১. পাৰাজিককণ্ডং (ভিক্খুনীৱিভঙ্গো)

১. পঠমপাৰাজিকং

৬৫৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন সাড়্হো মিগাৰনত্তা ভিক্খুনিসঙ্ঘস্স ৱিহাৰং কত্তুকামো হোতি. অথ খো সাড়্হো মিগাৰনত্তা ভিক্খুনিযো উপসঙ্কমিত্ৱা এতদৱোচ – ‘‘ইচ্ছামহং, অয্যে, ভিক্খুনিসঙ্ঘস্স ৱিহাৰং কাতুং. দেথ মে নৱকম্মিকং ভিক্খুনি’’ন্তি. তেন খো পন সমযেন চতস্সো ভগিনিযো ভিক্খুনীসু পব্বজিতা হোন্তি – নন্দা, নন্দৱতী, সুন্দৰীনন্দা, থুল্লনন্দাতি. তাসু সুন্দৰীনন্দা ভিক্খুনী তৰুণপব্বজিতা অভিৰূপা হোতি দস্সনীযা পাসাদিকা পণ্ডিতা ব্যত্তা মেধাৱিনী দক্খা অনলসা, তত্ৰুপাযায ৱীমংসায সমন্নাগতা, অলং কাতুং অলং সংৱিধাতুং. অথ খো ভিক্খুনিসঙ্ঘো সুন্দৰীনন্দং ভিক্খুনিং সম্মন্নিত্ৱা সাড়্হস্স মিগাৰনত্তুনো নৱকম্মিকং অদাসি. তেন খো পন সমযেন সুন্দৰীনন্দা ভিক্খুনী সাড়্হস্স মিগাৰনত্তুনো নিৱেসনং অভিক্খণং গচ্ছতি – ‘‘ৱাসিং দেথ, পৰসুং [ফৰসুং (স্যা. ক.)] দেথ, কুঠাৰিং [কুধাৰিং (ক.)] দেথ, কুদ্দালং দেথ, নিখাদনং দেথা’’তি. সাড়্হোপি মিগাৰনত্তা ভিক্খুনুপস্সযং অভিক্খণং গচ্ছতি কতাকতং জানিতুং. তে অভিণ্হদস্সনেন পটিবদ্ধচিত্তা অহেসুং.

অথ খো সাড়্হো মিগাৰনত্তা সুন্দৰীনন্দং ভিক্খুনিং দূসেতুং ওকাসং অলভমানো এতদেৱত্থায ভিক্খুনিসঙ্ঘস্স ভত্তং অকাসি. অথ খো সাড়্হো মিগাৰনত্তা ভত্তগ্গে আসনং পঞ্ঞপেন্তো – ‘‘এত্তকা ভিক্খুনিযো অয্যায সুন্দৰীনন্দায ৱুড্ঢতৰা’’তি একমন্তং আসনং পঞ্ঞপেসি ‘‘এত্তকা নৱকতৰা’’তি – একমন্তং আসনং পঞ্ঞপেসি. পটিচ্ছন্নে ওকাসে নিকূটে সুন্দৰীনন্দায ভিক্খুনিযা আসনং পঞ্ঞপেসি, যথা থেৰা ভিক্খুনিযো জানেয্যুং – ‘‘নৱকানং ভিক্খুনীনং সন্তিকে নিসিন্না’’তি; নৱকাপি ভিক্খুনিযো জানেয্যুং – ‘‘থেৰানং ভিক্খুনীনং সন্তিকে নিসিন্না’’তি. অথ খো সাড়্হো মিগাৰনত্তা ভিক্খুনিসঙ্ঘস্স কালং আৰোচাপেসি – ‘‘কালো, অয্যে, নিট্ঠিতং ভত্ত’’ন্তি. সুন্দৰীনন্দা ভিক্খুনী সল্লক্খেত্ৱা – ‘‘ন বহুকতো সাড়্হো মিগাৰনত্তা ভিক্খুনিসঙ্ঘস্স ভত্তং অকাসি; মং সো দূসেতুকামো. সচাহং গমিস্সামি ৱিস্সৰো মে ভৱিস্সতী’’তি, অন্তেৱাসিনিং ভিক্খুনিং আণাপেসি – ‘‘গচ্ছ মে পিণ্ডপাতং নীহৰ. যো চে মং পুচ্ছতি, ‘গিলানা’তি পটিৱেদেহী’’তি. ‘‘এৱং, অয্যে’’তি খো সা ভিক্খুনী সুন্দৰীনন্দায ভিক্খুনিযা পচ্চস্সোসি.

তেন খো পন সমযেন সাড়্হো মিগাৰনত্তা বহিদ্ৱাৰকোট্ঠকে ঠিতো হোতি সুন্দৰীনন্দং ভিক্খুনিং পটিপুচ্ছন্তো – ‘‘কহং, অয্যে, অয্যা সুন্দৰীনন্দা? কহং, অয্যে, অয্যা সুন্দৰীনন্দা’’তি? এৱং ৱুত্তে সুন্দৰীনন্দায ভিক্খুনিযা অন্তেৱাসিনী ভিক্খুনী সাড়্হং মিগাৰনত্তাৰং এতদৱোচ – ‘‘গিলানাৱুসো; পিণ্ডপাতং নীহৰিস্সামী’’তি. অথ খো সাড়্হো মিগাৰনত্তা – ‘‘যম্পাহং অত্থায [যংপাহং (স্যা.)] ভিক্খুনিসঙ্ঘস্স ভত্তং অকাসিং অয্যায সুন্দৰীনন্দায কাৰণা’’তি মনুস্সে আণাপেত্ৱা – ‘‘ভিক্খুনিসঙ্ঘং ভত্তেন পৰিৱিসথা’’তি ৱত্ৱা যেন ভিক্খুনুপস্সযো তেনুপসঙ্কমি. তেন খো পন সমযেন সুন্দৰীনন্দা ভিক্খুনী বহাৰামকোট্ঠকে ঠিতা হোতি সাড়্হং মিগাৰনত্তাৰং পতিমানেন্তী. অদ্দসা খো সুন্দৰীনন্দা ভিক্খুনী সাড়্হং মিগাৰনত্তাৰং দূৰতোৱ আগচ্ছন্তং. দিস্ৱান উপস্সযং পৱিসিত্ৱা সসীসং পাৰুপিত্ৱা মঞ্চকে নিপজ্জি. অথ খো সাড়্হো মিগাৰনত্তা যেন সুন্দৰীনন্দা ভিক্খুনী তেনুপসঙ্কমি; উপসঙ্কমিত্ৱা সুন্দৰীনন্দং ভিক্খুনিং এতদৱোচ – ‘‘কিং তে, অয্যে, অফাসু, কিস্স নিপন্নাসী’’তি? ‘‘এৱঞ্হেতং, আৱুসো, হোতি যা অনিচ্ছন্তং ইচ্ছতী’’তি. ‘‘ক্যাহং তং, অয্যে, ন ইচ্ছিস্সামি? অপি চাহং ওকাসং ন লভামি তং দূসেতু’’ন্তি. অৱস্সুতো অৱস্সুতায সুন্দৰীনন্দায ভিক্খুনিযা কাযসংসগ্গং সমাপজ্জি.

