৭. কথিনক্খন্ধকো

১৮৭. কথিনানুজাননা

৩০৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন তিংসমত্তা পাৱেয্যকা [পাঠেয্যকা (সী. স্যা.)] ভিক্খূ, সব্বে আৰঞ্ঞিকা সব্বে পিণ্ডপাতিকা সব্বে পংসুকূলিকা সব্বে তেচীৱৰিকা সাৱত্থিং আগচ্ছন্তা ভগৱন্তং দস্সনায উপকট্ঠায ৱস্সূপনাযিকায নাসক্খিংসু সাৱত্থিযং ৱস্সূপনাযিকং সম্ভাৱেতুং; অন্তৰামগ্গে সাকেতে ৱস্সং উপগচ্ছিংসু. তে উক্কণ্ঠিতৰূপা ৱস্সং ৱসিংসু – আসন্নেৱ নো ভগৱা ৱিহৰতি ইতো ছসু যোজনেসু, ন চ মযং লভাম ভগৱন্তং দস্সনাযাতি. অথ খো তে ভিক্খূ ৱস্সংৱুট্ঠা, তেমাসচ্চযেন কতায পৱাৰণায, দেৱে ৱস্সন্তে, উদকসঙ্গহে উদকচিক্খল্লে ওকপুণ্ণেহি চীৱৰেহি কিলন্তৰূপা যেন সাৱত্থি জেতৱনং অনাথপিণ্ডিকস্স আৰামো, যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. আচিণ্ণং খো পনেতং বুদ্ধানং ভগৱন্তানং আগন্তুকেহি ভিক্খূহি সদ্ধিং পটিসম্মোদিতুং. অথ খো ভগৱা তে ভিক্খূ এতদৱোচ – ‘‘কচ্চি, ভিক্খৱে, খমনীযং, কচ্চি যাপনীযং, কচ্চি সমগ্গা সম্মোদমানা অৱিৱদমানা ফাসুকং ৱস্সং ৱসিত্থ, ন চ পিণ্ডকেন কিলমিত্থা’’তি? ‘‘খমনীযং, ভগৱা; যাপনীযং, ভগৱা; সমগ্গা চ মযং, ভন্তে, সম্মোদমানা অৱিৱদমানা ৱস্সং ৱসিম্হা, ন চ পিণ্ডকেন কিলমিম্হা. ইধ মযং, ভন্তে, তিংসমত্তা পাৱেয্যকা ভিক্খূ সাৱত্থিং আগচ্ছন্তা ভগৱন্তং দস্সনায উপকট্ঠায ৱস্সূপনাযিকায নাসক্খিম্হা সাৱত্থিযং ৱস্সূপনাযিকং সম্ভাৱেতুং, অন্তৰামগ্গে সাকেতে ৱস্সং উপগচ্ছিম্হা. তে মযং, ভন্তে, উক্কণ্ঠিতৰূপা ৱস্সং ৱসিম্হা – ‘আসন্নেৱ নো ভগৱা ৱিহৰতি ইতো ছসু যোজনেসু, ন চ মযং লভাম ভগৱন্তং দস্সনাযা’তি. অথ খো মযং, ভন্তে, ৱস্সংৱুট্ঠা, তেমাসচ্চযেন কতায পৱাৰণায, দেৱে ৱস্সন্তে, উদকসঙ্গহে উদকচিক্খল্লে ওকপুণ্ণেহি চীৱৰেহি কিলন্তৰূপা অদ্ধানং আগতাতি. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, ৱস্সংৱুট্ঠানং ভিক্খূনং কথিনং [কঠিনং (সী. স্যা.)] অত্থৰিতুং. অত্থতকথিনানং ৱো, ভিক্খৱে, পঞ্চ কপ্পিস্সন্তি – অনামন্তচাৰো, অসমাদানচাৰো, গণভোজনং, যাৱদত্থচীৱৰং, যো চ তত্থ চীৱৰুপ্পাদো সো নেসং ভৱিস্সতীতি. অত্থতকথিনানং ৱো, ভিক্খৱে, ইমানি পঞ্চ কপ্পিস্সন্তি. এৱঞ্চ পন, ভিক্খৱে, কথিনং অত্থৰিতব্বং. ব্যত্তেন ভিক্খুনা পটিবলেন সঙ্ঘো ঞাপেতব্বো –

৩০৭. ‘‘সুণাতু মে, ভন্তে, সঙ্ঘো. ইদং সঙ্ঘস্স কথিনদুস্সং উপ্পন্নং. যদি সঙ্ঘস্স পত্তকল্লং, সঙ্ঘো ইমং কথিনদুস্সং ইত্থন্নামস্স ভিক্খুনো দদেয্য কথিনং অত্থৰিতুং. এসা ঞত্তি.

