৪. পহাৰসিক্খাপদং

৪৪৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ কুপিতা অনত্তমনা সত্তৰসৱগ্গিযানং ভিক্খূনং পহাৰং দেন্তি. তে ৰোদন্তি. ভিক্খূ এৱমাহংসু – ‘‘কিস্স তুম্হে, আৱুসো, ৰোদথা’’তি? ‘‘ইমে, আৱুসো, ছব্বগ্গিযা ভিক্খূ কুপিতা অনত্তমনা অম্হাকং পহাৰং দেন্তী’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ কুপিতা অনত্তমনা ভিক্খূনং পহাৰং দস্সন্তী’’তি…পে… সচ্চং কিৰ তুম্হে, ভিক্খৱে, কুপিতা অনত্তমনা ভিক্খূনং পহাৰং দেথাতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, কুপিতা অনত্তমনা ভিক্খূনং পহাৰং দস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৪৫০. ‘‘যো পন ভিক্খু ভিক্খুস্স কুপিতো অনত্তমনো পহাৰং দদেয্য, পাচিত্তিয’’ন্তি.

৪৫১. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুস্সাতি অঞ্ঞস্স ভিক্খুস্স.

কুপিতো অনত্তমনোতি অনভিৰদ্ধো আহতচিত্তো খিলজাতো.

পহাৰং দদেয্যাতি কাযেন ৱা কাযপটিবদ্ধেন ৱা নিস্সগ্গিযেন ৱা অন্তমসো উপ্পলপত্তেনপি পহাৰং দেতি, আপত্তি পাচিত্তিযস্স.

৪৫২. উপসম্পন্নে উপসম্পন্নসঞ্ঞী কুপিতো অনত্তমনো পহাৰং দেতি, আপত্তি পাচিত্তিযস্স. উপসম্পন্নে ৱেমতিকো কুপিতো অনত্তমনো পহাৰং দেতি, আপত্তি পাচিত্তিযস্স. উপসম্পন্নে অনুপসম্পন্নসঞ্ঞী কুপিতো অনত্তমনো পহাৰং দেতি, আপত্তি পাচিত্তিযস্স.

অনুপসম্পন্নস্স কুপিতো অনত্তমনো পহাৰং দেতি, আপত্তি দুক্কটস্স. অনুপসম্পন্নে উপসম্পন্নসঞ্ঞী, আপত্তি দুক্কটস্স. অনুপসম্পন্নে ৱেমতিকো, আপত্তি দুক্কটস্স. অনুপসম্পন্নে অনুপসম্পন্নসঞ্ঞী, আপত্তি দুক্কটস্স.

৪৫৩. অনাপত্তি কেনচি ৱিহেঠীযমানো মোক্খাধিপ্পাযো পহাৰং দেতি, উম্মত্তকস্স, আদিকম্মিকস্সাতি.

পহাৰসিক্খাপদং নিট্ঠিতং চতুত্থং.