৯. চম্পেয্যক্খন্ধকো

২৩৪. কস্সপগোত্তভিক্খুৱত্থু

৩৮০. তেন সমযেন বুদ্ধো ভগৱা চম্পাযং ৱিহৰতি গগ্গৰায পোক্খৰণিযা তীৰে. তেন খো পন সমযেন কাসীসু জনপদে ৱাসভগামো নাম হোতি. তত্থ কস্সপগোত্তো নাম ভিক্খু আৱাসিকো হোতি তন্তিবদ্ধো উস্সুক্কং আপন্নো – কিন্তি অনাগতা চ পেসলা ভিক্খূ আগচ্ছেয্যুং, আগতা চ পেসলা ভিক্খূ ফাসু ৱিহৰেয্যুং, অযঞ্চ আৱাসো ৱুদ্ধিং ৱিৰুড়্হিং ৱেপুল্লং আপজ্জেয্যাতি. তেন খো পন সমযেন সম্বহুলা ভিক্খূ কাসীসু চাৰিকং চৰমানা যেন ৱাসভগামো তদৱসৰুং. অদ্দসা খো কস্সপগোত্তো ভিক্খু তে ভিক্খূ দূৰতোৱ আগচ্ছন্তে, দিস্ৱান আসনং পঞ্ঞপেসি, পাদোদকং পাদপীঠং পাদকথলিকং উপনিক্খিপি, পচ্চুগ্গন্ত্ৱা পত্তচীৱৰং পটিগ্গহেসি, পানীযেন আপুচ্ছি, নহানে উস্সুক্কং অকাসি, উস্সুক্কম্পি অকাসি যাগুযা খাদনীযে ভত্তস্মিং. অথ খো তেসং আগন্তুকানং ভিক্খূনং এতদহোসি – ‘‘ভদ্দকো খো অযং, আৱুসো, আৱাসিকো ভিক্খু নহানে উস্সুক্কং কৰোতি, উস্সুক্কম্পি কৰোতি যাগুযা খাদনীযে ভত্তস্মিং. হন্দ, মযং, আৱুসো, ইধেৱ ৱাসভগামে নিৱাসং কপ্পেমা’’তি. অথ খো তে আগন্তুকা ভিক্খূ তত্থেৱ ৱাসভগামে নিৱাসং কপ্পেসুং.

অথ খো কস্সপগোত্তস্স ভিক্খুনো এতদহোসি – ‘‘যো খো ইমেসং আগন্তুকানং ভিক্খূনং আগন্তুককিলমথো সো পটিপ্পস্সদ্ধো. যেপিমে গোচৰে অপ্পকতঞ্ঞুনো তেদানিমে গোচৰে পকতঞ্ঞুনো. দুক্কৰং খো পন পৰকুলেসু যাৱজীৱং উস্সুক্কং কাতুং, ৱিঞ্ঞত্তি চ মনুস্সানং অমনাপা. যংনূনাহং ন উস্সুক্কং কৰেয্যং যাগুযা খাদনীযে ভত্তস্মি’’ন্তি. সো ন উস্সুক্কং অকাসি যাগুযা খাদনীযে ভত্তস্মিং. অথ খো তেসং আগন্তুকানং ভিক্খূনং এতদহোসি – ‘‘পুব্বে খ্ৱাযং, আৱুসো, আৱাসিকো ভিক্খু নহানে উস্সুক্কং অকাসি, উস্সুক্কম্পি অকাসি যাগুযা খাদনীযে ভত্তস্মিং. সোদানাযং ন উস্সুক্কং কৰোতি যাগুযা খাদনীযে ভত্তস্মিং. দুট্ঠোদানাযং, আৱুসো, আৱাসিকো ভিক্খু. হন্দ, মযং, আৱুসো, আৱাসিকং [ইমং আৱাসিকং (স্যা.)] ভিক্খুং উক্খিপামা’’তি. অথ খো তে আগন্তুকা ভিক্খূ সন্নিপতিত্ৱা কস্সপগোত্তং ভিক্খুং এতদৱোচুং – ‘‘পুব্বে খো ত্ৱং, আৱুসো, নহানে উস্সুক্কং কৰোসি, উস্সুক্কম্পি কৰোসি যাগুযা খাদনীযে ভত্তস্মিং. সোদানি ত্ৱং ন উস্সুক্কং কৰোসি যাগুযা খাদনীযে ভত্তস্মিং. আপত্তিং ত্ৱং, আৱুসো, আপন্নো. পস্সসেতং আপত্তি’’ন্তি? ‘‘নত্থি মে, আৱুসো, আপত্তি, যমহং পস্সেয্য’’ন্তি. অথ খো তে আগন্তুকা ভিক্খূ কস্সপগোত্তং ভিক্খুং আপত্তিযা অদস্সনে উক্খিপিংসু.

অথ খো কস্সপগোত্তস্স ভিক্খুনো এতদহোসি – ‘‘অহং খো এতং ন জানামি ‘আপত্তি ৱা এসা অনাপত্তি ৱা, আপন্নো চম্হি [ৱম্হি (?)] অনাপন্নো ৱা, উক্খিত্তো চম্হি অনুক্খিত্তো ৱা, ধম্মিকেন ৱা অধম্মিকেন ৱা, কুপ্পেন ৱা অকুপ্পেন ৱা, ঠানাৰহেন ৱা অট্ঠানাৰহেন ৱা’. যংনূনাহং চম্পং গন্ত্ৱা ভগৱন্তং এতমত্থং পুচ্ছেয্য’’ন্তি. অথ খো কস্সপগোত্তো ভিক্খু সেনাসনং সংসামেত্ৱা পত্তচীৱৰমাদায যেন চম্পা তেন পক্কামি. অনুপুব্বেন যেন চম্পা যেন ভগৱা তেনুপসঙ্কমি, উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. আচিণ্ণং খো পনেতং বুদ্ধানং ভগৱন্তানং আগন্তুকেহি ভিক্খূহি সদ্ধিং পটিসম্মোদিতুং. অথ খো ভগৱা কস্সপগোত্তং ভিক্খুং এতদৱোচ – ‘‘কচ্চি, ভিক্খু, খমনীযং, কচ্চি যাপনীযং, কচ্চি অপ্পকিলমথেন অদ্ধানং আগতো, কুতো চ ত্ৱং, ভিক্খু, আগচ্ছসী’’তি? ‘‘খমনীযং, ভগৱা; যাপনীযং, ভগৱা; অপ্পকিলমথেন চাহং, ভন্তে, অদ্ধানং আগতো. অত্থি, ভন্তে, কাসীসু জনপদে ৱাসভগামো নাম. তত্থাহং, ভগৱা, আৱাসিকো তন্তিবদ্ধো উস্সুক্কং আপন্নো – ‘কিন্তি অনাগতা চ পেসলা ভিক্খূ আগচ্ছেয্যুং, আগতা চ পেসলা ভিক্খূ ফাসু ৱিহৰেয্যুং, অযঞ্চ আৱাসো ৱুদ্ধিং ৱিৰুড়্হিং ৱেপুল্লং আপজ্জেয্যা’তি. অথ খো, ভন্তে, সম্বহুলা ভিক্খূ কাসীসু চাৰিকং চৰমানা যেন ৱাসভগামো তদৱসৰুং. অদ্দসং খো অহং, ভন্তে, তে ভিক্খূ দূৰতোৱ আগচ্ছন্তে, দিস্ৱান আসনং পঞ্ঞপেসিং, পাদোদকং পাদপীঠং পাদকথলিকং উপনিক্খিপিং, পচ্চুগ্গন্ত্ৱা পত্তচীৱৰং পটিগ্গহেসিং, পানীযেন অপুচ্ছিং, নহানে উস্সুক্কং অকাসিং, উস্সুক্কম্পি অকাসিং যাগুযা খাদনীযে ভত্তস্মিং. অথ খো তেসং, ভন্তে, আগন্তুকানং ভিক্খূনং এতদহোসি – ‘ভদ্দকো খো অযং আৱুসো আৱাসিকো ভিক্খু নহানে উস্সুক্কং কৰোতি, উস্সুক্কম্পি কৰোতি যাগুযা খাদনীযে ভত্তস্মিং. হন্দ, মযং, আৱুসো, ইধেৱ ৱাসভগামে নিৱাসং কপ্পেমা’তি. অথ খো তে, ভন্তে, আগন্তুকা ভিক্খূ তত্থেৱ ৱাসভগামে নিৱাসং কপ্পেসুং. তস্স ময্হং, ভন্তে, এতদহোসি – ‘যো খো ইমেসং আগন্তুকানং ভিক্খূনং আগন্তুককিলমথো সো পটিপ্পস্সদ্ধো. যেপিমে গোচৰে অপ্পকতঞ্ঞুনো তেদানিমে গোচৰে পকতঞ্ঞুনো. দুক্কৰং খো পন পৰকুলেসু যাৱজীৱং উস্সুক্কং কাতুং, ৱিঞ্ঞত্তি চ মনুস্সানং অমনাপা. যংনূনাহং ন উস্সুক্কং কৰেয্যং যাগুযা খাদনীযে ভত্তস্মি’ন্তি. সো খো অহং, ভন্তে, ন উস্সুক্কং অকাসিং যাগুযা খাদনীযে ভত্তস্মিং. অথ খো তেসং, ভন্তে, আগন্তুকানং ভিক্খূনং এতদহোসি – ‘পুব্বে খ্ৱাযং, আৱুসো, আৱাসিকো ভিক্খু নহানে উস্সুক্কং কৰোতি, উস্সুক্কম্পি কৰোতি যাগুযা খাদনীযে ভত্তস্মিং. সোদানাযং ন উস্সুক্কং কৰোতি যাগুযা খাদনীযে ভত্তস্মিং. দুট্ঠোদানাযং, আৱুসো, আৱাসিকো ভিক্খু. হন্দ, মযং, আৱুসো, আৱাসিকং ভিক্খুং উক্খিপামা’তি. অথ খো তে, ভন্তে, আগন্তুকা ভিক্খূ সন্নিপতিত্ৱা মং এতদৱোচুং – ‘পুব্বে খো ত্ৱং, আৱুসো, নহানে উস্সুক্কং কৰোসি, উস্সুক্কম্পি কৰোসি যাগুযা খাদনীযে ভত্তস্মিং. সোদানি ত্ৱং ন উস্সুক্কং কৰোসি যাগুযা খাদনীযে ভত্তস্মিং. আপত্তিং ত্ৱং, আৱুসো, আপন্নো. পস্সসেতং আপত্তি’ন্তি? ‘নত্থি মে, আৱুসো, আপত্তি যমহং পস্সেয্য’ন্তি. অথ খো তে, ভন্তে, আগন্তুকা ভিক্খূ মং আপত্তিযা অদস্সনে উক্খিপিংসু. তস্স ময্হং, ভন্তে, এতদহোসি – ‘অহং খো এতং ন জানামি ‘আপত্তি ৱা এসা অনাপত্তি ৱা, আপন্নো চম্হি অনাপন্নো ৱা, উক্খিত্তো চম্হি অনুক্খিত্তো ৱা, ধম্মিকেন ৱা অধম্মিকেন ৱা, কুপ্পেন ৱা অকুপ্পেন ৱা, ঠানাৰহেন ৱা অট্ঠানাৰহেন ৱা’. যংনূনাহং চম্পং গন্ত্ৱা ভগৱন্তং এতমত্থং পুচ্ছেয্য’ন্তি. ততো অহং, ভগৱা, আগচ্ছামী’’তি. ‘‘অনাপত্তি এসা, ভিক্খু, নেসা আপত্তি. অনাপন্নোসি, নসি আপন্নো. অনুক্খিত্তোসি, নসি উক্খিত্তো. অধম্মিকেনাসি কম্মেন উক্খিত্তো কুপ্পেন অট্ঠানাৰহেন. গচ্ছ ত্ৱং, ভিক্খু, তত্থেৱ ৱাসভগামে নিৱাসং কপ্পেহী’’তি. ‘‘এৱং, ভন্তে’’তি খো কস্সপগোত্তো ভিক্খু ভগৱতো পটিস্সুণিত্ৱা উট্ঠাযাসনা ভগৱন্তং অভিৱাদেত্ৱা পদক্খিণং কত্ৱা যেন ৱাসভগামো তেন পক্কামি.

৩৮১. অথ খো তেসং আগন্তুকানং ভিক্খূনং অহুদেৱ কুক্কুচ্চং, অহু ৱিপ্পটিসাৰো – ‘‘অলাভা ৱত নো, ন ৱত নো লাভা, দুল্লদ্ধং ৱত নো, ন ৱত নো সুলদ্ধং, যে মযং সুদ্ধং ভিক্খুং অনাপত্তিকং অৱত্থুস্মিং অকাৰণে উক্খিপিম্হা. হন্দ, মযং, আৱুসো, চম্পং গন্ত্ৱা ভগৱতো সন্তিকে অচ্চযং অচ্চযতো দেসেমা’’তি. অথ খো তে আগন্তুকা ভিক্খূ সেনাসনং সংসামেত্ৱা পত্তচীৱৰমাদায যেন চম্পা তেন পক্কমিংসু. অনুপুব্বেন যেন চম্পা যেন ভগৱা তেনুপসঙ্কমিংসু, উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. আচিণ্ণং খো পনেতং বুদ্ধানং ভগৱন্তানং আগন্তুকেহি ভিক্খূহি সদ্ধিং পটিসম্মোদিতুং. অথ খো ভগৱা তে ভিক্খূ এতদৱোচ – ‘‘কচ্চি, ভিক্খৱে, খমনীযং, কচ্চি যাপনীযং, কচ্চিত্থ অপ্পকিলমথেন অদ্ধানং আগতা, কুতো চ তুম্হে, ভিক্খৱে, আগচ্ছথা’’তি? ‘‘খমনীযং, ভগৱা; যাপনীযং, ভগৱা; অপ্পকিলমথেন চ মযং, ভন্তে, অদ্ধানং আগতা. অত্থি, ভন্তে, কাসীসু জনপদে ৱাসভগামো নাম. ততো মযং, ভগৱা, আগচ্ছামা’’তি. ‘‘তুম্হে, ভিক্খৱে, আৱাসিকং ভিক্খুং উক্খিপিত্থা’’তি? ‘‘এৱং, ভন্তে’’তি. ‘‘কিস্মিং, ভিক্খৱে, ৱত্থুস্মিং কাৰণে’’তি? ‘‘অৱত্থুস্মিং, ভগৱা, অকাৰণে’’তি. ৱিগৰহি বুদ্ধো ভগৱা – ‘‘অননুচ্ছৱিকং, মোঘপুৰিসা, অননুলোমিকং অপ্পতিৰূপং অস্সামণকং অকপ্পিযং অকৰণীযং. কথঞ্হি নাম তুম্হে, মোঘপুৰিসা, সুদ্ধং ভিক্খুং অনাপত্তিকং অৱত্থুস্মিং অকাৰণে উক্খিপিস্সথ. নেতং, মোঘপুৰিসা, অপ্পসন্নানং ৱা পসাদায…পে…’’ ৱিগৰহিত্ৱা ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, সুদ্ধো ভিক্খু অনাপত্তিকো অৱত্থুস্মিং অকাৰণে উক্খিপিতব্বো. যো উক্খিপেয্য, আপত্তি দুক্কটস্সা’’তি.