‘‘সুণাতু মে, ভন্তে, সঙ্ঘো. ইদং সঙ্ঘস্স কথিনদুস্সং উপ্পন্নং. সঙ্ঘো ইমং কথিনদুস্সং ইত্থন্নামস্স ভিক্খুনো দেতি কথিনং অত্থৰিতুং. যস্সাযস্মতো খমতি ইমস্স কথিনদুস্সস্স ইত্থন্নামস্স ভিক্খুনো দানং কথিনং অত্থৰিতুং, সো তুণ্হস্স; যস্স নক্খমতি, সো ভাসেয্য.

‘‘দিন্নং ইদং সঙ্ঘেন কথিনদুস্সং ইত্থন্নামস্স ভিক্খুনো কথিনং অত্থৰিতুং. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

৩০৮. ‘‘এৱং খো, ভিক্খৱে, অত্থতং হোতি কথিনং, এৱং অনত্থতং. কথঞ্চ পন, ভিক্খৱে, অনত্থতং হোতি কথিনং? ন উল্লিখিতমত্তেন অত্থতং হোতি কথিনং, ন ধোৱনমত্তেন অত্থতং হোতি কথিনং, ন চীৱৰৱিচাৰণমত্তেন [ন গণ্টুসকৰণমত্তেন (ক.)] অত্থতং হোতি কথিনং, ন ছেদনমত্তেন অত্থতং হোতি কথিনং, ন বন্ধনমত্তেন অত্থতং হোতি কথিনং, ন ওৱট্টিযকৰণমত্তেন [ন ওৱট্টেয্যকৰণমত্তেন (সী. স্যা.), ন ওৱদেয্যকৰণমত্তেন (ক.)] অত্থতং হোতি কথিনং, ন কণ্ডুসকৰণমত্তেন অত্থতং হোতি কথিনং, ন দড়্হীকম্মকৰণমত্তেন অত্থতং হোতি কথিনং, ন অনুৱাতকৰণমত্তেন অত্থতং হোতি কথিনং, ন পৰিভণ্ডকৰণমত্তেন অত্থতং হোতি কথিনং, ন ওৱদ্ধেয্যকৰণমত্তেন অত্থতং হোতি কথিনং, ন কম্বলমদ্দনমত্তেন অত্থতং হোতি কথিনং, ন নিমিত্তকতেন অত্থতং হোতি কথিনং, ন পৰিকথাকতেন অত্থতং হোতি কথিনং, ন কুক্কুকতেন অত্থতং হোতি কথিনং, ন সন্নিধিকতেন অত্থতং হোতি কথিনং, ন নিস্সগ্গিযেন অত্থতং হোতি কথিনং, ন অকপ্পকতেন অত্থতং হোতি কথিনং, ন অঞ্ঞত্ৰ সঙ্ঘাটিযা অত্থতং হোতি কথিনং, ন অঞ্ঞত্ৰ উত্তৰাসঙ্গেন অত্থতং হোতি কথিনং, ন অঞ্ঞত্ৰ অন্তৰৱাসকেন অত্থতং হোতি কথিনং, ন অঞ্ঞত্ৰ পঞ্চকেন ৱা অতিৰেকপঞ্চকেন ৱা তদহেৱ সঞ্ছিন্নেন সমণ্ডলীকতেন অত্থতং হোতি কথিনং, ন অঞ্ঞত্ৰ পুগ্গলস্স অত্থাৰা অত্থতং হোতি কথিনং; সম্মা চেৱ অত্থতং হোতি কথিনং, তঞ্চে নিস্সীমট্ঠো অনুমোদতি, এৱম্পি অনত্থতং হোতি কথিনং. এৱং খো, ভিক্খৱে, অনত্থতং হোতি কথিনং.

৩০৯. ‘‘কথঞ্চ, ভিক্খৱে, অত্থতং হোতি কথিনং? অহতেন অত্থতং হোতি কথিনং, অহতকপ্পেন অত্থতং হোতি কথিনং, পিলোতিকায অত্থতং হোতি কথিনং, পংসুকূলেন অত্থতং হোতি কথিনং, পাপণিকেন অত্থতং হোতি কথিনং, অনিমিত্তকতেন অত্থতং হোতি কথিনং, অপৰিকথাকতেন অত্থতং হোতি কথিনং, অকুক্কুকতেন অত্থতং হোতি কথিনং, অসন্নিধিকতেন অত্থতং হোতি কথিনং, অনিস্সগ্গিযেন অত্থতং হোতি কথিনং, কপ্পকতেন অত্থতং হোতি কথিনং, সঙ্ঘাটিযা অত্থতং হোতি কথিনং, উত্তৰাসঙ্গেন অত্থতং হোতি কথিনং, অন্তৰৱাসকেন অত্থতং হোতি কথিনং, পঞ্চকেন ৱা অতিৰেকপঞ্চকেন ৱা তদহেৱ সঞ্ছিন্নেন সমণ্ডলীকতেন অত্থতং হোতি কথিনং, পুগ্গলস্স অত্থাৰা অত্থতং হোতি কথিনং; সম্মা চে অত্থতং হোতি কথিনং, তঞ্চে সীমট্ঠো অনুমোদতি, এৱম্পি অত্থতং হোতি কথিনং. এৱং খো, ভিক্খৱে, অত্থতং হোতি কথিনং.

