২৭০. তস্সুদ্দানং

চম্পাযং ভগৱা আসি, ৱত্থু ৱাসভগামকে;

আগন্তুকানমুস্সুক্কং, অকাসি ইচ্ছিতব্বকে [ইচ্ছিতব্বকো (ক.)].

পকতঞ্ঞুনোতি ঞত্ৱা, উস্সুক্কং ন কৰী তদা;

উক্খিত্তো ন কৰোতীতি, সাগমা জিনসন্তিকে.

অধম্মেন ৱগ্গকম্মং, সমগ্গং অধম্মেন চ;

ধম্মেন ৱগ্গকম্মঞ্চ, পতিৰূপকেন ৱগ্গিকং.

পতিৰূপকেন সমগ্গং, একো উক্খিপতেককং;

একো চ দ্ৱে সম্বহুলে, সঙ্ঘং উক্খিপতেককো.

দুৱেপি সম্বহুলাপি, সঙ্ঘো সঙ্ঘঞ্চ উক্খিপি;

সব্বঞ্ঞুপৱৰো সুত্ৱা, অধম্মন্তি পটিক্খিপি.

ঞত্তিৱিপন্নং যং কম্মং, সম্পন্নং অনুসাৱনং;

অনুস্সাৱনৱিপন্নং, সম্পন্নং ঞত্তিযা চ যং.

উভযেন ৱিপন্নঞ্চ, অঞ্ঞত্ৰ ধম্মমেৱ চ;

ৱিনযা সত্থু পটিকুট্ঠং, কুপ্পং অট্ঠানাৰহিকং.

অধম্মৱগ্গং সমগ্গং, ধম্ম পতিৰূপানি যে দুৱে;

ধম্মেনেৱ চ সামগ্গিং, অনুঞ্ঞাসি তথাগতো.

চতুৱগ্গো পঞ্চৱগ্গো, দসৱগ্গো চ ৱীসতি;

পৰোৱীসতিৱগ্গো চ [অতিৰেকৱীসতিৱগ্গো (স্যা.)], সঙ্ঘো পঞ্চৱিধো তথা.

ঠপেত্ৱা উপসম্পদং, যঞ্চ কম্মং পৱাৰণং;

অব্ভানকম্মেন সহ, চতুৱগ্গেহি কম্মিকো.

দুৱে কম্মে ঠপেত্ৱান, মজ্ঝদেসূপসম্পদং;

অব্ভানং পঞ্চৱগ্গিকো, সব্বকম্মেসু কম্মিকো.

অব্ভানেকং ঠপেত্ৱান, যে ভিক্খূ দসৱগ্গিকা;

সব্বকম্মকৰো সঙ্ঘো, ৱীসো সব্বত্থ কম্মিকো.

ভিক্খুনী সিক্খমানা, চ সামণেৰো সামণেৰী;

পচ্চক্খাতন্তিমৱত্থূ, উক্খিত্তাপত্তিদস্সনে.

অপ্পটিকম্মে দিট্ঠিযা, পণ্ডকো থেয্যসংৱাসকং;

তিত্থিযা তিৰচ্ছানগতং, মাতু পিতু চ ঘাতকং.

অৰহং ভিক্খুনীদূসি, ভেদকং লোহিতুপ্পাদং;

ব্যঞ্জনং নানাসংৱাসং, নানাসীমায ইদ্ধিযা.

যস্স সঙ্ঘো কৰে কম্মং, হোন্তেতে চতুৱীসতি;

সম্বুদ্ধেন পটিক্খিত্তা, ন হেতে গণপূৰকা.

পাৰিৱাসিকচতুত্থো, পৰিৱাসং দদেয্য ৱা;

মূলা মানত্তমব্ভেয্য, অকম্মং ন চ কৰণং.

মূলা অৰহমানত্তা, অব্ভানাৰহমেৱ চ;

ন কম্মকাৰকা পঞ্চ, সম্বুদ্ধেন পকাসিতা.

ভিক্খুনী সিক্খমানা চ, সামণেৰো সামণেৰিকা;

পচ্চক্খন্তিমউম্মত্তা, খিত্তাৱেদনদস্সনে.

অপ্পটিকম্মে দিট্ঠিযা, পণ্ডকাপি চ ব্যঞ্জনা [ইতো পৰং স্যামমূলে দিযড্ঢগাথাহি অভব্বপুগ্গলা সমত্তং দস্সিতা];

নানাসংৱাসকা সীমা, ৱেহাসং যস্স কম্ম চ.

অট্ঠাৰসন্নমেতেসং, পটিক্কোসং ন ৰুহতি;

ভিক্খুস্স পকতত্তস্স, ৰুহতি পটিক্কোসনা.

সুদ্ধস্স দুন্নিসাৰিতো, বালো হি সুনিস্সাৰিতো;

পণ্ডকো থেয্যসংৱাসো, পক্কন্তো তিৰচ্ছানগতো.

