২২৭. কুসচীৰাদিপটিক্খেপকথা

৩৭১. তেন খো পন সমযেন অঞ্ঞতৰো ভিক্খু কুসচীৰং নিৱাসেত্ৱা…পে… ৱাকচীৰং নিৱাসেত্ৱা…পে… ফলকচীৰং নিৱাসেত্ৱা…পে… কেসকম্বলং নিৱাসেত্ৱা…পে… ৱাড়কম্বলং নিৱাসেত্ৱা…পে… উলূকপক্খং নিৱাসেত্ৱা…পে… অজিনক্খিপং নিৱাসেত্ৱা যেন ভগৱা তেনুপসঙ্কমি; উপসঙ্কমিত্ৱা ভগৱন্তং এতদৱোচ – ‘‘ভগৱা, ভন্তে, অনেকপৰিযাযেন অপ্পিচ্ছস্স সন্তুট্ঠস্স সল্লেখস্স ধুতস্স পাসাদিকস্স অপচযস্স ৱীৰিযাৰম্ভস্স ৱণ্ণৱাদী. ইদং, ভন্তে, অজিনক্খিপং অনেকপৰিযাযেন অপ্পিচ্ছতায সন্তুট্ঠিতায সল্লেখায ধুততায পাসাদিকতায অপচযায ৱীৰিযাৰম্ভায সংৱত্ততি. সাধু, ভন্তে, ভগৱা ভিক্খূনং অজিনক্খিপং অনুজানাতূ’’তি. ৱিগৰহি বুদ্ধো ভগৱা – ‘‘অননুচ্ছৱিকং, মোঘপুৰিস, অননুলোমিকং অপ্পতিৰূপং অস্সামণকং অকপ্পিযং অকৰণীযং. কথঞ্হি নাম ত্ৱং, মোঘপুৰিস, অজিনক্খিপং তিত্থিযধজং ধাৰেস্সসি. নেতং, মোঘপুৰিস, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, অজিনক্খিপং তিত্থিযধজং ধাৰেতব্বং. যো ধাৰেয্য, আপত্তি থুল্লচ্চযস্সা’’তি.

তেন খো পন সমযেন অঞ্ঞতৰো ভিক্খু অক্কনাড়ং নিৱাসেত্ৱা…পে… পোত্থকং নিৱাসেত্ৱা যেন ভগৱা তেনুপসঙ্কমি, উপসঙ্কমিত্ৱা ভগৱন্তং এতদৱোচ – ‘‘ভগৱা, ভন্তে, অনেকপৰিযাযেন অপ্পিচ্ছস্স সন্তুট্ঠস্স সল্লেখস্স ধুতস্স পাসাদিকস্স অপচযস্স ৱীৰিযাৰম্ভস্স, ৱণ্ণৱাদী. অযং, ভন্তে, পোত্থকো অনেকপৰিযাযেন অপ্পিচ্ছতায সন্তুট্ঠিতায সল্লেখায ধুততায পাসাদিকতায অপচযায ৱীৰিযাৰম্ভায সংৱত্ততি. সাধু, ভন্তে, ভগৱা ভিক্খূনং পোত্থকং অনুজানাতূ’’তি. ৱিগৰহি বুদ্ধো ভগৱা – ‘‘অননুচ্ছৱিকং, মোঘপুৰিস, অননুলোমিকং অপ্পতিৰূপং অস্সামণকং অকপ্পিযং অকৰণীযং. কথঞ্হি নাম ত্ৱং, মোঘপুৰিস, পোত্থকং নিৱাসেস্সসি. নেতং, মোঘপুৰিস, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, পোত্থকো নিৱাসেতব্বো. যো নিৱাসেয্য, আপত্তি দুক্কটস্সা’’তি.

কুসচীৰাদিপটিক্খেপকথা নিট্ঠিতা.