৩১০. ‘‘কথঞ্চ, ভিক্খৱে, উব্ভতং হোতি কথিনং? অট্ঠিমা, ভিক্খৱে, মাতিকা কথিনস্স উব্ভাৰায – পক্কমনন্তিকা, নিট্ঠানন্তিকা, সন্নিট্ঠানন্তিকা, নাসনন্তিকা, সৱনন্তিকা, আসাৱচ্ছেদিকা, সীমাতিক্কন্তিকা, সহুব্ভাৰা’’তি [সউব্ভাৰাতি (ক.)].

কথিনানুজাননা নিট্ঠিতা.

১৮৮. আদাযসত্তকং

৩১১. ভিক্খু অত্থতকথিনো কতচীৱৰং আদায পক্কমতি – ‘‘ন পচ্চেস্স’’ন্তি. তস্স ভিক্খুনো পক্কমনন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি – ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো সুণাতি ‘‘উব্ভতং কিৰ তস্মিং আৱাসে কথিন’’ন্তি. তস্স ভিক্খুনো সৱনন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি – ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো – ‘‘পচ্চেস্সং পচ্চেস্স’’ন্তি – বহিদ্ধা কথিনুদ্ধাৰং ৱীতিনামেতি. তস্স ভিক্খুনো সীমাতিক্কন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি – ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো – ‘‘পচ্চেস্সং পচ্চেস্স’’ন্তি – সম্ভুণাতি কথিনুদ্ধাৰং. তস্স ভিক্খুনো সহ ভিক্খূহি কথিনুদ্ধাৰো.

আদাযসত্তকং নিট্ঠিতং […দুতিযং নিট্ঠিতং (ক.)].

১৮৯. সমাদাযসত্তকং

৩১২. ভিক্খু অত্থতকথিনো কতচীৱৰং সমাদায পক্কমতি ‘‘ন পচ্চেস্স’’ন্তি. তস্স ভিক্খুনো পক্কমনন্তিকো কথিনুদ্ধাৰো.

ভিক্খু অত্থতকথিনো চীৱৰং সমাদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং সমাদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং সমাদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো চীৱৰং সমাদায পক্কমতি – ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো সুণাতি – ‘‘উব্ভতং কিৰ তস্মিং আৱাসে কথিন’’ন্তি. তস্স ভিক্খুনো সৱনন্তিকো কথিনুদ্ধাৰো.

ভিক্খু অত্থতকথিনো চীৱৰং সমাদায পক্কমতি – ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো – ‘‘পচ্চেস্সং পচ্চেস্স’’ন্তি – বহিদ্ধা কথিনুদ্ধাৰং ৱীতিনামেতি. তস্স ভিক্খুনো সীমাতিক্কন্তিকো কথিনুদ্ধাৰো.

ভিক্খু অত্থতকথিনো চীৱৰং সমাদায পক্কমতি – ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো – ‘‘পচ্চেস্সং পচ্চেস্স’’ন্তি – সম্ভুণাতি কথিনুদ্ধাৰং. তস্স ভিক্খুনো সহ ভিক্খূহি কথিনুদ্ধাৰো.

সমাদাযসত্তকং নিট্ঠিতং.

১৯০. আদাযছক্কং

৩১৩. ভিক্খু অত্থতকথিনো ৱিপ্পকতচীৱৰং আদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং আদায পক্কমতি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং আদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং ন পচ্চেস্স’’ন্তি. সো তং চীৱৰং কাৰেতি. তস্সং তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং আদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো সুণাতি – ‘‘উব্ভতং কিৰ তস্মিং আৱাসে কথিন’’ন্তি. তস্স ভিক্খুনো সৱনন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং আদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো ‘‘পচ্চেস্সং পচ্চেস্স’’ন্তি বহিদ্ধা কথিনুদ্ধাৰং ৱীতিনামেতি. তস্স ভিক্খুনো সীমাতিক্কন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং আদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো ‘‘পচ্চেস্সং পচ্চেস্স’’ন্তি সম্ভুণাতি কথিনুদ্ধাৰং. তস্স ভিক্খুনো সহ ভিক্খূহি কথিনুদ্ধাৰো.

আদাযছক্কং নিট্ঠিতং.