অথ খো তে ভিক্খূ উট্ঠাযাসনা একংসং উত্তৰাসঙ্গং কৰিত্ৱা ভগৱতো পাদেসু সিৰসা নিপতিত্ৱা ভগৱন্তং এতদৱোচুং – ‘‘অচ্চযো নো, ভন্তে, অচ্চগমা যথাবালে যথামূড়্হে যথাঅকুসলে, যে মযং সুদ্ধং ভিক্খুং অনাপত্তিকং অৱত্থুস্মিং অকাৰণে উক্খিপিম্হা. তেসং নো, ভন্তে, ভগৱা অচ্চযং অচ্চযতো পটিগ্গণ্হাতু আযতিং সংৱৰাযা’’তি. ‘‘তগ্ঘ, তুম্হে, ভিক্খৱে, অচ্চযো অচ্চগমা যথাবালে যথামূড়্হে যথাঅকুসলে, যে তুম্হে সুদ্ধং ভিক্খুং অনাপত্তিকং অৱত্থুস্মিং অকাৰণে উক্খিপিত্থ. যতো চ খো তুম্হে, ভিক্খৱে, অচ্চযং অচ্চযতো দিস্ৱা যথাধম্মং পটিকৰোথ, তং ৱো মযং পটিগ্গণ্হাম. ৱুদ্ধিহেসা, ভিক্খৱে, অৰিযস্স ৱিনযে যো অচ্চযং অচ্চযতো দিস্ৱা যথাধম্মং পটিকৰোতি, আযতিং [আযতিং চ (সী.)] সংৱৰং আপজ্জতী’’তি.

কস্সপগোত্তভিক্খুৱত্থু নিট্ঠিতং.

২৩৫. অধম্মেন ৱগ্গাদিকম্মকথা

৩৮২. তেন খো পন সমযেন চম্পাযং ভিক্খূ এৱৰূপানি কম্মানি কৰোন্তি – অধম্মেন ৱগ্গকম্মং কৰোন্তি, অধম্মেন সমগ্গকম্মং কৰোন্তি; ধম্মেন ৱগ্গকম্মং কৰোন্তি, ধম্মপতিৰূপকেন ৱগ্গকম্মং কৰোন্তি; ধম্মপতিৰূপকেন সমগ্গকম্মং কৰোন্তি; একোপি একং উক্খিপতি, একোপি দ্ৱে উক্খিপতি, একোপি সম্বহুলে উক্খিপতি, একোপি সঙ্ঘং উক্খিপতি; দ্ৱেপি একং উক্খিপন্তি, দ্ৱেপি দ্ৱে উক্খিপন্তি, দ্ৱেপি সম্বহুলে উক্খিপন্তি, দ্ৱেপি সঙ্ঘং উক্খিপন্তি; সম্বহুলাপি একং উক্খিপন্তি; সম্বহুলাপি দ্ৱে উক্খিপন্তি, সম্বহুলাপি সম্বহুলে উক্খিপন্তি, সম্বহুলাপি সঙ্ঘং উক্খিপন্তি; সঙ্ঘোপি সঙ্ঘং উক্খিপতি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম চম্পাযং ভিক্খূ এৱৰূপানি কম্মানি কৰিস্সন্তি – অধম্মেন ৱগ্গকম্মং কৰিস্সন্তি, অধম্মেন সমগ্গকম্মং কৰিস্সন্তি, ধম্মেন ৱগ্গকম্মং কৰিস্সন্তি, ধম্মপতিৰূপকেন ৱগ্গকম্মং কৰিস্সন্তি, ধম্মপতিৰূপকেন সমগ্গকম্মং কৰিস্সন্তি, একোপি একং উক্খিপিস্সতি, একোপি দ্ৱে উক্খিপিস্সতি, একোপি সম্বহুলে উক্খিপিস্সতি, একোপি সঙ্ঘং উক্খিপিস্সতি, দ্ৱেপি একং উক্খিপিস্সন্তি, দ্ৱেপি দ্ৱে উক্খিপিস্সন্তি, দ্ৱেপি সম্বহুলে উক্খিপিস্সন্তি, দ্ৱেপি সঙ্ঘং উক্খিপিস্সন্তি, সম্বহুলাপি একং উক্খিপিস্সন্তি, সম্বহুলাপি দ্ৱে উক্খিপিস্সন্তি, সম্বহুলাপি সম্বহুলে উক্খিপিস্সন্তি, সম্বহুলাপি সঙ্ঘং উক্খিপিস্সন্তি, সঙ্ঘোপি সঙ্ঘং উক্খিপিস্সতী’’তি. অথ খো তে ভিক্খূ ভগৱতো এতমত্থং আৰোচেসুং…পে… ‘‘সচ্চং কিৰ, ভিক্খৱে, চম্পাযং ভিক্খূ এৱৰূপানি কম্মানি কৰোন্তি – অধম্মেন ৱগ্গকম্মং কৰোন্তি…পে… সঙ্ঘোপি সঙ্ঘং উক্খিপতী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা – ‘‘অননুচ্ছৱিকং, ভিক্খৱে, তেসং মোঘপুৰিসানং অননুলোমিকং অপ্পতিৰূপং অস্সামণকং অকপ্পিযং অকৰণীযং. কথঞ্হি নাম তে, ভিক্খৱে, মোঘপুৰিসা এৱৰূপানি কম্মানি কৰিস্সন্তি – অধম্মেন ৱগ্গকম্মং কৰিস্সন্তি…পে… সঙ্ঘোপি সঙ্ঘং উক্খিপিস্সতি. নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি –

৩৮৩. ‘‘অধম্মেন চে, ভিক্খৱে, ৱগ্গকম্মং অকম্মং ন চ কৰণীযং, অধম্মেন [অধম্মেন চে ভিক্খৱে (স্যা.)] সমগ্গকম্মং অকম্মং ন চ কৰণীযং, ধম্মেন ৱগ্গকম্মং অকম্মং ন চ কৰণীযং; ধম্মপতিৰূপকেন ৱগ্গকম্মং অকম্মং ন চ কৰণীযং, ধম্মপতিৰূপকেন সমগ্গকম্মং অকম্মং ন চ কৰণীযং; একোপি একং উক্খিপতি অকম্মং ন চ কৰণীযং, একোপি দ্ৱে উক্খিপতি অকম্মং ন চ কৰণীযং, একোপি সম্বহুলে উক্খিপতি অকম্মং ন চ কৰণীযং, একোপি সঙ্ঘং উক্খিপতি অকম্মং ন চ কৰণীযং; দ্ৱেপি একং উক্খিপন্তি অকম্মং ন চ কৰণীযং, দ্ৱেপি দ্ৱে উক্খিপন্তি অকম্মং ন চ কৰণীযং, দ্ৱেপি সম্বহুলে উক্খিপন্তি অকম্মং ন চ কৰণীযং, দ্ৱেপি সঙ্ঘং উক্খিপন্তি অকম্মং ন চ কৰণীযং; সম্বহুলাপি একং উক্খিপন্তি অকম্মং ন চ কৰণীযং, সম্বহুলাপি দ্ৱে উক্খিপন্তি অকম্মং ন চ কৰণীযং, সম্বহুলাপি সম্বহুলে উক্খিপন্তি অকম্মং ন চ কৰণীযং, সম্বহুলাপি সঙ্ঘং উক্খিপন্তি অকম্মং ন চ কৰণীযং; সঙ্ঘোপি সঙ্ঘং উক্খিপতি অকম্মং ন চ কৰণীযং.

৩৮৪. ‘‘চত্তাৰিমানি, ভিক্খৱে, কম্মানি – অধম্মেন ৱগ্গকম্মং, অধম্মেন সমগ্গকম্মং, ধম্মেন ৱগ্গকম্মং, ধম্মেন সমগ্গকম্মং. তত্ৰ, ভিক্খৱে, যদিদং অধম্মেন ৱগ্গকম্মং, ইদং, ভিক্খৱে, কম্মং অধম্মত্তা ৱগ্গত্তা কুপ্পং অট্ঠানাৰহং; ন, ভিক্খৱে, এৱৰূপং কম্মং কাতব্বং, ন চ মযা এৱৰূপং কম্মং অনুঞ্ঞাতং. তত্ৰ, ভিক্খৱে, যদিদং অধম্মেন সমগ্গকম্মং, ইদং, ভিক্খৱে, কম্মং অধম্মত্তা কুপ্পং অট্ঠানাৰহং; ন, ভিক্খৱে, এৱৰূপং কম্মং কাতব্বং, ন চ মযা এৱৰূপং কম্মং অনুঞ্ঞাতং. তত্ৰ, ভিক্খৱে, যদিদং ধম্মেন ৱগ্গকম্মং, ইদং, ভিক্খৱে, কম্মং ৱগ্গত্তা কুপ্পং অট্ঠানাৰহং; ন, ভিক্খৱে, এৱৰূপং কম্মং কাতব্বং, ন চ মযা এৱৰূপং কম্মং অনুঞ্ঞাতং. তত্ৰ, ভিক্খৱে, যদিদং ধম্মেন সমগ্গকম্মং, ইদং, ভিক্খৱে, কম্মং ধম্মত্তা সমগ্গত্তা অকুপ্পং ঠানাৰহং; এৱৰূপং, ভিক্খৱে, কম্মং কাতব্বং, এৱৰূপঞ্চ মযা কম্মং অনুঞ্ঞাতং. তস্মাতিহ, ভিক্খৱে, এৱৰূপং কম্মং কৰিস্সাম যদিদং ধম্মেন সমগ্গন্তি – এৱঞ্হি ৱো, ভিক্খৱে, সিক্খিতব্ব’’ন্তি.

অধম্মেন ৱগ্গাদিকম্মকথা নিট্ঠিতা.

২৩৬. ঞত্তিৱিপন্নকম্মাদিকথা

৩৮৫. তেন খো পন সমযেন ছব্বগ্গিযা ভিক্খূ এৱৰূপানি কম্মানি কৰোন্তি – অধম্মেন ৱগ্গকম্মং কৰোন্তি, অধম্মেন সমগ্গকম্মং কৰোন্তি; ধম্মেন ৱগ্গকম্মং কৰোন্তি, ধম্মপতিৰূপকেন ৱগ্গকম্মং কৰোন্তি, ধম্মপতিৰূপকেন সমগ্গকম্মং কৰোন্তি; ঞত্তিৱিপন্নম্পি কম্মং কৰোন্তি অনুস্সাৱনসম্পন্নং, অনুস্সাৱনৱিপন্নম্পি কম্মং কৰোন্তি ঞত্তিসম্পন্নং, ঞত্তিৱিপন্নম্পি অনুস্সাৱনৱিপন্নম্পি কম্মং কৰোন্তি; অঞ্ঞত্ৰাপি ধম্মা কম্মং কৰোন্তি, অঞ্ঞত্ৰাপি ৱিনযা কম্মং কৰোন্তি, অঞ্ঞত্ৰাপি সত্থুসাসনা কম্মং কৰোন্তি; পটিকুট্ঠকতম্পি কম্মং কৰোন্তি অধম্মিকং কুপ্পং অট্ঠানাৰহং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ এৱৰূপানি কম্মানি কৰিস্সন্তি – অধম্মেন ৱগ্গকম্মং কৰিস্সন্তি, অধম্মেন সমগ্গকম্মং কৰিস্সন্তি; ধম্মেন ৱগ্গকম্মং কৰিস্সন্তি, ধম্মপতিৰূপকেন ৱগ্গকম্মং কৰিস্সন্তি, ধম্মপতিৰূপকেন সমগ্গকম্মং কৰিস্সন্তি; ঞত্তিৱিপন্নম্পি কম্মং কৰিস্সন্তি অনুস্সাৱনসম্পন্নং, অনুস্সাৱনৱিপন্নম্পি কম্মং কৰিস্সন্তি ঞত্তিসম্পন্নং, ঞত্তিৱিপন্নম্পি অনুস্সাৱনৱিপন্নম্পি কম্মং কৰিস্সন্তি; অঞ্ঞত্ৰাপি ধম্মা কম্মং কৰিস্সন্তি, অঞ্ঞত্ৰাপি ৱিনযা কম্মং কৰিস্সন্তি, অঞ্ঞত্ৰাপি সত্থুসাসনা কম্মং কৰিস্সন্তি; পটিকুট্ঠকতম্পি কম্মং কৰিস্সন্তি অধম্মিকং কুপ্পং অট্ঠানাৰহ’’ন্তি. অথ খো তে ভিক্খূ ভগৱতো এতমত্থং আৰোচেসুং…পে… ‘‘সচ্চং কিৰ, ভিক্খৱে, ছব্বগ্গিযা ভিক্খূ এৱৰূপানি কম্মানি কৰোন্তি – অধম্মেন ৱগ্গকম্মং কৰোন্তি…পে… পটিকুট্ঠকতম্পি কম্মং কৰোন্তি অধম্মিকং কুপ্পং অট্ঠানাৰহ’’ন্তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… ৱিগৰহিত্ৱা ধম্মিং কথং কত্ৱা ভিক্খূ আমন্তেসি –

৩৮৬. ‘‘অধম্মেন চে, ভিক্খৱে, ৱগ্গকম্মং অকম্মং ন চ কৰণীযং; অধম্মেন সমগ্গকম্মং অকম্মং ন চ কৰণীযং; ধম্মেন ৱগ্গকম্মং অকম্মং ন চ কৰণীযং; ধম্মপতিৰূপকেন ৱগ্গকম্মং অকম্মং ন চ কৰণীযং; ধম্মপতিৰূপকেন সমগ্গকম্মং অকম্মং ন চ কৰণীযং. ঞত্তিৱিপন্নঞ্চে, ভিক্খৱে, কম্মং অনুস্সাৱনসম্পন্নং অকম্মং ন চ কৰণীযং; অনুস্সাৱনৱিপন্নঞ্চে, ভিক্খৱে, কম্মং ঞত্তিসম্পন্নং অকম্মং ন চ কৰণীযং; ঞত্তিৱিপন্নঞ্চে, ভিক্খৱে, কম্মং অনুস্সাৱনৱিপন্নং অকম্মং ন চ কৰণীযং; অঞ্ঞত্ৰাপি ধম্মা কম্মং অকম্মং ন চ কৰণীযং; অঞ্ঞত্ৰাপি ৱিনযা কম্মং অকম্মং ন চ কৰণীযং; অঞ্ঞত্ৰাপি সত্থুসাসনা কম্মং অকম্মং ন চ কৰণীযং; পটিকুট্ঠকতঞ্চে, ভিক্খৱে, কম্মং অধম্মিকং কুপ্পং অট্ঠানাৰহং অকম্মং ন চ কৰণীযং.

৩৮৭. ছযিমানি, ভিক্খৱে, কম্মানি – অধম্মকম্মং, ৱগ্গকম্মং, সমগ্গকম্মং, ধম্মপতিৰূপকেন ৱগ্গকম্মং, ধম্মপতিৰূপকেন সমগ্গকম্মং, ধম্মেন সমগ্গকম্মং.

