২২৪. গিলানৱত্থুকথা

৩৬৫. তেন খো পন সমযেন অঞ্ঞতৰস্স ভিক্খুনো কুচ্ছিৱিকাৰাবাধো হোতি. সো সকে মুত্তকৰীসে পলিপন্নো সেতি. অথ খো ভগৱা আযস্মতা আনন্দেন পচ্ছাসমণেন সেনাসনচাৰিকং আহিণ্ডন্তো যেন তস্স ভিক্খুনো ৱিহাৰো তেনুপসঙ্কমি. অদ্দসা খো ভগৱা তং ভিক্খুং সকে মুত্তকৰীসে পলিপন্নং সযমানং, দিস্ৱান যেন সো ভিক্খু তেনুপসঙ্কমি, উপসঙ্কমিত্ৱা তং ভিক্খুং এতদৱোচ – ‘‘কিং তে, ভিক্খু, আবাধো’’তি? ‘‘কুচ্ছিৱিকাৰো মে, ভগৱা’’তি. ‘‘অত্থি পন তে, ভিক্খু, উপট্ঠাকো’’তি? ‘‘নত্থি, ভগৱা’’তি. ‘‘কিস্স তং ভিক্খূ ন উপট্ঠেন্তী’’তি? ‘‘অহং খো, ভন্তে, ভিক্খূনং অকাৰকো; তেন মং ভিক্খূ ন উপট্ঠেন্তী’’তি. অথ খো ভগৱা আযস্মন্তং আনন্দং আমন্তেসি – ‘‘গচ্ছানন্দ, উদকং আহৰ, ইমং ভিক্খুং নহাপেস্সামা’’তি. ‘‘এৱং, ভন্তে’’তি খো আযস্মা আনন্দো ভগৱতো পটিস্সুণিত্ৱা উদকং আহৰি. ভগৱা উদকং আসিঞ্চি. আযস্মা আনন্দো পৰিধোৱি. ভগৱা সীসতো অগ্গহেসি. আযস্মা আনন্দো পাদতো উচ্চাৰেত্ৱা মঞ্চকে নিপাতেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা ভিক্খূ পটিপুচ্ছি – ‘‘অত্থি, ভিক্খৱে, অমুকস্মিং ৱিহাৰে ভিক্খু গিলানো’’তি? ‘‘অত্থি, ভগৱা’’তি. ‘‘কিং তস্স, ভিক্খৱে, ভিক্খুনো আবাধো’’তি? ‘‘তস্স, ভন্তে, আযস্মতো কুচ্ছিৱিকাৰাবাধো’’তি. ‘‘অত্থি পন, ভিক্খৱে, তস্স ভিক্খুনো উপট্ঠাকো’’তি? ‘‘নত্থি, ভগৱা’’তি. ‘‘কিস্স তং ভিক্খূ ন উপট্ঠেন্তী’’তি? ‘‘এসো, ভন্তে, ভিক্খু ভিক্খূনং অকাৰকো; তেন তং ভিক্খূ ন উপট্ঠেন্তী’’তি. ‘‘নত্থি ৱো, ভিক্খৱে, মাতা, নত্থি পিতা, যে ৱো উপট্ঠহেয্যুং. তুম্হে চে, ভিক্খৱে, অঞ্ঞমঞ্ঞং ন উপট্ঠহিস্সথ, অথ কো চৰহি উপট্ঠহিস্সতি? যো, ভিক্খৱে, মং উপট্ঠহেয্য সো গিলানং উপট্ঠহেয্য. সচে উপজ্ঝাযো হোতি, উপজ্ঝাযেন যাৱজীৱং উপট্ঠাতব্বো; ৱুট্ঠানমস্স আগমেতব্বং. সচে আচৰিযো হোতি, আচৰিযেন যাৱজীৱং উপট্ঠাতব্বো; ৱুট্ঠানমস্স আগমেতব্বং. সচে সদ্ধিৱিহাৰিকো হোতি, সদ্ধিৱিহাৰিকেন যাৱজীৱং উপট্ঠাতব্বো; ৱুট্ঠানমস্স আগমেতব্বং. সচে অন্তেৱাসিকো হোতি, অন্তেৱাসিকেন যাৱজীৱং উপট্ঠাতব্বো; ৱুট্ঠানমস্স আগমেতব্বং. সচে সমানুপজ্ঝাযকো হোতি, সমানুপজ্ঝাযকেন যাৱজীৱং উপট্ঠাতব্বো; ৱুট্ঠানমস্স আগমেতব্বং. সচে সমানাচৰিযকো হোতি, সমানাচৰিযকেন যাৱজীৱং উপট্ঠাতব্বো; ৱুট্ঠানমস্স আগমেতব্বং. সচে ন হোতি উপজ্ঝাযো ৱা আচৰিযো ৱা সদ্ধিৱিহাৰিকো ৱা অন্তেৱাসিকো ৱা সমানুপজ্ঝাযকো ৱা সমানাচৰিযকো ৱা সঙ্ঘেন উপট্ঠাতব্বো. নো চে উপট্ঠহেয্য, আপত্তি দুক্কটস্স’’.

