৭. ধম্মদেসনাসিক্খাপদং

৬০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মা উদাযী সাৱত্থিযং কুলূপকো হোতি, বহুকানি কুলানি উপসঙ্কমতি. অথ খো আযস্মা উদাযী পুব্বণ্হসমযং নিৱাসেত্ৱা পত্তচীৱৰমাদায যেন অঞ্ঞতৰং কুলং তেনুপসঙ্কমি. তেন খো পন সমযেন ঘৰণী নিৱেসনদ্ৱাৰে নিসিন্না হোতি, ঘৰসুণ্হা আৱসথদ্ৱাৰে নিসিন্না হোতি. অথ খো আযস্মা উদাযী যেন ঘৰণী তেনুপসঙ্কমি; উপসঙ্কমিত্ৱা ঘৰণিযা উপকণ্ণকে ধম্মং দেসেসি. অথ খো ঘৰসুণ্হায এতদহোসি – ‘‘কি নু খো সো সমণো সস্সুযা জাৰো উদাহু ওভাসতী’’তি?

অথ খো আযস্মা উদাযী ঘৰণিযা উপকণ্ণকে ধম্মং দেসেত্ৱা যেন ঘৰসুণ্হা তেনুপসঙ্কমি; উপসঙ্কমিত্ৱা ঘৰসুণ্হায উপকণ্ণকে ধম্মং দেসেসি. অথ খো ঘৰণিযা এতদহোসি – ‘‘কিং নু খো সো সমণো ঘৰসুণ্হায জাৰো উদাহু ওভাসতী’’তি? অথ খো আযস্মা উদাযী ঘৰসুণ্হায উপকণ্ণকে ধম্মং দেসেত্ৱা পক্কামি. অথ খো ঘৰণী ঘৰসুণ্হং এতদৱোচ – ‘‘হে জে, কিং তে এসো সমণো অৱোচা’’তি? ‘‘ধম্মং মে, অয্যে, দেসেসি’’. ‘‘অয্যায পন কিং অৱোচা’’তি? ‘‘ময্হম্পি ধম্মং দেসেসী’’তি. তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যো উদাযী মাতুগামস্স উপকণ্ণকে ধম্মং দেসেস্সতি! ননু নাম ৱিস্সট্ঠেন ৱিৱটেন ধম্মো দেসেতব্বো’’তি?

অস্সোসুং খো ভিক্খূ তাসং ইত্থীনং উজ্ঝাযন্তীনং খিয্যন্তীনং ৱিপাচেন্তীনং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উদাযী মাতুগামস্স ধম্মং দেসেস্সতী’’তি! অথ খো তে ভিক্খূ আযস্মন্তং উদাযিং অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ ত্ৱং, উদাযি, মাতুগামস্স ধম্মং দেসেসী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, মাতুগামস্স ধম্মং দেসেস্সসি. নেতং মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘যো পন ভিক্খু মাতুগামস্স ধম্মং দেসেয্য পাচিত্তিয’’ন্তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

৬১. তেন খো পন সমযেন উপাসিকা ভিক্খূ পস্সিত্ৱা এতদৱোচুং – ‘‘ইঙ্ঘায্যা ধম্মং দেসেথা’’তি. ‘‘ন, ভগিনী, কপ্পতি মাতুগামস্স ধম্মং দেসেতু’’ন্তি. ‘‘ইঙ্ঘায্যা ছপ্পঞ্চৱাচাহি ধম্মং দেসেথ, সক্কা এত্তকেনপি ধম্মো অঞ্ঞাতু’’ন্তি. ‘‘ন, ভগিনী, কপ্পতি মাতুগামস্স ধম্মং দেসেতু’’ন্তি. কুক্কুচ্চাযন্তা ন দেসেসুং. উপাসিকা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা অম্হেহি যাচিযমানা ধম্মং ন দেসেস্সন্তী’’তি! অস্সোসুং খো ভিক্খূ তাসং উপাসিকানং উজ্ঝাযন্তীনং খিয্যন্তীনং ৱিপাচেন্তীনং. অথ খো তে ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, মাতুগামস্স ছপ্পঞ্চৱাচাহি ধম্মং দেসেতুং. এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘যো পন ভিক্খূ মাতুগামস্স উত্তৰিছপ্পঞ্চৱাচাহি ধম্মং দেসেয্য, পাচিত্তিয’’ন্তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

৬২. তেন খো পন সমযেন ছব্বগ্গিযা ভিক্খূ – ‘‘ভগৱতা অনুঞ্ঞাতং মাতুগামস্স ছপ্পঞ্চৱাচাহি ধম্মং দেসেতু’’ন্তি তে অৱিঞ্ঞুং পুৰিসৱিগ্গহং উপনিসীদাপেত্ৱা মাতুগামস্স উত্তৰিছপ্পঞ্চৱাচাহি ধম্মং দেসেন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ অৱিঞ্ঞুং পুৰিসৱিগ্গহং উপনিসীদাপেত্ৱা মাতুগামস্স উত্তৰিছপ্পঞ্চৱাচাহি ধম্মং দেসেস্সন্তী’’তি!