১৯১. সমাদাযছক্কং

৩১৪. ভিক্খু অত্থতকথিনো ৱিপ্পকতচীৱৰং সমাদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো সুণাতি – ‘‘উব্ভতং কিৰ তস্মিং আৱাসে কথিন’’ন্তি. তস্স ভিক্খুনো সৱনন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো ‘‘পচ্চেস্সং পচ্চেস্স’’ন্তি বহিদ্ধা কথিনুদ্ধাৰং ৱীতিনামেতি. তস্স ভিক্খুনো সীমাতিক্কন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো ‘‘পচ্চেস্সং পচ্চেস্স’’ন্তি সম্ভুণাতি কথিনুদ্ধাৰং. তস্স ভিক্খুনো সহ ভিক্খূহি কথিনুদ্ধাৰো.

সমাদাযছক্কং নিট্ঠিতং.

১৯২. আদাযপন্নৰসকং

৩১৫. ভিক্খু অত্থতকথিনো চীৱৰং আদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি. তস্স বহিসীমগতস্স এৱং হোতি –

‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

তিকং.

ভিক্খু অত্থতকথিনো চীৱৰং আদায পক্কমতি ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

তিকং.

ভিক্খু অত্থতকথিনো চীৱৰং আদায পক্কমতি অনধিট্ঠিতেন; নেৱস্স হোতি ‘‘পচ্চেস্স’’ন্তি, ন পনস্স হোতি ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি অনধিট্ঠিতেন; নেৱস্স হোতি ‘‘পচ্চেস্স’’ন্তি, ন পনস্স হোতি ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি অনধিট্ঠিতেন; নেৱস্স হোতি ‘‘পচ্চেস্স’’ন্তি, ন পনস্স হোতি ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

তিকং.

ভিক্খু অত্থতকথিনো চীৱৰং আদায পক্কমতি ‘‘পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি ‘‘পচ্চেস্স’’ন্তি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি ‘‘পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো সুণাতি – ‘‘উব্ভতং কিৰ তস্মিং আৱাসে কথিন’’ন্তি. তস্স ভিক্খুনো সৱনন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো ‘‘পচ্চেস্সং পচ্চেস্স’’ন্তি – বহিদ্ধা কথিনুদ্ধাৰং ৱীতিনামেতি. তস্স ভিক্খুনো সীমাতিক্কন্তিকো কথিনুদ্ধাৰো.

ভিক্খু অত্থতকথিনো চীৱৰং আদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো – ‘‘পচ্চেস্সং পচ্চেস্স’’ন্তি সম্ভুণাতি কথিনুদ্ধাৰং. তস্স ভিক্খুনো সহ ভিক্খূহি কথিনুদ্ধাৰো.

ছক্কং.

আদাযপন্নৰসকং নিট্ঠিতং.

১৯৩. সমাদাযপন্নৰসকাদি

৩১৬. ভিক্খু অত্থতকথিনো চীৱৰং সমাদায পক্কমতি…পে….

(আদাযৱাৰসদিসং এৱং ৱিত্থাৰেতব্বং.)

ভিক্খু অত্থতকথিনো ৱিপ্পকতচীৱৰং আদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো…পে….

(সমাদাযৱাৰসদিসং এৱং ৱিত্থাৰেতব্বং.)

সমাদাযপন্নৰসকাদি নিট্ঠিতা.

১৯৪. ৱিপ্পকতসমাদাযপন্নৰসকং

৩১৭. ভিক্খু অত্থতকথিনো ৱিপ্পকতচীৱৰং সমাদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

তিকং.

ভিক্খু অত্থতকথিনো ৱিপ্পকতচীৱৰং সমাদায পক্কমতি ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

তিকং.

ভিক্খু অত্থতকথিনো ৱিপ্পকতচীৱৰং সমাদায পক্কমতি অনধিট্ঠিতেন; নেৱস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি অনধিট্ঠিতেন; নেৱস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি অনধিট্ঠিতেন; নেৱস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

তিকং.

ভিক্খু অত্থতকথিনো ৱিপ্পকতচীৱৰং সমাদায পক্কমতি ‘‘পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি ‘‘পচ্চেস্স’’ন্তি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি ‘‘পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো সুণাতি – ‘‘উব্ভতং কিৰ তস্মিং আৱাসে কথিন’’ন্তি. তস্স ভিক্খুনো সৱনন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো – ‘‘পচ্চেস্সং পচ্চেস্স’’ন্তি বহিদ্ধা কথিনুদ্ধাৰং ৱীতিনামেতি. তস্স ভিক্খুনো সীমাতিক্কন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং সমাদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো ‘‘পচ্চেস্সং পচ্চেস্স’’ন্তি সম্ভুণাতি কথিনুদ্ধাৰং. তস্স ভিক্খুনো সহ ভিক্খূহি কথিনুদ্ধাৰো.

ছক্কং.

ৱিপ্পকতসমাদাযপন্নৰসকং নিট্ঠিতং.

আদাযভাণৱাৰো.