কতমঞ্চ, ভিক্খৱে, অধম্মকম্মং? ঞত্তিদুতিযে চে, ভিক্খৱে, কম্মে একায ঞত্তিযা কম্মং কৰোতি, ন চ কম্মৱাচং অনুস্সাৱেতি – অধম্মকম্মং. ঞত্তিদুতিযে চে, ভিক্খৱে, কম্মে দ্ৱীহি ঞত্তীহি কম্মং কৰোতি, ন চ কম্মৱাচং অনুস্সাৱেতি – অধম্মকম্মং. ঞত্তিদুতিযে চে, ভিক্খৱে, কম্মে একায কম্মৱাচায কম্মং কৰোতি, ন চ ঞত্তিং ঠপেতি – অধম্মকম্মং. ঞত্তিদুতিযে চে, ভিক্খৱে, কম্মে দ্ৱীহি কম্মৱাচাহি কম্মং কৰোতি, ন চ ঞত্তিং ঠপেতি – অধম্মকম্মং. ঞত্তিচতুত্থে চে, ভিক্খৱে, কম্মে একায ঞত্তিযা কম্মং কৰোতি, ন চ কম্মৱাচং অনুস্সাৱেতি – অধম্মকম্মং. ঞত্তিচতুত্থে চে, ভিক্খৱে, কম্মে দ্ৱীহি ঞত্তীহি কম্মং কৰোতি, ন চ কম্মৱাচং অনুস্সাৱেতি – অধম্মকম্মং. ঞত্তিচতুত্থে চে, ভিক্খৱে, কম্মে তীহি ঞত্তীহি কম্মং কৰোতি, ন চ কম্মৱাচং অনুস্সাৱেতি – অধম্মকম্মং. ঞত্তিচতুত্থে চে, ভিক্খৱে, কম্মে চতূহি ঞত্তীহি কম্মং কৰোতি, ন চ কম্মৱাচং অনুস্সাৱেতি – অধম্মকম্মং. ঞত্তিচতুত্থে চে, ভিক্খৱে, কম্মে একায কম্মৱাচায কম্মং কৰোতি, ন চ ঞত্তিং ঠপেতি – অধম্মকম্মং. ঞত্তিচতুত্থে চে, ভিক্খৱে, কম্মে দ্ৱীহি কম্মৱাচাহি কম্মং কৰোতি, ন চ ঞত্তিং ঠপেতি – অধম্মকম্মং. ঞত্তিচতুত্থে চে, ভিক্খৱে, কম্মে তীহি কম্মৱাচাহি কম্মং কৰোতি, ন চ ঞত্তিং ঠপেতি – অধম্মকম্মং. ঞত্তিচতুত্থে চে, ভিক্খৱে, কম্মে চতূহি কম্মৱাচাহি কম্মং কৰোতি, ন চ ঞত্তিং ঠপেতি – অধম্মকম্মং. ইদং ৱুচ্চতি, ভিক্খৱে, অধম্মকম্মং.

কতমঞ্চ, ভিক্খৱে, ৱগ্গকম্মং? ঞত্তিদুতিযে চে, ভিক্খৱে, কম্মে যাৱতিকা ভিক্খূ কম্মপ্পত্তা তে অনাগতা হোন্তি, ছন্দাৰহানং ছন্দো অনাহটো হোতি, সম্মুখীভূতা পটিক্কোসন্তি – ৱগ্গকম্মং. ঞত্তিদুতিযে চে, ভিক্খৱে, কম্মে যাৱতিকা ভিক্খূ কম্মপ্পত্তা তে আগতা হোন্তি, ছন্দাৰহানং ছন্দো অনাহটো হোতি, সম্মুখীভূতা পটিক্কোসন্তি – ৱগ্গকম্মং. ঞত্তিদুতিযে চে, ভিক্খৱে, কম্মে যাৱতিকা ভিক্খূ কম্মপ্পত্তা তে আগতা হোন্তি, ছন্দাৰহানং ছন্দো আহটো হোতি, সম্মুখীভূতা পটিক্কোসন্তি – ৱগ্গকম্মং. ঞত্তিচতুত্থে চে, ভিক্খৱে, কম্মে যাৱতিকা ভিক্খূ কম্মপ্পত্তা তে অনাগতা হোন্তি, ছন্দাৰহানং ছন্দো অনাহটো হোতি, সম্মুখীভূতা পটিক্কোসন্তি – ৱগ্গকম্মং. ঞত্তিচতুত্থে চে, ভিক্খৱে, কম্মে যাৱতিকা ভিক্খূ কম্মপ্পত্তা তে আগতা হোন্তি, ছন্দাৰহানং ছন্দো অনাহটো হোতি, সম্মুখীভূতা পটিক্কোসন্তি – ৱগ্গকম্মং. ঞত্তিচতুত্থে চে, ভিক্খৱে, কম্মে যাৱতিকা ভিক্খূ কম্মপ্পত্তা তে আগতা হোন্তি, ছন্দাৰহানং ছন্দো আহটো হোতি, সম্মুখীভূতা পটিক্কোসন্তি – ৱগ্গকম্মং. ইদং ৱুচ্চতি, ভিক্খৱে, ৱগ্গকম্মং.

কতমঞ্চ, ভিক্খৱে, সমগ্গকম্মং? ঞত্তিদুতিযে চে, ভিক্খৱে, কম্মে যাৱতিকা ভিক্খূ কম্মপ্পত্তা, তে আগতা হোন্তি, ছন্দাৰহানং ছন্দো আহটো হোতি, সম্মুখীভূতা ন পটিক্কোসন্তি – সমগ্গকম্মং. ঞত্তিচতুত্থে চে, ভিক্খৱে, কম্মে যাৱতিকা ভিক্খূ কম্মপ্পত্তা, তে আগতা হোন্তি, ছন্দাৰহানং ছন্দো আহটো হোতি, সম্মুখীভূতা ন পটিক্কোসন্তি – সমগ্গকম্মং. ইদং ৱুচ্চতি, ভিক্খৱে, সমগ্গকম্মং.

কতমঞ্চ, ভিক্খৱে, ধম্মপতিৰূপকেন ৱগ্গকম্মং? ঞত্তিদুতিযে চে, ভিক্খৱে, কম্মে পঠমং কম্মৱাচং অনুস্সাৱেতি, পচ্ছা ঞত্তিং ঠপেতি, যাৱতিকা ভিক্খূ কম্মপ্পত্তা তে অনাগতা হোন্তি, ছন্দাৰহানং ছন্দো অনাহটো হোতি, সম্মুখীভূতা পটিক্কোসন্তি – ধম্মপতিৰূপকেন ৱগ্গকম্মং. ঞত্তিদুতিযে চে, ভিক্খৱে, কম্মে পঠমং কম্মৱাচং অনুস্সাৱেতি, পচ্ছা ঞত্তিং ঠপেতি, যাৱতিকা ভিক্খূ কম্মপ্পত্তা তে আগতা হোন্তি, ছন্দাৰহানং ছন্দো অনাহটো হোতি, সম্মুখীভূতা পটিক্কোসন্তি – ধম্মপতিৰূপকেন ৱগ্গকম্মং. ঞত্তিদুতিযে চে, ভিক্খৱে, কম্মে পঠমং কম্মৱাচং অনুস্সাৱেতি, পচ্ছা ঞত্তিং ঠপেতি, যাৱতিকা ভিক্খূ কম্মপ্পত্তা তে আগতা হোন্তি, ছন্দাৰহানং ছন্দো আহটো হোতি, সম্মুখীভূতা পটিক্কোসন্তি – ধম্মপতিৰূপকেন ৱগ্গকম্মং. ঞত্তিচতুত্থে চে, ভিক্খৱে, কম্মে পঠমং কম্মৱাচং অনুস্সাৱেতি, পচ্ছা ঞত্তিং ঠপেতি, যাৱতিকা ভিক্খূ কম্মপ্পত্তা তে অনাগতা হোন্তি, ছন্দাৰহানং ছন্দো অনাহটো হোতি, সম্মুখীভূতা পটিক্কোসন্তি – ধম্মপতিৰূপকেন ৱগ্গকম্মং. ঞত্তিচতুত্থে চে, ভিক্খৱে, কম্মে পঠমং কম্মৱাচং অনুস্সাৱেতি, পচ্ছা ঞত্তিং ঠপেতি, যাৱতিকা ভিক্খূ কম্মপ্পত্তা তে আগতা হোন্তি, ছন্দাৰহানং ছন্দো অনাহটো হোতি, সম্মুখীভূতা পটিক্কোসন্তি – ধম্মপতিৰূপকেন ৱগ্গকম্মং. ঞত্তিচতুত্থে চে, ভিক্খৱে, কম্মে পঠমং কম্মৱাচং অনুস্সাৱেতি, পচ্ছা ঞত্তিং ঠপেতি, যাৱতিকা ভিক্খূ কম্মপ্পত্তা তে আগতা হোন্তি, ছন্দাৰহানং ছন্দো আহটো হোতি, সম্মুখীভূতা পটিক্কোসন্তি – ধম্মপতিৰূপকেন ৱগ্গকম্মং. ইদং ৱুচ্চতি, ভিক্খৱে, ধম্মপতিৰূপকেন ৱগ্গকম্মং.

কতমঞ্চ, ভিক্খৱে, ধম্মপতিৰূপকেন সমগ্গকম্মং? ঞত্তিদুতিযে চে, ভিক্খৱে, কম্মে পঠমং কম্মৱাচং অনুস্সাৱেতি, পচ্ছা ঞত্তিং ঠপেতি, যাৱতিকা ভিক্খূ কম্মপ্পত্তা, তে আগতা হোন্তি, ছন্দাৰহানং ছন্দো আহটো হোতি, সম্মুখীভূতা ন পটিক্কোসন্তি – ধম্মপতিৰূপকেন সমগ্গকম্মং. ঞত্তিচতুত্থে চে, ভিক্খৱে, কম্মে পঠমং কম্মৱাচং অনুস্সাৱেতি, পচ্ছা ঞত্তিং ঠপেতি, যাৱতিকা ভিক্খূ কম্মপ্পত্তা তে আগতা হোন্তি, ছন্দাৰহানং ছন্দো আহটো হোতি, সম্মুখীভূতা ন পটিক্কোসন্তি – ধম্মপতিৰূপকেন সমগ্গকম্মং. ইদং ৱুচ্চতি, ভিক্খৱে, ধম্মপতিৰূপকেন সমগ্গকম্মং.

কতমঞ্চ, ভিক্খৱে, ধম্মেন সমগ্গকম্মং? ঞত্তিদুতিযে চে, ভিক্খৱে, কম্মে পঠমং ঞত্তিং ঠপেতি, পচ্ছা একায কম্মৱাচায কম্মং কৰোতি, যাৱতিকা ভিক্খূ কম্মপ্পত্তা তে আগতা হোন্তি, ছন্দাৰহানং ছন্দো আহটো হোতি, সম্মুখীভূতা ন পটিক্কোসন্তি – ধম্মেন সমগ্গকম্মং. ঞত্তিচতুত্থে চে, ভিক্খৱে, কম্মে পঠমং ঞত্তিং ঠপেতি, পচ্ছা তীহি কম্মৱাচাহি কম্মং কৰোতি, যাৱতিকা ভিক্খূ কম্মপ্পত্তা, তে আগতা হোন্তি, ছন্দাৰহানং ছন্দো আহটো হোতি, সম্মুখীভূতা ন পটিক্কোসন্তি, ধম্মেন সমগ্গকম্মং. ইদং ৱুচ্চতি, ভিক্খৱে, ধম্মেন সমগ্গকম্মং.

ঞত্তিৱিপন্নকম্মাদিকথা নিট্ঠিতা.

২৩৭. চতুৱগ্গকৰণাদিকথা

৩৮৮. পঞ্চ সঙ্ঘা – চতুৱগ্গো ভিক্খুসঙ্ঘো পঞ্চৱগ্গো ভিক্খুসঙ্ঘো, দসৱগ্গো ভিক্খুসঙ্ঘো, ৱীসতিৱগ্গো ভিক্খুসঙ্ঘো, অতিৰেকৱীসতিৱগ্গো ভিক্খুসঙ্ঘো. তত্ৰ, ভিক্খৱে, য্ৱাযং চতুৱগ্গো ভিক্খুসঙ্ঘো, ঠপেত্ৱা তীণি কম্মানি – উপসম্পদং পৱাৰণং অব্ভানং, ধম্মেন সমগ্গো সব্বকম্মেসু কম্মপ্পত্তো. তত্ৰ, ভিক্খৱে, য্ৱাযং পঞ্চৱগ্গো ভিক্খুসঙ্ঘো, ঠপেত্ৱা দ্ৱে কম্মানি – মজ্ঝিমেসু জনপদেসু উপসম্পদং অব্ভানং, ধম্মেন সমগ্গো সব্বকম্মেসু কম্মপ্পত্তো. তত্ৰ, ভিক্খৱে, য্ৱাযং দসৱগ্গো ভিক্খুসঙ্ঘো, ঠপেত্ৱা একং কম্মং – অব্ভানং, ধম্মেন সমগ্গো সব্বকম্মেসু কম্মপ্পত্তো. তত্ৰ, ভিক্খৱে, য্ৱাযং ৱীসতিৱগ্গো ভিক্খুসঙ্ঘো ধম্মেন সমগ্গো সব্বকম্মেসু কম্মপ্পত্তো. তত্ৰ, ভিক্খৱে, য্ৱাযং অতিৰেকৱীসতিৱগ্গো ভিক্খুসঙ্ঘো ধম্মেন সমগ্গো সব্বকম্মেসু কম্মপ্পত্তো.

৩৮৯. চতুৱগ্গকৰণঞ্চে, ভিক্খৱে, কম্মং ভিক্খুনিচতুত্থো কম্মং কৰেয্য – অকম্মং ন চ কৰণীযং. চতুৱগ্গকৰণঞ্চে, ভিক্খৱে, কম্মং সিক্খমানচতুত্থো কম্মং কৰেয্য… অকম্মং ন চ কৰণীযং…পে…. সামণেৰচতুত্থো কম্মং কৰেয্য… অকম্মং ন চ কৰণীযং. সামণেৰিচতুত্থো কম্মং কৰেয্য… অকম্মং ন চ কৰণীযং. সিক্খং পচ্চক্খাতকচতুত্থো কম্মং কৰেয্য… অকম্মং ন চ কৰণীযং. অন্তিমৱত্থুং অজ্ঝাপন্নকচতুত্থো কম্মং কৰেয্য… অকম্মং ন চ কৰণীযং. আপত্তিযা অদস্সনে উক্খিত্তকচতুত্থো কম্মং কৰেয্য… অকম্মং ন চ কৰণীযং. আপত্তিযা অপ্পটিকম্মে উক্খিত্তকচতুত্থো কম্মং কৰেয্য… অকম্মং ন চ কৰণীযং. পাপিকায দিট্ঠিযা অপ্পটিনিস্সগ্গে উক্খিত্তকচতুত্থো কম্মং কৰেয্য… অকম্মং ন চ কৰণীযং. পণ্ডকচতুত্থো কম্মং কৰেয্য… অকম্মং ন চ কৰণীযং. থেয্যসংৱাসকচতুত্থো কম্মং কৰেয্য… অকম্মং ন চ কৰণীযং. তিত্থিযপক্কন্তকচতুত্থো কম্মং কৰেয্য… অকম্মং ন চ কৰণীযং. তিৰচ্ছানগতচতুত্থো কম্মং কৰেয্য… অকম্মং ন চ কৰণীযং. মাতুঘাতকচতুত্থো কম্মং কৰেয্য… অকম্মং ন চ কৰণীযং. পিতুঘাতকচতুত্থো কম্মং কৰেয্য… অকম্মং ন চ কৰণীযং. অৰহন্তঘাতকচতুত্থো কম্মং কৰেয্য… অকম্মং ন চ কৰণীযং. ভিক্খুনিদূসকচতুত্থো কম্মং কৰেয্য… অকম্মং ন চ কৰণীযং. সঙ্ঘভেদকচতুত্থো কম্মং কৰেয্য… অকম্মং ন চ কৰণীযং. লোহিতুপ্পাদকচতুত্থো কম্মং কৰেয্য… অকম্মং ন চ কৰণীযং. উভতোব্যঞ্জনকচতুত্থো কম্মং কৰেয্য… অকম্মং ন চ কৰণীযং. নানাসংৱাসকচতুত্থো কম্মং কৰেয্য… অকম্মং ন চ কৰণীযং. নানাসীমায ঠিতচতুত্থো কম্মং কৰেয্য… অকম্মং ন চ কৰণীযং. ইদ্ধিযা ৱেহাসে ঠিতচতুত্থো কম্মং কৰেয্য… অকম্মং ন চ কৰণীযং. যস্স সঙ্ঘো কম্মং কৰোতি, তংচতুত্থো কম্মং কৰেয্য … অকম্মং ন চ কৰণীযং.

