৯. দুট্ঠুল্লাৰোচনসিক্খাপদং

৭৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মা উপনন্দো সক্যপুত্তো ছব্বগ্গিযেহি ভিক্খূহি সদ্ধিং ভণ্ডনকতো হোতি. সো সঞ্চেতনিকং সুক্কৱিস্সট্ঠিং আপত্তিং আপজ্জিত্ৱা সঙ্ঘং তস্সা আপত্তিযা পৰিৱাসং যাচি. তস্স সঙ্ঘো তস্সা আপত্তিযা পৰিৱাসং অদাসি. তেন খো পন সমযেন সাৱত্থিযং অঞ্ঞতৰস্স পূগস্স সঙ্ঘভত্তং হোতি. সো পৰিৱসন্তো ভত্তগ্গে আসনপৰিযন্তে নিসীদি. ছব্বগ্গিযা ভিক্খূ তে উপাসকে এতদৱোচুং – ‘‘এসো, আৱুসো, আযস্মা উপনন্দো সক্যপুত্তো তুম্হাকং সম্ভাৱিতো কুলূপকো; যেনেৱ হত্থেন সদ্ধাদেয্যং ভুঞ্জতি তেনেৱ হত্থেন উপক্কমিত্ৱা অসুচিং মোচেসি. সো সঞ্চেতনিকং সুক্কৱিস্সট্ঠিং আপত্তিং আপজ্জিত্ৱা সঙ্ঘং তস্সা আপত্তিযা পৰিৱাসং যাচি. তস্স সঙ্ঘো তস্সা আপত্তিযা পৰিৱাসং অদাসি. সো পৰিৱসন্তো আসনপৰিযন্তে নিসিন্নো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খুস্স দুট্ঠুল্লং আপত্তিং অনুপসম্পন্নস্স আৰোচেস্সন্তী’’তি…পে… ‘‘সচ্চং কিৰ তুম্হে, ভিক্খৱে, ভিক্খুস্স দুট্ঠুল্লং আপত্তিং অনুপসম্পন্নস্স আৰোচেথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, ভিক্খুস্স দুট্ঠুল্লং আপত্তিং অনুপসম্পন্নস্স আৰোচেস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৭৯. ‘‘যো পন ভিক্খু ভিক্খুস্স দুট্ঠুল্লং আপত্তিং অনুপসম্পন্নস্স আৰোচেয্য, অঞ্ঞত্ৰ ভিক্খুসম্মুতিযা [ভিক্খুসম্মতিযা (স্যা.)], পাচিত্তিয’’ন্তি.

৮০. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুস্সাতি অঞ্ঞস্স ভিক্খুস্স.

দুট্ঠুল্লা নাম আপত্তি – চত্তাৰি চ পাৰাজিকানি, তেৰস চ সঙ্ঘাদিসেসা.

অনুপসম্পন্নো নাম ভিক্খুঞ্চ ভিক্খুনিঞ্চ ঠপেত্ৱা অৱসেসো অনুপসম্পন্নো নাম.

আৰোচেয্যাতি আৰোচেয্য ইত্থিযা ৱা পুৰিসস্স ৱা গহট্ঠস্স ৱা পব্বজিতস্স ৱা.

অঞ্ঞত্ৰ ভিক্খুসম্মুতিযাতি ঠপেত্ৱা ভিক্খুসম্মুতিং.

অত্থি ভিক্খুসম্মুতি আপত্তিপৰিযন্তা, ন কুলপৰিযন্তা. অত্থি ভিক্খুসম্মুতি কুলপৰিযন্তা, ন আপত্তিপৰিযন্তা, অত্থি ভিক্খুসম্মুতি আপত্তিপৰিযন্তা চ কুলপৰিযন্তা চ, অত্থি ভিক্খুসম্মুতি নেৱ আপত্তিপৰিযন্তা ন কুলপৰিযন্তা.

আপত্তিপৰিযন্তা নাম আপত্তিযো পৰিগ্গহিতাযো হোন্তি – ‘‘এত্তকাহি আপত্তীহি আৰোচেতব্বো’’তি.

