২২৮. সব্বনীলকাদিপটিক্খেপকথা

৩৭২. তেন খো পন সমযেন ছব্বগ্গিযা ভিক্খূ সব্বনীলকানি চীৱৰানি ধাৰেন্তি…পে… সব্বপীতকানি চীৱৰানি ধাৰেন্তি…পে… সব্বলোহিতকানি চীৱৰানি ধাৰেন্তি…পে… সব্বমঞ্জিট্ঠকানি [সব্বমঞ্জেট্ঠকানি (সী. স্যা.)] চীৱৰানি ধাৰেন্তি…পে… সব্বকণ্হানি চীৱৰানি ধাৰেন্তি …পে… সব্বমহাৰঙ্গৰত্তানি চীৱৰানি ধাৰেন্তি…পে… সব্বমহানামৰত্তানি চীৱৰানি ধাৰেন্তি…পে… অচ্ছিন্নদসানি চীৱৰানি ধাৰেন্তি…পে… দীঘদসানি চীৱৰানি ধাৰেন্তি…পে… পুপ্ফদসানি চীৱৰানি ধাৰেন্তি…পে… ফণদসানি [ফলদসানি (ক.)] চীৱৰানি ধাৰেন্তি…পে… কঞ্চুকং ধাৰেন্তি…পে… তিৰীটকং ধাৰেন্তি…পে… ৱেঠনং ধাৰেন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা ৱেঠনং ধাৰেস্সন্তি, সেয্যথাপি গিহী কামভোগিনো’’তি. ভগৱতো এতমত্থং আৰোচেসুং. ন, ভিক্খৱে, সব্বনীলকানি চীৱৰানি ধাৰেতব্বানি, ন সব্বপীতকানি চীৱৰানি ধাৰেতব্বানি, ন সব্বলোহিতকানি চীৱৰানি ধাৰেতব্বানি, ন সব্বমঞ্জিট্ঠকানি চীৱৰানি ধাৰেতব্বানি, ন সব্বকণ্হানি চীৱৰানি ধাৰেতব্বানি, ন সব্বমহাৰঙ্গৰত্তানি চীৱৰানি ধাৰেতব্বানি, ন সব্বমহানামৰত্তানি চীৱৰানি ধাৰেতব্বানি, ন অচ্ছিন্নদসানি চীৱৰানি ধাৰেতব্বানি, ন দীঘদসানি চীৱৰানি ধাৰেতব্বানি, ন পুপ্ফদসানি চীৱৰানি ধাৰেতব্বানি, ন ফণদসানি চীৱৰানি ধাৰেতব্বানি, ন কঞ্চুকং ধাৰেতব্বং, ন তিৰীটকং ধাৰেতব্বং, ন ৱেঠনং ধাৰেতব্বং. যো ধাৰেয্য, আপত্তি দুক্কটস্সাতি.

সব্বনীলকাদিপটিক্খেপকথা নিট্ঠিতা.