ্চং অহোসি – ‘‘ভগৱতা সিক্খাপদং পঞ্ঞত্তং, কচ্চি নু খো অহং পাৰাজিকং আপত্তিং আপন্নো’’তি? ভগৱতো এতমত্থং আৰোচেসি. ‘‘অনাপত্তি, ভিক্খু, চিত্তুপ্পাদে’’তি.

তেন খো পন সমযেন অঞ্ঞতৰো ভিক্খু ৰজকত্থৰণং গন্ত্ৱা মহগ্ঘং দুস্সং পস্সিত্ৱা থেয্যচিত্তো আমসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স. আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু ৰজকত্থৰণং গন্ত্ৱা মহগ্ঘং দুস্সং পস্সিত্ৱা থেয্যচিত্তো ফন্দাপেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স. আপত্তি থুল্লচ্চযস্সা’’তি.

তেন খো পন সমযেন অঞ্ঞতৰো ভিক্খু ৰজকত্থৰণং গন্ত্ৱা মহগ্ঘং দুস্সং পস্সিত্ৱা থেয্যচিত্তো ঠানা চাৱেসি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

১৩৩. তেন খো পন সমযেন অঞ্ঞতৰো পিণ্ডচাৰিকো ভিক্খু মহগ্ঘং উত্তৰত্থৰণং পস্সিত্ৱা থেয্যচিত্তং উপ্পাদেসি…পে… থেয্যচিত্তো আমসি…পে… থেয্যচিত্তো ফন্দাপেসি…পে… থেয্যচিত্তো ঠানা চাৱেসি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

১৩৪. তেন খো পন সমযেন অঞ্ঞতৰো ভিক্খু দিৱা ভণ্ডং পস্সিত্ৱা নিমিত্তং অকাসি – ‘ৰত্তিং অৱহৰিস্সামী’তি. সো তং মঞ্ঞমানো তং অৱহৰি…পে… তং মঞ্ঞমানো অঞ্ঞং অৱহৰি…পে… অঞ্ঞং মঞ্ঞমানো তং অৱহৰি…পে… অঞ্ঞং মঞ্ঞমানো অঞ্ঞং অৱহৰি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

তেন খো পন সমযেন অঞ্ঞতৰো ভিক্খু দিৱা ভণ্ডং পস্সিত্ৱা নিমিত্তং অকাসি – ‘‘ৰত্তিং অৱহৰিস্সামী’’তি. সো তং মঞ্ঞমানো অত্তনো ভণ্ডং অৱহৰি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স. আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু অঞ্ঞস্স ভণ্ডং হৰন্তো সীসে ভাৰং থেয্যচিত্তো আমসি…পে… থেয্যচিত্তো ফন্দাপেসি…পে… থেয্যচিত্তো খন্ধং ওৰোপেসি…পে… খন্ধে ভাৰং থেয্যচিত্তো আমসি…পে… থেয্যচিত্তো ফন্দাপেসি…পে… থেয্যচিত্তো কটিং ওৰোপেসি…পে… কটিযা ভাৰং থেয্যচিত্তো আমসি…পে… থেয্যচিত্তো ফন্দাপেসি…পে… থেয্যচিত্তো হত্থেন অগ্গহেসি…পে… হত্থে ভাৰং থেয্যচিত্তো ভূমিযং নিক্খিপি…পে… থেয্যচিত্তো ভূমিতো অগ্গহেসি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

১৩৫. তেন খো পন সমযেন অঞ্ঞতৰো ভিক্খু অজ্ঝোকাসে চীৱৰং পত্থৰিত্ৱা ৱিহাৰং পাৱিসি. অঞ্ঞতৰো ভিক্খু – ‘মাযিদং চীৱৰং নস্সী’তি, পটিসামেসি. সো নিক্খমিত্ৱা তং ভিক্খুং পুচ্ছি – ‘‘আৱুসো, ময্হং চীৱৰং কেন অৱহট’’ন্তি? সো এৱমাহ – ‘‘মযা অৱহট’’ন্তি. ‘‘সো তং আদিযি, অস্সমণোসি ত্ৱ’’ন্তি. তস্স কুক্কুচ্চং অহোসি…পে…. ভগৱতো এতমত্থং আৰোচেসি. ‘‘কিংচিত্তো ত্ৱং, ভিক্খূ’’তি? ‘‘নিৰুত্তিপথো অহং, ভগৱা’’তি. ‘‘অনাপত্তি, ভিক্খু, নিৰুত্তিপথে’’তি.

