৫. সহসেয্যসিক্খাপদং

৪৯. তেন সমযেন বুদ্ধো ভগৱা আড়ৱিযং ৱিহৰতি অগ্গাড়ৱে চেতিযে. তেন খো পন সমযেন উপাসকা আৰামং আগচ্ছন্তি ধম্মস্সৱনায. ধম্মে ভাসিতে থেৰা ভিক্খূ যথাৱিহাৰং গচ্ছন্তি. নৱকা ভিক্খূ তত্থেৱ উপট্ঠানসালাযং উপাসকেহি সদ্ধিং মুট্ঠস্সতী, অসম্পজানা, নগ্গা, ৱিকূজমানা, কাকচ্ছমানা সেয্যং কপ্পেন্তি. উপাসকা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভদন্তা মুট্ঠস্সতী অসম্পজানা নগ্গা ৱিকূজমানা কাকচ্ছমানা সেয্যং কপ্পেস্সন্তী’’তি! অস্সোসুং খো ভিক্খূ তেসং উপাসকানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খূ অনুপসম্পন্নেন সহসেয্যং কপ্পেস্সন্তী’’তি! অথ খো তে ভিক্খূ তে নৱকে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং…পে… ‘‘সচ্চং কিৰ, ভিক্খৱে, ভিক্খূ অনুপসম্পন্নেন সহসেয্যং কপ্পেন্তী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তে, ভিক্খৱে, মোঘপুৰিসা অনুপসম্পন্নেন সহসেয্যং কপ্পেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘যো পন ভিক্খু অনুপসম্পন্নেন সহসেয্যং কপ্পেয্য পাচিত্তিয’’ন্তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

৫০. অথ খো ভগৱা আড়ৱিযং যথাভিৰন্তং ৱিহৰিত্ৱা যেন কোসম্বী তেন চাৰিকং পক্কামি. অনুপুব্বেন চাৰিকং চৰমানো যেন কোসম্বী তদৱসৰি. তত্ৰ সুদং ভগৱা কোসম্বিযং ৱিহৰতি বদৰিকাৰামে. ভিক্খূ আযস্মন্তং ৰাহুলং এতদৱোচুং – ‘‘ভগৱতা, আৱুসো ৰাহুল, সিক্খাপদং পঞ্ঞত্তং – ‘ন অনুপসম্পন্নেন সহসেয্যা কপ্পেতব্বা’তি. সেয্যং, আৱুসো ৰাহুল, জানাহী’’তি. অথ খো আযস্মা ৰাহুলো সেয্যং অলভমানো ৱচ্চকুটিযা সেয্যং কপ্পেসি. অথ খো ভগৱা ৰত্তিযা পচ্চূসসমযং পচ্চুট্ঠায যেন ৱচ্চকুটি তেনুপসঙ্কমি; উপসঙ্কমিত্ৱা উক্কাসি. আযস্মাপি ৰাহুলো উক্কাসি. ‘‘কো এত্থা’’তি? ‘‘অহং, ভগৱা, ৰাহুলো’’তি. ‘‘কিস্স ত্ৱং, ৰাহুল, ইধ নিসিন্নোসী’’তি? অথ খো আযস্মা ৰাহুলো ভগৱতো এতমত্থং আৰোচেসি. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, অনুপসম্পন্নেন দিৰত্ততিৰত্তং সহসেয্যং কপ্পেতুং. এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৫১. ‘‘যো পন ভিক্খু অনুপসম্পন্নেন উত্তৰিদিৰত্ততিৰত্তং সহসেয্যং কপ্পেয্য, পাচিত্তিয’’ন্তি.

৫২. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

অনুপসম্পন্নো নাম ভিক্খুং ঠপেত্ৱা অৱসেসো অনুপসম্পন্নো নাম.

উত্তৰিদিৰত্ততিৰত্তন্তি অতিৰেকদিৰত্ততিৰত্তং.

সহাতি একতো.

সেয্যা নাম সব্বচ্ছন্না, সব্বপৰিচ্ছন্না, যেভুয্যেনচ্ছন্না, যেভুয্যেন পৰিচ্ছন্না.

সেয্যং কপ্পেয্যাতি চতুত্থে দিৱসে অত্থঙ্গতে সূৰিযে, অনুপসম্পন্নে নিপন্নে, ভিক্খু নিপজ্জতি, আপত্তি পাচিত্তিযস্স. ভিক্খু নিপন্নে, অনুপসম্পন্নো নিপজ্জতি, আপত্তি পাচিত্তিযস্স. উভো ৱা নিপজ্জন্তি, আপত্তি পাচিত্তিযস্স. উট্ঠহিত্ৱা পুনপ্পুনং নিপজ্জন্তি, আপত্তি পাচিত্তিযস্স.

৫৩. অনুপসম্পন্নে অনুপসম্পন্নসঞ্ঞী উত্তৰিদিৰত্ততিৰত্তং সহসেয্যং কপ্পেতি, আপত্তি পাচিত্তিযস্স. অনুপসম্পন্নে ৱেমতিকো উত্তৰিদিৰত্ততিৰত্তং সহসেয্যং কপ্পেতি, আপত্তি পাচিত্তিযস্স. অনুপসম্পন্নে উপসম্পন্নসঞ্ঞী উত্তৰিদিৰত্ততিৰত্তং সহসেয্যং কপ্পেতি, আপত্তি পাচিত্তিযস্স.

উপড্ঢচ্ছন্নে উপড্ঢপৰিচ্ছন্নে, আপত্তি দুক্কটস্স. উপসম্পন্নে অনুপসম্পন্নসঞ্ঞী, আপত্তি দুক্কটস্স. উপসম্পন্নে ৱেমতিকো, আপত্তি দুক্কটস্স. উপসম্পন্নে উপসম্পন্নসঞ্ঞী, অনাপত্তি.

৫৪. অনাপত্তি দ্ৱেতিস্সো ৰত্তিযো ৱসতি, ঊনকদ্ৱেতিস্সো ৰত্তিযো ৱসতি, দ্ৱে ৰত্তিযো ৱসিত্ৱা ততিযায ৰত্তিযা পুৰাৰুণা নিক্খমিত্ৱা পুন ৱসতি, সব্বচ্ছন্নে, সব্বঅপৰিচ্ছন্নে, সব্বপৰিচ্ছন্নে সব্বঅচ্ছন্নে [ৱসতি, সব্বঅচ্ছন্নে সব্বঅপৰিচ্ছন্নে, (সী.)], যেভুয্যেন অচ্ছন্নে, যেভুয্যেন অপৰিচ্ছন্নে, অনুপসম্পন্নে নিপন্নে ভিক্খু নিসীদতি, ভিক্খু নিপন্নে অনুপসম্পন্নো নিসীদতি, উভো ৱা নিসীদন্তি, উম্মত্তকস্স, আদিকম্মিকস্সাতি.

সহসেয্যসিক্খাপদং নিট্ঠিতং পঞ্চমং.