২২৫. মতসন্তককথা

৩৬৭. তেন খো পন সমযেন দ্ৱে ভিক্খূ কোসলেসু জনপদে অদ্ধানমগ্গপ্পটিপন্না হোন্তি. তে অঞ্ঞতৰং আৱাসং উপগচ্ছিংসু. তত্থ অঞ্ঞতৰো ভিক্খু গিলানো হোতি. অথ খো তেসং ভিক্খূনং এতদহোসি – ‘‘ভগৱতা খো, আৱুসো, গিলানুপট্ঠানং ৱণ্ণিতং. হন্দ, মযং, আৱুসো, ইমং ভিক্খুং উপট্ঠহেমা’’তি. তে তং উপট্ঠহিংসু. সো তেহি উপট্ঠহিযমানো কালমকাসি. অথ খো তে ভিক্খূ তস্স ভিক্খুনো পত্তচীৱৰমাদায সাৱত্থিং গন্ত্ৱা ভগৱতো এতমত্থং আৰোচেসুং. ‘‘ভিক্খুস্স, ভিক্খৱে, কালঙ্কতে সঙ্ঘো সামী পত্তচীৱৰে, অপিচ গিলানুপট্ঠাকা বহূপকাৰা. অনুজানামি, ভিক্খৱে, সঙ্ঘেন তিচীৱৰঞ্চ পত্তঞ্চ গিলানুপট্ঠাকানং দাতুং. এৱঞ্চ পন, ভিক্খৱে, দাতব্বং. তেন গিলানুপট্ঠাকেন ভিক্খুনা সঙ্ঘং উপসঙ্কমিত্ৱা এৱমস্স ৱচনীযো – ‘ইত্থন্নামো, ভন্তে, ভিক্খু কালঙ্কতো. ইদং তস্স তিচীৱৰঞ্চ পত্তো চা’’’তি. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. ইত্থন্নামো ভিক্খু কালঙ্কতো. ইদং তস্স তিচীৱৰঞ্চ পত্তো চ. যদি সঙ্ঘস্স পত্তকল্লং, সঙ্ঘো ইমং তিচীৱৰঞ্চ পত্তঞ্চ গিলানুপট্ঠাকানং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. ইত্থন্নামো ভিক্খু কালঙ্কতো. ইদং তস্স তিচীৱৰঞ্চ পত্তো চ. সঙ্ঘো ইমং তিচীৱৰঞ্চ পত্তঞ্চ গিলানুপট্ঠাকানং দেতি. যস্সাযস্মতো খমতি ইমস্স তিচীৱৰস্স চ পত্তস্স চ গিলানুপট্ঠাকানং দানং, সো তুণ্হস্স; যস্স নক্খমতি, সো ভাসেয্য.

‘‘দিন্নং ইদং সঙ্ঘেন তিচীৱৰঞ্চ পত্তো চ গিলানুপট্ঠাকানং. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

৩৬৮. তেন খো পন সমযেন অঞ্ঞতৰো সামণেৰো কালঙ্কতো হোতি. ভগৱতো এতমত্থং আৰোচেসুং. সামণেৰস্স, ভিক্খৱে, কালঙ্কতে সঙ্ঘো সামী পত্তচীৱৰে, অপি চ গিলানুপট্ঠাকা বহূপকাৰা. অনুজানামি, ভিক্খৱে, সঙ্ঘেন চীৱৰঞ্চ পত্তঞ্চ গিলানুপট্ঠাকানং দাতুং. এৱঞ্চ পন, ভিক্খৱে, দাতব্বং. তেন গিলানুপট্ঠাকেন ভিক্খুনা সঙ্ঘং উপসঙ্কমিত্ৱা এৱমস্স ৱচনীযো – ‘‘ইত্থন্নামো, ভন্তে, সামণেৰো কালঙ্কতো, ইদং তস্স চীৱৰঞ্চ পত্তো চা’’তি. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. ইত্থন্নামো সামণেৰো কালঙ্কতো. ইদং তস্স চীৱৰঞ্চ পত্তো চ. যদি সঙ্ঘস্স পত্তকল্লং, সঙ্ঘো ইমং চীৱৰঞ্চ পত্তঞ্চ গিলানুপট্ঠাকানং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. ইত্থন্নামো সামণেৰো কালঙ্কতো. ইদং তস্স চীৱৰঞ্চ পত্তো চ. সঙ্ঘো ইমং চীৱৰঞ্চ পত্তঞ্চ গিলানুপট্ঠাকানং দেতি. যস্সাযস্মতো খমতি ইমস্স চীৱৰস্স চ পত্তস্স চ গিলানুপট্ঠাকানং দানং, সো তুণ্হস্স; যস্স নক্খমতি, সো ভাসেয্য.

‘‘দিন্নং ইদং সঙ্ঘেন চীৱৰঞ্চ পত্তো চ গিলানুপট্ঠাকানং. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

৩৬৯. তেন খো পন সমযেন অঞ্ঞতৰো ভিক্খু চ সামণেৰো চ গিলানং উপট্ঠহিংসু. সো তেহি উপট্ঠহিযমানো কালমকাসি. অথ খো তস্স গিলানুপট্ঠাকস্স ভিক্খুনো এতদহোসি – ‘‘কথং নু খো গিলানুপট্ঠাকস্স সামণেৰস্স চীৱৰপটিৱীসো দাতব্বো’’তি? ভগৱতো এতমত্থং আৰোচেসুং. অনুজানামি, ভিক্খৱে, গিলানুপট্ঠাকস্স সামণেৰস্স সমকং পটিৱীসং দাতুন্তি.

তেন খো পন সমযেন অঞ্ঞতৰো ভিক্খু বহুভণ্ডো বহুপৰিক্খাৰো কালঙ্কতো হোতি. ভগৱতো এতমত্থং আৰোচেসুং. ভিক্খুস্স, ভিক্খৱে, কালঙ্কতে সঙ্ঘো সামী পত্তচীৱৰে, অপি চ গিলানুপট্ঠাকা বহূপকাৰা. অনুজানামি, ভিক্খৱে, সঙ্ঘেন তিচীৱৰঞ্চ পত্তঞ্চ গিলানুপট্ঠাকানং দাতুং. যং তত্থ লহুভণ্ডং লহুপৰিক্খাৰং তং সম্মুখীভূতেন সঙ্ঘেন ভাজেতুং. যং তত্থ গৰুভণ্ডং গৰুপৰিক্খাৰং তং আগতানাগতস্স চাতুদ্দিসস্স সঙ্ঘস্স অৱিস্সজ্জিকং অৱেভঙ্গিকন্তি.

মতসন্তককথা নিট্ঠিতা.