১০. পথৱীখণনসিক্খাপদং

৮৪. তেন সমযেন বুদ্ধো ভগৱা আড়ৱিযং ৱিহৰতি অগ্গাড়ৱে চেতিযে. তেন খো পন সমযেন আড়ৱকা [আড়ৱিকা (স্যা.)] ভিক্খূ নৱকম্মং কৰোন্তা পথৱিং খণন্তিপি খণাপেন্তিপি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা পথৱিং খণিস্সন্তিপি খণাপেস্সন্তিপি! একিন্দ্ৰিযং সমণা সক্যপুত্তিযা জীৱং ৱিহেঠেন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আড়ৱকা ভিক্খূ পথৱিং খণিস্সন্তিপি খণাপেস্সন্তিপী’’তি…পে… ‘‘সচ্চং কিৰ তুম্হে, ভিক্খৱে, পথৱিং খণথপি খণাপেথপী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, পথৱিং খণিস্সথপি খণাপেস্সথপি! জীৱসঞ্ঞিনো হি, মোঘপুৰিসা, মনুস্সা পথৱিযা. নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৮৫. ‘‘যো পন ভিক্খু পথৱিং খণেয্য ৱা খণাপেয্য ৱা, পাচিত্তিয’’ন্তি.

৮৬. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

পথৱী নাম দ্ৱে পথৱিযো – জাতা চ পথৱী অজাতা চ পথৱী.

জাতা নাম পথৱী – সুদ্ধপংসু সুদ্ধমত্তিকা অপ্পপাসাণা অপ্পসক্খৰা অপ্পকঠলা অপ্পমৰুম্বা অপ্পৱালিকা, যেভুয্যেনপংসুকা, যেভুয্যেনমত্তিকা. অদড্ঢাপি ৱুচ্চতি জাতা পথৱী. যোপি পংসুপুঞ্জো ৱা মত্তিকাপুঞ্জো ৱা অতিৰেকচাতুমাসং ওৱট্ঠো, অযম্পি ৱুচ্চতি জাতা পথৱী.

অজাতা নাম পথৱী – সুদ্ধপাসাণা সুদ্ধসক্খৰা সুদ্ধকঠলা সুদ্ধমৰুম্বা সুদ্ধৱালিকা অপ্পপংসুকা অপ্পমত্তিকা, যেভুয্যেনপাসাণা, যেভুয্যেনসক্খৰা, যেভুয্যেনকঠলা, যেভুয্যেনমৰুম্বা, যেভুয্যেনৱালিকা. দড্ঢাপি ৱুচ্চতি অজাতা পথৱী. যোপি পংসুপুঞ্জো ৱা মত্তিকাপুঞ্জো ৱা ওমকচাতুমাসং ওৱট্ঠো, অযম্পি ৱুচ্চতি অজাতা পথৱী.

খণেয্যাতি সযং খণতি, আপত্তি পাচিত্তিযস্স.

খণাপেয্যাতি অঞ্ঞং আণাপেতি, আপত্তি পাচিত্তিযস্স. সকিং আণত্তো বহুকম্পি খণতি, আপত্তি পাচিত্তিযস্স.

৮৭. পথৱিযা পথৱিসঞ্ঞী খণতি ৱা খণাপেতি ৱা, ভিন্দতি ৱা ভেদাপেতি ৱা, দহতি ৱা দহাপেতি ৱা, আপত্তি পাচিত্তিযস্স.

পথৱিযা ৱেমতিকো খণতি ৱা খণাপেতি ৱা, ভিন্দতি ৱা ভেদাপেতি ৱা, দহতি ৱা দহাপেতি ৱা, আপত্তি দুক্কটস্স.

পথৱিযা অপথৱিসঞ্ঞী খণতি ৱা খণাপেতি ৱা, ভিন্দতি ৱা ভেদাপেতি ৱা, দহতি ৱা দহাপেতি ৱা, অনাপত্তি.

অপথৱিযা পথৱিসঞ্ঞী, আপত্তি দুক্কটস্স. অপথৱিযা ৱেমতিকো, আপত্তি দুক্কটস্স. অপথৱিযা অপথৱিসঞ্ঞী, অনাপত্তি.

৮৮. অনাপত্তি – ‘‘ইমং জান, ইমং দেহি, ইমং আহৰ, ইমিনা অত্থো, ইমং কপ্পিযং কৰোহী’’তি ভণতি, অসঞ্চিচ্চ, অসতিযা, অজানন্তস্স, উম্মত্তকস্স, আদিকম্মিকস্সাতি.

পথৱীখণনসিক্খাপদং নিট্ঠিতং দসমং.

মুসাৱাদৱগ্গো পঠমো.

তস্সুদ্দানং –

মুসা ওমসপেসুঞ্ঞং, পদসেয্যায ৱে দুৱে;

অঞ্ঞত্ৰ ৱিঞ্ঞুনা ভূতা, দুট্ঠুল্লাপত্তি খণনাতি.