তেন খো পন সমযেন অঞ্ঞতৰা ভিক্খুনী জৰাদুব্বলা চৰণগিলানা সুন্দৰীনন্দায ভিক্খুনিযা অৱিদূৰে নিপন্না হোতি. অদ্দসা খো সা ভিক্খুনী সাড়্হং মিগাৰনত্তাৰং অৱস্সুতং অৱস্সুতায সুন্দৰীনন্দায ভিক্খুনিযা কাযসংসগ্গং সমাপজ্জন্তং. দিস্ৱান উজ্ঝাযতি খিয্যতি ৱিপাচেতি – ‘‘কথঞ্হি নাম অয্যা সুন্দৰীনন্দা অৱস্সুতা অৱস্সুতস্স পুৰিসপুগ্গলস্স কাযসংসগ্গং সাদিযিস্সতী’’তি! অথ খো সা ভিক্খুনী ভিক্খুনীনং এতমত্থং আৰোচেসি. যা তা ভিক্খুনিযো অপ্পিচ্ছা সন্তুট্ঠা লজ্জিনিযো কুক্কুচ্চিকা সিক্খাকামা তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা সুন্দৰীনন্দা অৱস্সুতা অৱস্সুতস্স পুৰিসপুগ্গলস্স কাযসংসগ্গং সাদিযিস্সতী’’তি! অথ খো তা ভিক্খুনিযো ভিক্খূনং এতমত্থং আৰোচেসুং. যে তে ভিক্খূ অপ্পিচ্ছা সন্তুট্ঠা লজ্জিনো কুক্কুচ্চকা সিক্খাকামা তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সুন্দৰীনন্দা ভিক্খুনী অৱস্সুতা অৱস্সুতস্স পুৰিসপুগ্গলস্স কাযসংসগ্গং সাদিযিস্সতী’’তি!

অথ খো তে ভিক্খূ সুন্দৰীনন্দং ভিক্খুনিং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা ভিক্খূ পটিপুচ্ছি – ‘‘সচ্চং কিৰ, ভিক্খৱে, সুন্দৰীনন্দা ভিক্খুনী অৱস্সুতা অৱস্সুতস্স পুৰিসপুগ্গলস্স কাযসংসগ্গং সাদিযতী’’তি [সাদিযীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা – ‘‘অননুচ্ছৱিকং, ভিক্খৱে, সুন্দৰীনন্দায ভিক্খুনিযা অননুলোমিকং অপ্পতিৰূপং অস্সামণকং অকপ্পিযং অকৰণীযং. কথঞ্হি নাম, ভিক্খৱে, সুন্দৰীনন্দা ভিক্খুনী অৱস্সুতা অৱস্সুতস্স পুৰিসপুগ্গলস্স কাযসংসগ্গং সাদিযিস্সতি! নেতং, ভিক্খৱে, অপ্পসন্নানং ৱা পসাদায পসন্নানং ৱা ভিয্যোভাৱায. অথ খ্ৱেতং, ভিক্খৱে, অপ্পসন্নানঞ্চেৱ অপ্পসাদায পসন্নানঞ্চ একচ্চানং অঞ্ঞথত্তাযা’’তি. অথ খো ভগৱা সুন্দৰীনন্দং ভিক্খুনিং অনেকপৰিযাযেন ৱিগৰহিত্ৱা দুব্ভৰতায দুপ্পোসতায মহিচ্ছতায অসন্তুট্ঠিতায [অসন্তুট্ঠতায (স্যা.), অসন্তুট্ঠিযা (ক.)] সঙ্গণিকায কোসজ্জস্স অৱণ্ণং ভাসিত্ৱা, অনেকপৰিযাযেন সুভৰতায সুপোসতায অপ্পিচ্ছস্স সন্তুট্ঠস্স [সন্তুট্ঠিযা (ক.)] সল্লেখস্স ধুতস্স পাসাদিকস্স অপচযস্স ৱীৰিযাৰম্ভস্স ৱণ্ণং ভাসিত্ৱা, ভিক্খূনং তদনুচ্ছৱিকং তদনুলোমিকং ধম্মিং কথং কত্ৱা ভিক্খূ আমন্তেসি – ‘‘তেন হি, ভিক্খৱে, ভিক্খুনীনং সিক্খাপদং পঞ্ঞপেস্সামি দস অত্থৱসে পটিচ্চ – সঙ্ঘসুট্ঠুতায, সঙ্ঘফাসুতায, দুম্মঙ্কূনং ভিক্খুনীনং নিগ্গহায, পেসলানং ভিক্খুনীনং ফাসুৱিহাৰায, দিট্ঠধম্মিকানং আসৱানং সংৱৰায, সম্পৰাযিকানং আসৱানং পটিঘাতায, অপ্পসন্নানং পসাদায, পসন্নানং ভিয্যোভাৱায, সদ্ধম্মট্ঠিতিযা ৱিনযানুগ্গহায. এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৬৫৭. ‘‘যা পন ভিক্খুনী অৱস্সুতা অৱস্সুতস্স পুৰিসপুগ্গলস্স অধক্খকং উব্ভজাণুমণ্ডলং আমসনং ৱা পৰামসনং ৱা গহণং ৱা ছুপনং ৱা পটিপীড়নং ৱা সাদিযেয্য, অযম্পি পাৰাজিকা হোতি অসংৱাসা উব্ভজাণুমণ্ডলিকা’’তি.