তেন খো পন সমযেন অঞ্ঞতৰো ভিক্খু পীঠে চীৱৰং নিক্খিপিত্ৱা. পীঠে নিসীদনং নিক্খিপিত্ৱা… হেট্ঠাপীঠে পত্তং নিক্খিপিত্ৱা ৱিহাৰং পাৱিসি. অঞ্ঞতৰো ভিক্খু – ‘‘মাযং পত্তো নস্সী’’তি পটিসামেসি. সো নিক্খমিত্ৱা তং ভিক্খুং পুচ্ছি – ‘‘আৱুসো, ময্হং পত্তো কেন অৱহটো’’তি? সো এৱমাহ – ‘‘মযা অৱহটো’’তি. ‘‘সো তং আদিযি, অস্সমণোসি ত্ৱ’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, নিৰুত্তিপথে’’তি.

তেন খো পন সমযেন অঞ্ঞতৰা ভিক্খুনী ৱতিযা চীৱৰং পত্থৰিত্ৱা ৱিহাৰং পাৱিসি. অঞ্ঞতৰা ভিক্খুনী – ‘মাযিদং চীৱৰং নস্সী’তি পটিসামেসি. সা নিক্খমিত্ৱা তং ভিক্খুনিং পুচ্ছি – ‘‘অয্যে, ময্হং চীৱৰং কেন অৱহট’’ন্তি? সা এৱমাহ – ‘‘মযা অৱহট’’ন্তি. ‘‘সা তং আদিযি, অস্সমণীসি ত্ৱ’’ন্তি. তস্সা কুক্কুচ্চং অহোসি. অথ খো সা ভিক্খুনী ভিক্খুনীনং এতমত্থং আৰোচেসি. ভিক্খুনিযো ভিক্খূনং এতমত্থং আৰোচেসুং. ভিক্খূ ভগৱতো এতমত্থং আৰোচেসুং…পে… ‘‘অনাপত্তি, ভিক্খৱে, নিৰুত্তিপথে’’তি.

১৩৬. তেন খো পন সমযেন অঞ্ঞতৰো ভিক্খু ৱাতমণ্ডলিকায উক্খিত্তং সাটকং পস্সিত্ৱা সামিকানং দস্সামীতি, অগ্গহেসি. সামিকা তং ভিক্খুং চোদেসুং – ‘‘অস্সমণোসি ত্ৱ’’ন্তি. তস্স কুক্কুচ্চং অহোসি…পে… ‘‘কিংচিত্তো ত্ৱং ভিক্খূ’’তি? ‘‘অথেয্যচিত্তো অহং, ভগৱা’’তি. অনাপত্তি, ভিক্খু, অথেয্যচিত্তস্সা’’তি.

তেন খো পন সমযেন অঞ্ঞতৰো ভিক্খু ৱাতমণ্ডলিকায উক্খিত্তং ৱেঠনং পস্সিত্ৱা ‘পুৰে সামিকা পস্সন্তী’তি থেয্যচিত্তো অগ্গহেসি. সামিকা তং ভিক্খুং চোদেসুং – ‘‘অস্সমণোসি ত্ৱ’’ন্তি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

১৩৭. তেন খো পন সমযেন অঞ্ঞতৰো ভিক্খু সুসানং গন্ত্ৱা অভিন্নে সৰীৰে পংসুকূলং অগ্গহেসি. তস্মিঞ্চ সৰীৰে পেতো অধিৱত্থো হোতি. অথ খো সো পেতো তং ভিক্খুং এতদৱোচ – ‘‘মা, ভন্তে, ময্হং সাটকং অগ্গহেসী’’তি. সো ভিক্খু অনাদিযন্তো অগমাসি. অথ খো তং সৰীৰং উট্ঠহিত্ৱা তস্স ভিক্খুনো পিট্ঠিতো পিট্ঠিতো অনুবন্ধি. অথ খো সো ভিক্খু ৱিহাৰং পৱিসিত্ৱা দ্ৱাৰং থকেসি. অথ খো তং সৰীৰং তত্থেৱ পৰিপতি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স. ন চ, ভিক্খৱে, অভিন্নে সৰীৰে পংসুকূলং গহেতব্বং. সো গণ্হেয্য, আপত্তি দুক্কটস্সা’’তি.