১৯৫. অনাসাদোড়সকং

৩১৮. ভিক্খু অত্থতকথিনো চীৱৰাসায পক্কমতি. সো বহিসীমগতো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি. সো বহিসীমগতো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি. সো বহিসীমগতো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰাসং পযিৰুপাসিস্সং, ন পচ্চেস্স’’ন্তি. সো তং চীৱৰাসং পযিৰুপাসতি. তস্স সা চীৱৰাসা উপচ্ছিজ্জতি. তস্স ভিক্খুনো আসাৱচ্ছেদিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘ন পচ্চেস্স’’ন্তি. সো বহিসীমগতো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘ন পচ্চেস্স’’ন্তি. সো বহিসীমগতো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘নেৱিমং চীৱৰং কাৰেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘ন পচ্চেস্স’’ন্তি. সো বহিসীমগতো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰাসং পযিৰুপাসিস্স’’ন্তি. সো তং চীৱৰাসং পযিৰুপাসতি. তস্স সা চীৱৰাসা উপচ্ছিজ্জতি. তস্স ভিক্খুনো আসাৱচ্ছেদিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি অনধিট্ঠিতেন; নেৱস্স হোতি – ‘‘পচ্চেস্সন্তি, ন পনস্স হোতি – ‘‘ন পচ্চেস্স’’ন্তি. সো বহিসীমগতো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি অনধিট্ঠিতেন; নেৱস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি. সো বহিসীমগতো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি অনধিট্ঠিতেন; নেৱস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি. সো বহিসীমগতো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি অনধিট্ঠিতেন; নেৱস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰাসং পযিৰুপাসিস্সং, ন পচ্চেস্স’’ন্তি. সো তং চীৱৰাসং পযিৰুপাসতি. তস্স সা চীৱৰাসা উপচ্ছিজ্জতি. তস্স ভিক্খুনো আসাৱচ্ছেদিকো কথিনুদ্ধাৰো.

অনাসাদোড়সকং [অনাসাদ্ৱাদসকং (সী.)] নিট্ঠিতং.

১৯৬. আসাদোড়সকং

৩১৯. ভিক্খু অত্থতকথিনো চীৱৰাসায পক্কমতি ‘‘পচ্চেস্স’’ন্তি. সো বহিসীমগতো তং চীৱৰাসং পযিৰুপাসতি. আসায লভতি, অনাসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘পচ্চেস্স’’ন্তি. সো বহিসীমগতো তং চীৱৰাসং পযিৰুপাসতি. আসায লভতি, অনাসায ন লভতি. তস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘পচ্চেস্স’’ন্তি. সো বহিসীমগতো তং চীৱৰাসং পযিৰুপাসতি. আসায লভতি, অনাসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰাসং পযিৰুপাসিস্সং, ন পচ্চেস্স’’ন্তি. সো তং চীৱৰাসং পযিৰুপাসতি. তস্স সা চীৱৰাসা উপচ্ছিজ্জতি. তস্স ভিক্খুনো আসাৱচ্ছেদিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘পচ্চেস্স’’ন্তি. সো বহিসীমগতো সুণাতি – ‘‘উব্ভতং কিৰ তস্মিং আৱাসে কথিন’’ন্তি. তস্স এৱং হোতি – ‘‘যতো তস্মিং আৱাসে উব্ভতং কথিনং, ইধেৱিমং চীৱৰাসং পযিৰুপাসিস্স’’ন্তি. সো তং চীৱৰাসং পযিৰুপাসতি. আসায লভতি, অনাসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘পচ্চেস্স’’ন্তি. সো বহিসীমগতো সুণাতি – ‘‘উব্ভতং কিৰ তস্মিং আৱাসে কথিন’’ন্তি. তস্স এৱং হোতি – ‘‘যতো তস্মিং আৱাসে উব্ভতং কথিনং, ইধেৱিমং চীৱৰাসং পযিৰুপাসিস্স’’ন্তি. সো তং চীৱৰাসং পযিৰুপাসতি. আসায লভতি, অনাসায ন লভতি. তস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘পচ্চেস্স’’ন্তি. সো বহিসীমগতো সুণাতি – ‘‘উব্ভতং কিৰ তস্মিং আৱাসে কথিন’’ন্তি. তস্স এৱং হোতি – ‘‘যতো তস্মিং আৱাসে উব্ভতং কথিনং, ইধেৱিমং চীৱৰাসং পযিৰুপাসিস্স’’ন্তি. সো তং চীৱৰাসং পযিৰুপাসতি. আসায লভতি, অনাসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘পচ্চেস্স’’ন্তি. সো বহিসীমগতো সুণাতি – ‘‘উব্ভতং কিৰ তস্মিং আৱাসে কথিন’’ন্তি. তস্স এৱং হোতি – ‘‘যতো তস্মিং আৱাসে উব্ভতং কথিনং, ইধেৱিমং চীৱৰাসং পযিৰুপাসিস্সং, ন পচ্চেস্স’’ন্তি. সো তং চীৱৰাসং পযিৰুপাসতি. তস্স সা চীৱৰাসা উপচ্ছিজ্জতি. তস্স ভিক্খুনো আসাৱচ্ছেদিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘পচ্চেস্স’’ন্তি. সো বহিসীমগতো তং চীৱৰাসং পযিৰুপাসতি. আসায লভতি, অনাসায ন লভতি. সো তং চীৱৰং কাৰেতি. সো কতচীৱৰো সুণাতি – ‘‘উব্ভতং কিৰ তস্মিং আৱাসে কথিন’’ন্তি. তস্স ভিক্খুনো সৱনন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰাসং পযিৰুপাসিস্সং, ন পচ্চেস্স’’ন্তি. সো তং চীৱৰাসং পযিৰুপাসতি. তস্স সা চীৱৰাসা উপচ্ছিজ্জতি. তস্স ভিক্খুনো আসাৱচ্ছেদিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘পচ্চেস্স’’ন্তি. সো বহিসীমগতো তং চীৱৰাসং পযিৰুপাসতি. আসায লভতি, অনাসায ন লভতি. সো তং চীৱৰং কাৰেতি. সো কতচীৱৰো ‘‘পচ্চেস্সং পচ্চেস্স’’ন্তি – বহিদ্ধা কথিনুদ্ধাৰং ৱীতিনামেতি. তস্স ভিক্খুনো সীমাতিক্কন্তিকো কথিনুদ্ধাৰো.