মাতু পিতু অৰহন্ত, দূসকো সঙ্ঘভেদকো;

লোহিতুপ্পাদকো চেৱ, উভতোব্যঞ্জনো চ যো.

একাদসন্নং এতেসং, ওসাৰণং ন যুজ্জতি;

হত্থপাদং তদুভযং, কণ্ণনাসং তদূভযং.

অঙ্গুলি অড়কণ্ডৰং, ফণং খুজ্জো চ ৱামনো;

গণ্ডী লক্খণকসা, চ লিখিতকো চ সীপদী.

পাপা পৰিসকাণো চ, কুণী খঞ্জো হতোপি চ;

ইৰিযাপথদুব্বলো, অন্ধো মূগো চ বধিৰো.

অন্ধমূগন্ধবধিৰো মূগবধিৰমেৱ চ;

অন্ধমূগবধিৰো চ, দ্ৱত্তিংসেতে অনূনকা.

তেসং ওসাৰণং হোতি, সম্বুদ্ধেন পকাসিতং;

দট্ঠব্বা পটিকাতব্বা, নিস্সজ্জেতা ন ৱিজ্জতি.

তস্স উক্খেপনা কম্মা, সত্ত হোন্তি অধম্মিকা;

আপন্নং অনুৱত্তন্তং, সত্ত তেপি অধম্মিকা.

আপন্নং নানুৱত্তন্তং, সত্ত কম্মা সুধম্মিকা;

সম্মুখা পটিপুচ্ছা চ, পটিঞ্ঞায চ কাৰণা.

সতি অমূড়্হপাপিকা, তজ্জনীনিযস্সেন চ;

পব্বাজনীয পটিসাৰো, উক্খেপপৰিৱাস চ.

মূলা মানত্তঅব্ভানা, তথেৱ উপসম্পদা;

অঞ্ঞং কৰেয্য অঞ্ঞস্স, সোড়সেতে অধম্মিকা.

তং তং কৰেয্য তং তস্স, সোড়সেতে সুধম্মিকা;

পচ্চাৰোপেয্য অঞ্ঞঞ্ঞং, সোড়সেতে অধম্মিকা.

দ্ৱে দ্ৱে তম্মূলকং তস্স [দ্ৱে দ্ৱে মূলা কতা কস্স (স্যা.), দোদোতমূলকন্তস্স (ক.)], তেপি সোড়স ধম্মিকা;

একেকমূলকং চক্কং, ‘‘অধম্ম’’ন্তি জিনোব্ৰৱি.

অকাসি তজ্জনীযং কম্মং, সঙ্ঘো ভণ্ডনকাৰকো;

অধম্মেন ৱগ্গকম্মং, অঞ্ঞং আৱাসং গচ্ছি সো.

তত্থাধম্মেন সমগ্গা, তস্স তজ্জনীযং কৰুং;

অঞ্ঞত্থ ৱগ্গাধম্মেন, তস্স তজ্জনীযং কৰুং.

পতিৰূপেন ৱগ্গাপি, সমগ্গাপি তথা কৰুং;

অধম্মেন সমগ্গা চ, ধম্মেন ৱগ্গমেৱ চ.

পতিৰূপকেন ৱগ্গা চ, সমগ্গা চ ইমে পদা;

একেকমূলকং কত্ৱা, চক্কং বন্ধে ৱিচক্খণো.

বালা ব্যত্তস্স নিযস্সং, পব্বাজে কুলদূসকং;

পটিসাৰণীযং কম্মং, কৰে অক্কোসকস্স চ.

অদস্সনাপ্পটিকম্মে, যো চ দিট্ঠিং ন নিস্সজ্জে;

তেসং উক্খেপনীযকম্মং, সত্থৱাহেন ভাসিতং.

উপৰি নযকম্মানং [উপৱিনযকম্মানং (স্যা.), উক্খেপনীযকম্মানং (ক.)] পঞ্ঞো তজ্জনীযং নযে;

তেসংযেৱ অনুলোমং, সম্মা ৱত্ততি যাচিতে [যাচতি (স্যা.), যাচিতো (সী.)].

পস্সদ্ধি তেসং কম্মানং, হেট্ঠা কম্মনযেন চ;

তস্মিং তস্মিং তু কম্মেসু, তত্ৰট্ঠো চ ৱিৱদতি.

অকতং দুক্কটঞ্চেৱ, পুনকাতব্বকন্তি চ;

কম্মে পস্সদ্ধিযা চাপি, তে ভিক্খূ ধম্মৱাদিনো.

ৱিপত্তিব্যাধিতে দিস্ৱা, কম্মপ্পত্তে মহামুনি;

পটিপ্পস্সদ্ধিমক্খাসি, সল্লকত্তোৱ ওসধন্তি.

ইমম্হি খন্ধকে ৱত্থূনি ছত্তিংসাতি.

চম্পেয্যক্খন্ধকো নিট্ঠিতো.