৬৫৮. যা পনাতি যা যাদিসা যথাযুত্তা যথাজচ্চা যথানামা যথাগোত্তা যথাসীলা যথাৱিহাৰিনী যথাগোচৰা থেৰা ৱা নৱা ৱা মজ্ঝিমা ৱা, এসা ৱুচ্চতি যা পনাতি.

ভিক্খুনীতি ভিক্খিকাতি ভিক্খুনী; ভিক্খাচৰিযং অজ্ঝুপগতাতি ভিক্খুনী; ভিন্নপটধৰাতি ভিক্খুনী; সমঞ্ঞায ভিক্খুনী; পটিঞ্ঞায ভিক্খুনী; এহি ভিক্খুনীতি ভিক্খুনী; তীহি সৰণগমনেহি উপসম্পন্নাতি ভিক্খুনী; ভদ্ৰা ভিক্খুনী; সাৰা ভিক্খুনী; সেখা ভিক্খুনী; অসেখা ভিক্খুনী; সমগ্গেন উভতোসঙ্ঘেন ঞত্তিচতুত্থেন কম্মেন অকুপ্পেন ঠানাৰহেন উপসম্পন্নাতি ভিক্খুনী. তত্ৰ যাযং ভিক্খুনী সমগ্গেন উভতোসঙ্ঘেন ঞত্তিচতুত্থেন কম্মেন অকুপ্পেন ঠানাৰহেন উপসম্পন্না, অযং ইমস্মিং অত্থে অধিপ্পেতা ভিক্খুনীতি.

অৱস্সুতা নাম সাৰত্তা অপেক্খৱতী পটিবদ্ধচিত্তা.

অৱস্সুতো নাম সাৰত্তো অপেক্খৱা পটিবদ্ধচিত্তো.

পুৰিসপুগ্গলো নাম মনুস্সপুৰিসো ন যক্খো ন পেতো ন তিৰচ্ছানগতো ৱিঞ্ঞূ পটিবলো কাযসংসগ্গং সমাপজ্জিতুং.

অধক্খকন্তি হেট্ঠক্খকং.

উব্ভজাণুমণ্ডলন্তি উপৰিজাণুমণ্ডলং.

আমসনং নাম আমট্ঠমত্তং.

পৰামসনং নাম ইতোচিতো চ সঞ্চোপনং.

গহণং নাম গহিতমত্তং.

ছুপনং নাম ফুট্ঠমত্তং.

পটিপীড়নং ৱা সাদিযেয্যাতি অঙ্গং গহেত্ৱা নিপ্পীড়নং সাদিযতি.

অযম্পীতি পুৰিমাযো উপাদায ৱুচ্চতি.

পাৰাজিকা হোতীতি সেয্যথাপি নাম পুৰিসো সীসচ্ছিন্নো অভব্বো তেন সৰীৰবন্ধনেন জীৱিতুং, এৱমেৱ ভিক্খুনী অৱস্সুতা অৱস্সুতস্স পুৰিসপুগ্গলস্স অধক্খকং উব্ভজাণুমণ্ডলং আমসনং ৱা পৰামসনং ৱা গহণং ৱা ছুপনং ৱা পটিপীড়নং ৱা সাদিযন্তী অস্সমণী হোতি অসক্যধীতা. তেন ৱুচ্চতি পাৰাজিকা হোতীতি.

অসংৱাসাতি সংৱাসো নাম এককম্মং একুদ্দেসো সমসিক্খতা, এসো সংৱাসো নাম. সো তায সদ্ধিং নত্থি, তেন ৱুচ্চতি অসংৱাসাতি.

৬৫৯. উভতোঅৱস্সুতে অধক্খকং উব্ভজাণুমণ্ডলং কাযেন কাযং আমসতি, আপত্তি পাৰাজিকস্স. কাযেন কাযপটিবদ্ধং আমসতি, আপত্তি থুল্লচ্চযস্স. কাযপটিবদ্ধেন কাযং আমসতি, আপত্তি থুল্লচ্চযস্স. কাযপটিবদ্ধেন কাযপটিবদ্ধং আমসতি, আপত্তি দুক্কটস্স.

নিস্সগ্গিযেন কাযং আমসতি, আপত্তি দুক্কটস্স. নিস্সগ্গিযেন কাযপটিবদ্ধং আমসতি, আপত্তি দুক্কটস্স. নিস্সগ্গিযেন নিস্সগ্গিযং আমসতি, আপত্তি দুক্কটস্স.

উব্ভক্খকং অধোজাণুমণ্ডলং কাযেন কাযং আমসতি, আপত্তি থুল্লচ্চযস্স. কাযেন কাযপটিবদ্ধং আমসতি, আপত্তি দুক্কটস্স. কাযপটিবদ্ধেন কাযং আমসতি, আপত্তি দুক্কটস্স. কাযপটিবদ্ধেন কাযপটিবদ্ধং আমসতি, আপত্তি দুক্কটস্স.

নিস্সগ্গিযেন কাযং আমসতি, আপত্তি দুক্কটস্স. নিস্সগ্গিযেন কাযপটিবদ্ধং আমসতি, আপত্তি দুক্কটস্স. নিস্সগ্গিযেন নিস্সগ্গিযং আমসতি, আপত্তি দুক্কটস্স.