ভিক্খু অত্থতকথিনো চীৱৰাসায পক্কমতি ‘‘পচ্চেস্স’’ন্তি. সো বহিসীমগতো তং চীৱৰাসং পযিৰুপাসতি. আসায লভতি, অনাসায ন লভতি. সো তং চীৱৰং কাৰেতি. সো কতচীৱৰো ‘‘পচ্চেস্সং পচ্চেস্স’’ন্তি – সম্ভুণাতি কথিনুদ্ধাৰং. তস্স ভিক্খুনো সহ ভিক্খূহি কথিনুদ্ধাৰো.

আসাদোড়সকং নিট্ঠিতং.

১৯৭. কৰণীযদোড়সকং

৩২০. ভিক্খু অত্থতকথিনো কেনচিদেৱ কৰণীযেন পক্কমতি. তস্স বহিসীমগতস্স চীৱৰাসা উপ্পজ্জতি. সো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো কেনচিদেৱ কৰণীযেন পক্কমতি. তস্স বহিসীমগতস্স চীৱৰাসা উপ্পজ্জতি. সো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো কেনচিদেৱ কৰণীযেন পক্কমতি. তস্স বহিসীমগতস্স চীৱৰাসা উপ্পজ্জতি. সো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো কেনচিদেৱ কৰণীযেন পক্কমতি. তস্স বহিসীমগতস্স চীৱৰাসা উপ্পজ্জতি. তস্স এৱং হোতি – ‘‘ইধেৱিমং চীৱৰাসং পযিৰুপাসিস্সং, ন পচ্চেস্স’’ন্তি. সো তং চীৱৰাসং পযিৰুপাসতি. তস্স সা চীৱৰাসা উপচ্ছিজ্জতি. তস্স ভিক্খুনো আসাৱচ্ছেদিকো কথিনুদ্ধাৰো.

ভিক্খু অত্থতকথিনো কেনচিদেৱ কৰণীযেন পক্কমতি ‘‘ন পচ্চেস্স’’ন্তি. তস্স বহিসীমগতস্স চীৱৰাসা উপ্পজ্জতি. সো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো কেনচিদেৱ কৰণীযেন পক্কমতি ‘‘ন পচ্চেস্স’’ন্তি. তস্স বহিসীমগতস্স চীৱৰাসা উপ্পজ্জতি. সো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘নেৱিমং চীৱৰং কাৰেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো কেনচিদেৱ কৰণীযেন পক্কমতি ‘‘ন পচ্চেস্স’’ন্তি. তস্স বহিসীমগতস্স চীৱৰাসা উপ্পজ্জতি. সো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো কেনচিদেৱ কৰণীযেন পক্কমতি ‘‘ন পচ্চেস্স’’ন্তি. তস্স বহিসীমগতস্স চীৱৰাসা উপ্পজ্জতি. তস্স এৱং হোতি – ‘‘ইধেৱিমং চীৱৰাসং পযিৰুপাসিস্স’’ন্তি. সো তং চীৱৰাসং পযিৰুপাসতি. তস্স সা চীৱৰাসা উপচ্ছিজ্জতি. তস্স ভিক্খুনো আসাৱচ্ছেদিকো কথিনুদ্ধাৰো.

