২৩৮. পাৰিৱাসিকাদিকথা

৩৯৩. পাৰিৱাসিকচতুত্থো চে, ভিক্খৱে, পৰিৱাসং দদেয্য, মূলায পটিকস্সেয্য, মানত্তং দদেয্য, তংৱীসো অব্ভেয্য – অকম্মং ন চ কৰণীযং. মূলায পটিকস্সনাৰহচতুত্থো চে, ভিক্খৱে, পৰিৱাসং দদেয্য, মূলায পটিকস্সেয্য, মানত্তং দদেয্য, তংৱীসো অব্ভেয্য – অকম্মং ন চ কৰণীযং. মানত্তাৰহচতুত্থো চে, ভিক্খৱে, পৰিৱাসং দদেয্য, মূলায পটিকস্সেয্য, মানত্তং দদেয্য, তংৱীসো অব্ভেয্য – অকম্মং ন চ কৰণীযং. মানত্তচাৰিকচতুত্থো চে, ভিক্খৱে, পৰিৱাসং দদেয্য, মূলায পটিকস্সেয্য, মানত্তং দদেয্য, তংৱীসো অব্ভেয্য – অকম্মং ন চ কৰণীযং. অব্ভানাৰহচতুত্থো চে, ভিক্খৱে, পৰিৱাসং দদেয্য, মূলায পটিকস্সেয্য, মানত্তং দদেয্য, তংৱীসো অব্ভেয্য – অকম্মং ন চ কৰণীযং.

৩৯৪. একচ্চস্স, ভিক্খৱে, সঙ্ঘমজ্ঝে পটিক্কোসনা ৰুহতি, একচ্চস্স ন ৰুহতি. কস্স চ, ভিক্খৱে, সঙ্ঘমজ্ঝে পটিক্কোসনা ন ৰুহতি? ভিক্খুনিযা, ভিক্খৱে, সঙ্ঘমজ্ঝে পটিক্কোসনা ন ৰুহতি. সিক্খমানায, ভিক্খৱে…পে… সামণেৰস্স, ভিক্খৱে… সামণেৰিযা, ভিক্খৱে… সিক্খাপচ্চক্খাতকস্স ভিক্খৱে… অন্তিমৱত্থুং অজ্ঝাপন্নকস্স, ভিক্খৱে … উম্মত্তকস্স, ভিক্খৱে… খিত্তচিত্তস্স, ভিক্খৱে… ৱেদনাট্টস্স, ভিক্খৱে… আপত্তিযা অদস্সনে উক্খিত্তকস্স, ভিক্খৱে… আপত্তিযা অপ্পটিকম্মে উক্খিত্তকস্স, ভিক্খৱে… পাপিকায দিট্ঠিযা অপ্পটিনিস্সগ্গে উক্খিত্তকস্স, ভিক্খৱে… পণ্ডকস্স, ভিক্খৱে… থেয্যসংৱাসকস্স, ভিক্খৱে… তিত্থিযপক্কন্তকস্স, ভিক্খৱে … তিৰচ্ছানগতস্স ভিক্খৱে… মাতুঘাতকস্স, ভিক্খৱে… পিতুঘাতকস্স, ভিক্খৱে… অৰহন্তঘাতকস্স, ভিক্খৱে… ভিক্খুনিদূসকস্স, ভিক্খৱে… সঙ্ঘভেদকস্স, ভিক্খৱে… লোহিতুপ্পাদকস্স, ভিক্খৱে… উভতোব্যঞ্জনকস্স, ভিক্খৱে… নানাসংৱাসকস্স, ভিক্খৱে… নানাসীমায ঠিতস্স, ভিক্খৱে… ইদ্ধিযা ৱেহাসে ঠিতস্স, ভিক্খৱে, যস্স সঙ্ঘো কম্মং কৰোতি, তস্স চ [তস্স (স্যা.)], ভিক্খৱে, সঙ্ঘমজ্ঝে পটিক্কোসনা ন ৰুহতি. ইমেসং খো, ভিক্খৱে, সঙ্ঘমজ্ঝে পটিক্কোসনা ন ৰুহতি.

কস্স চ, ভিক্খৱে, সঙ্ঘমজ্ঝে পটিক্কোসনা ৰুহতি? ভিক্খুস্স, ভিক্খৱে, পকতত্তস্স

সমানসংৱাসকস্স সমানসীমায ঠিতস্স অন্তমসো আনন্তৰিকস্সাপি [অনন্তৰিকস্সাপি (স্যা.)] ভিক্খুনো ৱিঞ্ঞাপেন্তস্স সঙ্ঘমজ্ঝে পটিক্কোসনা ৰুহতি. ইমস্স খো, ভিক্খৱে, সঙ্ঘমজ্ঝে পটিক্কোসনা ৰুহতি.

পাৰিৱাসিকাদিকথা নিট্ঠিতা.