২৩২. অট্ঠচীৱৰমাতিকা

৩৭৯. অট্ঠিমা, ভিক্খৱে, মাতিকা চীৱৰস্স উপ্পাদায – সীমায দেতি, কতিকায দেতি, ভিক্খাপঞ্ঞত্তিযা দেতি, সঙ্ঘস্স দেতি, উভতোসঙ্ঘস্স দেতি, ৱস্সংৱুট্ঠসঙ্ঘস্স দেতি, আদিস্স দেতি, পুগ্গলস্স দেতি.

সীমায দেতি – যাৱতিকা ভিক্খূ অন্তোসীমগতা তেহি ভাজেতব্বং. কতিকায দেতি – সম্বহুলা আৱাসা সমানলাভা হোন্তি একস্মিং আৱাসে দিন্নে সব্বত্থ দিন্নং হোতি. ভিক্খাপঞ্ঞত্তিযা দেতি, যত্থ সঙ্ঘস্স ধুৱকাৰা কৰিয্যন্তি, তত্থ দেতি. সঙ্ঘস্স দেতি, সম্মুখীভূতেন সঙ্ঘেন ভাজেতব্বং. উভতোসঙ্ঘস্স দেতি, বহুকাপি ভিক্খূ হোন্তি, একা ভিক্খুনী হোতি, উপড্ঢং দাতব্বং, বহুকাপি ভিক্খুনিযো হোন্তি, একো ভিক্খু হোতি, উপড্ঢং দাতব্বং. ৱস্সংৱুট্ঠসঙ্ঘস্স দেতি, যাৱতিকা ভিক্খূ তস্মিং আৱাসে ৱস্সংৱুট্ঠা, তেহি ভাজেতব্বং. আদিস্স দেতি, যাগুযা ৱা ভত্তে ৱা খাদনীযে ৱা চীৱৰে ৱা সেনাসনে ৱা ভেসজ্জে ৱা. পুগ্গলস্স দেতি, ‘‘ইমং চীৱৰং ইত্থন্নামস্স দম্মী’’তি.

অট্ঠচীৱৰমাতিকা নিট্ঠিতা.

চীৱৰক্খন্ধকো অট্ঠমো.