২৩৯. দ্ৱেনিস্সাৰণাদিকথা

৩৯৫. দ্ৱেমা, ভিক্খৱে, নিস্সাৰণা. অত্থি, ভিক্খৱে, পুগ্গলো অপ্পত্তো নিস্সাৰণং. তঞ্চে সঙ্ঘো নিস্সাৰেতি, একচ্চো সুনিস্সাৰিতো, একচ্চো দুন্নিস্সাৰিতো. কতমো চ, ভিক্খৱে, পুগ্গলো অপ্পত্তো নিস্সাৰণং, তঞ্চে সঙ্ঘো নিস্সাৰেতি – দুন্নিস্সাৰিতো? ইধ পন, ভিক্খৱে, ভিক্খু সুদ্ধো হোতি অনাপত্তিকো. তঞ্চে সঙ্ঘো নিস্সাৰেতি – দুন্নিস্সাৰিতো. অযং ৱুচ্চতি, ভিক্খৱে, পুগ্গলো অপ্পত্তো নিস্সাৰণং, তঞ্চে সঙ্ঘো নিস্সাৰেতি – দুন্নিস্সাৰিতো.

কতমো চ, ভিক্খৱে, পুগ্গলো অপ্পত্তো নিস্সাৰণং, তঞ্চে সঙ্ঘো নিস্সাৰেতি – সুনিস্সাৰিতো? ইধ পন, ভিক্খৱে, ভিক্খু বালো হোতি অব্যত্তো আপত্তিবহুলো অনপদানো, গিহিসংসট্ঠো ৱিহৰতি অননুলোমিকেহি গিহিসংসগ্গেহি, তঞ্চে সঙ্ঘো নিস্সাৰেতি – সুনিস্সাৰিতো. অযং ৱুচ্চতি, ভিক্খৱে, পুগ্গলো অপ্পত্তো নিস্সাৰণং, তঞ্চে সঙ্ঘো নিস্সাৰেতি – সুনিস্সাৰিতো.

৩৯৬. দ্ৱেমা, ভিক্খৱে, ওসাৰণা. অত্থি, ভিক্খৱে, পুগ্গলো অপ্পত্তো ওসাৰণং তঞ্চে সঙ্ঘো ওসাৰেতি, একচ্চো সোসাৰিতো, একচ্চো দোসাৰিতো. কতমো চ, ভিক্খৱে, পুগ্গলো অপ্পত্তো ওসাৰণং, তঞ্চে সঙ্ঘো ওসাৰেতি – দোসাৰিতো? পণ্ডকো, ভিক্খৱে, অপ্পত্তো ওসাৰণং, তঞ্চে সঙ্ঘো ওসাৰেতি – দোসাৰিতো. থেয্যসংৱাসকো, ভিক্খৱে, অপ্পত্তো ওসাৰণং, তঞ্চে সঙ্ঘো ওসাৰেতি – দোসাৰিতো. তিত্থিযপক্কন্তকো, ভিক্খৱে…পে… তিৰচ্ছানগতো, ভিক্খৱে… মাতুঘাতকো, ভিক্খৱে… পিতুঘাতকো, ভিক্খৱে… অৰহন্তঘাতকো, ভিক্খৱে… ভিক্খুনিদূসকো, ভিক্খৱে… সঙ্ঘভেদকো, ভিক্খৱে… লোহিতুপ্পাদকো, ভিক্খৱে… উভতোব্যঞ্জনকো, ভিক্খৱে, অপ্পত্তো, ওসাৰণং, তঞ্চে সঙ্ঘো ওসাৰেতি – দোসাৰিতো. অযং ৱুচ্চতি, ভিক্খৱে, পুগ্গলো অপ্পত্তো ওসাৰণং, তঞ্চে সঙ্ঘো ওসাৰেতি – দোসাৰিতো. ইমে ৱুচ্চন্তি, ভিক্খৱে, পুগ্গলা অপ্পত্তা ওসাৰণং, তে চে সঙ্ঘো ওসাৰেতি – দোসাৰিতা.

কতমো চ, ভিক্খৱে, পুগ্গলো অপ্পত্তো ওসাৰণং, তঞ্চে সঙ্ঘো ওসাৰেতি – সোসাৰিতো? হত্থচ্ছিন্নো, ভিক্খৱে, অপ্পত্তো ওসাৰণং, তঞ্চে সঙ্ঘো ওসাৰেতি, সোসাৰিতো. পাদচ্ছিন্নো, ভিক্খৱে…পে… হত্থপাদচ্ছিন্নো, ভিক্খৱে… কণ্ণচ্ছিন্নো, ভিক্খৱে… নাসচ্ছিন্নো, ভিক্খৱে… কণ্ণনাসচ্ছিন্নো, ভিক্খৱে… অঙ্গুলিচ্ছিন্নো, ভিক্খৱে… অড়চ্ছিন্নো, ভিক্খৱে… কণ্ডৰচ্ছিন্নো, ভিক্খৱে… ফণহত্থকো, ভিক্খৱে… খুজ্জো, ভিক্খৱে… ৱামনো, ভিক্খৱে… গলগণ্ডী, ভিক্খৱে… লক্খণাহতো, ভিক্খৱে… কসাহতো, ভিক্খৱে… লিখিতকো, ভিক্খৱে… সীপদিকো, ভিক্খৱে… পাপৰোগী, ভিক্খৱে… পৰিসদূসকো, ভিক্খৱে… কাণো, ভিক্খৱে… কুণী, ভিক্খৱে… খঞ্জো, ভিক্খৱে… পক্খহতো, ভিক্খৱে… ছিন্নিৰিযাপথো, ভিক্খৱে… জৰাদুব্বলো, ভিক্খৱে… অন্ধো, ভিক্খৱে… মূগো, ভিক্খৱে… বধিৰো, ভিক্খৱে… অন্ধমূগো, ভিক্খৱে… অন্ধবধিৰো, ভিক্খৱে… মূগবধিৰো, ভিক্খৱে… অন্ধমূগবধিৰো, ভিক্খৱে, অপ্পত্তো ওসাৰণং, তঞ্চে সঙ্ঘো ওসাৰেতি – সোসাৰিতো. অযং ৱুচ্চতি, ভিক্খৱে, পুগ্গলো অপ্পত্তো ওসাৰণং, তঞ্চে সঙ্ঘো ওসাৰেতি – সোসাৰিতো. ইমে ৱুচ্চন্তি, ভিক্খৱে, পুগ্গলা অপ্পত্তা ওসাৰণং, তে চে সঙ্ঘো ওসাৰেতি – সোসাৰিতা.

দ্ৱেনিস্সাৰণাদিকথা নিট্ঠিতা.

ৱাসভগামভাণৱাৰো নিট্ঠিতো পঠমো.