২২৩. উপনন্দসক্যপুত্তৱত্থু

৩৬৪. তেন খো পন সমযেন আযস্মা উপনন্দো সক্যপুত্তো সাৱত্থিযং ৱস্সংৱুট্ঠো অঞ্ঞতৰং গামকাৱাসং অগমাসি. তত্থ চ ভিক্খূ চীৱৰং ভাজেতুকামা সন্নিপতিংসু. তে এৱমাহংসু – ‘‘ইমানি খো, আৱুসো, সঙ্ঘিকানি চীৱৰানি ভাজিযিস্সন্তি, সাদিযিস্সসি ভাগ’’ন্তি? ‘‘আমাৱুসো, সাদিযিস্সামী’’তি. ততো চীৱৰভাগং গহেত্ৱা অঞ্ঞং আৱাসং অগমাসি. তত্থপি ভিক্খূ চীৱৰং ভাজেতুকামা সন্নিপতিংসু. তেপি এৱমাহংসু – ‘‘ইমানি খো, আৱুসো, সঙ্ঘিকানি চীৱৰানি ভাজিযিস্সন্তি, সাদিযিস্সসি ভাগ’’ন্তি? ‘‘আমাৱুসো, সাদিযিস্সামী’’তি. ততোপি চীৱৰভাগং গহেত্ৱা অঞ্ঞং আৱাসং অগমাসি. তত্থপি ভিক্খূ চীৱৰং ভাজেতুকামা সন্নিপতিংসু. তেপি এৱমাহংসু – ‘‘ইমানি খো, আৱুসো, সঙ্ঘিকানি চীৱৰানি ভাজিযিস্সন্তি, সাদিযিস্সসি ভাগ’’ন্তি? ‘‘আমাৱুসো, সাদিযিস্সামী’’তি. ততোপি চীৱৰভাগং গহেত্ৱা মহন্তং চীৱৰভণ্ডিকং আদায পুনদেৱ সাৱত্থিং পচ্চাগঞ্ছি. ভিক্খূ এৱমাহংসু – ‘‘মহাপুঞ্ঞোসি ত্ৱং, আৱুসো উপনন্দ, বহুং তে চীৱৰং উপ্পন্ন’’ন্তি. ‘‘কুতো মে, আৱুসো, পুঞ্ঞং? ইধাহং, আৱুসো, সাৱত্থিযং ৱস্সংৱুট্ঠো অঞ্ঞতৰং গামকাৱাসং অগমাসিং. তত্থ ভিক্খূ চীৱৰং ভাজেতুকামা সন্নিপতিংসু. তে মং এৱমাহংসু – ‘ইমানি খো, আৱুসো, সঙ্ঘিকানি চীৱৰানি ভাজিযিস্সন্তি, সাদিযিস্সসি ভাগ’ন্তি? ‘আমাৱুসো, সাদিযিস্সামী’তি. ততো চীৱৰভাগং গহেত্ৱা অঞ্ঞং আৱাসং অগমাসিং. তত্থপি ভিক্খূ চীৱৰং ভাজেতুকামা সন্নিপতিংসু. তেপি মং এৱমাহংসু – ‘ইমানি খো, আৱুসো, সঙ্ঘিকানি চীৱৰানি ভাজিযিস্সন্তি, সাদিযিস্সসি ভাগ’’’ন্তি? ‘আমাৱুসো, সাদিযিস্সামী’তি. ততোপি চীৱৰভাগং গহেত্ৱা অঞ্ঞং আৱাসং অগমাসিং. তত্থপি ভিক্খূ চীৱৰং ভাজেতুকামা সন্নিপতিংসু. তেপি মং এৱমাহংসু – ‘ইমানি খো, আৱুসো, সঙ্ঘিকানি চীৱৰানি ভাজিযিস্সন্তি, সাদিযিস্সসি ভাগ’ন্তি? ‘আমাৱুসো, সাদিযিস্সামী’তি. ততোপি চীৱৰভাগং অগ্গহেসিং. এৱং মে বহুং চীৱৰং উপ্পন্নন্তি. ‘‘কিং পন ত্ৱং, আৱুসো উপনন্দ, অঞ্ঞত্ৰ ৱস্সংৱুট্ঠো অঞ্ঞত্ৰ চীৱৰভাগং সাদিযী’’তি? ‘‘এৱমাৱুসো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উপনন্দো সক্যপুত্তো অঞ্ঞত্ৰ ৱস্সংৱুট্ঠো অঞ্ঞত্ৰ চীৱৰভাগং সাদিযিস্সতী’’তি. ভগৱতো এতমত্থং আৰোচেসুং…পে… ‘‘সচ্চং কিৰ ত্ৱং, উপনন্দ, অঞ্ঞত্ৰ ৱস্সংৱুট্ঠো অঞ্ঞত্ৰ চীৱৰভাগং সাদিযী’’তি? ‘‘সচ্চং ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, অঞ্ঞত্ৰ ৱস্সংৱুট্ঠো অঞ্ঞত্ৰ চীৱৰভাগং সাদিযিস্সসি. নেতং, মোঘপুৰিস, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, অঞ্ঞত্ৰ ৱস্সংৱুট্ঠেন অঞ্ঞত্ৰ চীৱৰভাগো সাদিতব্বো. যো সাদিযেয্য, আপত্তি দুক্কটস্সা’’তি.

তেন খো পন সমযেন আযস্মা উপনন্দো সক্যপুত্তো একো দ্ৱীসু আৱাসেসু ৱস্সং ৱসি – ‘‘এৱং মে বহুং চীৱৰং উপ্পজ্জিস্সতী’’তি. অথ খো তেসং ভিক্খূনং এতদহোসি – ‘‘কথং নু খো আযস্মতো উপনন্দস্স সক্যপুত্তস্স চীৱৰপটিৱীসো দাতব্বো’’তি? ভগৱতো এতমত্থং আৰোচেসুং. দেথ, ভিক্খৱে, মোঘপুৰিসস্স একাধিপ্পাযং. ইধ পন, ভিক্খৱে, ভিক্খু একো দ্ৱীসু আৱাসেসু ৱস্সং ৱসতি – ‘‘এৱং মে বহুং চীৱৰং উপ্পজ্জিস্সতী’’তি. সচে অমুত্ৰ উপড্ঢং অমুত্ৰ উপড্ঢং ৱসতি, অমুত্ৰ উপড্ঢো অমুত্ৰ উপড্ঢো চীৱৰপটিৱীসো দাতব্বো. যত্থ ৱা পন বহুতৰং ৱসতি, ততো চীৱৰপটিৱীসো দাতব্বোতি.

উপনন্দসক্যপুত্তৱত্থু নিট্ঠিতং.