৬. দুতিযসহসেয্যসিক্খাপদং

৫৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মা অনুৰুদ্ধো কোসলেসু জনপদে [এত্থ অম্বট্ঠসুত্তাদিটীকা ওলোকেতব্বা] সাৱত্থিং গচ্ছন্তো সাযং অঞ্ঞতৰং গামং উপগচ্ছি. তেন খো পন সমযেন তস্মিং গামে অঞ্ঞতৰিস্সা ইত্থিযা আৱসথাগাৰং পঞ্ঞত্তং হোতি. অথ খো আযস্মা অনুৰুদ্ধো যেন সা ইত্থী তেনুপসঙ্কমি; উপসঙ্কমিত্ৱা তং ইত্থিং এতদৱোচ – ‘‘সচে তে, ভগিনি, অগৰু, ৱসেয্যাম একৰত্তং আৱসথাগাৰে’’তি. ‘‘ৱসেয্যাথ, ভন্তে’’তি. অঞ্ঞেপি অদ্ধিকা যেন সা ইত্থী তেনুপসঙ্কমিংসু; উপসঙ্কমিত্ৱা তং ইত্থিং এতদৱোচুং – ‘‘সচে তে, অয্যে, অগৰু ৱসেয্যাম একৰত্তং আৱসথাগাৰে’’তি. ‘‘এসো খো অয্যো সমণো পঠমং উপগতো; সচে সো অনুজানাতি, ৱসেয্যাথা’’তি. অথ খো তে অদ্ধিকা যেনাযস্মা অনুৰুদ্ধো তেনুপসঙ্কমিংসু; উপসঙ্কমিত্ৱা আযস্মন্তং অনুৰুদ্ধং এতদৱোচুং – ‘‘সচে তে, ভন্তে, অগৰু, ৱসেয্যাম একৰত্তং আৱসথাগাৰে’’তি. ‘‘ৱসেয্যাথ, আৱুসো’’তি. অথ খো সা ইত্থী আযস্মন্তে অনুৰুদ্ধে সহ দস্সনেন পটিবদ্ধচিত্তা অহোসি. অথ খো সা ইত্থী যেনাযস্মা অনুৰুদ্ধো তেনুপসঙ্কমি; উপসঙ্কমিত্ৱা আযস্মন্তং অনুৰুদ্ধং এতদৱোচ – ‘‘অয্যো, ভন্তে, ইমেহি মনুস্সেহি আকিণ্ণো ন ফাসু ৱিহৰিস্সতি. সাধাহং, ভন্তে, অয্যস্স মঞ্চকং অব্ভন্তৰং পঞ্ঞপেয্য’’ন্তি. অধিৱাসেসি খো আযস্মা অনুৰুদ্ধো তুণ্হীভাৱেন. অথ খো সা ইত্থী আযস্মতো অনুৰুদ্ধস্স মঞ্চকং অব্ভন্তৰং পঞ্ঞপেত্ৱা অলঙ্কতপ্পটিযত্তা গন্ধগন্ধিনী যেনাযস্মা অনুৰুদ্ধো তেনুপসঙ্কমি; উপসঙ্কমিত্ৱা আযস্মন্তং অনুৰুদ্ধং এতদৱোচ – ‘‘অয্যো, ভন্তে, অভিৰূপো দস্সনীযো পাসাদিকো, অহং চম্হি অভিৰূপা দস্সনীযা পাসাদিকা. সাধাহং, ভন্তে, অয্যস্স পজাপতি ভৱেয্য’’ন্তি. এৱং ৱুত্তে আযস্মা অনুৰুদ্ধো তুণ্হী অহোসি. দুতিযম্পি খো…পে… ততিযম্পি খো সা ইত্থী আযস্মন্তং অনুৰুদ্ধং এতদৱোচ – ‘‘অয্যো, ভন্তে, অভিৰূপো দস্সনীযো পাসাদিকো, অহঞ্চম্হি অভিৰূপা দস্সনীযা পাসাদিকা. সাধু, ভন্তে, অয্যো মঞ্চেৱ পটিচ্ছতু [সম্পটিচ্ছতু (স্যা.)] সব্বঞ্চ সাপতেয্য’’ন্তি. ততিযম্পি খো আযস্মা অনুৰুদ্ধো তুণ্হী অহোসি. অথ খো সা ইত্থী সাটকং নিক্খিপিত্ৱা আযস্মতো অনুৰুদ্ধস্স পুৰতো চঙ্কমতিপি তিট্ঠতিপি নিসীদতিপি সেয্যম্পি কপ্পেতি. অথ খো আযস্মা অনুৰুদ্ধো ইন্দ্ৰিযানি ওক্খিপিত্ৱা তং ইত্থিং নেৱ ওলোকেসি নপি আলপি. অথ খো সা ইত্থী – ‘‘অচ্ছৰিযং ৱত ভো, অব্ভুতং ৱত ভো! বহূ মে মনুস্সা সতেনপি সহস্সেনপি পহিণন্তি. অযং পন সমণো – মযা সামং যাচিযমানো – ন ইচ্ছতি মঞ্চেৱ পটিচ্ছিতুং সব্বঞ্চ সাপতেয্য’’ন্তি সাটকং নিৱাসেত্ৱা আযস্মতো অনুৰুদ্ধস্স পাদেসু সিৰসা নিপতিত্ৱা আযস্মন্তং অনুৰুদ্ধং এতদৱোচ – ‘‘অচ্চযো মং, ভন্তে, অচ্চগমা যথাবালং যথামূড়্হং যথাঅকুসলং যাহং এৱমকাসিং. তস্সা মে, ভন্তে, অয্যো অচ্চযং অচ্চযতো পটিগ্গণ্হাতু আযতিং সংৱৰাযা’’তি. ‘‘তগ্ঘ ত্ৱং, ভগিনি, অচ্চযো অচ্চগমা যথাবালং যথামূড়্হং যথাঅকুসলং যা ত্ৱং এৱমকাসি. যতো চ খো ত্ৱং, ভগিনি, অচ্চযং অচ্চযতো দিস্ৱা যথাধম্মং পটিকৰোসি, তং তে মযং পটিগ্গণ্হাম. ৱুদ্ধি হেসা, ভগিনি, অৰিযস্স ৱিনযে যো অচ্চযং অচ্চযতো দিস্ৱা যথাধম্মং পটিকৰোতি আযতিঞ্চ সংৱৰং আপজ্জতী’’তি.