অথ খো তে ভিক্খূ ছব্বগ্গিযে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ তুম্হে, ভিক্খৱে, অৱিঞ্ঞুং পুৰিসৱিগ্গহং উপনিসীদাপেত্ৱা মাতুগামস্স উত্তৰিছপ্পঞ্চৱাচাহি ধম্মং দেসেথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, অৱিঞ্ঞুং পুৰিসৱিগ্গহং উপনিসীদাপেত্ৱা মাতুগামস্স উত্তৰিছপ্পঞ্চৱাচাহি ধম্মং দেসেস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৬৩. ‘‘যো পন ভিক্খু মাতুগামস্স উত্তৰিছপ্পঞ্চৱাচাহি ধম্মং দেসেয্য, অঞ্ঞত্ৰ ৱিঞ্ঞুনা পুৰিসৱিগ্গহেন, পাচিত্তিয’’ন্তি.

৬৪. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

মাতুগামো নাম মনুস্সিত্থী; ন যক্খী ন পেতী ন তিৰচ্ছানগতা; ৱিঞ্ঞূ, পটিবলা সুভাসিতদুব্ভাসিতং দুট্ঠুল্লাদুট্ঠুল্লং আজানিতুং.

উত্তৰিছপ্পঞ্চৱাচাহীতি অতিৰেকছপ্পঞ্চৱাচাহি.

ধম্মো নাম বুদ্ধভাসিতো, সাৱকভাসিতো, ইসিভাসিতো, দেৱতাভাসিতো, অত্থূপসঞ্হিতো, ধম্মূপসঞ্হিতো.

দেসেয্যাতি পদেন দেসেতি, পদে পদে আপত্তি পাচিত্তিযস্স. অক্খৰায দেসেতি, অক্খৰক্খৰায আপত্তি পাচিত্তিযস্স.

অঞ্ঞত্ৰ ৱিঞ্ঞুনা পুৰিসৱিগ্গহেনাতি ঠপেত্ৱা ৱিঞ্ঞুং পুৰিসৱিগ্গহং. ৱিঞ্ঞূ নাম পুৰিসৱিগ্গহো, পটিবলো হোতি সুভাসিতদুব্ভাসিতং দুট্ঠুল্লাদুট্ঠুল্লং আজানিতুং.

৬৫. মাতুগামে মাতুগামসঞ্ঞী উত্তৰিছপ্পঞ্চৱাচাহি ধম্মং দেসেতি, অঞ্ঞত্ৰ ৱিঞ্ঞুনা পুৰিসৱিগ্গহেন, আপত্তি পাচিত্তিযস্স. মাতুগামে ৱেমতিকো উত্তৰিছপ্পঞ্চৱাচাহি ধম্মং দেসেতি, অঞ্ঞত্ৰ ৱিঞ্ঞুনা পুৰিসৱিগ্গহেন, আপত্তি পাচিত্তিযস্স. মাতুগামে অমাতুগামসঞ্ঞী উত্তৰিছপ্পঞ্চৱাচাহি ধম্মং দেসেতি, অঞ্ঞত্ৰ ৱিঞ্ঞুনা পুৰিসৱিগ্গহেন, আপত্তি পাচিত্তিযস্স.

যক্খিযা ৱা পেতিযা ৱা পণ্ডকস্স ৱা তিৰচ্ছানগতমনুস্সৱিগ্গহিত্থিযা ৱা উত্তৰিছপ্পঞ্চৱাচাহি ধম্মং দেসেতি, অঞ্ঞত্ৰ ৱিঞ্ঞুনা পুৰিসৱিগ্গহেন, আপত্তি দুক্কটস্স. অমাতুগামে মাতুগামসঞ্ঞী, আপত্তি দুক্কটস্স. অমাতুগামে ৱেমতিকো, আপত্তি দুক্কটস্স. অমাতুগামে অমাতুগামসঞ্ঞী, অনাপত্তি.

৬৬. অনাপত্তি ৱিঞ্ঞুনা পুৰিসৱিগ্গহেন, ছপ্পঞ্চৱাচাহি ধম্মং দেসেতি, ঊনকছপ্পঞ্চৱাচাহি ধম্মং দেসেতি, উট্ঠহিত্ৱা পুন নিসীদিত্ৱা দেসেতি, মাতুগামো উট্ঠহিত্ৱা পুন নিসীদতি তস্মিং দেসেতি, অঞ্ঞস্স মাতুগামস্স দেসেতি, পঞ্হং পুচ্ছতি, পঞ্হং পুট্ঠো কথেতি, অঞ্ঞস্সত্থায ভণন্তং মাতুগামো সুণাতি, উম্মত্তকস্স, আদিকম্মিকস্সাতি.

ধম্মদেসনাসিক্খাপদং নিট্ঠিতং সত্তমং.