৬৬০. একতোঅৱস্সুতে অধক্খকং উব্ভজাণুমণ্ডলং কাযেন কাযং আমসতি, আপত্তি থুল্লচ্চযস্স. কাযেন কাযপটিবদ্ধং আমসতি, আপত্তি দুক্কটস্স. কাযপটিবদ্ধেন কাযং আমসতি, আপত্তি দুক্কটস্স. কাযপটিবদ্ধেন কাযপটিবদ্ধং আমসতি, আপত্তি দুক্কটস্স.

নিস্সগ্গিযেন কাযং আমসতি, আপত্তি দুক্কটস্স. নিস্সগ্গিযেন কাযপটিবদ্ধং আমসতি, আপত্তি দুক্কটস্স. নিস্সগ্গিযেন নিস্সগ্গিযং আমসতি, আপত্তি দুক্কটস্স.

উব্ভক্খকং অধোজাণুমণ্ডলং কাযেন কাযং আমসতি, আপত্তি দুক্কটস্স. কাযেন কাযপটিবদ্ধং আমসতি, আপত্তি দুক্কটস্স. কাযপটিবদ্ধেন কাযং আমসতি, আপত্তি দুক্কটস্স. কাযপটিবদ্ধেন কাযপটিবদ্ধং আমসতি, আপত্তি দুক্কটস্স.

নিস্সগ্গিযেন কাযং আমসতি, আপত্তি দুক্কটস্স. নিস্সগ্গিযেন কাযপটিবদ্ধং আমসতি, আপত্তি দুক্কটস্স. নিস্সগ্গিযেন নিস্সগ্গিযং আমসতি, আপত্তি দুক্কটস্স.

৬৬১. উভতোঅৱস্সুতে যক্খস্স ৱা পেতস্স ৱা পণ্ডকস্স ৱা তিৰচ্ছানগতমনুস্সৱিগ্গহস্স ৱা অধক্খকং উব্ভজাণুমণ্ডলং কাযেন কাযং আমসতি, আপত্তি থুল্লচ্চযস্স. কাযেন কাযপটিবদ্ধং আমসতি, আপত্তি দুক্কটস্স. কাযপটিবদ্ধেন কাযং আমসতি, আপত্তি দুক্কটস্স. কাযপটিবদ্ধেন কাযপটিবদ্ধং আমসতি, আপত্তি দুক্কটস্স.

নিস্সগ্গিযেন কাযং আমসতি, আপত্তি দুক্কটস্স. নিস্সগ্গিযেন কাযপটিবদ্ধং আমসতি, আপত্তি দুক্কটস্স. নিস্সগ্গিযেন নিস্সগ্গিযং আমসতি, আপত্তি দুক্কটস্স.

উব্ভক্খকং অধোজাণুমণ্ডলং কাযেন কাযং আমসতি, আপত্তি দুক্কটস্স. কাযেন কাযপটিবদ্ধং আমসতি, আপত্তি দুক্কটস্স. কাযপটিবদ্ধেন কাযং আমসতি, আপত্তি দুক্কটস্স. কাযপটিবদ্ধেন কাযপটিবদ্ধং আমসতি, আপত্তি দুক্কটস্স.

নিস্সগ্গিযেন কাযং আমসতি, আপত্তি দুক্কটস্স. নিস্সগ্গিযেন কাযপটিবদ্ধং আমসতি, আপত্তি দুক্কটস্স. নিস্সগ্গিযেন নিস্সগ্গিযং আমসতি, আপত্তি দুক্কটস্স.

৬৬২. একতোঅৱস্সুতে অধক্খকং উব্ভজাণুমণ্ডলং কাযেন কাযং আমসতি, আপত্তি দুক্কটস্স. কাযেন কাযপটিবদ্ধং আমসতি, আপত্তি দুক্কটস্স. কাযপটিবদ্ধেন কাযং আমসতি, আপত্তি দুক্কটস্স. কাযপটিবদ্ধেন কাযপটিবদ্ধং আমসতি, আপত্তি দুক্কটস্স.

নিস্সগ্গিযেন কাযং আমসতি, আপত্তি দুক্কটস্স. নিস্সগ্গিযেন কাযপটিবদ্ধং আমসতি, আপত্তি দুক্কটস্স. নিস্সগ্গিযেন নিস্সগ্গিযং আমসতি, আপত্তি দুক্কটস্স.

উব্ভক্খকং অধোজাণুমণ্ডলং কাযেন কাযং আমসতি, আপত্তি দুক্কটস্স. কাযেন কাযপটিবদ্ধং আমসতি, আপত্তি দুক্কটস্স. কাযপটিবদ্ধেন কাযং আমসতি, আপত্তি দুক্কটস্স. কাযপটিবদ্ধেন কাযপটিবদ্ধং আমসতি, আপত্তি দুক্কটস্স.

নিস্সগ্গিযেন কাযং আমসতি, আপত্তি দুক্কটস্স. নিস্সগ্গিযেন কাযপটিবদ্ধং আমসতি, আপত্তি দুক্কটস্স. নিস্সগ্গিযেন নিস্সগ্গিযং আমসতি, আপত্তি দুক্কটস্স.

৬৬৩. অনাপত্তি অসঞ্চিচ্চ, অস্সতিযা, অজানন্তিযা, অসাদিযন্তিযা, উম্মত্তিকায, খিত্তচিত্তায, ৱেদনাট্টায, আদিকম্মিকাযাতি.

পঠমপাৰাজিকং সমত্তং [ভিক্খুনিৱিভঙ্গে সিক্খাপদগণনা ভিক্খূহি§অসাধাৰণৱসেন পকাসিতাতি ৱেদিতব্বা].

