২০১. তস্সুদ্দানং

তিংস পাৱেয্যকা ভিক্খূ, সাকেতুক্কণ্ঠিতা ৱসুং;

ৱস্সংৱুট্ঠোকপুণ্ণেহি, অগমুং জিনদস্সনং.

ইদং ৱত্থু কথিনস্স, কপ্পিস্সন্তি চ পঞ্চকা;

অনামন্তা অসমাচাৰা, তথেৱ গণভোজনং.

যাৱদত্থঞ্চ উপ্পাদো, অত্থতানং ভৱিস্সতি;

ঞত্তি এৱত্থতঞ্চেৱ, এৱঞ্চেৱ অনত্থতং.

উল্লিখি ধোৱনা চেৱ, ৱিচাৰণঞ্চ ছেদনং;

বন্ধনো ৱট্টি কণ্ডুস, দড়্হীকম্মানুৱাতিকা.

পৰিভণ্ডং ওৱদ্ধেয্যং, মদ্দনা নিমিত্তং কথা;

কুক্কু সন্নিধি নিস্সগ্গি, ন কপ্পঞ্ঞত্ৰ তে তযো.

অঞ্ঞত্ৰ পঞ্চাতিৰেকে, সঞ্ছিন্নেন সমণ্ডলী;

নাঞ্ঞত্ৰ পুগ্গলা সম্মা, নিস্সীমট্ঠোনুমোদতি.

কথিনানত্থতং হোতি, এৱং বুদ্ধেন দেসিতং;

অহতাকপ্পপিলোতি, পংসু পাপণিকায চ.

অনিমিত্তাপৰিকথা, অকুক্কু চ অসন্নিধি;

অনিস্সগ্গি কপ্পকতে, তথা তিচীৱৰেন চ.

পঞ্চকে ৱাতিৰেকে ৱা, ছিন্নে সমণ্ডলীকতে;

পুগ্গলস্সত্থাৰা সম্মা, সীমট্ঠো অনুমোদতি.

এৱং কথিনত্থৰণং, উব্ভাৰস্সট্ঠমাতিকা;

পক্কমনন্তি নিট্ঠানং, সন্নিট্ঠানঞ্চ নাসনং.

সৱনং আসাৱচ্ছেদি, সীমা সহুব্ভাৰট্ঠমী;

কতচীৱৰমাদায, ‘‘ন পচ্চেস্স’’ন্তি গচ্ছতি.

তস্স তং কথিনুদ্ধাৰা,এ হোতি পক্কমনন্তিকো;

আদায চীৱৰং যাতি, নিস্সীমে ইদং চিন্তযি.

‘‘কাৰেস্সং ন পচ্চেস্স’’ন্তি, নিট্ঠানে কথিনুদ্ধাৰো;

আদায নিস্সীমং নেৱ, ‘‘ন পচ্চেস্স’’ন্তি মানসো.

তস্স তং কথিনুদ্ধাৰো, সন্নিট্ঠানন্তিকো ভৱে;

আদায চীৱৰং যাতি, নিস্সীমে ইদং চিন্তযি.

‘‘কাৰেস্সং ন পচ্চেস্স’’ন্তি, কযিৰং তস্স নস্সতি;

তস্স তং কথিনুদ্ধাৰো, ভৱতি নাসনন্তিকো.

আদায যাতি ‘‘পচ্চেস্সং’’, বহি কাৰেতি চীৱৰং;

কতচীৱৰো সুণাতি, উব্ভতং কথিনং তহিং.

তস্স তং কথিনুদ্ধাৰো, ভৱতি সৱনন্তিকো;

আদায যাতি ‘‘পচ্চেস্সং’’, বহি কাৰেতি চীৱৰং.

কতচীৱৰো বহিদ্ধা, নামেতি কথিনুদ্ধাৰং;

তস্স তং কথিনুদ্ধাৰো, সীমাতিক্কন্তিকো ভৱে.

আদায যাতি ‘‘পচ্চেস্সং’’, বহি কাৰেতি চীৱৰং;

কতচীৱৰো পচ্চেস্সং, সম্ভোতি কথিনুদ্ধাৰং.

তস্স তং কথিনুদ্ধাৰো, সহ ভিক্খূহি জাযতি;

আদায চ সমাদায, সত্ত-সত্তৱিধা গতি.

পক্কমনন্তিকা নত্থি, ছক্কে ৱিপ্পকতে [ছট্ঠে ৱিপ্পকতা (সী.), ছচ্চা ৱিপ্পকথা (ক.)] গতি;

আদায নিস্সীমগতং, কাৰেস্সং ইতি জাযতি.

নিট্ঠানং সন্নিট্ঠানঞ্চ, নাসনঞ্চ ইমে তযো;

আদায ‘‘ন পচ্চেস্স’’ন্তি, বহিসীমে কৰোমিতি.

নিট্ঠানং সন্নিট্ঠানম্পি, নাসনম্পি ইদং তযো;

অনধিট্ঠিতেন নেৱস্স, হেট্ঠা তীণি নযাৱিধি.

আদায যাতি পচ্চেস্সং, বহিসীমে কৰোমিতি;

‘‘ন পচ্চেস্স’’ন্তি কাৰেতি, নিট্ঠানে কথিনুদ্ধাৰো.

সন্নিট্ঠানং নাসনঞ্চ, সৱনসীমাতিক্কমা;

সহ ভিক্খূহি জাযেথ, এৱং পন্নৰসং গতি.

সমাদায ৱিপ্পকতা, সমাদায পুনা তথা;

ইমে তে চতুৰো ৱাৰা, সব্বে পন্নৰসৱিধি.

অনাসায চ আসায, কৰণীযো চ তে তযো;

নযতো তং ৱিজানেয্য, তযো দ্ৱাদস দ্ৱাদস.

অপৱিলানা নৱেত্থ [অপৱিলাযমানেৱ (স্যা.), অপৱিনা নৱ চেত্থ (সী.)], ফাসু পঞ্চৱিধা তহিং;

পলিবোধাপলিবোধা, উদ্দানং নযতো কতন্তি.

ইমম্হি খন্ধকে ৱত্থূ দোড়সকপেয্যালমুখানি একসতং অট্ঠাৰস.

কথিনক্খন্ধকো নিট্ঠিতো.