২২২. সঙ্ঘিকচীৱৰুপ্পাদকথা

৩৬৩. তেন খো পন সমযেন অঞ্ঞতৰো ভিক্খু একো ৱস্সং ৱসি. তত্থ মনুস্সা সঙ্ঘস্স দেমাতি চীৱৰানি অদংসু. অথ খো তস্স ভিক্খুনো এতদহোসি – ‘‘ভগৱতা পঞ্ঞত্তং ‘চতুৱগ্গো পচ্ছিমো সঙ্ঘো’তি. অহঞ্চম্হি এককো. ইমে চ মনুস্সা সঙ্ঘস্স দেমাতি চীৱৰানি অদংসু. যংনূনাহং ইমানি সঙ্ঘিকানি চীৱৰানি সাৱত্থিং হৰেয্য’’ন্তি. অথ খো সো ভিক্খু তানি চীৱৰানি আদায সাৱত্থিং গন্ত্ৱা ভগৱতো এতমত্থং আৰোচেসি. ‘‘তুয্হেৱ, ভিক্খু, তানি চীৱৰানি যাৱ কথিনস্স উব্ভাৰাযা’’তি. ইধ পন, ভিক্খৱে, ভিক্খু একো ৱস্সং ৱসতি. তত্থ মনুস্সা সঙ্ঘস্স দেমাতি চীৱৰানি দেন্তি. অনুজানামি, ভিক্খৱে, তস্সেৱ তানি চীৱৰানি যাৱ কথিনস্স উব্ভাৰাযাতি.

তেন খো পন সমযেন অঞ্ঞতৰো ভিক্খু উতুকালং একো ৱসি. তত্থ মনুস্সা সঙ্ঘস্স দেমাতি চীৱৰানি অদংসু. অথ খো তস্স ভিক্খুনো এতদহোসি – ‘‘ভগৱতা পঞ্ঞত্তং ‘চতুৱগ্গো পচ্ছিমো সঙ্ঘো’তি. অহঞ্চম্হি এককো. ইমে চ মনুস্সা সঙ্ঘস্স দেমাতি চীৱৰানি অদংসু. যংনূনাহং ইমানি সঙ্ঘিকানি চীৱৰানি সাৱত্থিং হৰেয্য’’ন্তি. অথ খো সো ভিক্খু তানি চীৱৰানি আদায সাৱত্থিং গন্ত্ৱা ভিক্খূনং এতমত্থং আৰোচেসি. ভিক্খূ ভগৱতো এতমত্থং আৰোচেসুং. অনুজানামি, ভিক্খৱে, সম্মুখীভূতেন সঙ্ঘেন ভাজেতুং. ইধ পন, ভিক্খৱে, ভিক্খু উতুকালং একো ৱসতি. তত্থ মনুস্সা সঙ্ঘস্স দেমাতি চীৱৰানি দেন্তি. অনুজানামি, ভিক্খৱে, তেন ভিক্খুনা তানি চীৱৰানি অধিট্ঠাতুং – ‘‘ময্হিমানি চীৱৰানী’’তি. তস্স চে, ভিক্খৱে, ভিক্খুনো তং চীৱৰং অনধিট্ঠিতে অঞ্ঞো ভিক্খু আগচ্ছতি, সমকো দাতব্বো ভাগো. তেহি চে, ভিক্খৱে, ভিক্খূহি তং চীৱৰং ভাজিযমানে, অপাতিতে কুসে, অঞ্ঞো ভিক্খু আগচ্ছতি, সমকো দাতব্বো ভাগো. তেহি চে, ভিক্খৱে, ভিক্খূহি তং চীৱৰং ভাজিযমানে, পাতিতে কুসে, অঞ্ঞো ভিক্খু আগচ্ছতি, নাকামা দাতব্বো ভাগোতি.

তেন খো পন সমযেন দ্ৱে ভাতিকা থেৰা, আযস্মা চ ইসিদাসো আযস্মা চ ইসিভটো, সাৱত্থিযং ৱস্সংৱুট্ঠা অঞ্ঞতৰং গামকাৱাসং অগমংসু. মনুস্সা চিৰস্সাপি থেৰা আগতাতি সচীৱৰানি ভত্তানি অদংসু. আৱাসিকা ভিক্খূ থেৰে পুচ্ছিংসু – ‘‘ইমানি, ভন্তে, সঙ্ঘিকানি চীৱৰানি থেৰে আগম্ম উপ্পন্নানি, সাদিযিস্সন্তি থেৰা ভাগ’’ন্তি. থেৰা এৱমাহংসু – ‘‘যথা খো মযং, আৱুসো, ভগৱতা ধম্মং দেসিতং আজানাম, তুম্হাকংযেৱ তানি চীৱৰানি যাৱ কথিনস্স উব্ভাৰাযা’’তি.

তেন খো পন সমযেন তযো ভিক্খূ ৰাজগহে ৱস্সং ৱসন্তি. তত্থ মনুস্সা সঙ্ঘস্স

দেমাতি চীৱৰানি দেন্তি. অথ খো তেসং ভিক্খূনং এতদহোসি – ‘‘ভগৱতা পঞ্ঞত্তং ‘চতুৱগ্গো পচ্ছিমো সঙ্ঘো’তি. মযঞ্চম্হা তযো জনা. ইমে চ মনুস্সা সঙ্ঘস্স দেমাতি চীৱৰানি দেন্তি. কথং নু খো অম্হেহি পটিপজ্জিতব্ব’’ন্তি? তেন খো পন সমযেন সম্বহুলা থেৰা, আযস্মা চ নিলৱাসী আযস্মা চ সাণৱাসী আযস্মা চ গোতকো আযস্মা চ ভগু আযস্মা চ ফড়িকসন্তানো, পাটলিপুত্তে ৱিহৰন্তি কুক্কুটাৰামে. অথ খো তে ভিক্খূ পাটলিপুত্তং গন্ত্ৱা থেৰে পুচ্ছিংসু. থেৰা এৱমাহংসু – ‘‘যথা খো মযং আৱুসো ভগৱতা ধম্মং দেসিতং আজানাম, তুম্হাকংযেৱ তানি চীৱৰানি যাৱ কথিনস্স উব্ভাৰাযা’’তি.

সঙ্ঘিকচীৱৰুপ্পাদকথা নিট্ঠিতা.