২. দুতিযপাৰাজিকং

৬৬৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন সুন্দৰীনন্দা ভিক্খুনী সাড়্হেন মিগাৰনত্তুনা গব্ভিনী হোতি. যাৱ গব্ভো তৰুণো অহোসি তাৱ ছাদেসি. পৰিপক্কে গব্ভে ৱিব্ভমিত্ৱা ৱিজাযি. ভিক্খুনিযো থুল্লনন্দং ভিক্খুনিং এতদৱোচুং – ‘‘সুন্দৰীনন্দা খো, অয্যে, অচিৰৱিব্ভন্তা ৱিজাতা. কচ্চি নো সা ভিক্খুনীযেৱ সমানা গব্ভিনী’’তি? ‘‘এৱং, অয্যে’’তি. ‘‘কিস্স পন ত্ৱং, অয্যে, জানং পাৰাজিকং ধম্মং অজ্ঝাপন্নং ভিক্খুনিং নেৱত্তনা পটিচোদেসি ন গণস্স আৰোচেসী’’তি? ‘‘যো এতিস্সা অৱণ্ণো ময্হেসো অৱণ্ণো, যা এতিস্সা অকিত্তি ময্হেসা অকিত্তি, যো এতিস্সা অযসো ময্হেসো অযসো, যো এতিস্সা অলাভো ময্হেসো অলাভো. ক্যাহং, অয্যে, অত্তনো অৱণ্ণং অত্তনো অকিত্তিং অত্তনো অযসং অত্তনো অলাভং পৰেসং আৰোচেস্সামী’’তি? যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা জানং পাৰাজিকং ধম্মং অজ্ঝাপন্নং ভিক্খুনিং নেৱত্তনা পটিচোদেস্সতি ন গণস্স আৰোচেস্সতী’’তি! অথ খো তা ভিক্খুনিযো ভিক্খূনং এতমত্থং আৰোচেসুং. ভিক্খূ [যে তে ভিক্খূ…পে… (?)] ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা ভিক্খূ পটিপুচ্ছি – ‘‘সচ্চং কিৰ, ভিক্খৱে, থুল্লনন্দা ভিক্খুনী জানং পাৰাজিকং ধম্মং অজ্ঝাপন্নং ভিক্খুনিং নেৱত্তনা পটিচোদেতি [পটিচোদেসি… আৰোচেসীতি (ক.)] ন গণস্স আৰোচেতী’’তি [পটিচোদেসি… আৰোচেসীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী জানং পাৰাজিকং ধম্মং অজ্ঝাপন্নং ভিক্খুনিং নেৱত্তনা পটিচোদেস্সতি ন গণস্স আৰোচেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৬৬৫. ‘‘যা পন ভিক্খুনী জানং পাৰাজিকং ধম্মং অজ্ঝাপন্নং ভিক্খুনিং নেৱত্তনা পটিচোদেয্য ন গণস্স আৰোচেয্য, যদা চ সা ঠিতা ৱা অস্স চুতা ৱা নাসিতা ৱা অৱস্সটা ৱা, সা পচ্ছা এৱং ৱদেয্য – ‘পুব্বেৱাহং, অয্যে, অঞ্ঞাসিং এতং ভিক্খুনিং এৱৰূপা চ এৱৰূপা চ সা ভগিনীতি, নো চ খো অত্তনা পটিচোদেস্সং ন গণস্স আৰোচেস্স’ন্তি, অযম্পি পাৰাজিকা হোতি অসংৱাসা ৱজ্জপ্পটিচ্ছাদিকা’’তি.

৬৬৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

জানাতি নাম সামং ৱা জানাতি, অঞ্ঞে ৱা তস্সা আৰোচেন্তি, সা ৱা আৰোচেতি.

পাৰাজিকং ধম্মং অজ্ঝাপন্নন্তি অট্ঠন্নং পাৰাজিকানং অঞ্ঞতৰং পাৰাজিকং অজ্ঝাপন্নং.

নেৱত্তনা পটিচোদেয্যাতি ন সযং চোদেয্য.

ন গণস্স আৰোচেয্যাতি ন অঞ্ঞাসং ভিক্খুনীনং আৰোচেয্য.

যদা চ সা ঠিতা ৱা অস্স চুতা ৱাতি ঠিতা নাম সলিঙ্গে ঠিতা ৱুচ্চতি. চুতা নাম কালঙ্কতা ৱুচ্চতি. নাসিতা নাম সযং ৱা ৱিব্ভন্তা হোতি অঞ্ঞেহি ৱা নাসিতা. অৱস্সটা নাম তিত্থাযতনং সঙ্কন্তা ৱুচ্চতি. সা পচ্ছা এৱং ৱদেয্য – ‘‘পুব্বেৱাহং, অয্যে, অঞ্ঞাসিং এতং ভিক্খুনিং এৱৰূপা চ এৱৰূপা চ সা ভগিনী’’তি.

নো চ খো অত্তনা পটিচোদেস্সন্তি সযং ৱা ন চোদেস্সং.

ন গণস্স আৰোচেস্সন্তি ন অঞ্ঞাসং ভিক্খুনীনং আৰোচেস্সং.

অযম্পীতি পুৰিমাযো উপাদায ৱুচ্চতি.

পাৰাজিকা হোতীতি সেয্যথাপি নাম পণ্ডুপলাসো বন্ধনা পমুত্তো অভব্বো হৰিতত্থায, এৱমেৱ ভিক্খুনী জানং পাৰাজিকং ধম্মং অজ্ঝাপন্নং ভিক্খুনিং নেৱত্তনা পটিচোদেস্সামি ন গণস্স আৰোচেস্সামীতি ধুৰং নিক্খিত্তমত্তে অস্সমণী হোতি অসক্যধীতা. তেন ৱুচ্চতি পাৰাজিকা হোতীতি.

অসংৱাসাতি সংৱাসো নাম এককম্মং একুদ্দেসো সমসিক্খতা. এসো সংৱাসো নাম. সো তায সদ্ধিং নত্থি. তেন ৱুচ্চতি অসংৱাসাতি.

৬৬৭. অনাপত্তি ‘‘সঙ্ঘস্স ভণ্ডনং ৱা কলহো ৱা ৱিগ্গহো ৱা ৱিৱাদো ৱা ভৱিস্সতী’’তি নাৰোচেতি, ‘‘সঙ্ঘভেদো ৱা সঙ্ঘৰাজি ৱা ভৱিস্সতী’’তি নাৰোচেতি, ‘‘অযং কক্খড়া ফৰুসা জীৱিতন্তৰাযং ৱা ব্ৰহ্মচৰিযন্তৰাযং ৱা কৰিস্সতী’’তি নাৰোচেতি, অঞ্ঞা পতিৰূপা ভিক্খুনিযো অপস্সন্তী নাৰোচেতি, নচ্ছাদেতুকামা নাৰোচেতি, পঞ্ঞাযিস্সতি সকেন কম্মেনাতি নাৰোচেতি, উম্মত্তিকায…পে… আদিকম্মিকাযাতি.