১৩৮. তেন খো পন সমযেন অঞ্ঞতৰো ভিক্খু সঙ্ঘস্স চীৱৰে ভাজীযমানে থেয্যচিত্তো কুসং সঙ্কামেত্ৱা চীৱৰং অগ্গহেসি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

১৩৯. তেন খো পন সমযেন আযস্মা আনন্দো জন্তাঘৰে অঞ্ঞতৰস্স ভিক্খুনো অন্তৰৱাসকং অত্তনো মঞ্ঞমানো নিৱাসেসি. অথ খো সো ভিক্খু আযস্মন্তং আনন্দং এতদৱোচ – ‘‘কিস্স মে ত্ৱং, আৱুসো আনন্দ, অন্তৰৱাসকং নিৱাসেসী’’তি? ‘‘সকসঞ্ঞী অহং, আৱুসো’’তি. ভগৱতো এতমত্থং আৰোচেসুং. ‘‘অনাপত্তি, ভিক্খৱে, সকসঞ্ঞিস্সা’’তি.

১৪০. তেন খো পন সমযেন সম্বহুলা ভিক্খূ গিজ্ঝকূটা পব্বতা ওৰোহন্তা সীহৱিঘাসং পস্সিত্ৱা পচাপেত্ৱা পৰিভুঞ্জিংসু. তেসং কুক্কুচ্চং অহোসি…পে… ‘‘অনাপত্তি, ভিক্খৱে, সীহৱিঘাসে’’তি.

তেন খো পন সমযেন সম্বহুলা ভিক্খূ গিজ্ঝকূটা পব্বতা ওৰোহন্তা ব্যগ্ঘৱিঘাসং পস্সিত্ৱা… দীপিৱিঘাসং পস্সিত্ৱা… তৰচ্ছৱিঘাসং পস্সিত্ৱা… কোকৱিঘাসং পস্সিত্ৱা পচাপেত্ৱা পৰিভুঞ্জিংসু. তেসং কুক্কুচ্চং অহোসি…পে… ‘‘অনাপত্তি, ভিক্খৱে, তিৰচ্ছানগতপৰিগ্গহে’’তি.

১৪১. তেন খো পন সমযেন অঞ্ঞতৰো ভিক্খু সঙ্ঘস্স ওদনে ভাজীযমানে – ‘অপৰস্স ভাগং দেহী’তি অমূলকং অগ্গহেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স. আপত্তি সম্পজানমুসাৱাদে পাচিত্তিযস্সা’’তি.

তেন খো পন সমযেন অঞ্ঞতৰো ভিক্খু সঙ্ঘস্স খাদনীযে ভাজিযমানে… সঙ্ঘস্স পূৱে ভাজিযমানে… সঙ্ঘস্স উচ্ছুম্হি ভাজিযমানে… সঙ্ঘস্স তিম্বৰূসকে ভাজিযমানে – ‘অপৰস্স ভাগং দেহী’তি অমূলকং অগ্গহেসি. তস্স কুক্কুচ্চং অহোসি…পে…. ‘‘অনাপত্তি, ভিক্খু, পাৰাজিকস্স. আপত্তি সম্পজানমুসাৱাদে পাচিত্তিযস্সা’’তি.

১৪২. তেন খো পন সমযেন অঞ্ঞতৰো ভিক্খু দুব্ভিক্খে ওদনীযঘৰং পৱিসিত্ৱা পত্তপূৰং ওদনং থেয্যচিত্তো অৱহৰি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

তেন খো পন সমযেন অঞ্ঞতৰো ভিক্খু দুব্ভিক্খে সূনঘৰং [সূনাঘৰং (সী. স্যা)] পৱিসিত্ৱা পত্তপূৰং মংসং থেয্যচিত্তো অৱহৰি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

তেন খো পন সমযেন অঞ্ঞতৰো ভিক্খু দুব্ভিক্খে পূৱঘৰং পৱিসিত্ৱা পত্তপূৰং পূৱং থেয্যচিত্তো অৱহৰি…পে… পত্তপূৰা সক্খলিযো থেয্যচিত্তো অৱহৰি…পে… পত্তপূৰে মোদকে থেয্যচিত্তো অৱহৰি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

