২২১. পচ্ছিমৱিকপ্পনুপগচীৱৰাদিকথা

৩৫৮. অথ খো ভিক্খূনং এতদহোসি – ‘‘যানি তানি ভগৱতা অনুঞ্ঞাতানি তিচীৱৰন্তি ৱা ৱস্সিকসাটিকাতি ৱা নিসীদনন্তি ৱা পচ্চত্থৰণন্তি ৱা কণ্ডুপ্পটিচ্ছাদীতি ৱা মুখপুঞ্ছনচোড়ন্তি ৱা পৰিক্খাৰচোড়ন্তি ৱা, সব্বানি তানি অধিট্ঠাতব্বানি নু খো, উদাহু, ৱিকপ্পেতব্বানী’’তি? ভগৱতো এতমত্থং আৰোচেসুং. অনুজানামি, ভিক্খৱে, তিচীৱৰং অধিট্ঠাতুং ন ৱিকপ্পেতুং; ৱস্সিকসাটিকং ৱস্সানং চাতুমাসং অধিট্ঠাতুং, ততো পৰং ৱিকপ্পেতুং; নিসীদনং অধিট্ঠাতুং ন ৱিকপ্পেতুং; পচ্চত্থৰণং অধিট্ঠাতুং ন ৱিকপ্পেতুং; কণ্ডুপ্পটিচ্ছাদিং যাৱআবাধা অধিট্ঠাতুং ততো পৰং ৱিকপ্পেতুং; মুখপুঞ্ছনচোড়ং অধিট্ঠাতুং ন ৱিকপ্পেতুং; পৰিক্খাৰচোড়ং অধিট্ঠাতুং ন ৱিকপ্পেতুন্তি.

অথ খো ভিক্খূনং এতদহোসি – ‘‘কিত্তকং পচ্ছিমং নু খো চীৱৰং ৱিকপ্পেতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, আযামেন অট্ঠঙ্গুলং সুগতঙ্গুলেন চতুৰঙ্গুলৱিত্থতং পচ্ছিমং চীৱৰং ৱিকপ্পেতুন্তি.

৩৫৯. তেন খো পন সমযেন আযস্মতো মহাকস্সপস্স পংসুকূলকতো গৰুকো হোতি. ভগৱতো এতমত্থং আৰোচেসুং. অনুজানামি, ভিক্খৱে, সুত্তলূখং কাতুন্তি. ৱিকণ্ণো হোতি. ভগৱতো এতমত্থং আৰোচেসুং. অনুজানামি, ভিক্খৱে, ৱিকণ্ণং উদ্ধৰিতুন্তি. সুত্তা ওকিৰিযন্তি. ভগৱতো এতমত্থং আৰোচেসুং. অনুজানামি, ভিক্খৱে, অনুৱাতং পৰিভণ্ডং আৰোপেতুন্তি.

তেন খো পন সমযেন সঙ্ঘাটিযা পত্তা লুজ্জন্তি. ভগৱতো এতমত্থং আৰোচেসুং. অনুজানামি, ভিক্খৱে, অট্ঠপদকং কাতুন্তি.

৩৬০. তেন খো পন সমযেন অঞ্ঞতৰস্স ভিক্খুনো তিচীৱৰে কযিৰমানে সব্বং ছিন্নকং নপ্পহোতি. ভগৱতো এতমত্থং আৰোচেসুং. অনুজানামি, ভিক্খৱে, দ্ৱে ছিন্নকানি একং অচ্ছিন্নকন্তি.

দ্ৱে ছিন্নকানি একং অচ্ছিন্নকং নপ্পহোতি. ভগৱতো এতমত্থং আৰোচেসুং. অনুজানামি, ভিক্খৱে, দ্ৱে অচ্ছিন্নকানি একং ছিন্নকন্তি.

দ্ৱে অচ্ছিন্নকানি একং ছিন্নকং নপ্পহোতি. ভগৱতো এতমত্থং আৰোচেসুং. অনুজানামি, ভিক্খৱে, অন্ৱাধিকম্পি আৰোপেতুং, ন চ, ভিক্খৱে, সব্বং অচ্ছিন্নকং ধাৰেতব্বং. যো ধাৰেয্য, আপত্তি দুক্কটস্সাতি.