৩৬৬. পঞ্চহি, ভিক্খৱে, অঙ্গেহি সমন্নাগতো গিলানো দূপট্ঠো হোতি – অসপ্পাযকাৰী হোতি, সপ্পাযে মত্তং ন জানাতি, ভেসজ্জং ন পটিসেৱিতা হোতি, অত্থকামস্স গিলানুপট্ঠাকস্স যথাভূতং আবাধং নাৱিকত্তা হোতি ‘অভিক্কমন্তং ৱা অভিক্কমতীতি, পটিক্কমন্তং ৱা পটিক্কমতীতি, ঠিতং ৱা ঠিতো’তি, উপ্পন্নানং সাৰীৰিকানং ৱেদনানং দুক্খানং তিব্বানং খৰানং কটুকানং অসাতানং অমনাপানং পাণহৰানং অনধিৱাসকজাতিকো হোতি. ইমেহি খো, ভিক্খৱে, পঞ্চহঙ্গেহি সমন্নাগতো গিলানো দূপট্ঠো হোতি.

পঞ্চহি, ভিক্খৱে, অঙ্গেহি সমন্নাগতো গিলানো সূপট্ঠো হোতি – সপ্পাযকাৰী হোতি, সপ্পাযে মত্তং জানাতি, ভেসজ্জং পটিসেৱিতা হোতি, অত্থকামস্স গিলানুপট্ঠাকস্স যথাভূতং আবাধং আৱিকত্তা হোতি ‘অভিক্কমন্তং ৱা অভিক্কমতীতি, পটিক্কমন্তং ৱা পটিক্কমতীতি, ঠিতং ৱা ঠিতো’তি, উপ্পন্নানং সাৰীৰিকানং ৱেদনানং দুক্খানং তিব্বানং খৰানং কটুকানং অসাতানং অমনাপানং পাণহৰানং অধিৱাসকজাতিকো হোতি. ইমেহি খো, ভিক্খৱে, পঞ্চহঙ্গেহি সমন্নাগতো গিলানো সূপট্ঠো হোতি.

পঞ্চহি, ভিক্খৱে, অঙ্গেহি সমন্নাগতো গিলানুপট্ঠাকো নালং গিলানং উপট্ঠাতুং – ন পটিবলো হোতি ভেসজ্জং সংৱিধাতুং, সপ্পাযাসপ্পাযং ন জানাতি, অসপ্পাযং উপনামেতি সপ্পাযং অপনামেতি, আমিসন্তৰো গিলানং উপট্ঠাতি নো মেত্তচিত্তো, জেগুচ্ছী হোতি উচ্চাৰং ৱা পস্সাৱং ৱা খেড়ং ৱা ৱন্তং ৱা নীহাতুং, ন পটিবলো হোতি গিলানং কালেন কালং ধম্মিযা কথায সন্দস্সেতুং সমাদপেতুং সমুত্তেজেতুং সম্পহংসেতুং. ইমেহি খো, ভিক্খৱে, পঞ্চহঙ্গেহি সমন্নাগতো গিলানুপট্ঠাকো নালং গিলানং উপট্ঠাতুং.

পঞ্চহি, ভিক্খৱে, অঙ্গেহি সমন্নাগতো গিলানুপট্ঠাকো অলং গিলানং উপট্ঠাতুং – পটিবলো হোতি ভেসজ্জং সংৱিধাতুং, সপ্পাযাসপ্পাযং জানাতি, অসপ্পাযং অপনামেতি সপ্পাযং উপনামেতি, মেত্তচিত্তো গিলানং উপট্ঠাতি নো আমিসন্তৰো, অজেগুচ্ছী হোতি উচ্চাৰং ৱা পস্সাৱং ৱা খেড়ং ৱা ৱন্তং ৱা নীহাতুং, পটিবলো হোতি গিলানং কালেন কালং ধম্মিযা কথায সন্দস্সেতুং সমাদপেতুং সমুত্তেজেতুং সম্পহংসেতুং. ইমেহি খো, ভিক্খৱে, পঞ্চহঙ্গেহি সমন্নাগতো গিলানুপট্ঠাকো অলং গিলানং উপট্ঠাতুন্তি.

গিলানৱত্থুকথা নিট্ঠিতা.