দুতিযপাৰাজিকং সমত্তং.

৩. ততিযপাৰাজিকং

৬৬৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী সমগ্গেন সঙ্ঘেন উক্খিত্তং অৰিট্ঠং ভিক্খুং গদ্ধবাধিপুব্বং অনুৱত্ততি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা ভিক্খুনী সমগ্গেন সঙ্ঘেন উক্খিত্তং অৰিট্ঠং ভিক্খুং গদ্ধবাধিপুব্বং অনুৱত্তিস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী সমগ্গেন সঙ্ঘেন উক্খিত্তং অৰিট্ঠং ভিক্খুং গদ্ধবাধিপুব্বং অনুৱত্ততীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী সমগ্গেন সঙ্ঘেন উক্খিত্তং অৰিট্ঠং ভিক্খুং গদ্ধবাধিপুব্বং অনুৱত্তিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৬৬৯. ‘‘যা পন ভিক্খুনী সমগ্গেন সঙ্ঘেন উক্খিত্তং ভিক্খুং ধম্মেন ৱিনযেন সত্থুসাসনেন অনাদৰং অপ্পটিকাৰং অকতসহাযং তমনুৱত্তেয্য, সা ভিক্খুনী ভিক্খুনীহি এৱমস্স ৱচনীযা – ‘এসো খো, অয্যে, ভিক্খু সমগ্গেন সঙ্ঘেন উক্খিত্তো ধম্মেন ৱিনযেন সত্থুসাসনেন অনাদৰো অপ্পটিকাৰো অকতসহাযো, মায্যে, এতং ভিক্খুং অনুৱত্তী’তি. এৱঞ্চ সা ভিক্খুনী ভিক্খুনীহি ৱুচ্চমানা তথেৱ পগ্গণ্হেয্য, সা ভিক্খুনী ভিক্খুনীহি যাৱততিযং সমনুভাসিতব্বা তস্স পটিনিস্সগ্গায. যাৱততিযং চে সমনুভাসিযমানা তং পটিনিস্সজ্জেয্য, ইচ্চেতং কুসলং. নো চে পটিনিস্সজ্জেয্য, অযম্পি পাৰাজিকা হোতি অসংৱাসা উক্খিত্তানুৱত্তিকা’’তি.

৬৭০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সমগ্গো নাম সঙ্ঘো সমানসংৱাসকো সমানসীমাযং ঠিতো.

উক্খিত্তো নাম আপত্তিযা অদস্সনে ৱা অপ্পটিকম্মে ৱা অপ্পটিনিস্সগ্গে ৱা [অদস্সনেন ৱা অপ্পটিকম্মেন ৱা অপ্পটিনিস্সগ্গেন ৱা (ক.), অদস্সনে ৱা অপ্পটিকম্মে ৱা পাপিকায দিট্ঠিযা অপ্পটিনিস্সগ্গে ৱা (?)] উক্খিত্তো.

ধম্মেন ৱিনযেনাতি যেন ধম্মেন যেন ৱিনযেন.

সত্থুসাসনেনাতি জিনসাসনেন বুদ্ধসাসনেন.

অনাদৰো নাম সঙ্ঘং ৱা গণং ৱা পুগ্গলং ৱা কম্মং ৱা নাদিযতি.

অপ্পটিকাৰো নাম উক্খিত্তো অনোসাৰিতো.

অকতসহাযো নাম সমানসংৱাসকা ভিক্খূ ৱুচ্চন্তি সহাযা. সো তেহি সদ্ধিং নত্থি, তেন ৱুচ্চতি অকতসহাযোতি.

তমনুৱত্তেয্যাতি যংদিট্ঠিকো সো হোতি যংখন্তিকো যংৰুচিকো, সাপি তংদিট্ঠিকা হোতি তংখন্তিকা তংৰুচিকা.

সা ভিক্খুনীতি যা সা উক্খিত্তানুৱত্তিকা ভিক্খুনী.

ভিক্খুনীহীতি অঞ্ঞাহি ভিক্খুনীহি. যা পস্সন্তি যা সুণন্তি তাহি ৱত্তব্বা – ‘‘এসো খো, অয্যে, ভিক্খু সমগ্গেন সঙ্ঘেন উক্খিত্তো ধম্মেন ৱিনযেন সত্থুসাসনেন অনাদৰো অপ্পটিকাৰো অকতসহাযো. মায্যে, এতং ভিক্খুং অনুৱত্তী’’তি. দুতিযম্পি ৱত্তব্বা. ততিযম্পি ৱত্তব্বা. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সুত্ৱা ন ৱদন্তি, আপত্তি দুক্কটস্স. সা ভিক্খুনী সঙ্ঘমজ্ঝম্পি আকড্ঢিত্ৱা ৱত্তব্বা – ‘‘এসো খো, অয্যে, ভিক্খু সমগ্গেন সঙ্ঘেন উক্খিত্তো ধম্মেন ৱিনযেন সত্থুসাসনেন অনাদৰো অপ্পটিকাৰো অকতসহাযো. মায্যে, এতং ভিক্খুং অনুৱত্তী’’তি. দুতিযম্পি ৱত্তব্বা. ততিযম্পি ৱত্তব্বা. সচে পটিনিস্সজ্জতি, ইচ্চেতং কুসলং. নো চে পটিনিস্সজ্জতি, আপত্তি দুক্কটস্স. সা ভিক্খুনী সমনুভাসিতব্বা. এৱঞ্চ পন, ভিক্খৱে, সমনুভাসিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