৩৬১. তেন খো পন সমযেন অঞ্ঞতৰস্স ভিক্খুনো বহুং চীৱৰং উপ্পন্নং হোতি. সো চ তং চীৱৰং মাতাপিতূনং দাতুকামো হোতি. ভগৱতো এতমত্থং আৰোচেসুং. মাতাপিতৰোতি [মাতাপিতূনং খো (সী.)] খো, ভিক্খৱে, দদমানে [ৱদমানো (ক.), ৱদমানে (?)] কিং ৱদেয্যাম? অনুজানামি, ভিক্খৱে, মাতাপিতূনং দাতুং. ন চ, ভিক্খৱে, সদ্ধাদেয্যং ৱিনিপাতেতব্বং. যো ৱিনিপাতেয্য, আপত্তি দুক্কটস্সাতি.

৩৬২. তেন খো পন সমযেন অঞ্ঞতৰো ভিক্খু অন্ধৱনে চীৱৰং নিক্খিপিত্ৱা সন্তৰুত্তৰেন গামং পিণ্ডায পাৱিসি. চোৰা তং চীৱৰং অৱহৰিংসু. সো ভিক্খু দুচ্চোড়ো হোতি লূখচীৱৰো. ভিক্খূ এৱমাহংসু – ‘‘কিস্স ত্ৱং, আৱুসো, দুচ্চোড়ো লূখচীৱৰোসী’’তি? ‘‘ইধাহং [সো অহং (কত্থচি)], আৱুসো, অন্ধৱনে চীৱৰং নিক্খিপিত্ৱা সন্তৰুত্তৰেন গামং পিণ্ডায পাৱিসিং. চোৰা তং চীৱৰং অৱহৰিংসু. তেনাহং দুচ্চোড়ো লূখচীৱৰো’’তি. ভগৱতো এতমত্থং আৰোচেসুং. ন, ভিক্খৱে, সন্তৰুত্তৰেন গামো পৱিসিতব্বো. যো পৱিসেয্য, আপত্তি দুক্কটস্সাতি.

তেন খো পন সমযেন আযস্মা আনন্দো অস্সতিযা সন্তৰুত্তৰেন গামং পিণ্ডায পাৱিসি. ভিক্খূ আযস্মন্তং আনন্দং এতদৱোচুং – ‘‘ননু, আৱুসো আনন্দ, ভগৱতা পঞ্ঞত্তং – ‘ন সন্তৰুত্তৰেন গামো পৱিসিতব্বো’তি? কিস্স ত্ৱং, আৱুসো আনন্দ, সন্তৰুত্তৰেন গামং পৱিট্ঠো’’তি? ‘‘সচ্চং, আৱুসো, ভগৱতা পঞ্ঞত্তং – ‘ন সন্তৰুত্তৰেন গামো পৱিসিতব্বো’তি. অপি চাহং অস্সতিযা পৱিট্ঠো’’তি. ভগৱতো এতমত্থং আৰোচেসুং.

পঞ্চিমে, ভিক্খৱে, পচ্চযা সঙ্ঘাটিযা নিক্খেপায – গিলানো ৱা হোতি, ৱস্সিকসঙ্কেতং ৱা হোতি, নদীপাৰং গন্তুং ৱা হোতি, অগ্গড়গুত্তিৱিহাৰো ৱা হোতি, অত্থতকথিনং ৱা হোতি. ইমে খো, ভিক্খৱে, পঞ্চ পচ্চযা সঙ্ঘাটিযা নিক্খেপায.

পঞ্চিমে, ভিক্খৱে, পচ্চযা উত্তৰাসঙ্গস্স নিক্খেপায…পে… অন্তৰৱাসকস্স নিক্খেপায – গিলানো ৱা হোতি, ৱস্সিকসঙ্কেতং ৱা হোতি, নদীপাৰং গন্তুং ৱা হোতি, অগ্গড়গুত্তিৱিহাৰো ৱা হোতি, অত্থতকথিনং ৱা হোতি. ইমে খো, ভিক্খৱে, পঞ্চ পচ্চযা উত্তৰাসঙ্গস্স অন্তৰৱাসকস্স নিক্খেপায.

পঞ্চিমে, ভিক্খৱে, পচ্চযা ৱস্সিকসাটিকায নিক্খেপায – গিলানো ৱা হোতি, নিস্সীমং গন্তুং ৱা হোতি, নদীপাৰং গন্তুং ৱা হোতি, অগ্গড়গুত্তিৱিহাৰো ৱা হোতি, ৱস্সিকসাটিকা অকতা ৱা হোতি ৱিপ্পকতা ৱা. ইমে খো, ভিক্খৱে, পঞ্চ পচ্চযা ৱস্সিকসাটিকায নিক্খেপাযাতি.

পচ্ছিমৱিকপ্পনুপগচীৱৰাদিকথা নিট্ঠিতা.