অথ খো সা ইত্থী তস্সা ৰত্তিযা অচ্চযেন আযস্মন্তং অনুৰুদ্ধং পণীতেন খাদনীযেন ভোজনীযেন সহত্থা সন্তপ্পেত্ৱা সম্পৱাৰেত্ৱা, আযস্মন্তং অনুৰুদ্ধং ভুত্তাৱিং ওনীতপত্তপাণিং অভিৱাদেত্ৱা একমন্তং নিসীদি. একমন্তং নিসিন্নং খো তং ইত্থিং আযস্মা অনুৰুদ্ধো ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো সা ইত্থী – আযস্মতা অনুৰুদ্ধেন ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা – আযস্মন্তং অনুৰুদ্ধং এতদৱোচ – ‘‘অভিক্কন্তং, ভন্তে, অভিক্কন্তং, ভন্তে! সেয্যথাপি, ভন্তে, নিক্কুজ্জিতং ৱা উক্কুজ্জেয্য, পটিচ্ছন্নং ৱা ৱিৱৰেয্য, মূড়্হস্স ৱা মগ্গং আচিক্খেয্য, অন্ধকাৰে ৱা তেলপজ্জোতং ধাৰেয্য – চক্খুমন্তো ৰূপানি দক্খন্তীতি, এৱমেৱং অয্যেন অনুৰুদ্ধেন অনেকপৰিযাযেন ধম্মো পকাসিতো. এসাহং, ভন্তে, তং ভগৱন্তং সৰণং গচ্ছামি ধম্মঞ্চ ভিক্খুসঙ্ঘঞ্চ. উপাসিকং মং অয্যো ধাৰেতু অজ্জতগ্গে পাণুপেতং সৰণং গত’’ন্তি.

