২০০. পলিবোধাপলিবোধকথা

৩২৫. দ্ৱেমে, ভিক্খৱে, কথিনস্স পলিবোধা, দ্ৱে অপলিবোধা. কতমে চ, ভিক্খৱে, দ্ৱে কথিনস্স পলিবোধা? আৱাসপলিবোধো চ চীৱৰপলিবোধো চ. কথঞ্চ, ভিক্খৱে, আৱাসপলিবোধো হোতি? ইধ, ভিক্খৱে, ভিক্খু ৱসতি ৱা তস্মিং আৱাসে, সাপেক্খো ৱা পক্কমতি ‘‘পচ্চেস্স’’ন্তি. এৱং খো, ভিক্খৱে, আৱাসপলিবোধো হোতি. কথঞ্চ, ভিক্খৱে, চীৱৰপলিবোধো হোতি? ইধ, ভিক্খৱে, ভিক্খুনো চীৱৰং অকতং ৱা হোতি ৱিপ্পকতং ৱা, চীৱৰাসা ৱা অনুপচ্ছিন্না. এৱং খো, ভিক্খৱে, চীৱৰপলিবোধো হোতি. ইমে খো, ভিক্খৱে, দ্ৱে কথিনস্স পলিবোধা.

কতমে চ, ভিক্খৱে, দ্ৱে কথিনস্স অপলিবোধা? আৱাসঅপলিবোধো চ চীৱৰঅপলিবোধো চ. কথঞ্চ, ভিক্খৱে, আৱাসঅপলিবোধো হোতি? ইধ, ভিক্খৱে, ভিক্খু পক্কমতি তম্হা আৱাসা চত্তেন ৱন্তেন মুত্তেন অনপেক্খো [অনপেক্খেন (ক.)] ‘‘ন পচ্চেস্স’’ন্তি. এৱং খো, ভিক্খৱে, আৱাসঅপলিবোধো হোতি. কথঞ্চ, ভিক্খৱে, চীৱৰঅপলিবোধো হোতি? ইধ, ভিক্খৱে, ভিক্খুনো চীৱৰং কতং ৱা হোতি, নট্ঠং ৱা ৱিনট্ঠং ৱা দড্ঢং ৱা, চীৱৰাসা ৱা উপচ্ছিন্না. এৱং খো, ভিক্খৱে, চীৱৰঅপলিবোধো হোতি. ইমে খো, ভিক্খৱে, দ্ৱে কথিনস্স অপলিবোধাতি.

পলিবোধাপলিবোধকথা নিট্ঠিতা.

কথিনক্খন্ধকো নিট্ঠিতো সত্তমো.