৪. সক্কচ্চৱগ্গো

৬০৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ অসক্কচ্চং পিণ্ডপাতং ভুঞ্জন্তি অভুঞ্জিতুকামা ৱিয…পে….

‘‘সক্কচ্চং পিণ্ডপাতং ভুঞ্জিস্সামীতি সিক্খা কৰণীযা’’তি.

সক্কচ্চং পিণ্ডপাতো ভুঞ্জিতব্বো. যো অনাদৰিযং পটিচ্চ অসক্কচ্চং পিণ্ডপাতং ভুঞ্জতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স,

আদিকম্মিকস্সাতি.

পঠমসিক্খাপদং নিট্ঠিতং.

৬০৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ তহং তহং ওলোকেন্তা পিণ্ডপাতং ভুঞ্জন্তি, আকিৰন্তেপি অতিক্কন্তেপি ন জানন্তি…পে….

‘‘পত্তসঞ্ঞী পিণ্ডপাতং ভুঞ্জিস্সামীতি সিক্খা কৰণীযা’’তি.

পত্তসঞ্ঞিনা পিণ্ডপাতো ভুঞ্জিতব্বো. যো অনাদৰিযং পটিচ্চ তহং তহং ওলোকেন্তো পিণ্ডপাতং ভুঞ্জতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

দুতিযসিক্খাপদং নিট্ঠিতং.

৬০৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ তহং তহং ওমসিত্ৱা [ওমদ্দিত্ৱা (ক.)] পিণ্ডপাতং ভুঞ্জন্তি…পে….

‘‘সপদানং পিণ্ডপাতং ভুঞ্জিস্সামীতি সিক্খা কৰণীযা’’তি.

সপদানং পিণ্ডপাতো ভুঞ্জিতব্বো. যো অনাদৰিযং পটিচ্চ তহং তহং ওমসিত্ৱা [ওমদ্দিত্ৱা (ক.)] পিণ্ডপাতং ভুঞ্জতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, অঞ্ঞেসং দেন্তো ওমসতি, অঞ্ঞস্স ভাজনে আকিৰন্তো ওমসতি, উত্তৰিভঙ্গে, আপদাসু, উম্মত্তকস্স, আদিকম্মিকস্সাতি.

ততিযসিক্খাপদং নিট্ঠিতং.

৬০৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ পিণ্ডপাতং ভুঞ্জন্তা সূপঞ্ঞেৱ বহুং ভুঞ্জন্তি…পে….

‘‘সমসূপকং পিণ্ডপাতং ভুঞ্জিস্সামীতি সিক্খা কৰণীযা’’তি.

সূপো নাম দ্ৱে সূপা – মুগ্গসূপো, মাসসূপো হত্থহাৰিযো. সমসূপকো পিণ্ডপাতো ভুঞ্জিতব্বো. যো অনাদৰিযং পটিচ্চ সূপঞ্ঞেৱ বহুং ভুঞ্জতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৰসৰসে, ঞাতকানং পৱাৰিতানং, অত্তনো ধনেন, আপদাসু, উম্মত্তকস্স, আদিকম্মিকস্সাতি.

চতুত্থসিক্খাপদং নিট্ঠিতং.

৬১০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ থূপকতো ওমদ্দিত্ৱা পিণ্ডপাতং ভুঞ্জন্তি…পে….

‘‘ন থূপকতো ওমদ্দিত্ৱা পিণ্ডপাতং ভুঞ্জিস্সামীতি সিক্খা কৰণীযা’’তি.

ন থূপকতো ওমদ্দিত্ৱা পিণ্ডপাতো ভুঞ্জিতব্বো. যো অনাদৰিযং পটিচ্চ থূপকতো ওমদ্দিত্ৱা পিণ্ডপাতং ভুঞ্জতি আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, পৰিত্তকে সেসে একতো সংকড্ঢিত্ৱা ওমদ্দিত্ৱা ভুঞ্জতি, আপদাসু, উম্মত্তকস্স, আদিকম্মিকস্সাতি.

পঞ্চমসিক্খাপদং নিট্ঠিতং.

৬১১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ সূপম্পি ব্যঞ্জনম্পি ওদনেন পটিচ্ছাদেন্তি ভিয্যোকম্যতং উপাদায…পে….

‘‘ন সূপং ৱা ব্যঞ্জনং ৱা ওদনেন পটিচ্ছাদেস্সামি ভিয্যোকম্যতং উপাদাযাতি সিক্খা কৰণীযা’’তি.

ন সূপং ৱা ব্যঞ্জনং ৱা ওদনেন পটিচ্ছাদেতব্বং ভিয্যোকম্যতং উপাদায. যো অনাদৰিযং পটিচ্চ সূপং ৱা ব্যঞ্জনং ৱা ওদনেন পটিচ্ছাদেতি ভিয্যোকম্যতং উপাদায, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, সামিকা পটিচ্ছাদেত্ৱা দেন্তি, ন ভিয্যোকম্যতং উপাদায, আপদাসু, উম্মত্তকস্স, আদিকম্মিকস্সাতি.

ছট্ঠসিক্খাপদং নিট্ঠিতং.

