২২৯. ৱস্সংৱুট্ঠানং অনুপ্পন্নচীৱৰকথা

৩৭৩. তেন খো পন সমযেন ৱস্সংৱুট্ঠা ভিক্খূ অনুপ্পন্নে চীৱৰে পক্কমন্তিপি, ৱিব্ভমন্তিপি, কালম্পি কৰোন্তি, সামণেৰাপি পটিজানন্তি, সিক্খং পচ্চক্খাতকাপি পটিজানন্তি, অন্তিমৱত্থুং অজ্ঝাপন্নকাপি পটিজানন্তি, উম্মত্তকাপি পটিজানন্তি, খিত্তচিত্তাপি পটিজানন্তি, ৱেদনাট্টাপি পটিজানন্তি, আপত্তিযা অদস্সনে উক্খিত্তকাপি পটিজানন্তি, আপত্তিযা অপ্পটিকম্মে উক্খিত্তকাপি পটিজানন্তি, পাপিকায দিট্ঠিযা অপ্পটিনিস্সগ্গে উক্খিত্তকাপি পটিজানন্তি, পণ্ডকাপি পটিজানন্তি, থেয্যসংৱাসকাপি পটিজানন্তি, তিত্থিযপক্কন্তকাপি পটিজানন্তি, তিৰচ্ছানগতাপি পটিজানন্তি, মাতুঘাতকাপি পটিজানন্তি, পিতুঘাতকাপি পটিজানন্তি, অৰহন্তঘাতকাপি পটিজানন্তি, ভিক্খুনিদূসকাপি পটিজানন্তি, সঙ্ঘভেদকাপি পটিজানন্তি, লোহিতুপ্পাদকাপি পটিজানন্তি, উভতোব্যঞ্জনকাপি পটিজানন্তি. ভগৱতো এতমত্থং আৰোচেসুং.

৩৭৪. ইধ পন, ভিক্খৱে, ৱস্সংৱুট্ঠো ভিক্খু অনুপ্পন্নে চীৱৰে পক্কমতি, সন্তে পতিৰূপে গাহকে দাতব্বং.

ইধ পন, ভিক্খৱে, ৱস্সংৱুট্ঠো ভিক্খু অনুপ্পন্নে চীৱৰে ৱিব্ভমতি, কালং কৰোতি, সামণেৰো পটিজানাতি, সিক্খং পচ্চক্খাতকো পটিজানাতি, অন্তিমৱত্থুং অজ্ঝাপন্নকো পটিজানাতি, সঙ্ঘো সামী.

ইধ পন, ভিক্খৱে, ৱস্সংৱুট্ঠো ভিক্খু অনুপ্পন্নে চীৱৰে উম্মত্তকো পটিজানাতি, খিত্তচিত্তো পটিজানাতি, ৱেদনাট্টো পটিজানাতি, আপত্তিযা অদস্সনে উক্খিত্তকো পটিজানাতি, আপত্তিযা অপ্পটিকম্মে উক্খিত্তকো পটিজানাতি, পাপিকায দিট্ঠিযা অপ্পটিনিস্সগ্গে উক্খিত্তকো পটিজানাতি, সন্তে পতিৰূপে গাহকে দাতব্বং.

ইধ পন, ভিক্খৱে, ৱস্সংৱুট্ঠো ভিক্খু অনুপ্পন্নে চীৱৰে পণ্ডকো পটিজানাতি, থেয্যসংৱাসকো পটিজানাতি, তিত্থিযপক্কন্তকো পটিজানাতি, তিৰচ্ছানগতো পটিজানাতি, মাতুঘাতকো পটিজানাতি, পিতুঘাতকো পটিজানাতি, অৰহন্তঘাতকো পটিজানাতি, ভিক্খুনিদূসকো পটিজানাতি, সঙ্ঘভেদকো পটিজানাতি, লোহিতুপ্পাদকো পটিজানাতি, উভতোব্যঞ্জনকো পটিজানাতি, সঙ্ঘো সামী.

৩৭৫. ইধ পন, ভিক্খৱে, ৱস্সংৱুট্ঠো ভিক্খু উপ্পন্নে চীৱৰে অভাজিতে পক্কমতি, সন্তে পতিৰূপে গাহকে দাতব্বং.

ইধ পন, ভিক্খৱে, ৱস্সংৱুট্ঠো ভিক্খু উপ্পন্নে চীৱৰে অভাজিতে ৱিব্ভমতি, কালং কৰোতি, সামণেৰো পটিজানাতি, সিক্খং পচ্চক্খাতকো পটিজানাতি, অন্তিমৱত্থুং অজ্ঝাপন্নকো পটিজানাতি, সঙ্ঘো সামী.

ইধ পন, ভিক্খৱে, ৱস্সংৱুট্ঠো ভিক্খু উপ্পন্নে চীৱৰে অভাজিতে উম্মত্তকো পটিজানাতি. খিত্তচিত্তো পটিজানাতি, ৱেদনাট্টো পটিজানাতি, আপত্তিযা অদস্সনে উক্খিত্তকো পটিজানাতি, আপত্তিযা অপ্পটিকম্মে উক্খিত্তকো পটিজানাতি, পাপিকায দিট্ঠিযা অপ্পটিনিস্সগ্গে উক্খিত্তকো পটিজানাতি, সন্তে পতিৰূপে গাহকে দাতব্বং.

ইধ পন, ভিক্খৱে, ৱস্সংৱুট্ঠো ভিক্খু উপ্পন্নে চীৱৰে অভাজিতে পণ্ডকো পটিজানাতি, থেয্যসংৱাসকো পটিজানাতি, তিত্থিযপক্কন্তকো পটিজানাতি, তিৰচ্ছানগতো পটিজানাতি, মাতুঘাতকো পটিজানাতি, পিতুঘাতকো পটিজানাতি, অৰহন্তঘাতকো পটিজানাতি, ভিক্খুনিদূসকো পটিজানাতি, সঙ্ঘভেদকো পটিজানাতি, লোহিতুপ্পাদকো পটিজানাতি, উভতোব্যঞ্জনকো পটিজানাতি, সঙ্ঘো সামী.

ৱস্সং ৱুট্ঠানং অনুপ্পন্নচীৱৰকথা নিট্ঠিতা.