ভিক্খু অত্থতকথিনো কেনচিদেৱ কৰণীযেন পক্কমতি অনধিট্ঠিতেন; নেৱস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি. তস্স বহিসীমগতস্স চীৱৰাসা উপ্পজ্জতি. সো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো কেনচিদেৱ কৰণীযেন পক্কমতি অনধিট্ঠিতেন; নেৱস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি. তস্স বহিসীমগতস্স চীৱৰাসা উপ্পজ্জতি. সো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো কেনচিদেৱ কৰণীযেন পক্কমতি অনধিট্ঠিতেন; নেৱস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি. তস্স বহিসীমগতস্স চীৱৰাসা উপ্পজ্জতি. সো তং চীৱৰাসং পযিৰুপাসতি. অনাসায লভতি, আসায ন লভতি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো কেনচিদেৱ কৰণীযেন পক্কমতি অনধিট্ঠিতেন; নেৱস্স হোতি – ‘‘পচ্চেস্স’’ন্তি, ন পনস্স হোতি – ‘‘ন পচ্চেস্স’’ন্তি. তস্স বহিসীমগতস্স চীৱৰাসা উপ্পজ্জতি. তস্স এৱং হোতি – ‘‘ইধেৱিমং চীৱৰাসং পযিৰুপাসিস্সং, ন পচ্চেস্স’’ন্তি. সো তং চীৱৰাসং পযিৰুপাসতি. তস্স সা চীৱৰাসা উপচ্ছিজ্জতি. তস্স ভিক্খুনো আসাৱচ্ছেদিকো কথিনুদ্ধাৰো.

কৰণীযদোড়সকং নিট্ঠিতং.

১৯৮. অপৱিলাযননৱকং

৩২১. ভিক্খু অত্থতকথিনো দিসংগমিকো পক্কমতি চীৱৰপটিৱীসং অপৱিলাযমানো [অপৱিনযমানো (সী.), অপচিনযমানো (ক.)]. তমেনং দিসঙ্গতং ভিক্খূ পুচ্ছন্তি – ‘‘কহং ত্ৱং, আৱুসো, ৱস্সংৱুট্ঠো, কত্থ চ তে চীৱৰপটিৱীসো’’তি? সো এৱং ৱদেতি – ‘‘অমুকস্মিং আৱাসে ৱস্সংৱুট্ঠোম্হি. তত্থ চ মে চীৱৰপটিৱীসো’’তি. তে এৱং ৱদন্তি – ‘‘গচ্ছাৱুসো, তং চীৱৰং আহৰ, মযং তে ইধ চীৱৰং কৰিস্সামা’’তি. সো তং আৱাসং গন্ত্ৱা ভিক্খূ পুচ্ছতি – ‘‘কহং মে, আৱুসো, চীৱৰপটিৱীসো’’তি? তে এৱং ৱদন্তি – ‘‘অযং তে, আৱুসো, চীৱৰপটিৱীসো; কহং গমিস্সসী’’তি? সো এৱং ৱদেতি – ‘‘অমুকং নাম [অমুকঞ্চ (ক.)] আৱাসং গমিস্সামি, তত্থ মে ভিক্খূ চীৱৰং কৰিস্সন্তী’’তি. তে এৱং ৱদন্তি – ‘‘অলং, আৱুসো, মা অগমাসি. মযং তে ইধ চীৱৰং কৰিস্সামা’’তি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো দিসংগমিকো পক্কমতি…পে… ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো দিসংগমিকো পক্কমতি…পে… ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

