১. পৰিমণ্ডলৱগ্গো

ইমে খো পনায্যাযো সেখিযা

ধম্মা উদ্দেসং আগচ্ছন্তি.

১২৪০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো পুৰতোপি পচ্ছতোপি ওলম্বেন্তী নিৱাসেন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো পুৰতোপি পচ্ছতোপি ওলম্বেন্তী নিৱাসেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো পুৰতোপি পচ্ছতোপি ওলম্বেন্তী নিৱাসেস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো পুৰতোপি পচ্ছতোপি ওলম্বেন্তী নিৱাসেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো পুৰতোপি পচ্ছতোপি ওলম্বেন্তী নিৱাসেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

‘‘পৰিমণ্ডলং নিৱাসেস্সামীতি সিক্খা কৰণীযা’’তি.

পৰিমণ্ডলং নিৱাসেতব্বং নাভিমণ্ডলং জাণুমণ্ডলং পটিচ্ছাদেন্তিযা. যা অনাদৰিযং পটিচ্চ পুৰতো ৱা পচ্ছতো ৱা ওলম্বেন্তী নিৱাসেতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তিযা, গিলানায, আপদাসু, উম্মত্তিকায, আদিকম্মিকাযাতি…পে… (সংখিত্তং).