৭. পাদুকৱগ্গো

১২৪১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো উদকে উচ্চাৰম্পি পস্সাৱম্পি খেড়ম্পি কৰোন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো উদকে উচ্চাৰম্পি পস্সাৱম্পি খেড়ম্পি কৰিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা, তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো উদকে উচ্চাৰম্পি পস্সাৱম্পি খেড়ম্পি কৰিস্সন্তী’’তি! অথ খো ভিক্খুনিযো ভিক্খূনং এতমত্থং আৰোচেসুং. ভিক্খূ [যে তে ভিক্খূ…পে… (?)] ভগৱতো এতমত্থং আৰোচেসুং. অথ খো ভগৱা…পে… ভিক্খূ পটিপুচ্ছি – ‘‘সচ্চং কিৰ, ভিক্খৱে, ছব্বগ্গিযা ভিক্খুনিযো উদকে উচ্চাৰম্পি পস্সাৱম্পি খেড়ম্পি কৰোন্তী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো উদকে উচ্চাৰম্পি পস্সাৱম্পি খেড়ম্পি কৰিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

‘‘ন উদকে উচ্চাৰং ৱা পস্সাৱং ৱা খেড়ং ৱা কৰিস্সামীতি সিক্খা কৰণীযা’’তি.

এৱঞ্চিদং ভগৱতা ভিক্খুনীনং সিক্খাপদং পঞ্ঞত্তং হোতি.

তেন খো পন সমযেন গিলানা ভিক্খুনিযো উদকে উচ্চাৰম্পি পস্সাৱম্পি খেড়ম্পি কাতুং কুক্কুচ্চাযন্তি. ভগৱতো এতমত্থং আৰোচেসুং…পে… অনুজানামি, ভিক্খৱে, গিলানায ভিক্খুনিযা উদকে উচ্চাৰম্পি পস্সাৱম্পি খেড়ম্পি কাতুং. এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

‘‘ন উদকে অগিলানা উচ্চাৰং ৱা পস্সাৱং ৱা খেড়ং ৱা কৰিস্সামীতি সিক্খা কৰণীযা’’তি.

ন উদকে অগিলানায উচ্চাৰো ৱা পস্সাৱো ৱা খেড়ো ৱা কাতব্বো. যা অনাদৰিযং পটিচ্চ উদকে অগিলানা উচ্চাৰং ৱা পস্সাৱং ৱা খেড়ং ৱা কৰোতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তিযা, গিলানায, থলে কতো উদকং ওত্থৰতি, আপদাসু, উম্মত্তিকায, খিত্তচিত্তায, ৱেদনাট্টায, আদিকম্মিকাযাতি.

পন্নৰসমসিক্খাপদং নিট্ঠিতং.

পাদুকৱগ্গো সত্তমো.

উদ্দিট্ঠা খো, অয্যাযো, সেখিযা ধম্মা. তত্থায্যাযো পুচ্ছামি – ‘‘কচ্চিত্থ পৰিসুদ্ধা’’? দুতিযম্পি পুচ্ছামি – ‘‘কচ্চিত্থ পৰিসুদ্ধা’’? ততিযম্পি পুচ্ছামি – ‘‘কচ্চিত্থ পৰিসুদ্ধা’’? পৰিসুদ্ধেত্থায্যাযো, তস্মা তুণ্হী, এৱমেতং ধাৰযামীতি.

সেখিযকণ্ডং নিট্ঠিতং.