চতুৱৰণং.

৩৯০. পঞ্চৱগ্গকৰণঞ্চে, ভিক্খৱে, কম্মং ভিক্খুনিপঞ্চমো কম্মং কৰেয্য… অকম্মং ন চ কৰণীযং. পঞ্চৱগ্গকৰণঞ্চে, ভিক্খৱে, কম্মং সিক্খমানপঞ্চমো কম্মং কৰেয্য…পে…. সামণেৰপঞ্চমো কম্মং কৰেয্য… সামণেৰিপঞ্চমো কম্মং কৰেয্য … সিক্খং পচ্চক্খাতকপঞ্চমো কম্মং কৰেয্য… অন্তিমৱত্থুং অজ্ঝাপন্নকপঞ্চমো কম্মং কৰেয্য… আপত্তিযা অদস্সনে উক্খিত্তকপঞ্চমো কম্মং কৰেয্য… আপত্তিযা অপ্পটিকম্মে উক্খিত্তকপঞ্চমো কম্মং কৰেয্য… পাপিকায দিট্ঠিযা অপ্পটিনিস্সগ্গে উক্খিত্তকপঞ্চমো কম্মং কৰেয্য… পণ্ডকপঞ্চমো কম্মং কৰেয্য… থেয্যসংৱাসকপঞ্চমো কম্মং কৰেয্য… তিত্থিযপক্কন্তকপঞ্চমো কম্মং কৰেয্য… তিৰচ্ছানগতপঞ্চমো কম্মং কৰেয্য… মাতুঘাতকপঞ্চমো কম্মং কৰেয্য… পিতুঘাতকপঞ্চমো কম্মং কৰেয্য… অৰহন্তঘাতকপঞ্চমো কম্মং কৰেয্য… ভিক্খুনিদূসকপঞ্চমো কম্মং কৰেয্য… সঙ্ঘভেদকপঞ্চমো কম্মং কৰেয্য… লোহিতুপ্পাদকপঞ্চমো কম্মং কৰেয্য… উভতোব্যঞ্জনকপঞ্চমো কম্মং কৰেয্য… নানাসংৱাসকপঞ্চমো কম্মং কৰেয্য… নানাসীমায ঠিতপঞ্চমো কম্মং কৰেয্য… ইদ্ধিযা ৱেহাসে ঠিতপঞ্চমো কম্মং কৰেয্য… যস্স সঙ্ঘো কম্মং কৰোতি, তংপঞ্চমো কম্মং কৰেয্য – অকম্মং ন চ কৰণীযং.

পঞ্চৱগ্গকৰণং.

৩৯১. দসৱগ্গকৰণঞ্চে, ভিক্খৱে, কম্মং ভিক্খুনিদসমো কম্মং কৰেয্য, অকম্মং ন চ কৰণীযং. দসৱগ্গকৰণঞ্চে, ভিক্খৱে, কম্মং সিক্খমানদসমো কম্মং কৰেয্য, অকম্মং ন চ কৰণীযং…পে…. দসৱগ্গকৰণঞ্চে, ভিক্খৱে, কম্মং যস্স সঙ্ঘো কম্মং কৰোতি, তংদসমো কম্মং কৰেয্য – অকম্মং ন চ কৰণীযং.

দসৱগ্গকৰণং.

৩৯২. ৱীসতিৱগ্গকৰণঞ্চে, ভিক্খৱে, কম্মং ভিক্খুনিৱীসো কম্মং কৰেয্য – অকম্মং ন চ কৰণীযং. ৱীসতিৱগ্গকৰণঞ্চে, ভিক্খৱে, কম্মং সিক্খমানৱীসো কম্মং কৰেয্য …পে… সামণেৰৱীসো কম্মং কৰেয্য… সামণেৰিৱীসো কম্মং কৰেয্য… সিক্খং পচ্চক্খাতকৱীসো কম্মং কৰেয্য… অন্তিমৱত্থুং অজ্ঝাপন্নকৱীসো কম্মং কৰেয্য… আপত্তিযা অদস্সনে উক্খিত্তকৱীসো কম্মং কৰেয্য… আপত্তিযা অপ্পটিকম্মে উক্খিত্তকৱীসো কম্মং কৰেয্য… পাপিকায দিট্ঠিযা অপ্পটিনিস্সগ্গে উক্খিত্তকৱীসো কম্মং কৰেয্য… পণ্ডকৱীসো কম্মং কৰেয্য… থেয্যসংৱাসকৱীসো কম্মং কৰেয্য… তিত্থিযপক্কন্তকৱীসো কম্মং কৰেয্য… তিৰচ্ছানগতৱীসো কম্মং কৰেয্য… মাতুঘাতকৱীসো কম্মং কৰেয্য… পিতুঘাতকৱীসো কম্মং কৰেয্য… অৰহন্তঘাতকৱীসো কম্মং কৰেয্য… ভিক্খুনিদূসকৱীসো কম্মং কৰেয্য… সঙ্ঘভেদকৱীসো কম্মং কৰেয্য… লোহিতুপ্পাদকৱীসো কম্মং কৰেয্য… উভতোব্যঞ্জনকৱীসো কম্মং কৰেয্য… নানাসংৱাসকৱীসো কম্মং কৰেয্য… নানাসীমায ঠিতৱীসো কম্মং কৰেয্য… ইদ্ধিযা ৱেহাসে ঠিতৱীসো কম্মং কৰেয্য… যস্স সঙ্ঘো কম্মং কৰোতি, তংৱীসো কম্মং কৰেয্য – অকম্মং ন চ কৰণীযং.

ৱীসতিৱগ্গকৰণং.

চতুৱগ্গকৰণাদিকথা নিট্ঠিতা.

২৩৮. পাৰিৱাসিকাদিকথা

৩৯৩. পাৰিৱাসিকচতুত্থো চে, ভিক্খৱে, পৰিৱাসং দদেয্য, মূলায পটিকস্সেয্য, মানত্তং দদেয্য, তংৱীসো অব্ভেয্য – অকম্মং ন চ কৰণীযং. মূলায পটিকস্সনাৰহচতুত্থো চে, ভিক্খৱে, পৰিৱাসং দদেয্য, মূলায পটিকস্সেয্য, মানত্তং দদেয্য, তংৱীসো অব্ভেয্য – অকম্মং ন চ কৰণীযং. মানত্তাৰহচতুত্থো চে, ভিক্খৱে, পৰিৱাসং দদেয্য, মূলায পটিকস্সেয্য, মানত্তং দদেয্য, তংৱীসো অব্ভেয্য – অকম্মং ন চ কৰণীযং. মানত্তচাৰিকচতুত্থো চে, ভিক্খৱে, পৰিৱাসং দদেয্য, মূলায পটিকস্সেয্য, মানত্তং দদেয্য, তংৱীসো অব্ভেয্য – অকম্মং ন চ কৰণীযং. অব্ভানাৰহচতুত্থো চে, ভিক্খৱে, পৰিৱাসং দদেয্য, মূলায পটিকস্সেয্য, মানত্তং দদেয্য, তংৱীসো অব্ভেয্য – অকম্মং ন চ কৰণীযং.

৩৯৪. একচ্চস্স, ভিক্খৱে, সঙ্ঘমজ্ঝে পটিক্কোসনা ৰুহতি, একচ্চস্স ন ৰুহতি. কস্স চ, ভিক্খৱে, সঙ্ঘমজ্ঝে পটিক্কোসনা ন ৰুহতি? ভিক্খুনিযা, ভিক্খৱে, সঙ্ঘমজ্ঝে পটিক্কোসনা ন ৰুহতি. সিক্খমানায, ভিক্খৱে…পে… সামণেৰস্স, ভিক্খৱে… সামণেৰিযা, ভিক্খৱে… সিক্খাপচ্চক্খাতকস্স ভিক্খৱে… অন্তিমৱত্থুং অজ্ঝাপন্নকস্স, ভিক্খৱে … উম্মত্তকস্স, ভিক্খৱে… খিত্তচিত্তস্স, ভিক্খৱে… ৱেদনাট্টস্স, ভিক্খৱে… আপত্তিযা অদস্সনে উক্খিত্তকস্স, ভিক্খৱে… আপত্তিযা অপ্পটিকম্মে উক্খিত্তকস্স, ভিক্খৱে… পাপিকায দিট্ঠিযা অপ্পটিনিস্সগ্গে উক্খিত্তকস্স, ভিক্খৱে… পণ্ডকস্স, ভিক্খৱে… থেয্যসংৱাসকস্স, ভিক্খৱে… তিত্থিযপক্কন্তকস্স, ভিক্খৱে … তিৰচ্ছানগতস্স ভিক্খৱে… মাতুঘাতকস্স, ভিক্খৱে… পিতুঘাতকস্স, ভিক্খৱে… অৰহন্তঘাতকস্স, ভিক্খৱে… ভিক্খুনিদূসকস্স, ভিক্খৱে… সঙ্ঘভেদকস্স, ভিক্খৱে… লোহিতুপ্পাদকস্স, ভিক্খৱে… উভতোব্যঞ্জনকস্স, ভিক্খৱে… নানাসংৱাসকস্স, ভিক্খৱে… নানাসীমায ঠিতস্স, ভিক্খৱে… ইদ্ধিযা ৱেহাসে ঠিতস্স, ভিক্খৱে, যস্স সঙ্ঘো কম্মং কৰোতি, তস্স চ [তস্স (স্যা.)], ভিক্খৱে, সঙ্ঘমজ্ঝে পটিক্কোসনা ন ৰুহতি. ইমেসং খো, ভিক্খৱে, সঙ্ঘমজ্ঝে পটিক্কোসনা ন ৰুহতি.

কস্স চ, ভিক্খৱে, সঙ্ঘমজ্ঝে পটিক্কোসনা ৰুহতি? ভিক্খুস্স, ভিক্খৱে, পকতত্তস্স

সমানসংৱাসকস্স সমানসীমায ঠিতস্স অন্তমসো আনন্তৰিকস্সাপি [অনন্তৰিকস্সাপি (স্যা.)] ভিক্খুনো ৱিঞ্ঞাপেন্তস্স সঙ্ঘমজ্ঝে পটিক্কোসনা ৰুহতি. ইমস্স খো, ভিক্খৱে, সঙ্ঘমজ্ঝে পটিক্কোসনা ৰুহতি.

পাৰিৱাসিকাদিকথা নিট্ঠিতা.

২৩৯. দ্ৱেনিস্সাৰণাদিকথা

৩৯৫. দ্ৱেমা, ভিক্খৱে, নিস্সাৰণা. অত্থি, ভিক্খৱে, পুগ্গলো অপ্পত্তো নিস্সাৰণং. তঞ্চে সঙ্ঘো নিস্সাৰেতি, একচ্চো সুনিস্সাৰিতো, একচ্চো দুন্নিস্সাৰিতো. কতমো চ, ভিক্খৱে, পুগ্গলো অপ্পত্তো নিস্সাৰণং, তঞ্চে সঙ্ঘো নিস্সাৰেতি – দুন্নিস্সাৰিতো? ইধ পন, ভিক্খৱে, ভিক্খু সুদ্ধো হোতি অনাপত্তিকো. তঞ্চে সঙ্ঘো নিস্সাৰেতি – দুন্নিস্সাৰিতো. অযং ৱুচ্চতি, ভিক্খৱে, পুগ্গলো অপ্পত্তো নিস্সাৰণং, তঞ্চে সঙ্ঘো নিস্সাৰেতি – দুন্নিস্সাৰিতো.

কতমো চ, ভিক্খৱে, পুগ্গলো অপ্পত্তো নিস্সাৰণং, তঞ্চে সঙ্ঘো নিস্সাৰেতি – সুনিস্সাৰিতো? ইধ পন, ভিক্খৱে, ভিক্খু বালো হোতি অব্যত্তো আপত্তিবহুলো অনপদানো, গিহিসংসট্ঠো ৱিহৰতি অননুলোমিকেহি গিহিসংসগ্গেহি, তঞ্চে সঙ্ঘো নিস্সাৰেতি – সুনিস্সাৰিতো. অযং ৱুচ্চতি, ভিক্খৱে, পুগ্গলো অপ্পত্তো নিস্সাৰণং, তঞ্চে সঙ্ঘো নিস্সাৰেতি – সুনিস্সাৰিতো.

৩৯৬. দ্ৱেমা, ভিক্খৱে, ওসাৰণা. অত্থি, ভিক্খৱে, পুগ্গলো অপ্পত্তো ওসাৰণং তঞ্চে সঙ্ঘো ওসাৰেতি, একচ্চো সোসাৰিতো, একচ্চো দোসাৰিতো. কতমো চ, ভিক্খৱে, পুগ্গলো অপ্পত্তো ওসাৰণং, তঞ্চে সঙ্ঘো ওসাৰেতি – দোসাৰিতো? পণ্ডকো, ভিক্খৱে, অপ্পত্তো ওসাৰণং, তঞ্চে সঙ্ঘো ওসাৰেতি – দোসাৰিতো. থেয্যসংৱাসকো, ভিক্খৱে, অপ্পত্তো ওসাৰণং, তঞ্চে সঙ্ঘো ওসাৰেতি – দোসাৰিতো. তিত্থিযপক্কন্তকো, ভিক্খৱে…পে… তিৰচ্ছানগতো, ভিক্খৱে… মাতুঘাতকো, ভিক্খৱে… পিতুঘাতকো, ভিক্খৱে… অৰহন্তঘাতকো, ভিক্খৱে… ভিক্খুনিদূসকো, ভিক্খৱে… সঙ্ঘভেদকো, ভিক্খৱে… লোহিতুপ্পাদকো, ভিক্খৱে… উভতোব্যঞ্জনকো, ভিক্খৱে, অপ্পত্তো, ওসাৰণং, তঞ্চে সঙ্ঘো ওসাৰেতি – দোসাৰিতো. অযং ৱুচ্চতি, ভিক্খৱে, পুগ্গলো অপ্পত্তো ওসাৰণং, তঞ্চে সঙ্ঘো ওসাৰেতি – দোসাৰিতো. ইমে ৱুচ্চন্তি, ভিক্খৱে, পুগ্গলা অপ্পত্তা ওসাৰণং, তে চে সঙ্ঘো ওসাৰেতি – দোসাৰিতা.