কুলপৰিযন্তা নাম কুলানি পৰিগ্গহিতানি হোন্তি – ‘‘এত্তকেসু কুলেসু আৰোচেতব্বো’’তি. আপত্তিপৰিযন্তা চ কুলপৰিযন্তা চ নাম আপত্তিযো চ পৰিগ্গহিতাযো হোন্তি, কুলানি চ পৰিগ্গহিতানি হোন্তি – ‘‘এত্তকাহি আপত্তীহি এত্তকেসু কুলেসু আৰোচেতব্বো’’তি. নেৱ আপত্তিপৰিযন্তা ন কুলপৰিযন্তা নাম আপত্তিযো চ অপৰিগ্গহিতাযো হোন্তি, কুলানি চ অপৰিগ্গহিতানি হোন্তি – ‘‘এত্তকাহি আপত্তীহি এত্তকেসু কুলেসু আৰোচেতব্বো’’তি.

৮১. আপত্তিপৰিযন্তে যা আপত্তিযো পৰিগ্গহিতাযো হোন্তি, তা আপত্তিযো ঠপেত্ৱা অঞ্ঞাহি আপত্তীহি আৰোচেতি, আপত্তি পাচিত্তিযস্স.

কুলপৰিযন্তে যানি কুলানি পৰিগ্গহিতানি হোন্তি, তানি কুলানি ঠপেত্ৱা অঞ্ঞেসু কুলেসু আৰোচেতি, আপত্তি পাচিত্তিযস্স.

আপত্তিপৰিযন্তে চ কুলপৰিযন্তে চ যা আপত্তিযো পৰিগ্গহিতাযো হোন্তি, তা আপত্তিযো ঠপেত্ৱা যানি কুলানি পৰিগ্গহিতানি হোন্তি, তানি কুলানি ঠপেত্ৱা অঞ্ঞাহি আপত্তীহি অঞ্ঞেসু কুলেসু আৰোচেতি, আপত্তি পাচিত্তিযস্স.

নেৱ আপত্তিপৰিযন্তে ন কুলপৰিযন্তে, অনাপত্তি.

৮২. দুট্ঠুল্লায আপত্তিযা দুট্ঠুল্লাপত্তিসঞ্ঞী অনুপসম্পন্নস্স আৰোচেতি, অঞ্ঞত্ৰ ভিক্খুসম্মুতিযা, আপত্তি পাচিত্তিযস্স.

দুট্ঠুল্লায আপত্তিযা ৱেমতিকো অনুপসম্পন্নস্স আৰোচেতি, অঞ্ঞত্ৰ ভিক্খুসম্মুতিযা, আপত্তি পাচিত্তিযস্স.

দুট্ঠুল্লায আপত্তিযা অদুট্ঠুল্লাপত্তিসঞ্ঞী অনুপসম্পন্নস্স আৰোচেতি, অঞ্ঞত্ৰ ভিক্খুসম্মুতিযা, আপত্তি পাচিত্তিযস্স.

অদুট্ঠুল্লং আপত্তিং আৰোচেতি, আপত্তি দুক্কটস্স.

অনুপসম্পন্নস্স দুট্ঠুল্লং ৱা অদুট্ঠুল্লং ৱা অজ্ঝাচাৰং আৰোচেতি, আপত্তি দুক্কটস্স.

অদুট্ঠুল্লায আপত্তিযা দুট্ঠুল্লাপত্তিসঞ্ঞী, আপত্তি দুক্কটস্স.

অদুট্ঠুল্লায আপত্তিযা ৱেমতিকো, আপত্তি দুক্কটস্স.

অদুট্ঠুল্লায আপত্তিযা অদুট্ঠুল্লাপত্তিসঞ্ঞী, আপত্তি দুক্কটস্স.

৮৩. অনাপত্তি ৱত্থুং আৰোচেতি নো আপত্তিং, আপত্তিং আৰোচেতি নো ৱত্থুং, ভিক্খুসম্মুতিযা, উম্মত্তকস্স, আদিকম্মিকস্সাতি.

দুট্ঠুল্লাৰোচনসিক্খাপদং নিট্ঠিতং নৱমং.