৩২২. ভিক্খু অত্থতকথিনো দিসংগমিকো পক্কমতি চীৱৰপটিৱীসং অপৱিলাযমানো. তমেনং দিসংগতং ভিক্খূ পুচ্ছন্তি – ‘‘কহং ত্ৱং, আৱুসো, ৱস্সংৱুট্ঠো, কত্থ চ তে চীৱৰপটিৱীসো’’তি? সো এৱং ৱদেতি – ‘‘অমুকস্মিং আৱাসে ৱস্সংৱুট্ঠোম্হি, তত্থ চ মে চীৱৰপটিৱীসো’’তি. তে এৱং ৱদন্তি – ‘‘গচ্ছাৱুসো, তং চীৱৰং আহৰ, মযং তে ইধ চীৱৰং কৰিস্সামা’’তি. সো তং আৱাসং গন্ত্ৱা ভিক্খূ পুচ্ছতি – ‘‘কহং মে, আৱুসো, চীৱৰপটিৱীসো’’তি? তে এৱং ৱদন্তি – ‘‘অযং তে, আৱুসো, চীৱৰপটিৱীসো’’তি. সো তং চীৱৰং আদায তং আৱাসং গচ্ছতি. তমেনং অন্তৰামগ্গে ভিক্খূ পুচ্ছন্তি – ‘‘আৱুসো, কহং গমিস্সসী’’তি? সো এৱং ৱদেতি – ‘‘অমুকং নাম আৱাসং গমিস্সামি, তত্থ মে ভিক্খূ চীৱৰং কৰিস্সন্তী’’তি. তে এৱং ৱদন্তি – ‘‘অলং, আৱুসো, মা অগমাসি, মযং তে ইধ চীৱৰং কৰিস্সামা’’তি. তস্স এৱং হোতি – ‘‘ইধেৱিমং চীৱৰং কাৰেস্সং ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো দিসংগমিকো পক্কমতি চীৱৰপটিৱীসং অপৱিলাযমানো. তমেনং দিসংগতং ভিক্খূ পুচ্ছন্তি – ‘‘কহং ত্ৱং, আৱুসো, ৱস্সংৱুট্ঠো, কত্থ চ তে চীৱৰপটিৱীসো’’তি? সো এৱং ৱদেতি – ‘‘অমুকস্মিং আৱাসে ৱস্সংৱুট্ঠোম্হি, তত্থ চ মে চীৱৰপটিৱীসো’’তি. তে এৱং ৱদন্তি – ‘‘গচ্ছাৱুসো, তং চীৱৰং আহৰ, মযং তে ইধ চীৱৰং কৰিস্সামা’’তি. সো তং আৱাসং গন্ত্ৱা ভিক্খূ পুচ্ছতি – ‘‘কহং মে, আৱুসো, চীৱৰপটিৱীসো’’তি? তে এৱং ৱদন্তি – ‘‘অযং তে, আৱুসো, চীৱৰপটিৱীসো’’তি. সো তং চীৱৰং আদায তং আৱাসং গচ্ছতি. তমেনং অন্তৰামগ্গে ভিক্খূ পুচ্ছন্তি – ‘‘আৱুসো, কহং গমিস্সসী’’তি? সো এৱং ৱদেতি – ‘‘অমুকং নাম আৱাসং গমিস্সামি, তত্থ মে ভিক্খূ চীৱৰং কৰিস্সন্তী’’তি. তে এৱং ৱদন্তি – ‘‘অলং, আৱুসো, মা অগমাসি, মযং তে ইধ চীৱৰং কৰিস্সামা’’তি. তস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো দিসংগমিকো পক্কমতি…পে… ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

৩২৩. ভিক্খু অত্থতকথিনো দিসংগমিকো পক্কমতি চীৱৰপটিৱীসং অপৱিলাযমানো. তমেনং দিসংগতং ভিক্খূ পুচ্ছন্তি – ‘‘কহং ত্ৱং, আৱুসো, ৱস্সংৱুট্ঠো, কত্থ চ তে চীৱৰপটিৱীসো’’তি? সো এৱং ৱদেতি – ‘‘অমুকস্মিং আৱাসে ৱস্সংৱুট্ঠোম্হি, তত্থ চ মে চীৱৰপটিৱীসো’’তি. তে এৱং ৱদন্তি – ‘‘গচ্ছাৱুসো, তং চীৱৰং আহৰ, মযং তে ইধ চীৱৰং কৰিস্সামা’’তি. সো তং আৱাসং গন্ত্ৱা ভিক্খূ পুচ্ছতি – ‘‘কহং মে, আৱুসো, চীৱৰপটিৱীসো’’তি? তে এৱং ৱদন্তি – ‘‘অযং তে, আৱুসো, চীৱৰপটিৱীসো’’তি. সো তং চীৱৰং আদায তং আৱাসং গচ্ছতি. তস্স তং আৱাসং গতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো দিসংগমিকো পক্কমতি…পে… ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো দিসংগমিকো পক্কমতি…পে… ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

অপৱিলাযননৱকং নিট্ঠিতং.

১৯৯. ফাসুৱিহাৰপঞ্চকং

৩২৪. ভিক্খু অত্থতকথিনো ফাসুৱিহাৰিকো চীৱৰং আদায পক্কমতি – ‘‘অমুকং নাম আৱাসং গমিস্সামি; তত্থ মে ফাসু ভৱিস্সতি ৱসিস্সামি, নো চে মে ফাসু ভৱিস্সতি, অমুকং নাম আৱাসং গমিস্সামি; তত্থ মে ফাসু ভৱিস্সতি ৱসিস্সামি, নো চে মে ফাসু ভৱিস্সতি, অমুকং নাম আৱাসং গমিস্সামি; তত্থ মে ফাসু ভৱিস্সতি ৱসিস্সামি, নো চে মে ফাসু ভৱিস্সতি, পচ্চেস্স’’ন্তি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো ফাসুৱিহাৰিকো চীৱৰং আদায পক্কমতি – ‘‘অমুকং নাম আৱাসং গমিস্সামি; তত্থ মে ফাসু ভৱিস্সতি ৱসিস্সামি, নো চে মে ফাসু ভৱিস্সতি, অমুকং নাম আৱাসং গমিস্সামি; তত্থ মে ফাসু ভৱিস্সতি ৱসিস্সামি, নো চে মে ফাসু ভৱিস্সতি, অমুকং নাম আৱাসং গমিস্সামি; তত্থ মে ফাসু ভৱিস্সতি ৱসিস্সামি, নো চে মে ফাসু ভৱিস্সতি, পচ্চেস্স’’ন্তি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.