কতমো চ, ভিক্খৱে, পুগ্গলো অপ্পত্তো ওসাৰণং, তঞ্চে সঙ্ঘো ওসাৰেতি – সোসাৰিতো? হত্থচ্ছিন্নো, ভিক্খৱে, অপ্পত্তো ওসাৰণং, তঞ্চে সঙ্ঘো ওসাৰেতি, সোসাৰিতো. পাদচ্ছিন্নো, ভিক্খৱে…পে… হত্থপাদচ্ছিন্নো, ভিক্খৱে… কণ্ণচ্ছিন্নো, ভিক্খৱে… নাসচ্ছিন্নো, ভিক্খৱে… কণ্ণনাসচ্ছিন্নো, ভিক্খৱে… অঙ্গুলিচ্ছিন্নো, ভিক্খৱে… অড়চ্ছিন্নো, ভিক্খৱে… কণ্ডৰচ্ছিন্নো, ভিক্খৱে… ফণহত্থকো, ভিক্খৱে… খুজ্জো, ভিক্খৱে… ৱামনো, ভিক্খৱে… গলগণ্ডী, ভিক্খৱে… লক্খণাহতো, ভিক্খৱে… কসাহতো, ভিক্খৱে… লিখিতকো, ভিক্খৱে… সীপদিকো, ভিক্খৱে… পাপৰোগী, ভিক্খৱে… পৰিসদূসকো, ভিক্খৱে… কাণো, ভিক্খৱে… কুণী, ভিক্খৱে… খঞ্জো, ভিক্খৱে… পক্খহতো, ভিক্খৱে… ছিন্নিৰিযাপথো, ভিক্খৱে… জৰাদুব্বলো, ভিক্খৱে… অন্ধো, ভিক্খৱে… মূগো, ভিক্খৱে… বধিৰো, ভিক্খৱে… অন্ধমূগো, ভিক্খৱে… অন্ধবধিৰো, ভিক্খৱে… মূগবধিৰো, ভিক্খৱে… অন্ধমূগবধিৰো, ভিক্খৱে, অপ্পত্তো ওসাৰণং, তঞ্চে সঙ্ঘো ওসাৰেতি – সোসাৰিতো. অযং ৱুচ্চতি, ভিক্খৱে, পুগ্গলো অপ্পত্তো ওসাৰণং, তঞ্চে সঙ্ঘো ওসাৰেতি – সোসাৰিতো. ইমে ৱুচ্চন্তি, ভিক্খৱে, পুগ্গলা অপ্পত্তা ওসাৰণং, তে চে সঙ্ঘো ওসাৰেতি – সোসাৰিতা.

দ্ৱেনিস্সাৰণাদিকথা নিট্ঠিতা.

ৱাসভগামভাণৱাৰো নিট্ঠিতো পঠমো.

২৪০. অধম্মকম্মাদিকথা

৩৯৭. ইধ পন, ভিক্খৱে, ভিক্খুস্স ন হোতি আপত্তি দট্ঠব্বা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘আপত্তিং ত্ৱং, আৱুসো, আপন্নো, পস্সসেতং আপত্তি’’ন্তি? সো এৱং ৱদেতি – ‘‘নত্থি মে, আৱুসো, আপত্তি, যমহং পস্সেয্য’’ন্তি. তং সঙ্ঘো আপত্তিযা অদস্সনে উক্খিপতি – অধম্মকম্মং.

ইধ পন, ভিক্খৱে, ভিক্খুস্স ন হোতি আপত্তি পটিকাতব্বা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘আপত্তিং ত্ৱং, আৱুসো, আপন্নো, পটিকৰোহি তং আপত্তি’’ন্তি. সো এৱং ৱদেতি – ‘‘নত্থি মে, আৱুসো, আপত্তি, যমযং পটিকৰেয্য’’ন্তি. তং সঙ্ঘো আপত্তিযা অপ্পটিকম্মে উক্খিপতি – অধম্মকম্মং.

ইধ পন, ভিক্খৱে, ভিক্খুস্স ন হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘পাপিকা তে, আৱুসো, দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৱং ৱদেতি – ‘‘নত্থি মে, আৱুসো, পাপিকা দিট্ঠি, যমহং পটিনিস্সজ্জেয্য’’ন্তি. তং সঙ্ঘো পাপিকায দিট্ঠিযা অপ্পটিনিস্সগ্গে উক্খিপতি – অধম্মকম্মং.

ইধ পন, ভিক্খৱে, ভিক্খুস্স ন হোতি আপত্তি দট্ঠব্বা, ন হোতি আপত্তি পটিকাতব্বা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘আপত্তিং ত্ৱং, আৱুসো, আপন্নো, পস্সসেতং আপত্তি? পটিকৰোহি তং আপত্তি’’ন্তি. সো এৱং ৱদেতি – ‘‘নত্থি মে, আৱুসো, আপত্তি, যমহং পস্সেয্যং. নত্থি মে, আৱুসো, আপত্তি, যমহং পটিকৰেয্য’’ন্তি. তং সঙ্ঘো অদস্সনে ৱা অপ্পটিকম্মে ৱা উক্খিপতি – অধম্মকম্মং.

ইধ পন, ভিক্খৱে, ভিক্খুস্স ন হোতি আপত্তি দট্ঠব্বা, ন হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘আপত্তিং ত্ৱং, আৱুসো, আপন্নো, পস্সসেতং আপত্তিং? পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৱং ৱদেতি – ‘‘নত্থি মে, আৱুসো, আপত্তি, যমহং পস্সেয্যং; নত্থি মে, আৱুসো, পাপিকা দিট্ঠি, যমহং পটিনিস্সজ্জেয্য’’ন্তি. তং সঙ্ঘো অদস্সনে ৱা অপ্পটিনিস্সগ্গে ৱা উক্খিপতি – অধম্মকম্মং.

ইধ পন, ভিক্খৱে, ভিক্খুস্স ন হোতি আপত্তি পটিকাতব্বা, ন হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘আপত্তিং ত্ৱং, আৱুসো, আপন্নো, পটিকৰোহি তং আপত্তিং; পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৱং ৱদেতি – ‘‘নত্থি মে, আৱুসো, আপত্তি, যমহং পটিকৰেয্যং. নত্থি মে, আৱুসো, পাপিকা দিট্ঠি, যমহং পটিনিস্সজ্জেয্য’’ন্তি. তং সঙ্ঘো অপ্পটিকম্মে ৱা অপ্পটিনিস্সগ্গে ৱা উক্খিপতি – অধম্মকম্মং.

ইধ পন, ভিক্খৱে, ভিক্খুস্স ন হোতি আপত্তি দট্ঠব্বা, ন হোতি আপত্তি পটিকাতব্বা, ন হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘আপত্তিং ত্ৱং, আৱুসো, আপন্নো, পস্সসেতং আপত্তিং? পটিকৰোহি তং আপত্তিং; পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৱং ৱদেতি – ‘‘নত্থি মে, আৱুসো, আপত্তি, যমহং পস্সেয্যং. নত্থি মে, আৱুসো, আপত্তি, যমহং পটিকৰেয্যং. নত্থি মে, আৱুসো, পাপিকা দিট্ঠি, যমহং পটিনিস্সজ্জেয্য’’ন্তি. তং সঙ্ঘো অদস্সনে ৱা অপ্পটিকম্মে ৱা অপ্পটিনিস্সগ্গে ৱা উক্খিপতি – অধম্মকম্মং.

৩৯৮. ইধ পন, ভিক্খৱে, ভিক্খুস্স হোতি আপত্তি দট্ঠব্বা. তমেনং চোদেতি. সঙ্ঘো ৱা সম্বহুলা ৱা একপুগ্গলো ৱা – ‘‘আপত্তিং ত্ৱং, আৱুসো, আপন্নো, পস্সসেতং আপত্তি’’ন্তি? সো এৱং ৱদেতি – ‘‘আমাৱুসো, পস্সামী’’তি. তং সঙ্ঘো আপত্তিযা অদস্সনে উক্খিপতি – অধম্মকম্মং.

ইধ পন, ভিক্খৱে, ভিক্খুস্স হোতি আপত্তি পটিকাতব্বা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘আপত্তিং ত্ৱং, আৱুসো, আপন্নো, পটিকৰোহি তং আপত্তি’’ন্তি. সো এৱং ৱদেতি – ‘‘আমাৱুসো, পটিকৰিস্সামী’’তি. তং সঙ্ঘো আপত্তিযা অপ্পটিকম্মে উক্খিপতি – অধম্মকম্মং.

ইধ পন, ভিক্খৱে, ভিক্খুস্স হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘পাপিকা তে, আৱুসো, দিট্ঠি; পটিনিস্সজ্জেতং পাপিকং দিট্ঠি’’ন্তি. সো এৱং ৱদেতি – ‘‘আমাৱুসো, পটিনিস্সজ্জিস্সামী’’তি. তং সঙ্ঘো পাপিকায দিট্ঠিযা অপ্পটিনিস্সগ্গে উক্খিপতি – অধম্মকম্মং.

ইধ পন, ভিক্খৱে, ভিক্খুস্স হোতি আপত্তি দট্ঠব্বা, হোতি আপত্তি পটিকাতব্বা…পে… হোতি আপত্তি দট্ঠব্বা, হোতি পাপিকা দিট্ঠি পটিনিস্সজ্জেতা…পে… হোতি আপত্তি পটিকাতব্বা, হোতি পাপিকা দিট্ঠি পটিনিস্সজ্জেতা…পে… হোতি আপত্তি দট্ঠব্বা, হোতি আপত্তি পটিকাতব্বা, হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘আপত্তিং ত্ৱং, আৱুসো, আপন্নো, পস্সসেতং আপত্তিং? পটিকৰোহি তং আপত্তিং; পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৱং ৱদেতি – ‘‘আমাৱুসো, পস্সামি, আম পটিকৰিস্সামি, আম পটিনিস্সজ্জিস্সামী’’তি. তং সঙ্ঘো অদস্সনে ৱা অপ্পটিকম্মে ৱা অপ্পটিনিস্সগ্গে ৱা উক্খিপতি – অধম্মকম্মং.

৩৯৯. ইধ পন, ভিক্খৱে, ভিক্খুস্স হোতি আপত্তি দট্ঠব্বা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘আপত্তিং ত্ৱং, আৱুসো, আপন্নো, পস্সসেতং আপত্তি’’ন্তি? সো এৱং ৱদেতি – ‘‘নত্থি মে, আৱুসো, আপত্তি, যমহং পস্সেয্য’’ন্তি. তং সঙ্ঘো আপত্তিযা অদস্সনে উক্খিপতি – ধম্মকম্মং.

ইধ পন, ভিক্খৱে, ভিক্খুস্স হোতি আপত্তি পটিকাতব্বা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘আপত্তিং ত্ৱং, আৱুসো, আপন্নো, পটিকৰোহি তং আপত্তি’’ন্তি. সো এৱং ৱদেতি – ‘‘নত্থি মে, আৱুসো, আপত্তি, যমহং পটিকৰেয্য’’ন্তি. তং সঙ্ঘো আপত্তিযা অপ্পটিকম্মে উক্খিপতি – ধম্মকম্মং.

ইধ পন, ভিক্খৱে, ভিক্খুস্স হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘পাপিকা তে, আৱুসো, দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৱং ৱদেতি – ‘‘নত্থি মে, আৱুসো, পাপিকা দিট্ঠি, যমহং পটিনিস্সজ্জেয্য’’ন্তি. তং সঙ্ঘো পাপিকায দিট্ঠিযা অপ্পটিনিস্সগ্গে উক্খিপতি – ধম্মকম্মং.

ইধ পন, ভিক্খৱে, ভিক্খুস্স হোতি আপত্তি দট্ঠব্বা, হোতি আপত্তি পটিকাতব্বা…পে…

হোতি আপত্তি দট্ঠব্বা, হোতি পাপিকা দিট্ঠি পটিনিস্সজ্জেতা…পে… হোতি আপত্তি পটিকাতব্বা, হোতি পাপিকা দিট্ঠি পটিনিস্সজ্জেতা …পে… হোতি আপত্তি দট্ঠব্বা, হোতি আপত্তি পটিকাতব্বা, হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৱা সম্বহুলা ৱা একপুগ্গলো ৱা – ‘‘আপত্তিং ত্ৱং, আৱুসো, আপন্নো, পস্সসেতং আপত্তিং? পটিকৰোহি তং আপত্তিং. পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৱং ৱদেতি – ‘‘নত্থি মে, আৱুসো, আপত্তি, যমহং পস্সেয্যং. নত্থি মে, আৱুসো, আপত্তি যমহং পটিকৰেয্যং. নত্থি মে, আৱুসো, পাপিকা দিট্ঠি, যমহং পটিনিস্সজ্জেয্য’’ন্তি. তং সঙ্ঘো অদস্সনে ৱা অপ্পটিকম্মে ৱা অপ্পটিনিস্সগ্গে ৱা উক্খিপতি – ধম্মকম্মন্তি.

অধম্মকম্মাদিকথা নিট্ঠিতা.

২৪১. উপালিপুচ্ছাকথা

৪০০. অথ খো আযস্মা উপালি যেন ভগৱা তেনুপসঙ্কমি, উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা উপালি ভগৱন্তং এতদৱোচ – ‘‘যো নু খো, ভন্তে, সমগ্গো সঙ্ঘো সম্মুখাকৰণীযং কম্মং অসম্মুখা কৰোতি, ধম্মকম্মং নু খো তং, ভন্তে, ৱিনযকম্ম’’ন্তি? ‘‘অধম্মকম্মং তং, উপালি, অৱিনযকম্ম’’ন্তি. ‘‘যো নু খো, ভন্তে, সমগ্গো সঙ্ঘো পটিপুচ্ছাকৰণীযং কম্মং অপ্পটিপুচ্ছা কৰোতি…পে… পটিঞ্ঞাযকৰণীযং কম্মং অপটিঞ্ঞায কৰোতি… সতিৱিনযাৰহস্স অমূড়্হৱিনযং দেতি… অমূড়্হৱিনযাৰহস্স তস্সপাপিযসিকাকম্মং কৰোতি… তস্সপাপিযসিকাকম্মাৰহস্স তজ্জনীযকম্মং কৰোতি… তজ্জনীযকম্মাৰহস্স নিযস্সকম্মং কৰোতি … নিযস্সকম্মাৰহস্স পব্বাজনীযকম্মং কৰোতি… পব্বাজনীযকম্মাৰহস্স পটিসাৰণীযকম্মং কৰোতি… পটিসাৰণীযকম্মাৰহস্স উক্খেপনীযকম্মং কৰোতি… উক্খেপনীযকম্মাৰহস্স পৰিৱাসং দেতি… পৰিৱাসাৰহং মূলায পটিকস্সতি… মূলাযপটিকস্সনাৰহস্স মানত্তং দেতি… মানত্তাৰহং অব্ভেতি… অব্ভানাৰহং উপসম্পাদেতি, ধম্মকম্মং নু খো তং, ভন্তে, ৱিনযকম্ম’’ন্তি? ‘‘অধম্মকম্মং তং, উপালি, অৱিনযকম্মং’’.

‘‘যো খো, উপালি, সমগ্গো সঙ্ঘো সম্মুখাকৰণীযং কম্মং অসম্মুখা কৰোতি, এৱং খো, উপালি, অধম্মকম্মং হোতি অৱিনযকম্মং, এৱঞ্চ পন সঙ্ঘো সাতিসাৰো হোতি. যো খো, উপালি, সমগ্গো সঙ্ঘো পটিপুচ্ছাকৰণীযং কম্মং অপ্পটিপুচ্ছা কৰোতি…পে… পটিঞ্ঞাযকৰণীযং কম্মং অপটিঞ্ঞায কৰোতি… সতিৱিনযাৰহস্স অমূড়্হৱিনযং দেতি… অমূড়্হৱিনযাৰহস্স তস্সপাপিযসিকাকম্মং কৰোতি… তস্সপাপিযসিকাকম্মাৰহস্স তজ্জনীযকম্মং কৰোতি… তজ্জনীযকম্মাৰহস্স নিযস্সকম্মং কৰোতি… নিযস্সকম্মাৰহস্স পব্বাজনীযকম্মং কৰোতি… পব্বাজনীযকম্মাৰহস্স পটিসাৰণীযকম্মং কৰোতি… পটিসাৰণীযকম্মাৰহস্স উক্খেপনীযকম্মং কৰোতি… উক্খেপনীযকম্মাৰহস্স পৰিৱাসং দেতি… পৰিৱাসাৰহং মূলায পটিকস্সতি… মূলাযপটিকস্সনাৰহস্স মানত্তং দেতি… মানত্তাৰহং অব্ভেতি… অব্ভানাৰহং উপসম্পাদেতি, এৱং খো, উপালি, অধম্মকম্মং হোতি অৱিনযকম্মং. এৱঞ্চ পন সঙ্ঘো সাতিসাৰো হোতী’’তি.