৬৭১. ‘‘সুণাতু মে, অয্যে, সঙ্ঘো. অযং ইত্থন্নামা ভিক্খুনী সমগ্গেন সঙ্ঘেন উক্খিত্তং ভিক্খুং ধম্মেন ৱিনযেন সত্থুসাসনেন অনাদৰং অপ্পটিকাৰং অকতসহাযং তমনুৱত্ততি, সা তং ৱত্থুং ন পটিনিস্সজ্জতি. যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুনিং সমনুভাসেয্য তস্স ৱত্থুস্স পটিনিস্সগ্গায. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ভিক্খুনী সমগ্গেন সঙ্ঘেন উক্খিত্তং ভিক্খুং ধম্মেন ৱিনযেন সত্থুসাসনেন অনাদৰং অপ্পটিকাৰং অকতসহাযং তমনুৱত্ততি. সা তং ৱত্থুং ন পটিনিস্সজ্জতি. সঙ্ঘো ইত্থন্নামং ভিক্খুনিং সমনুভাসতি তস্স ৱত্থুস্স পটিনিস্সগ্গায. যস্সা অয্যায খমতি ইত্থন্নামায ভিক্খুনিযা সমনুভাসনা তস্স ৱত্থুস্স পটিনিস্সগ্গায, সা তুণ্হস্স; যস্সা নক্খমতি, সা ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি…পে….

‘‘সমনুভট্ঠা সঙ্ঘেন ইত্থন্নামা ভিক্খুনী তস্স ৱত্থুস্স পটিনিস্সগ্গায. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

ঞত্তিযা দুক্কটং, দ্ৱীহি কম্মৱাচাহি থুল্লচ্চযা, কম্মৱাচা পৰিযোসানে আপত্তি পাৰাজিকস্স.

অযম্পীতি পুৰিমাযো উপাদায ৱুচ্চতি.

পাৰাজিকা হোতীতি সেয্যথাপি নাম পুথুসিলা দ্ৱেধা ভিন্না অপ্পটিসন্ধিকা হোতি, এৱমেৱ ভিক্খুনী যাৱততিযং সমনুভাসনায ন পটিনিস্সজ্জন্তী অস্সমণী হোতি অসক্যধীতা. তেন ৱুচ্চতি পাৰাজিকা হোতীতি.

অসংৱাসাতি সংৱাসো নাম এককম্মং একুদ্দেসো সমসিক্খতা. এসো সংৱাসো নাম. সো তায সদ্ধিং নত্থি. তেন ৱুচ্চতি অসংৱাসাতি.

৬৭২. ধম্মকম্মে ধম্মকম্মসঞ্ঞা ন পটিনিস্সজ্জতি, আপত্তি পাৰাজিকস্স. ধম্মকম্মে ৱেমতিকা ন পটিনিস্সজ্জতি, আপত্তি পাৰাজিকস্স. ধম্মকম্মে অধম্মকম্মসঞ্ঞা ন পটিনিস্সজ্জতি, আপত্তি পাৰাজিকস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৱেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

৬৭৩. অনাপত্তি অসমনুভাসন্তিযা, পটিনিস্সজ্জন্তিযা, উম্মত্তিকায…পে… আদিকম্মিকাযাতি.

ততিযপাৰাজিকং সমত্তং.

৪. চতুত্থপাৰাজিকং

৬৭৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো অৱস্সুতা অৱস্সুতস্স পুৰিসপুগ্গলস্স হত্থগ্গহণম্পি সাদিযন্তি, সঙ্ঘাটিকণ্ণগ্গহণম্পি সাদিযন্তি, সন্তিট্ঠন্তিপি, সল্লপন্তিপি, সঙ্কেতম্পি গচ্ছন্তি, পুৰিসস্সপি অব্ভাগমনং সাদিযন্তি, ছন্নম্পি অনুপৱিসন্তি, কাযম্পি তদত্থায উপসংহৰন্তি এতস্স অসদ্ধম্মস্স পটিসেৱনত্থায. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো অৱস্সুতা অৱস্সুতস্স পুৰিসপুগ্গলস্স হত্থগ্গহণম্পি সাদিযিস্সন্তি, সঙ্ঘাটিকণ্ণগ্গহণম্পি সাদিযিস্সন্তি, সন্তিট্ঠিস্সন্তিপি, সল্লপিস্সন্তিপি, সঙ্কেতম্পি গচ্ছিস্সন্তি, পুৰিসস্সপি অব্ভাগমনং সাদিযিস্সন্তি, ছন্নম্পি অনুপৱিসিস্সন্তি, কাযম্পি তদত্থায উপসংহৰিস্সন্তি এতস্স অসদ্ধম্মস্স পটিসেৱনত্থাযা’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো অৱস্সুতা অৱস্সুতস্স পুৰিসপুগ্গলস্স হত্থগ্গহণম্পি সাদিযন্তি, সঙ্ঘাটিকণ্ণগ্গহণম্পি সাদিযন্তি, সন্তিট্ঠন্তিপি, সল্লপন্তিপি, সঙ্কেতম্পি গচ্ছন্তি, পুৰিসস্সপি অব্ভাগমনং সাদিযন্তি, ছন্নম্পি অনুপৱিসন্তি, কাযম্পি তদত্থায উপসংহৰন্তি এতস্স অসদ্ধম্মস্স পটিসেৱনত্থাযাতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো অৱস্সুতা অৱস্সুতস্স পুৰিসপুগ্গলস্স হত্থগ্গহণম্পি সাদিযিস্সন্তি, সঙ্ঘাটিকণ্ণগ্গহণম্পি সাদিযিস্সন্তি, সন্তিট্ঠিস্সন্তিপি, সল্লপিস্সন্তিপি, সঙ্কেতম্পি গচ্ছিস্সন্তি, পুৰিসস্সপি অব্ভাগমনং সাদিযিস্সন্তি, ছন্নম্পি অনুপৱিসিস্সন্তি, কাযম্পি তদত্থায উপসংহৰিস্সন্তি এতস্স অসদ্ধম্মস্স পটিসেৱনত্থায! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৬৭৫. ‘‘যা পন ভিক্খুনী অৱস্সুতা অৱস্সুতস্স পুৰিসপুগ্গলস্স হত্থগ্গহণং ৱা সাদিযেয্য, সঙ্ঘাটিকণ্ণগ্গহণং ৱা সাদিযেয্য, সন্তিট্ঠেয্য ৱা, সল্লপেয্য ৱা, সঙ্কেতং ৱা গচ্ছেয্য, পুৰিসস্স ৱা অব্ভাগমনং সাদিযেয্য, ছন্নং ৱা অনুপৱিসেয্য, কাযং ৱা তদত্থায উপসংহৰেয্য এতস্স অসদ্ধম্মস্স পটিসেৱনত্থায, অযম্পি পাৰাজিকা হোতি অসংৱাসা অট্ঠৱত্থুকা’’তি.