১৪৩. তেন খো পন সমযেন অঞ্ঞতৰো ভিক্খু দিৱা পৰিক্খাৰং পস্সিত্ৱা নিমিত্তং অকাসি – ‘‘ৰত্তিং অৱহৰিস্সামী’’তি. সো তং মঞ্ঞমানো তং অৱহৰি…পে… তং মঞ্ঞমানো অঞ্ঞং অৱহৰি…পে… অঞ্ঞং মঞ্ঞমানো তং অৱহৰি…পে… অঞ্ঞং মঞ্ঞমানো অঞ্ঞং অৱহৰি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

তেন খো পন সমযেন অঞ্ঞতৰো ভিক্খু দিৱা পৰিক্খাৰং পস্সিত্ৱা নিমিত্তং অকাসি – ‘‘ৰত্তিং অৱহৰিস্সামী’’তি. সো তং মঞ্ঞমানো অত্তনো পৰিক্খাৰং অৱহৰি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স. আপত্তি দুক্কটস্সা’’তি.

১৪৪. তেন খো পন সমযেন অঞ্ঞতৰো ভিক্খু পীঠে থৱিকং পস্সিত্ৱা – ‘‘ইতো গণ্হন্তো পাৰাজিকো ভৱিস্সামী’’তি সহ পীঠকেন সঙ্কামেত্ৱা অগ্গহেসি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

তেন খো পন সমযেন অঞ্ঞতৰো ভিক্খু সঙ্ঘস্স ভিসিং থেয্যচিত্তো অৱহৰি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

১৪৫. তেন খো পন সমযেন অঞ্ঞতৰো ভিক্খু চীৱৰৱংসে চীৱৰং থেয্যচিত্তো অৱহৰি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

তেন খো পন সমযেন অঞ্ঞতৰো ভিক্খু ৱিহাৰে চীৱৰং অৱহৰিত্ৱা – ‘‘ইতো নিক্খমন্তো পাৰাজিকো ভৱিস্সামী’’তি ৱিহাৰা ন নিক্খমি…পে… ভগৱতো এতমত্থং আৰোচেসুং. ‘‘নিক্খমি [নিক্খমেয্য (সী. স্যা.)] ৱা সো, ভিক্খৱে, মোঘপুৰিসো ন ৱা নিক্খমি [নিক্খমেয্য (সী. স্যা.)], আপত্তি পাৰাজিকস্সা’’তি.

১৪৬. তেন খো পন সমযেন দ্ৱে ভিক্খূ সহাযকা হোন্তি. একো ভিক্খু গামং পিণ্ডায পাৱিসি. দুতিযো ভিক্খু সঙ্ঘস্স খাদনীযে ভাজীযমানে সহাযকস্স ভাগং গহেত্ৱা তস্স ৱিস্সসন্তো পৰিভুঞ্জি. সো জানিত্ৱা তং চোদেসি – ‘‘অস্সমণোসি ত্ৱ’’ন্তি. তস্স কুক্কুচ্চং অহোসি…পে… ‘‘কিং চিত্তো ত্ৱং, ভিক্খূ’’তি? ‘‘ৱিস্সাসগ্গাহো অহং, ভগৱা’’তি. ‘‘অনাপত্তি, ভিক্খু, ৱিস্সাসগ্গাহে’’তি.

১৪৭. তেন খো পন সমযেন সম্বহুলা ভিক্খূ চীৱৰকম্মং কৰোন্তি. সঙ্ঘস্স খাদনীযে ভাজীযমানে সব্বেসং পটিৱিসা আহৰিত্ৱা উপনিক্খিত্তা হোন্তি. অঞ্ঞতৰো ভিক্খু অঞ্ঞতৰস্স ভিক্খুনো পটিৱিসং অত্তনো মঞ্ঞমানো পৰিভুঞ্জি. সো জানিত্ৱা তং চোদেসি – ‘‘অস্সমণোসি ত্ৱ’’ন্তি. তস্স কুক্কুচ্চং অহোসি…পে… ‘‘কিংচিত্তো ত্ৱং, ভিক্খূ’’তি? ‘‘সকসঞ্ঞী অহং, ভগৱা’’তি. ‘‘অনাপত্তি, ভিক্খু, সকসঞ্ঞিস্সা’’তি.