৪০১. ‘‘যো নু খো, ভন্তে, সমগ্গো সঙ্ঘো সম্মুখাকৰণীযং কম্মং সম্মুখা কৰোতি, ধম্মকম্মং নু খো তং, ভন্তে, ৱিনযকম্ম’’ন্তি? ‘‘ধম্মকম্মং তং, উপালি, ৱিনযকম্ম’’ন্তি. ‘‘যো নু খো, ভন্তে, সমগ্গো সঙ্ঘো পটিপুচ্ছাকৰণীযং কম্মং পটিপুচ্ছা কৰোতি…পে… পটিঞ্ঞাযকৰণীযং কম্মং পটিঞ্ঞায কৰোতি… সতিৱিনযাৰহস্স সতিৱিনযং দেতি… অমূড়্হৱিনযাৰহস্স অমূড়্হৱিনযং দেতি… তস্সপাপিযসিকাকম্মাৰহস্স তস্সপাপিযসিকাকম্মং কৰোতি… তজ্জনীযকম্মাৰহস্স তজ্জনীযকম্মং কৰোতি… নিযস্সকম্মাৰহস্স নিযস্সকম্মং কৰোতি… পব্বাজনীযকম্মাৰহস্স পব্বাজনীযকম্মং কৰোতি… পটিসাৰণীযকম্মাৰহস্স পটিসাৰণীযকম্মং কৰোতি… উক্খেপনীযকম্মাৰহস্স উক্খেপনীযকম্মং কৰোতি… পৰিৱাসাৰহস্স পৰিৱাসং দেতি মূলাযপটিকস্সনাৰহং মূলায পটিকস্সতি… মানত্তাৰহস্স মানত্তং দেতি… অব্ভানাৰহং অব্ভেতি… উপসম্পদাৰহং উপসম্পাদেতি, ধম্মকম্মং নু খো তং, ভন্তে, ৱিনযকম্ম’’ন্তি? ‘‘ধম্মকম্মং তং, উপালি, ৱিনযকম্মং.

‘‘যো খো, উপালি, সমগ্গো সঙ্ঘো সম্মুখাকৰণীযং কম্মং সম্মুখা কৰোতি, এৱং খো, উপালি, ধম্মকম্মং হোতি ৱিনযকম্মং. এৱঞ্চ পন সঙ্ঘো অনতিসাৰো হোতি. যো খো, উপালি, সমগ্গো সঙ্ঘো পটিপুচ্ছাকৰণীযং কম্মং পটিপুচ্ছা কৰোতি… পটিঞ্ঞাযকৰণীযং কম্মং পটিঞ্ঞায কৰোতি… সতিৱিনযাৰহস্স সতিৱিনযং দেতি… অমূড়্হৱিনযাৰহস্স অমূড়্হৱিনযং দেতি… তস্সপাপিযসিকাকম্মাৰহস্স তস্সপাপিযসিকাকম্মং কৰোতি… তজ্জনীযকম্মাৰহস্স তজ্জনীযকম্মং কৰোতি… নিযস্সকম্মাৰহস্স নিযস্সকম্মং কৰোতি… পব্বাজনীযকম্মাৰহস্স পব্বাজনীযকম্মং কৰোতি … পটিসাৰণীযকম্মাৰহস্স পটিসাৰণীযকম্মং কৰোতি… উক্খেপনীযকম্মাৰহস্স উক্খেপনীযকম্মং কৰোতি… পৰিৱাসাৰহস্স পৰিৱাসং দেতি… মূলাযপটিকস্সনাৰহং মূলায পটিকস্সতি… মানত্তাৰহস্স মানত্তং দেতি… অব্ভানাৰহং অব্ভেতি… উপসম্পদাৰহং উপসম্পাদেতি, এৱং খো, উপালি, ধম্মকম্মং হোতি ৱিনযকম্মং. এৱঞ্চ পন সঙ্ঘো অনতিসাৰো হোতী’’তি.

৪০২. ‘‘যো নু খো, ভন্তে, সমগ্গো সঙ্ঘো সতিৱিনযাৰহস্স অমূড়্হৱিনযং দেতি, অমূড়্হৱিনযাৰহস্স সতিৱিনযং দেতি, ধম্মকম্মং নু খো তং, ভন্তে, ৱিনযকম্ম’’ন্তি? ‘‘অধম্মকম্মং তং, উপালি, অৱিনযকম্ম’’ন্তি. ‘‘যো নু খো, ভন্তে, সমগ্গো সঙ্ঘো অমূড়্হৱিনযাৰহস্স তস্সপাপিযসিকাকম্মং কৰোতি, তস্সপাপিযসিকাকম্মাৰহস্স অমূড়্হৱিনযং দেতি…পে… তস্সপাপিযসিকাকম্মাৰহস্স তজ্জনীযকম্মং কৰোতি, তজ্জনীযকম্মাৰহস্স তস্সপাপিযসিকাকম্মং কৰোতি… তজ্জনীযকম্মাৰহস্স নিযস্সকম্মং কৰোতি, নিযস্সকম্মাৰহস্স তজ্জনীযকম্মং কৰোতি… নিযস্সকম্মাৰহস্স পব্বাজনীযকম্মং কৰোতি, পব্বাজনীযকম্মাৰহস্স নিযস্সকম্মং কৰোতি… পব্বাজনীযকম্মাৰহস্স পটিসাৰণীযকম্মং কৰোতি, পটিসাৰণীযকম্মাৰহস্স পব্বাজনীযকম্মং কৰোতি… পটিসাৰণীযকম্মাৰহস্স উক্খেপনীযকম্মং কৰোতি, উক্খেপনীযকম্মাৰহস্স পটিসাৰণীযকম্মং কৰোতি… উক্খেপনীযকম্মাৰহস্স পৰিৱাসং দেতি, পৰিৱাসাৰহস্স উক্খেপনীযকম্মং কৰোতি… পৰিৱাসাৰহং মূলায পটিকস্সতি, মূলাযপটিকস্সনাৰহস্স পৰিৱাসং দেতি… মূলাযপটিকস্সনাৰহস্স মানত্তং দেতি, মানত্তাৰহং মূলায পটিকস্সতি… মানত্তাৰহং অব্ভেতি, অব্ভানাৰহস্স মানত্তং দেতি… অব্ভানাৰহং উপসম্পাদেতি, উপসম্পদাৰহং অব্ভেতি, ধম্মকম্মং নু খো তং, ভন্তে, ৱিনযকম্ম’’ন্তি? ‘‘অধম্মকম্মং তং, উপালি, অৱিনযকম্ম’’ন্তি.

‘‘যো খো, উপালি, সমগ্গো সঙ্ঘো সতিৱিনযাৰহস্স অমূড়্হৱিনযং দেতি, অমূড়্হৱিনযাৰহস্স সতিৱিনযং দেতি, এৱং খো, উপালি, অধম্মকম্মং হোতি অৱিনযকম্মং. এৱঞ্চ পন সঙ্ঘো সাতিসাৰো হোতি. যো খো, উপালি, সমগ্গো সঙ্ঘো অমূড়্হৱিনযাৰহস্স তস্সপাপিযসিকাকম্মং কৰোতি, তস্সপাপিযসিকাকম্মাৰহস্স অমূড়্হৱিনযং দেতি…পে… তস্সপাপিযসিকাকম্মাৰহস্স তজ্জনীযকম্মং কৰোতি, তজ্জনীযকম্মাৰহস্স তস্সপাপিযসিকাকম্মং কৰোতি… তজ্জনীযকম্মাৰহস্স নিযস্সকম্মং কৰোতি, নিযস্সকম্মাৰহস্স তজ্জনীযকম্মং কৰোতি… নিযস্সকম্মাৰহস্স পব্বাজনীযকম্মং কৰোতি, পব্বাজনীযকম্মাৰহস্স নিযস্সকম্মং কৰোতি… পব্বাজনীযকম্মাৰহস্স পটিসাৰণীযকম্মং কৰোতি, পটিসাৰণীযকম্মাৰহস্স পব্বাজনীযকম্মং কৰোতি… পটিসাৰণীযকম্মাৰহস্স উক্খেপনীযকম্মং কৰোতি, উক্খেপনীযকম্মাৰহস্স পটিসাৰণীযকম্মং কৰোতি… উক্খেপনীযকম্মাৰহস্স পৰিৱাসং দেতি, পৰিৱাসাৰহস্স উক্খেপনীযকম্মং কৰোতি… পৰিৱাসাৰহং মূলায পটিকস্সতি, মূলাযপটিকস্সনাৰহস্স পৰিৱাসং দেতি… মূলাযপটিকস্সনাৰহস্স মানত্তং দেতি, মানত্তাৰহং মূলায পটিকস্সতি – মানত্তাৰহং অব্ভেতি, অব্ভানাৰহস্স মানত্তং দেতি… অব্ভানাৰহং উপসম্পাদেতি, উপসম্পদাৰহং অব্ভেতি, এৱং খো, উপালি, অধম্মকম্মং হোতি অৱিনযকম্মং. এৱঞ্চ পন সঙ্ঘো সাতিসাৰো হোতী’’তি.

৪০৩. ‘‘যো নু খো, ভন্তে, সমগ্গো সঙ্ঘো সতিৱিনযাৰহস্স সতিৱিনযং দেতি, অমূড়্হৱিনযাৰহস্স অমূড়্হৱিনযং দেতি, ধম্মকম্মং নু খো তং, ভন্তে, ৱিনযকম্ম’’ন্তি? ‘‘ধম্মকম্মং তং, উপালি, ৱিনযকম্ম’’ন্তি. ‘‘যো নু খো, ভন্তে, সমগ্গো সঙ্ঘো অমূড়্হৱিনযাৰহস্স অমূড়্হৱিনযং দেতি…পে… তস্সপাপিযসিকাকম্মাৰহস্স তস্সপাপিযসিকাকম্মং কৰোতি…পে… তজ্জনীযকম্মাৰহস্স তজ্জনীযকম্মং কৰোতি…পে… নিযস্সকম্মাৰহস্স নিযস্সকম্মং কৰোতি…পে… পব্বাজনীযকম্মাৰহস্স পব্বাজনীযকম্মং কৰোতি…পে… পটিসাৰণীযকম্মাৰহস্স পটিসাৰণীযকম্মং কৰোতি…পে… উক্খেপনীযকম্মাৰহস্স উক্খেপনীযকম্মং কৰোতি…পে… পৰিৱাসাৰহস্স পৰিৱাসং দেতি…পে… মূলাযপটিকস্সনাৰহং মূলায পটিকস্সতি…পে… মানত্তাৰহস্স মানত্তং দেতি…পে… অব্ভানাৰহং অব্ভেতি, উপসম্পদাৰহং উপসম্পাদেতি, ধম্মকম্মং নু খো তং, ভন্তে, ৱিনযকম্ম’’ন্তি? ‘‘ধম্মকম্মং তং, উপালি, ৱিনযকম্মং’’.

‘‘যো খো, উপালি, সমগ্গো সঙ্ঘো সতিৱিনযাৰহস্স সতিৱিনযং দেতি, অমূড়্হৱিনযাৰহস্স অমূড়্হৱিনযং দেতি, এৱং খো, উপালি, ধম্মকম্মং হোতি ৱিনযকম্মং. এৱঞ্চ পন সঙ্ঘো অনতিসাৰো হোতি. যো খো, উপালি, সমগ্গো সঙ্ঘো অমূড়্হৱিনযাৰহস্স অমূড়্হৱিনযং দেতি …পে… তস্সপাপিযসিকাকম্মাৰহস্স তস্সপাপিযসিকাকম্মং কৰোতি…পে… তজ্জনীযকম্মাৰহস্স তজ্জনীযকম্মং কৰোতি…পে… নিযস্সকম্মাৰহস্স নিযস্সকম্মং কৰোতি…পে… পব্বাজনীযকম্মাৰহস্স পব্বাজনীযকম্মং কৰোতি…পে… পটিসাৰণীযকম্মাৰহস্স পটিসাৰণীযকম্মং কৰোতি…পে… উক্খেপনীযকম্মাৰহস্স উক্খেপনীযকম্মং কৰোতি…পে… পৰিৱাসাৰহস্স পৰিৱাসং দেতি…পে… মূলায পটিকস্সনাৰহং মূলায পটিকস্সতি…পে… মানত্তাৰহস্স মানত্তং দেতি…পে… অব্ভানাৰহং অব্ভেতি, উপসম্পদাৰহং উপসম্পাদেতি, এৱং খো, উপালি, ধম্মকম্মং হোতি ৱিনযকম্মং. এৱঞ্চ পন সঙ্ঘো অনতিসাৰো হোতী’’তি.

৪০৪. অথ খো ভগৱা ভিক্খূ আমন্তেসি – যো খো, ভিক্খৱে, সমগ্গো সঙ্ঘো সতিৱিনযাৰহস্স অমূড়্হৱিনযং দেতি, এৱং খো, ভিক্খৱে, অধম্মকম্মং হোতি অৱিনযকম্মং. এৱঞ্চ পন সঙ্ঘো সাতিসাৰো হোতি. যো খো, ভিক্খৱে, সমগ্গো সঙ্ঘো সতিৱিনযাৰহস্স তস্সপাপিযসিকাকম্মং কৰোতি…পে… সতিৱিনযাৰহস্স তজ্জনীযকম্মং কৰোতি… সতিৱিনযাৰহস্স নিযস্সকম্মং কৰোতি… সতিৱিনযাৰহস্স পব্বাজনীযকম্মং কৰোতি… সতিৱিনযাৰহস্স পটিসাৰণীযকম্মং কৰোতি… সতিৱিনযাৰহস্স উক্খেপনীযকম্মং কৰোতি … সতিৱিনযাৰহস্স পৰিৱাসং দেতি… সতিৱিনযাৰহং মূলায পটিকস্সতি… সতিৱিনযাৰহস্স মানত্তং দেতি… সতিৱিনযাৰহং অব্ভেতি… সতিৱিনযাৰহং উপসম্পাদেতি, এৱং খো, ভিক্খৱে, অধম্মকম্মং হোতি অৱিনযকম্মং. এৱঞ্চ পন সঙ্ঘো সাতিসাৰো হোতি.

৪০৫. যো খো, ভিক্খৱে, সমগ্গো সঙ্ঘো অমূড়্হৱিনযাৰহস্স তস্সপাপিযসিকাকম্মং কৰোতি, এৱং খো, ভিক্খৱে, অধম্মকম্মং হোতি অৱিনযকম্মং. এৱঞ্চ পন সঙ্ঘো সাতিসাৰো হোতি. যো খো, ভিক্খৱে, সমগ্গো সঙ্ঘো অমূড়্হৱিনযাৰহস্স তজ্জনীযকম্মং কৰোতি…পে… অমূড়্হৱিনযাৰহস্স নিযস্সকম্মং কৰোতি… অমূড়্হৱিনযাৰহস্স পব্বাজনীযকম্মং কৰোতি… অমূড়্হৱিনযাৰহস্স পটিসাৰণীযকম্মং কৰোতি… অমূড়্হৱিনযাৰহস্স উক্খেপনীযকম্মং কৰোতি… অমূড়্হৱিনযাৰহস্স পৰিৱাসং দেতি… অমূড়্হৱিনযাৰহং মূলায পটিকস্সতি… অমূড়্হৱিনযাৰহস্স মানত্তং দেতি… অমূড়্হৱিনযাৰহং অব্ভেতি… অমূড়্হৱিনযাৰহং উপসম্পাদেতি… অমূড়্হৱিনযাৰহস্স সতিৱিনযং দেতি, এৱং খো, ভিক্খৱে, অধম্মকম্মং হোতি অৱিনযকম্মং. এৱঞ্চ পন সঙ্ঘো সাতিসাৰো হোতি.