৬১২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ সূপম্পি ওদনম্পি অত্তনো অত্থায ৱিঞ্ঞাপেত্ৱা ভুঞ্জন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা সূপম্পি ওদনম্পি অত্তনো অত্থায ৱিঞ্ঞাপেত্ৱা ভুঞ্জিস্সন্তি! কস্স সম্পন্নং ন মনাপং! কস্স সাদুং ন ৰুচ্চতী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ সূপম্পি ওদনম্পি অত্তনো অত্থায ৱিঞ্ঞাপেত্ৱা ভুঞ্জিস্সন্তী’’তি…পে… সচ্চং কিৰ তুম্হে, ভিক্খৱে, সূপম্পি ওদনম্পি অত্তনো অত্থায ৱিঞ্ঞাপেত্ৱা ভুঞ্জথাতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, সূপম্পি ওদনম্পি অত্তনো অত্থায ৱিঞ্ঞাপেত্ৱা ভুঞ্জিস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘ন সূপং ৱা ওদনং ৱা অত্তনো অত্থায ৱিঞ্ঞাপেত্ৱা ভুঞ্জিস্সামীতি সিক্খা কৰণীযা’’তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

৬১৩. তেন খো পন সমযেন ভিক্খূ গিলানা হোন্তি. গিলানপুচ্ছকা ভিক্খূ গিলানে ভিক্খূ এতদৱোচুং – ‘‘কচ্চাৱুসো, খমনীযং, কচ্চি যাপনীয’’ন্তি? ‘‘পুব্বে মযং, আৱুসো, সূপম্পি ওদনম্পি অত্তনো অত্থায ৱিঞ্ঞাপেত্ৱা ভুঞ্জাম, তেন নো ফাসু হোতি. ইদানি পন – ‘‘ভগৱতা পটিক্খিত্ত’’ন্তি কুক্কুচ্চাযন্তা ন ৱিঞ্ঞাপেম, তেন নো ন ফাসু হোতী’’তি. ভগৱতো এতমত্থং আৰোচেসুং…পে… অনুজানামি, ভিক্খৱে, গিলানেন ভিক্খুনা সূপম্পি ওদনম্পি অত্তনো অত্থায ৱিঞ্ঞাপেত্ৱা ভুঞ্জিতুং. এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘ন সূপং ৱা ওদনং ৱা অগিলানো অত্তনো অত্থায ৱিঞ্ঞাপেত্ৱা ভুঞ্জিস্সামীতি সিক্খা কৰণীযা’’তি.

ন সূপং ৱা ওদনং ৱা অগিলানেন অত্তনো অত্থায ৱিঞ্ঞাপেত্ৱা ভুঞ্জিতব্বং. যো অনাদৰিযং পটিচ্চ সূপং ৱা ওদনং ৱা অগিলানো অত্তনো অত্থায ৱিঞ্ঞাপেত্ৱা ভুঞ্জতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ঞাতকানং পৱাৰিতানং, অঞ্ঞস্সত্থায, অত্তনো ধনেন, আপদাসু, উম্মত্তকস্স, আদিকম্মিকস্সাতি.

সত্তমসিক্খাপদং নিট্ঠিতং.

৬১৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ উজ্ঝানসঞ্ঞী পৰেসং পত্তং ওলোকেন্তি…পে….

‘‘ন উজ্ঝানসঞ্ঞী পৰেসং পত্তং ওলোকেস্সামীতি সিক্খা কৰণীযা’’তি.

ন উজ্ঝানসঞ্ঞিনা পৰেসং পত্তো ওলোকেতব্বো. যো অনাদৰিযং পটিচ্চ উজ্ঝানসঞ্ঞী পৰেসং পত্তং ওলোকেতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, ‘‘দস্সামী’’তি ৱা ‘‘দাপেস্সামী’’তি ৱা ওলোকেতি, ন উজ্ঝানসঞ্ঞিস্স, আপদাসু, উম্মত্তকস্স, আদিকম্মিকস্সাতি.

অট্ঠমসিক্খাপদং নিট্ঠিতং.

৬১৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ মহন্তং কবড়ং কৰোন্তি…পে….

‘‘নাতিমহন্তং কবড়ং কৰিস্সামীতি সিক্খা কৰণীযা’’তি.

নাতিমহন্তো কবড়ো কাতব্বো. যো অনাদৰিযং পটিচ্চ মহন্তং কবড়ং কৰোতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, খজ্জকে, ফলাফলে, উত্তৰিভঙ্গে, আপদাসু, উম্মত্তকস্স, আদিকম্মিকস্সাতি.

নৱমসিক্খাপদং নিট্ঠিতং.

৬১৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ দীঘং আলোপং কৰোন্তি…পে….

‘‘পৰিমণ্ডলং আলোপং কৰিস্সামীতি সিক্খা কৰণীযা’’তি.

পৰিমণ্ডলো আলোপো কাতব্বো. যো অনাদৰিযং পটিচ্চ দীঘং আলোপং কৰোতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, খজ্জকে, ফলাফলে, উত্তৰিভঙ্গে, আপদাসু, উম্মত্তকস্স, আদিকম্মিকস্সাতি.

দসমসিক্খাপদং নিট্ঠিতং.

সক্কচ্চৱগ্গো চতুত্থো.