তেন খো পন সমযেন সম্বহুলা ভিক্খূ চীৱৰকম্মং কৰোন্তি. সঙ্ঘস্স খাদনীযে ভাজিযমানে অঞ্ঞতৰস্স ভিক্খুনো পত্তেন অঞ্ঞতৰস্স ভিক্খুনো পটিৱিসো আহৰিত্ৱা উপনিক্খিত্তো হোতি. পত্তসামিকো ভিক্খু অত্তনো মঞ্ঞমানো পৰিভুঞ্জি. সো জানিত্ৱা তং চোদেসি – ‘‘অস্সমণোসি ত্ৱ’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, সকসঞ্ঞিস্সা’’তি.

১৪৮. তেন খো পন সমযেন অম্বচোৰকা অম্বং পাতেত্ৱা ভণ্ডিকং আদায অগমংসু. সামিকা তে চোৰকে অনুবন্ধিংসু. চোৰকা সামিকে পস্সিত্ৱা ভণ্ডিকং পাতেত্ৱা পলাযিংসু. ভিক্খূ পংসুকূলসঞ্ঞিনো পটিগ্গহাপেত্ৱা পৰিভুঞ্জিংসু. সামিকা তে ভিক্খূ চোদেসুং – ‘‘অস্সমণাত্থ তুম্হে’’তি. তেসং কুক্কুচ্চং অহোসি…পে… ভগৱতো এতমত্থং আৰোচেসুং. ‘‘কিংচিত্তা তুম্হে, ভিক্খৱে’’তি? ‘‘পংসুকূলসঞ্ঞিনো মযং, ভগৱা’’তি. ‘‘অনাপত্তি, ভিক্খৱে, পংসুকূলসঞ্ঞিস্সা’’তি.

তেন খো পন সমযেন জম্বুচোৰকা… লবুজচোৰকা… পনসচোৰকা… তালপক্কচোৰকা… উচ্ছুচোৰকা… তিম্বৰূসকচোৰকা তিম্বৰূসকে উচ্চিনিত্ৱা ভণ্ডিকং আদায অগমংসু. সামিকা তে চোৰকে অনুবন্ধিংসু. চোৰকা সামিকে পস্সিত্ৱা ভণ্ডিকং পাতেত্ৱা পলাযিংসু. ভিক্খূ পংসুকূলসঞ্ঞিনো পটিগ্গহাপেত্ৱা পৰিভুঞ্জিংসু. সামিকা তে ভিক্খূ চোদেসুং – ‘‘অস্সমণাত্থ তুম্হে’’তি. তেসং কুক্কুচ্চং অহোসি…পে… ‘‘অনাপত্তি, ভিক্খৱে, পংসুকূলসঞ্ঞিস্সা’’তি.

তেন খো পন সমযেন অম্বচোৰকা অম্বং পাতেত্ৱা ভণ্ডিকং আদায অগমংসু. সামিকা তে চোৰকে অনুবন্ধিংসু. চোৰকা সামিকে পস্সিত্ৱা ভণ্ডিকং পাতেত্ৱা পলাযিংসু. ভিক্খূ – ‘পুৰে সামিকা পস্সন্তী’তি, থেয্যচিত্তা পৰিভুঞ্জিংসু. সামিকা তে ভিক্খূ চোদেসুং – ‘‘অস্সমণাত্থ তুম্হে’’তি. তেসং কুক্কুচ্চং অহোসি…পে… ‘‘আপত্তিং তুম্হে, ভিক্খৱে, আপন্না পাৰাজিক’’ন্তি.

তেন খো পন সমযেন জম্বুচোৰকা… লবুজচোৰকা… পনসচোৰকা… তালপক্কচোৰকা… উচ্ছুচোৰকা… তিম্বৰূসকচোৰকা তিম্বৰূসকে উচ্চিনিত্ৱা ভণ্ডিকং আদায অগমংসু. সামিকা তে চোৰকে অনুবন্ধিংসু. চোৰকা সামিকে পস্সিত্ৱা ভণ্ডিকং পাতেত্ৱা পলাযিংসু. ভিক্খূ – ‘পুৰে সামিকা পস্সন্তী’তি, থেয্যচিত্তা পৰিভুঞ্জিংসু. সামিকা তে ভিক্খূ চোদেসুং – ‘‘অস্সমণাত্থ তুম্হে’’তি. তেসং কুক্কুচ্চং অহোসি…পে… ‘‘আপত্তিং তুম্হে, ভিক্খৱে, আপন্না পাৰাজিক’’ন্তি.