৪০৬. যো খো, ভিক্খৱে, সমগ্গো সঙ্ঘো তস্সপাপিযসিকাকম্মাৰহস্স তজ্জনীযকম্মং কৰোতি…পে… তজ্জনীযকম্মাৰহস্স… নিযস্সকম্মাৰহস্স… পব্বাজনীযকম্মাৰহস্স… পটিসাৰণীযকম্মাৰহস্স… উক্খেপনীযকম্মাৰহস্স… পৰিৱাসাৰহং… মূলাযপটিকস্সনাৰহস্স… মানত্তাৰহং… অব্ভানাৰহং… উপসম্পদাৰহস্স সতিৱিনযং দেতি, এৱং খো, ভিক্খৱে, অধম্মকম্মং হোতি অৱিনযকম্মং. এৱঞ্চ পন সঙ্ঘো সাতিসাৰো হোতি. যো খো, ভিক্খৱে, সমগ্গো সঙ্ঘো উপসম্পদাৰহস্স অমূড়্হৱিনযং দেতি…পে… উপসম্পদাৰহস্স তস্সপাপিযসিকাকম্মং কৰোতি… উপসম্পদাৰহস্স তজ্জনীযকম্মং কৰোতি… উপসম্পদাৰহস্স নিযস্সকম্মং কৰোতি… উপসম্পদাৰহস্স পব্বাজনীযকম্মং কৰোতি… উপসম্পদাৰহস্স পটিসাৰণীযকম্মং কৰোতি… উপসম্পদাৰহস্স উক্খেপনীযকম্মং কৰোতি… উপসম্পদাৰহস্স পৰিৱাসং দেতি… উপসম্পদাৰহং মূলায পটিকস্সতি… উপসম্পদাৰহস্স মানত্তং দেতি… উপসম্পদাৰহং অব্ভেতি, এৱং খো, ভিক্খৱে, অধম্মকম্মং হোতি অৱিনযকম্মং. এৱঞ্চ পন সঙ্ঘো সাতিসাৰো হোতীতি.

উপালিপুচ্ছাকথা নিট্ঠিতা.

উপালিপুচ্ছাভাণৱাৰো নিট্ঠিতো দুতিযো.

২৪২. তজ্জনীযকম্মকথা

৪০৭. ইধ পন, ভিক্খৱে, ভিক্খু ভণ্ডনকাৰকো হোতি কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু ভণ্ডনকাৰকো কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো অধম্মেন ৱগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – অধম্মেন সমগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো অধম্মেন সমগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো ধম্মেন ৱগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মপতিৰূপকেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো ধম্মপতিৰূপকেন ৱগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মপতিৰূপকেন সমগ্গা.

৪০৮. ইধ পন, ভিক্খৱে, ভিক্খু ভণ্ডনকাৰকো হোতি কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু ভণ্ডনকাৰকো কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – অধম্মেন সমগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো অধম্মেন সমগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো ধম্মেন ৱগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মপতিৰূপকেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো ধম্মপতিৰূপকেন ৱগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মপতিৰূপকেন সমগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো ধম্মপতিৰূপকেন সমগ্গেহি. হন্দস্স মযং তজ্জনীযকম্মং কৰোমা’তি. তে তস্স তজ্জনীযকম্মং কৰোন্তি – অধম্মেন ৱগ্গা.

৪০৯. ইধ পন, ভিক্খৱে, ভিক্খু ভণ্ডনকাৰকো হোতি কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু ভণ্ডনকাৰকো কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো ধম্মেন ৱগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মপতিৰূপকেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো ধম্মপতিৰূপকেন ৱগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মপতিৰূপকেন সমগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো ধম্মপতিৰূপকেন সমগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – অধম্মেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো অধম্মেন ৱগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – অধম্মেন সমগ্গা.

৪১০. ইধ পন, ভিক্খৱে, ভিক্খু ভণ্ডনকাৰকো হোতি কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু ভণ্ডনকাৰকো কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মপতিৰূপকেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো ধম্মপতিৰূপকেন ৱগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মপতিৰূপকেন সমগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো ধম্মপতিৰূপকেন সমগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – অধম্মেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো অধম্মেন ৱগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – অধম্মেন সমগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো অধম্মেন সমগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মেন ৱগ্গা.

৪১১. ইধ পন, ভিক্খৱে, ভিক্খু ভণ্ডনকাৰকো হোতি কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু ভণ্ডনকাৰকো কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মপতিৰূপকেন সমগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো ধম্মপতিৰূপকেন সমগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – অধম্মেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো অধম্মেন ৱগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – অধম্মেন সমগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো অধম্মেন সমগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো ধম্মেন ৱগ্গেহি. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মপতিৰূপকেন ৱগ্গা.

তজ্জনীযকম্মকথা নিট্ঠিতা.

২৪৩. নিযস্সকম্মকথা

৪১২. ইধ পন, ভিক্খৱে, ভিক্খু বালো হোতি অব্যত্তো আপত্তিবহুলো অনপদানো, গিহিসংসট্ঠো ৱিহৰতি অননুলোমিকেহি গিহিসংসগ্গেহি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু বালো অব্যত্তো আপত্তিবহুলো অনপদানো, গিহিসংসট্ঠো ৱিহৰতি অননুলোমিকেহি গিহিসংসগ্গেহি. হন্দস্স মযং নিযস্সকম্মং কৰোমা’’তি. তে তস্স নিযস্সকম্মং কৰোন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন নিযস্সকম্মকতো অধম্মেন ৱগ্গেহি. হন্দস্স মযং নিযস্সকম্মং কৰোমা’’তি. তে তস্স নিযস্সকম্মং কৰোন্তি – অধম্মেন সমগ্গা…পে… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা…পে….

যথা হেট্ঠা, তথা চক্কং কাতব্বং.

নিযস্সকম্মকথা নিট্ঠিতা.

২৪৪. পব্বাজনীযকম্মকথা

৪১৩. ইধ পন, ভিক্খৱে, ভিক্খু কুলদূসকো হোতি পাপসমাচাৰো. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু কুলদূসকো পাপসমাচাৰো. হন্দস্স মযং পব্বাজনীযকম্মং কৰোমা’’তি. তে তস্স পব্বাজনীযকম্মং কৰোন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন পব্বাজনীযকম্মকতো অধম্মেন ৱগ্গেহি. হন্দস্স মযং পব্বাজনীযকম্মং কৰোমা’’তি. তে তস্স পব্বাজনীযকম্মং কৰোন্তি – অধম্মেন সমগ্গা…পে… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা…পে….

চক্কং কাতব্বং.

পব্বাজনীযকম্মকতা নিট্ঠিতা.

২৪৫. পটিসাৰণীযকম্মকথা

৪১৪. ইধ পন, ভিক্খৱে, ভিক্খু গিহী অক্কোসতি পৰিভাসতি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু গিহী অক্কোসতি পৰিভাসতি. হন্দস্স মযং পটিসাৰণীযকম্মং কৰোমা’’তি. তে তস্স পটিসাৰণীযকম্মং কৰোন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন পটিসাৰণীযকম্মকতো অধম্মেন ৱগ্গেহি. হন্দস্স মযং পটিসাৰণীযকম্মং কৰোমা’’তি. তে তস্স পটিসাৰণীযকম্মং কৰোন্তি – অধম্মেন সমগ্গা…পে… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা…পে….

চক্কং কাতব্বং.

পটিসাৰণীযকম্মকথা নিট্ঠিতা.

২৪৬. অদস্সনে উক্খেপনীযকম্মকথা

৪১৫. ইধ পন, ভিক্খৱে, ভিক্খু আপত্তিং আপজ্জিত্ৱা ন ইচ্ছতি আপত্তিং পস্সিতুং. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু আপত্তিং আপজ্জিত্ৱা ন ইচ্ছতি আপত্তিং পস্সিতুং. হন্দস্স মযং আপত্তিযা অদস্সনে উক্খেপনীযকম্মং কৰোমা’’তি. তে তস্স আপত্তিযা অদস্সনে উক্খেপনীযকম্মং কৰোন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন আপত্তিযা অদস্সনে উক্খেপনীযকম্মকতো অধম্মেন ৱগ্গেহি. হন্দস্স মযং আপত্তিযা অদস্সনে উক্খেপনীযকম্মং কৰোমা’’তি. তে তস্স আপত্তিযা অদস্সনে উক্খেপনীযকম্মং কৰোন্তি – অধম্মেন সমগ্গা…পে… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা…পে….

চক্কং কাতব্বং.

অদস্সনে উক্খেপনীযকম্মকথা নিট্ঠিতা.

২৪৭. অপ্পটিকম্মে উক্খেপনীযকম্মকথা

৪১৬. ইধ পন, ভিক্খৱে, ভিক্খু আপত্তিং আপজ্জিত্ৱা ন ইচ্ছতি আপত্তিং পটিকাতুং. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু আপত্তিং আপজ্জিত্ৱা ন ইচ্ছতি আপত্তিং পটিকাতুং. হন্দস্স মযং আপত্তিযা অপ্পটিকম্মে উক্খেপনীযকম্মং কৰোমা’’তি. তে তস্স আপত্তিযা অপ্পটিকম্মে উক্খেপনীযকম্মং কৰোন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন আপত্তিযা অপ্পটিকম্মে উক্খেপনীযকম্মকতো অধম্মেন ৱগ্গেহি. হন্দস্স মযং আপত্তিযা অপ্পটিকম্মে উক্খেপনীযকম্মং কৰোমা’’তি. তে তস্স আপত্তিযা অপ্পটিকম্মে উক্খেপনীযকম্মং কৰোন্তি – অধম্মেন সমগ্গা…পে… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা…পে….

চক্কং কাতব্বং.

অপ্পটিকম্মে উক্খেপনীযকম্মকথা নিট্ঠিতা.

২৪৮. অপ্পটিনিস্সগ্গে উক্খেপনীযকম্মকথা

৪১৭. ইধ পন, ভিক্খৱে, ভিক্খু ন ইচ্ছতি পাপিকং দিট্ঠিং পটিনিস্সজ্জিতুং. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু ন ইচ্ছতি পাপিকং দিট্ঠিং পটিনিস্সজ্জিতুং. হন্দস্স মযং পাপিকায দিট্ঠিযা অপ্পটিনিস্সগ্গে উক্খেপনীযকম্মং কৰোমা’’তি. তে তস্স পাপিকায দিট্ঠিযা অপ্পটিনিস্সগ্গে উক্খেপনীযকম্মং কৰোন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন পাপিকায দিট্ঠিযা অপ্পটিনিস্সগ্গে উক্খেপনীযকম্মকতো অধম্মেন ৱগ্গেহি. হন্দস্স মযং পাপিকায দিট্ঠিযা অপ্পটিনিস্সগ্গে উক্খেপনীযকম্মং কৰোমা’’তি. তে তস্স পাপিকায দিট্ঠিযা অপ্পটিনিস্সগ্গে উক্খেপনীযকম্মং কৰোন্তি – অধম্মেন সমগ্গা…পে… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা…পে….

চক্কং কাতব্বং.

অপ্পটিনিস্সগ্গে উক্খেপনীযকম্মকথা নিট্ঠিতা.

২৪৯. তজ্জনীযকম্মপটিপ্পস্সদ্ধিকথা

৪১৮. ইধ পন, ভিক্খৱে, ভিক্খু সঙ্ঘেন তজ্জনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, তজ্জনীযস্স কম্মস্স পটিপ্পস্সদ্ধিং যাচতি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, তজ্জনীযস্স কম্মস্স পটিপ্পস্সদ্ধিং যাচতি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং অধম্মেন সমগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – অধম্মেন সমগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং অধম্মেন ৱগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং ধম্মেন ৱগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মপতিৰূপকেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং ধম্মপতিৰূপকেন ৱগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মপতিৰূপকেন সমগ্গা.

৪১৯. ইধ পন, ভিক্খৱে, ভিক্খু সঙ্ঘেন তজ্জনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, তজ্জনীযস্স কম্মস্স পটিপ্পস্সদ্ধিং যাচতি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, তজ্জনীযস্স কম্মস্স পটিপ্পস্সদ্ধিং যাচতি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – অধম্মেন সমগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং অধম্মেন সমগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং ধম্মেন ৱগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মপতিৰূপকেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং ধম্মপতিৰূপকেন ৱগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মপতিৰূপকেন সমগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং ধম্মপতিৰূপকেন সমগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – অধম্মেন ৱগ্গা.

৪২০. ইধ পন, ভিক্খৱে, ভিক্খু সঙ্ঘেন তজ্জনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, তজ্জনীযস্স কম্মস্স পটিপ্পস্সদ্ধিং যাচতি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, তজ্জনীযস্স কম্মস্স পটিপ্পস্সদ্ধিং যাচতি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং ধম্মেন ৱগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মপতিৰূপকেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং ধম্মপতিৰূপকেন ৱগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মপতিৰূপকেন সমগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং ধম্মপতিৰূপকেন সমগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – অধম্মেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং অধম্মেন ৱগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – অধম্মেন সমগ্গা.

৪২১. ইধ পন, ভিক্খৱে, ভিক্খু সঙ্ঘেন তজ্জনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, তজ্জনীযস্স কম্মস্স পটিপ্পস্সদ্ধিং যাচতি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, তজ্জনীযস্স কম্মস্স পটিপ্পস্সদ্ধিং যাচতি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মপতিৰূপকেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং ধম্মপতিৰূপকেন ৱগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মপতিৰূপকেন সমগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং ধম্মপতিৰূপকেন সমগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – অধম্মেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং অধম্মেন ৱগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – অধম্মেন সমগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং অধম্মেন সমগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মেন ৱগ্গা.

৪২২. ইধ পন, ভিক্খৱে, ভিক্খু সঙ্ঘেন তজ্জনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, তজ্জনীযস্স কম্মস্স পটিপ্পস্সদ্ধিং যাচতি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন তজ্জনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, তজ্জনীযস্স কম্মস্স পটিপ্পস্সদ্ধিং যাচতি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মপতিৰূপকেন সমগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং ধম্মপতিৰূপকেন সমগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – অধম্মেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং অধম্মেন ৱগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – অধম্মেন সমগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং অধম্মেন সমগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মেন ৱগ্গা. সো তম্হাপি আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন তজ্জনীযকম্মং পটিপ্পস্সদ্ধং ধম্মেন ৱগ্গেহি. হন্দস্স মযং তজ্জনীযকম্মং পটিপ্পস্সম্ভেমা’’তি. তে তস্স তজ্জনীযকম্মং পটিপ্পস্সম্ভেন্তি – ধম্মপতিৰূপকেন ৱগ্গা.

তজ্জনীযকম্মপটিপ্পস্সদ্ধিকথা নিট্ঠিতা.

২৫০. নিযস্সকম্মপটিপ্পস্সদ্ধিকথা

৪২৩. ইধ পন, ভিক্খৱে, ভিক্খু সঙ্ঘেন নিযস্সকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, নিযস্সস্স কম্মস্স পটিপ্পস্সদ্ধিং যাচতি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন নিযস্সকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, নিযস্সস্স কম্মস্স পটিপ্পস্সদ্ধিং যাচতি. হন্দস্স মযং নিযস্সকম্মং পটিপ্পস্সম্ভেমা’’তি. তে তস্স নিযস্সকম্মং পটিপ্পস্সম্ভেন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন নিযস্সকম্মং পটিপ্পস্সদ্ধং অধম্মেন ৱগ্গেহি. হন্দস্স মযং নিযস্সকম্মং পটিপ্পস্সম্ভেমা’’তি. তে তস্স নিযস্সকম্মং পটিপ্পস্সম্ভেন্তি – অধম্মেন সমগ্গা…পে… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা…পে….

