২৩১. দুগ্গহিতসুগ্গহিতাদিকথা

৩৭৭. তেন খো পন সমযেন আযস্মা ৰেৱতো অঞ্ঞতৰস্স ভিক্খুনো হত্থে আযস্মতো সাৰিপুত্তস্স চীৱৰং পাহেসি – ‘‘ইমং চীৱৰং থেৰস্স দেহী’’তি. অথ খো সো ভিক্খু অন্তৰামগ্গে আযস্মতো ৰেৱতস্স ৱিস্সাসা তং চীৱৰং অগ্গহেসি. অথ খো আযস্মা ৰেৱতো আযস্মতা সাৰিপুত্তেন সমাগন্ত্ৱা পুচ্ছি – ‘‘অহং, ভন্তে, থেৰস্স চীৱৰং পাহেসিং. সম্পত্তং তং চীৱৰ’’ন্তি? ‘‘নাহং তং, আৱুসো, চীৱৰং পস্সামী’’তি. অথ খো আযস্মা ৰেৱতো তং ভিক্খুং এতদৱোচ – ‘‘অহং, আৱুসো, আযস্মতো হত্থে থেৰস্স চীৱৰং পাহেসিং. কহং তং চীৱৰ’’ন্তি? ‘‘অহং, ভন্তে, আযস্মতো ৱিস্সাসা তং চীৱৰং অগ্গহেসি’’ন্তি. ভগৱতো এতমত্থং আৰোচেসুং.

৩৭৮. ইধ পন, ভিক্খৱে, ভিক্খু ভিক্খুস্স হত্থে চীৱৰং পহিণতি – ‘‘ইমং চীৱৰং ইত্থন্নামস্স দেহী’’তি. সো অন্তৰামগ্গে যো পহিণতি তস্স ৱিস্সাসা গণ্হাতি. সুগ্গহিতং. যস্স পহিয্যতি তস্স ৱিস্সাসা গণ্হাতি. দুগ্গহিতং.

ইধ পন, ভিক্খৱে, ভিক্খু ভিক্খুস্স হত্থে চীৱৰং পহিণতি – ‘‘ইমং চীৱৰং ইত্থন্নামস্স দেহী’’তি. সো অন্তৰামগ্গে যস্স পহিয্যতি তস্স ৱিস্সাসা গণ্হাতি. দুগ্গহিতং. যো পহিণতি তস্স ৱিস্সাসা গণ্হাতি. সুগ্গহিতং.

ইধ পন, ভিক্খৱে, ভিক্খু ভিক্খুস্স হত্থে চীৱৰং পহিণতি – ‘‘ইমং চীৱৰং ইত্থন্নামস্স দেহী’’তি. সো অন্তৰামগ্গে সুণাতি – যো পহিণতি সো কালঙ্কতোতি. তস্স মতকচীৱৰং অধিট্ঠাতি. স্ৱাধিট্ঠিতং. যস্স পহিয্যতি তস্স ৱিস্সাসা গণ্হাতি. দুগ্গহিতং.

ইধ পন, ভিক্খৱে, ভিক্খু ভিক্খুস্স হত্থে চীৱৰং পহিণতি – ‘‘ইমং চীৱৰং ইত্থন্নামস্স দেহী’’তি. সো অন্তৰামগ্গে সুণাতি – যস্স পহিয্যতি সো কালঙ্কতোতি. তস্স মতকচীৱৰং অধিট্ঠাতি. দ্ৱাধিট্ঠিতং. যো পহিণতি তস্স ৱিস্সাসা গণ্হাতি. সুগ্গহিতং.

ইধ পন, ভিক্খৱে, ভিক্খু ভিক্খুস্স হত্থে চীৱৰং পহিণতি – ‘‘ইমং চীৱৰং ইত্থন্নামস্স দেহী’’তি. সো অন্তৰামগ্গে সুণাতি – উভো কালঙ্কতাতি. যো পহিণতি তস্স মতকচীৱৰং অধিট্ঠাতি. স্ৱাধিট্ঠিতং. যস্স পহিয্যতি তস্স মতকচীৱৰং অধিট্ঠাতি. দ্ৱাধিট্ঠিতং.

ইধ পন, ভিক্খৱে, ভিক্খু ভিক্খুস্স হত্থে চীৱৰং পহিণতি – ‘‘ইমং চীৱৰং ইত্থন্নামস্স দম্মী’’তি. সো অন্তৰামগ্গে যো পহিণতি তস্স ৱিস্সাসা গণ্হাতি. দুগ্গহিতং. যস্স পহিয্যতি তস্স ৱিস্সাসা গণ্হাতি. সুগ্গহিতং.

ইধ পন, ভিক্খৱে, ভিক্খু ভিক্খুস্স হত্থে চীৱৰং পহিণতি – ‘‘ইমং চীৱৰং ইত্থন্নামস্স দম্মী’’তি. সো অন্তৰামগ্গে যস্স পহিয্যতি তস্স ৱিস্সাসা গণ্হাতি. সুগ্গহিতং. যো পহিণতি তস্স ৱিস্সাসা গণ্হাতি. দুগ্গহিতং.

ইধ পন, ভিক্খৱে, ভিক্খু ভিক্খুস্স হত্থে চীৱৰং পহিণতি – ‘‘ইমং চীৱৰং ইত্থন্নামস্স দম্মী’’তি. সো অন্তৰামগ্গে সুণাতি – ‘‘যো পহিণতি সো কালঙ্কতো’’তি. তস্স মতকচীৱৰং অধিট্ঠাতি. দ্ৱাধিট্ঠিতং. যস্স পহিয্যতি তস্স ৱিস্সাসা গণ্হাতি. সুগ্গহিতং.

ইধ পন, ভিক্খৱে, ভিক্খু ভিক্খুস্স হত্থে চীৱৰং পহিণতি – ‘‘ইমং চীৱৰং ইত্থন্নামস্স দম্মী’’তি. সো অন্তৰামগ্গে সুণাতি – ‘‘যস্স পহিয্যতি সো কালঙ্কতো’’তি. তস্স মতকচীৱৰং অধিট্ঠাতি. স্ৱাধিট্ঠিতং. যো পহিণতি তস্স ৱিস্সাসা গণ্হাতি. দুগ্গহিতং.

ইধ পন, ভিক্খৱে, ভিক্খু ভিক্খুস্স হত্থে চীৱৰং পহিণতি – ‘‘ইমং চীৱৰং ইত্থন্নামস্স দম্মী’’তি. সো অন্তৰামগ্গে সুণাতি ‘‘উভো কালঙ্কতা’’তি. যো পহিণতি তস্স মতকচীৱৰং অধিট্ঠাতি. দ্ৱাধিট্ঠিতং. যস্স পহিয্যতি তস্স মতকচীৱৰং অধিট্ঠাতি. স্ৱাধিট্ঠিতং.

দুগ্গহিতসুগ্গহিতাদিকথা নিট্ঠিতা.