অথ খো আযস্মা অনুৰুদ্ধো সাৱত্থিযং গন্ত্ৱা ভিক্খূনং এতমত্থং আৰোচেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা অনুৰুদ্ধো মাতুগামেন সহসেয্যং কপ্পেস্সতী’’তি! অথ খো তে ভিক্খূ আযস্মন্তং অনুৰুদ্ধং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ ত্ৱং, অনুৰুদ্ধ, মাতুগামেন সহসেয্যং কপ্পেসী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, অনুৰুদ্ধ, মাতুগামেন সহসেয্যং কপ্পেস্সসি! নেতং, অনুৰুদ্ধ, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৫৬. ‘‘যো পন ভিক্খু মাতুগামেন সহসেয্যং কপ্পেয্য পাচিত্তিয’’ন্তি.

৫৭. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

মাতুগামো নাম মনুস্সিত্থী, ন যক্খী [যক্খিনী (ক.)], ন পেতী, ন তিৰচ্ছানগতা; অন্তমসো তদহুজাতাপি দাৰিকা, পগেৱ মহত্তৰী.

সহাতি একতো.

সেয্যা নাম সব্বচ্ছন্না, সব্বপৰিচ্ছন্না, যেভুয্যেনচ্ছন্না, যেভুয্যেন পৰিচ্ছন্না.

সেয্যং কপ্পেয্যাতি অত্থঙ্গতে সূৰিযে, মাতুগামে নিপন্নে ভিক্খু নিপজ্জতি, আপত্তি পাচিত্তিযস্স. ভিক্খু নিপন্নে মাতুগামো নিপজ্জতি, আপত্তি পাচিত্তিযস্স. উভো ৱা নিপজ্জন্তি, আপত্তি পাচিত্তিযস্স. উট্ঠহিত্ৱা পুনপ্পুনং নিপজ্জন্তি, আপত্তি পাচিত্তিযস্স.

৫৮. মাতুগামে মাতুগামসঞ্ঞী সহসেয্যং কপ্পেতি, আপত্তি পাচিত্তিযস্স. মাতুগামে ৱেমতিকো সহসেয্যং কপ্পেতি, আপত্তি পাচিত্তিযস্স. মাতুগামে অমাতুগামসঞ্ঞী সহসেয্যং কপ্পেতি, আপত্তি পাচিত্তিযস্স.

উপড্ঢচ্ছন্নে উপড্ঢপৰিচ্ছন্নে, আপত্তি দুক্কটস্স. যক্খিযা ৱা পেতিযা ৱা পণ্ডকেন ৱা তিৰচ্ছানগতিত্থিযা ৱা সহসেয্যং কপ্পেতি, আপত্তি দুক্কটস্স. অমাতুগামে মাতুগামসঞ্ঞী, আপত্তি দুক্কটস্স. অমাতুগামে ৱেমতিকো, আপত্তি দুক্কটস্স. অমাতুগামে অমাতুগামসঞ্ঞী, অনাপত্তি.

৫৯. অনাপত্তি সব্বচ্ছন্নে সব্বঅপৰিচ্ছন্নে, সব্বপৰিচ্ছন্নে সব্বঅচ্ছন্নে [অনাপত্তি সব্বঅচ্ছন্নে সব্বঅপৰিচ্ছন্নে, (সী.)], যেভুয্যেন অচ্ছন্নে, যেভুয্যেন অপৰিচ্ছন্নে, মাতুগামে নিপন্নে ভিক্খু নিসীদতি, ভিক্খু নিপন্নে মাতুগামো নিসীদতি, উভো ৱা নিসীদন্তি, উম্মত্তকস্স, আদিকম্মিকস্সাতি.

দুতিযসহসেয্যসিক্খাপদং নিট্ঠিতং ছট্ঠং.