৬৭৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অৱস্সুতা নাম সাৰত্তা অপেক্খৱতী পটিবদ্ধচিত্তা.

অৱস্সুতো নাম সাৰত্তো অপেক্খৱা পটিবদ্ধচিত্তো.

পুৰিসপুগ্গলো নাম মনুস্সপুৰিসো, ন যক্খো ন পেতো ন তিৰচ্ছানগতো ৱিঞ্ঞূ পটিবলো কাযসংসগ্গং সমাপজ্জিতুং.

হত্থগ্গহণং ৱা সাদিযেয্যাতি হত্থো নাম কপ্পৰং উপাদায যাৱ অগ্গনখা. এতস্স অসদ্ধম্মস্স পটিসেৱনত্থায উব্ভক্খকং অধোজাণুমণ্ডলং গহণং সাদিযতি, আপত্তি থুল্লচ্চযস্স.

সঙ্ঘাটিকণ্ণগ্গহণং ৱা সাদিযেয্যাতি এতস্স অসদ্ধম্মস্স পটিসেৱনত্থায নিৱত্থং ৱা পাৰুতং ৱা গহণং সাদিযতি, আপত্তি থুল্লচ্চযস্স.

সন্তিট্ঠেয্য ৱাতি এতস্স অসদ্ধম্মস্স পটিসেৱনত্থায পুৰিসস্স হত্থপাসে তিট্ঠতি, আপত্তি থুল্লচ্চযস্স.

সল্লপেয্য ৱাতি এতস্স অসদ্ধম্মস্স পটিসেৱনত্থায পুৰিসস্স হত্থপাসে ঠিতা সল্লপতি, আপত্তি থুল্লচ্চযস্স.

সঙ্কেতং ৱা গচ্ছেয্যাতি এতস্স অসদ্ধম্মস্স পটিসেৱনত্থায পুৰিসেন – ‘‘ইত্থন্নামং ওকাসং [ইদং পদং অট্ঠকথাযং ন দিস্সতি] আগচ্ছা’’তি – ৱুত্তা গচ্ছতি. পদে পদে আপত্তি দুক্কটস্স. পুৰিসস্স হত্থপাসং ওক্কন্তমত্তে আপত্তি থুল্লচ্চযস্স.

পুৰিসস্স ৱা অব্ভাগমনং সাদিযেয্যাতি এতস্স অসদ্ধম্মস্স পটিসেৱনত্থায পুৰিসস্স অব্ভাগমনং সাদিযতি, আপত্তি দুক্কটস্স. হত্থপাসং ওক্কন্তমত্তে আপত্তি থুল্লচ্চযস্স.

ছন্নং ৱা অনুপৱিসেয্যাতি এতস্স অসদ্ধম্মস্স পটিসেৱনত্থায যেন কেনচি পটিচ্ছন্নং ওকাসং পৱিট্ঠমত্তে আপত্তি থুল্লচ্চযস্স.

কাযং ৱা তদত্থায উপসংহৰেয্যাতি এতস্স অসদ্ধম্মস্স পটিসেৱনত্থায পুৰিসস্স হত্থপাসে ঠিতা কাযং উপসংহৰতি, আপত্তি থুল্লচ্চযস্স.

অযম্পীতি পুৰিমাযো উপাদায ৱুচ্চতি.

পাৰাজিকা হোতীতি সেয্যথাপি নাম তালো মত্থকচ্ছিন্নো অভব্বো পুন ৱিৰুড়্হিযা এৱমেৱ ভিক্খুনী অট্ঠমং ৱত্থুং পৰিপূৰেন্তী অস্সমণী হোতি অসক্যধীতা. তেন ৱুচ্চতি পাৰাজিকা হোতীতি.

অসংৱাসাতি সংৱাসো নাম এককম্মং একুদ্দেসো সমসিক্খতা. এসো সংৱাসো নাম. সো তায সদ্ধিং নত্থি. তেন ৱুচ্চতি অসংৱাসাতি.

৬৭৭. অনাপত্তি অসঞ্চিচ্চ, অস্সতিযা, অজানন্তিযা, অসাদিযন্তিযা, উম্মত্তিকায, খিত্তচিত্তায, ৱেদনাট্টায, আদিকম্মিকাযাতি.

চতুত্থপাৰাজিকং সমত্তং.

উদ্দিট্ঠা খো, অয্যাযো, অট্ঠ পাৰাজিকা ধম্মা. যেসং ভিক্খুনী অঞ্ঞতৰং ৱা অঞ্ঞতৰং ৱা আপজ্জিত্ৱা ন লভতি ভিক্খুনীহি সদ্ধিং সংৱাসং, যথা পুৰে তথা পচ্ছা, পাৰাজিকা হোতি অসংৱাসা. তত্থায্যাযো পুচ্ছামি – ‘‘কচ্চিত্থ পৰিসুদ্ধা’’? দুতিযম্পি পুচ্ছামি – ‘‘কচ্চিত্থ পৰিসুদ্ধা’’? ততিযম্পি পুচ্ছামি – ‘‘কচ্চিত্থ পৰিসুদ্ধা’’? পৰিসুদ্ধেত্থায্যাযো, তস্মা তুণ্হী, এৱমেতং ধাৰযামীতি.

ভিক্খুনিৱিভঙ্গে পাৰাজিককণ্ডং নিট্ঠিতং.