তেন খো পন সমযেন অঞ্ঞতৰো ভিক্খু সঙ্ঘস্স অম্বং থেয্যচিত্তো অৱহৰি… সঙ্ঘস্স জম্বুং… সঙ্ঘস্স লবুজং… সঙ্ঘস্স পনসং… সঙ্ঘস্স তালপক্কং… সঙ্ঘস্স উচ্ছুং… সঙ্ঘস্স তিম্বৰূসকং থেয্যচিত্তো অৱহৰি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

১৪৯. তেন খো পন সমযেন অঞ্ঞতৰো ভিক্খু পুপ্ফাৰামং গন্ত্ৱা ওচিতং পুপ্ফং পঞ্চমাসগ্ঘনকং থেয্যচিত্তো অৱহৰি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু, আপন্নো পাৰাজিক’’ন্তি.

তেন খো পন সমযেন অঞ্ঞতৰো ভিক্খু পুপ্ফাৰামং গন্ত্ৱা পুপ্ফং ওচিনিত্ৱা পঞ্চমাসগ্ঘনকং থেয্যচিত্তো অৱহৰি. তস্স কুক্কুচ্চং অহোসি…পে… ‘‘আপত্তিং ত্ৱং, ভিক্খু আপন্নো পাৰাজিক’’ন্তি.

১৫০. তেন খো পন সমযেন অঞ্ঞতৰো ভিক্খু গামকং গচ্ছন্তো অঞ্ঞতৰং ভিক্খুং এতদৱোচ – ‘‘আৱুসো, তুয্হং উপট্ঠাককুলং ৱুত্তো ৱজ্জেমী’’তি. সো গন্ত্ৱা একং সাটকং আহৰাপেত্ৱা অত্তনা পৰিভুঞ্জি. সো জানিত্ৱা তং চোদেসি – ‘‘অস্সমণোসি ত্ৱ’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স. ন চ, ভিক্খৱে, ৱুত্তো ৱজ্জেমীতি ৱত্তব্বো. যো ৱদেয্য, আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু গামকং গচ্ছতি. অঞ্ঞতৰো ভিক্খু তং ভিক্খুং এতদৱোচ – ‘‘আৱুসো, ময্হং উপট্ঠাককুলং ৱুত্তো ৱজ্জেহী’’তি. সো গন্ত্ৱা যুগসাটকং আহৰাপেত্ৱা একং অত্তনা পৰিভুঞ্জি, একং তস্স ভিক্খুনো অদাসি. সো জানিত্ৱা তং চোদেসি – ‘‘অস্সমণোসি ত্ৱ’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স. ন চ, ভিক্খৱে, ৱুত্তো ৱজ্জেহীতি ৱত্তব্বো. যো ৱদেয্য, আপত্তি দুক্কটস্সা’’তি.

তেন খো পন সমযেন অঞ্ঞতৰো ভিক্খু গামকং গচ্ছন্তো অঞ্ঞতৰং ভিক্খুং এতদৱোচ – ‘‘আৱুসো, তুয্হং উপট্ঠাককুলং ৱুত্তো ৱজ্জেমী’’তি. সোপি এৱমাহ – ‘‘ৱুত্তো ৱজ্জেহী’’তি. সো গন্ত্ৱা আড়্হকং সপ্পিং তুলং গুড়ং দোণং তণ্ডুলং আহৰাপেত্ৱা অত্তনা পৰিভুঞ্জি. সো জানিত্ৱা তং চোদেসি – ‘‘অস্সমণোসি ত্ৱ’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, পাৰাজিকস্স. ন চ, ভিক্খৱে, ৱুত্তো ৱজ্জেমীতি ৱত্তব্বো, ন চ ৱুত্তো ৱজ্জেহীতি ৱত্তব্বো. যো ৱদেয্য, আপত্তি দুক্কটস্সা’’তি.