চক্কং কাতব্বং.

নিযস্সকম্মপটিপ্পস্সদ্ধিকথা নিট্ঠিতা.

২৫১. পব্বাজনীযকম্মপটিপ্পস্সদ্ধিকথা

৪২৪. ইধ পন, ভিক্খৱে, ভিক্খু সঙ্ঘেন পব্বাজনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, পব্বাজনীযস্স কম্মস্স পটিপ্পস্সদ্ধিং যাচতি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন পব্বাজনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, পব্বাজনীযস্স কম্মস্স পটিপ্পস্সদ্ধিং যাচতি. হন্দস্স মযং পব্বাজনীযকম্মং পটিপ্পস্সম্ভেমা’’তি. তে তস্স পব্বাজনীযকম্মং পটিপ্পস্সম্ভেন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন পব্বাজনীযকম্মং পটিপ্পস্সদ্ধং অধম্মেন ৱগ্গেহি. হন্দস্স মযং পব্বাজনীযকম্মং পটিপ্পস্সম্ভেমা’’তি. তে তস্স পব্বাজনীযকম্মং পটিপ্পস্সম্ভেন্তি – অধম্মেন সমগ্গা…পে… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা…পে….

চক্কং কাতব্বং.

পব্বাজনীযকম্মপটিপ্পস্সদ্ধিকথা নিট্ঠিতা.

২৫২. পটিসাৰণীযকম্মপটিপ্পস্সদ্ধিকথা

৪২৫. ইধ পন, ভিক্খৱে, ভিক্খু সঙ্ঘেন পটিসাৰণীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, পটিসাৰণীযস্স কম্মস্স পটিপ্পস্সদ্ধিং যাচতি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন পটিসাৰণীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, পটিসাৰণীযস্স কম্মস্স পটিপ্পস্সদ্ধিং যাচতি. হন্দস্স মযং পটিসাৰণীযকম্মং পটিপ্পস্সম্ভেমা’’তি. তে তস্স পটিসাৰণীযকম্মং পটিপ্পস্সম্ভেন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন পটিসাৰণীযকম্মং পটিপ্পস্সদ্ধং অধম্মেন ৱগ্গেহি. হন্দস্স মযং পটিসাৰণীযকম্মং পটিপ্পস্সম্ভেমা’’তি. তে তস্স পটিসাৰণীযকম্মং পটিপ্পস্সম্ভেন্তি – অধম্মেন সমগ্গা…পে… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা…পে….

চক্কং কাতব্বং.

পটিসাৰণীযকম্মপটিপ্পস্সদ্ধিকথা নিট্ঠিতা.

২৫৩. অদস্সনে উক্খেপনীযকম্মপটিপ্পস্সদ্ধিকথা

৪২৬. ইধ পন, ভিক্খৱে, ভিক্খু সঙ্ঘেন আপত্তিযা অদস্সনে উক্খেপনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, আপত্তিযা অদস্সনে উক্খেপনীযস্স কম্মস্স পটিপ্পস্সদ্ধিং যাচতি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন আপত্তিযা অদস্সনে উক্খেপনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, আপত্তিযা অদস্সনে উক্খেপনীযস্স কম্মস্স পটিপ্পস্সদ্ধিং যাচতি. হন্দস্স মযং আপত্তিযা অদস্সনে উক্খেপনীযকম্মং পটিপ্পস্সম্ভেমা’’তি. তে তস্স আপত্তিযা অদস্সনে উক্খেপনীযকম্মং পটিপ্পস্সম্ভেন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন আপত্তিযা অদস্সনে উক্খেপনীযকম্মং পটিপ্পস্সদ্ধং অধম্মেন ৱগ্গেহি. হন্দস্স মযং আপত্তিযা অদস্সনে উক্খেপনীযকম্মং পটিপ্পস্সম্ভেমা’’তি. তে তস্স আপত্তিযা অদস্সনে উক্খেপনীযকম্মং পটিপ্পস্সম্ভেন্তি – অধম্মেন সমগ্গা…পে… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা…পে….

চক্কং কাতব্বং.

অদস্সনে উক্খেপনীযকম্মপটিপ্পস্সদ্ধিকথা নিট্ঠিতা.

২৫৪. অপ্পটিকম্মে উক্খেপনীযকম্মপটিপ্পস্সদ্ধিকথা

৪২৭. ইধ পন, ভিক্খৱে, ভিক্খু সঙ্ঘেন আপত্তিযা অপ্পটিকম্মে উক্খেপনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, আপত্তিযা অপ্পটিকম্মে উক্খেপনীযস্স কম্মস্স পটিপ্পস্সদ্ধিং যাচতি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন আপত্তিযা অপ্পটিকম্মে উক্খেপনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, আপত্তিযা অপ্পটিকম্মে উক্খেপনীযস্স কম্মস্স পটিপ্পস্সদ্ধিং যাচতি. হন্দস্স মযং আপত্তিযা অপ্পটিকম্মে উক্খেপনীযকম্মং পটিপ্পস্সম্ভেমা’’তি. তে তস্স আপত্তিযা অপ্পটিকম্মে উক্খেপনীযকম্মং পটিপ্পস্সম্ভেন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন আপত্তিযা অপ্পটিকম্মে উক্খেপনীযকম্মং পটিপ্পস্সদ্ধং – অধম্মেন ৱগ্গেহি. হন্দস্স মযং আপত্তিযা অপ্পটিকম্মে উক্খেপনীযকম্মং পটিপ্পস্সম্ভেমা’’তি. তে তস্স আপত্তিযা অপ্পটিকম্মে উক্খেপনীযকম্মং পটিপ্পস্সম্ভেন্তি – অধম্মেন সমগ্গা…পে… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা…পে….

চক্কং কাতব্বং.

অপ্পটিকম্মে উক্খেপনীযকম্মপটিপ্পস্সদ্ধিকথা নিট্ঠিতা.

২৫৫. অপ্পটিনিস্সগ্গে উক্খেপনীযকম্মপটিপ্পস্সদ্ধিকথা

৪২৮. ইধ পন, ভিক্খৱে, ভিক্খু সঙ্ঘেন পাপিকায দিট্ঠিযা অপ্পটিনিস্সগ্গে উক্খেপনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, পাপিকায দিট্ঠিযা অপ্পটিনিস্সগ্গে উক্খেপনীযস্স কম্মস্স পটিপ্পস্সদ্ধিং যাচতি. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু সঙ্ঘেন পাপিকায দিট্ঠিযা অপ্পটিনিস্সগ্গে উক্খেপনীযকম্মকতো সম্মা ৱত্ততি, লোমং পাতেতি, নেত্থাৰং ৱত্ততি, পাপিকায দিট্ঠিযা অপ্পটিনিস্সগ্গে উক্খেপনীযস্স কম্মস্স পটিপ্পস্সদ্ধিং যাচতি. হন্দস্স মযং পাপিকায দিট্ঠিযা অপ্পটিনিস্সগ্গে উক্খেপনীযকম্মং পটিপ্পস্সম্ভেমা’’তি. তে তস্স পাপিকায দিট্ঠিযা অপ্পটিনিস্সগ্গে উক্খেপনীযকম্মং পটিপ্পস্সম্ভেন্তি – অধম্মেন ৱগ্গা. সো তম্হা আৱাসা অঞ্ঞং আৱাসং গচ্ছতি. তত্থপি ভিক্খূনং এৱং হোতি – ‘‘ইমস্স খো, আৱুসো, ভিক্খুনো সঙ্ঘেন পাপিকায দিট্ঠিযা অপ্পটিনিস্সগ্গে উক্খেপনীযকম্মং পটিপ্পস্সদ্ধং – অধম্মেন ৱগ্গেহি. হন্দস্স মযং পাপিকায দিট্ঠিযা অপ্পটিনিস্সগ্গে উক্খেপনীযকম্মং পটিপ্পস্সম্ভেমা’’তি. তে তস্স পাপিকায দিট্ঠিযা অপ্পটিনিস্সগ্গে উক্খেপনীযকম্মং পটিপ্পস্সম্ভেন্তি… অধম্মেন সমগ্গা…পে… ধম্মেন ৱগ্গা… ধম্মপতিৰূপকেন ৱগ্গা… ধম্মপতিৰূপকেন সমগ্গা…পে….

চক্কং কাতব্বং.

অপ্পটিনিস্সগ্গে উক্খেপনীযকম্মপটিপ্পস্সদ্ধিকথা নিট্ঠিতা.

২৫৬. তজ্জনীযকম্মৱিৱাদকথা

৪২৯. ইধ পন, ভিক্খৱে, ভিক্খু ভণ্ডনকাৰকো হোতি কলহকাৰকো ৱিৱাদকাৰকো ভস্সকাৰকো সঙ্ঘে অধিকৰণকাৰকো. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু ভণ্ডনকাৰকো…পে… সঙ্ঘে অধিকৰণকাৰকো. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – অধম্মেন ৱগ্গা. তত্ৰট্ঠো সঙ্ঘো ৱিৱদতি – ‘‘অধম্মেন ৱগ্গকম্মং, অধম্মেন সমগ্গকম্মং, ধম্মেন ৱগ্গকম্মং, ধম্মপতিৰূপকেন ৱগ্গকম্মং, ধম্মপতিৰূপকেন সমগ্গকম্মং, অকতং কম্মং দুক্কটং কম্মং পুন কাতব্বং কম্ম’’ন্তি. তত্ৰ, ভিক্খৱে, যে তে ভিক্খূ এৱমাহংসু – ‘‘অধম্মেন ৱগ্গকম্ম’’ন্তি, যে চ তে ভিক্খূ এৱমাহংসু – ‘‘অকতং কম্মং দুক্কটং কম্মং পুন কাতব্বং কম্ম’’ন্তি, ইমে তত্থ ভিক্খূ ধম্মৱাদিনো.

৪৩০. ইধ পন, ভিক্খৱে, ভিক্খু ভণ্ডনকাৰকো হোতি…পে… সঙ্ঘে অধিকৰণকাৰকো. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু ভণ্ডনকাৰকো…পে… সঙ্ঘে অধিকৰণকাৰকো. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – অধম্মেন সমগ্গা. তত্ৰট্ঠো সঙ্ঘো ৱিৱদতি – ‘‘অধম্মেন ৱগ্গকম্মং, অধম্মেন সমগ্গকম্মং, ধম্মেন ৱগ্গকম্মং, ধম্মপতিৰূপকেন ৱগ্গকম্মং, ধম্মপতিৰূপকেন সমগ্গকম্মং, অকতং কম্মং দুক্কটং কম্মং পুন কাতব্বং কম্ম’’ন্তি. তত্ৰ, ভিক্খৱে, যে তে ভিক্খূ এৱমাহংসু – ‘‘অধম্মেন সমগ্গকম্ম’’ন্তি, যে চ তে ভিক্খূ এৱমাহংসু – ‘‘অকতং কম্মং দুক্কটং কম্মং পুন কাতব্বং কম্ম’’ন্তি, ইমে তত্থ ভিক্খূ ধম্মৱাদিনো.

৪৩১. ইধ পন, ভিক্খৱে, ভিক্খু ভণ্ডনকাৰকো হোতি…পে… সঙ্ঘে অধিকৰণকাৰকো. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু ভণ্ডনকাৰকো…পে… সঙ্ঘে অধিকৰণকাৰকো হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মেন ৱগ্গা. তত্ৰট্ঠো সঙ্ঘো ৱিৱদতি – ‘‘অধম্মেন ৱগ্গকম্মং, অধম্মেন সমগ্গকম্মং, ধম্মেন ৱগ্গকম্মং, ধম্মপতিৰূপকেন ৱগ্গকম্মং, ধম্মপতিৰূপকেন সমগ্গকম্মং, অকতং কম্মং দুক্কটং কম্মং পুন কাতব্বং কম্ম’’ন্তি. তত্ৰ, ভিক্খৱে, যে তে ভিক্খূ এৱমাহংসু – ‘‘ধম্মেন ৱগ্গকম্ম’’ন্তি, যে চ তে ভিক্খূ এৱমাহংসু – ‘‘অকতং কম্মং দুক্কটং কম্মং পুন কাতব্বং কম্ম’’ন্তি, ইমে তত্থ ভিক্খূ ধম্মৱাদিনো.

৪৩২. ইধ পন, ভিক্খৱে, ভিক্খু ভণ্ডনকাৰকো হোতি…পে… সঙ্ঘে অধিকৰণকাৰকো. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু ভণ্ডনকাৰকো…পে… সঙ্ঘে অধিকৰণকাৰকো. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মপতিৰূপকেন ৱগ্গা. তত্ৰট্ঠো সঙ্ঘো ৱিৱদতি – ‘‘অধম্মেন ৱগ্গকম্মং, অধম্মেন সমগ্গকম্মং, ধম্মেন ৱগ্গকম্মং, ধম্মপতিৰূপকেন ৱগ্গকম্মং, ধম্মপতিৰূপকেন সমগ্গকম্মং, অকতং কম্মং দুক্কটং কম্মং পুন কাতব্বং কম্ম’’ন্তি. তত্ৰ, ভিক্খৱে, যে তে ভিক্খূ এৱমাহংসু – ‘‘ধম্মপতিৰূপকেন সমগ্গকম্ম’’ন্তি, যে চ তে ভিক্খূ এৱমাহংসু – ‘‘অকতং কম্মং দুক্কটং কম্মং পুন কাতব্বং কম্ম’’ন্তি, ইমে তত্থ ভিক্খূ ধম্মৱাদিনো.

৪৩৩. ইধ পন, ভিক্খৱে, ভিক্খু ভণ্ডনকাৰকো হোতি…পে… সঙ্ঘে অধিকৰণকাৰকো. তত্ৰ চে ভিক্খূনং এৱং হোতি – ‘‘অযং খো, আৱুসো, ভিক্খু ভণ্ডনকাৰকো হোতি…পে… সঙ্ঘে অধিকৰণকাৰকো. হন্দস্স মযং তজ্জনীযকম্মং কৰোমা’’তি. তে তস্স তজ্জনীযকম্মং কৰোন্তি – ধম্মপতিৰূপকেন সমগ্গা. তত্ৰট্ঠো সঙ্ঘো ৱিৱদতি – ‘‘অধম্মেন ৱগ্গকম্মং, অধম্মেন সমগ্গকম্মং, ধম্মেন ৱগ্গকম্মং, ধম্মপতিৰূপকেন ৱগ্গকম্মং, ধম্মপতিৰূপকেন সমগ্গকম্মং, অকতং কম্মং দুক্কটং কম্মং পুন কাতব্বং কম্ম’’ন্তি. তত্ৰ, ভিক্খৱে, যে তে ভিক্খূ এৱমাহংসু – ‘‘ধম্মপতিৰূপকেন সমগ্গকম্ম’’ন্তি, যে চ তে ভিক্খূ এৱমাহংসু – ‘‘অকতং কম্মং দুক্কটং কম্মং পুন কাতব্বং কম্ম’’ন্তি, ইমে তত্থ ভিক্খূ ধম্মৱাদিনো.

তজ্জনীযকম্মৱিৱাদকথা নিট্ঠিতা.

২৫৭. নিযস্সকম্মৱিৱাদকথা