১৯৮. অপৱিলাযননৱকং

৩২১. ভিক্খু অত্থতকথিনো দিসংগমিকো পক্কমতি চীৱৰপটিৱীসং অপৱিলাযমানো [অপৱিনযমানো (সী.), অপচিনযমানো (ক.)]. তমেনং দিসঙ্গতং ভিক্খূ পুচ্ছন্তি – ‘‘কহং ত্ৱং, আৱুসো, ৱস্সংৱুট্ঠো, কত্থ চ তে চীৱৰপটিৱীসো’’তি? সো এৱং ৱদেতি – ‘‘অমুকস্মিং আৱাসে ৱস্সংৱুট্ঠোম্হি. তত্থ চ মে চীৱৰপটিৱীসো’’তি. তে এৱং ৱদন্তি – ‘‘গচ্ছাৱুসো, তং চীৱৰং আহৰ, মযং তে ইধ চীৱৰং কৰিস্সামা’’তি. সো তং আৱাসং গন্ত্ৱা ভিক্খূ পুচ্ছতি – ‘‘কহং মে, আৱুসো, চীৱৰপটিৱীসো’’তি? তে এৱং ৱদন্তি – ‘‘অযং তে, আৱুসো, চীৱৰপটিৱীসো; কহং গমিস্সসী’’তি? সো এৱং ৱদেতি – ‘‘অমুকং নাম [অমুকঞ্চ (ক.)] আৱাসং গমিস্সামি, তত্থ মে ভিক্খূ চীৱৰং কৰিস্সন্তী’’তি. তে এৱং ৱদন্তি – ‘‘অলং, আৱুসো, মা অগমাসি. মযং তে ইধ চীৱৰং কৰিস্সামা’’তি. তস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো দিসংগমিকো পক্কমতি…পে… ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো দিসংগমিকো পক্কমতি…পে… ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

৩২২. ভিক্খু অত্থতকথিনো দিসংগমিকো পক্কমতি চীৱৰপটিৱীসং অপৱিলাযমানো. তমেনং দিসংগতং ভিক্খূ পুচ্ছন্তি – ‘‘কহং ত্ৱং, আৱুসো, ৱস্সংৱুট্ঠো, কত্থ চ তে চীৱৰপটিৱীসো’’তি? সো এৱং ৱদেতি – ‘‘অমুকস্মিং আৱাসে ৱস্সংৱুট্ঠোম্হি, তত্থ চ মে চীৱৰপটিৱীসো’’তি. তে এৱং ৱদন্তি – ‘‘গচ্ছাৱুসো, তং চীৱৰং আহৰ, মযং তে ইধ চীৱৰং কৰিস্সামা’’তি. সো তং আৱাসং গন্ত্ৱা ভিক্খূ পুচ্ছতি – ‘‘কহং মে, আৱুসো, চীৱৰপটিৱীসো’’তি? তে এৱং ৱদন্তি – ‘‘অযং তে, আৱুসো, চীৱৰপটিৱীসো’’তি. সো তং চীৱৰং আদায তং আৱাসং গচ্ছতি. তমেনং অন্তৰামগ্গে ভিক্খূ পুচ্ছন্তি – ‘‘আৱুসো, কহং গমিস্সসী’’তি? সো এৱং ৱদেতি – ‘‘অমুকং নাম আৱাসং গমিস্সামি, তত্থ মে ভিক্খূ চীৱৰং কৰিস্সন্তী’’তি. তে এৱং ৱদন্তি – ‘‘অলং, আৱুসো, মা অগমাসি, মযং তে ইধ চীৱৰং কৰিস্সামা’’তি. তস্স এৱং হোতি – ‘‘ইধেৱিমং চীৱৰং কাৰেস্সং ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো দিসংগমিকো পক্কমতি চীৱৰপটিৱীসং অপৱিলাযমানো. তমেনং দিসংগতং ভিক্খূ পুচ্ছন্তি – ‘‘কহং ত্ৱং, আৱুসো, ৱস্সংৱুট্ঠো, কত্থ চ তে চীৱৰপটিৱীসো’’তি? সো এৱং ৱদেতি – ‘‘অমুকস্মিং আৱাসে ৱস্সংৱুট্ঠোম্হি, তত্থ চ মে চীৱৰপটিৱীসো’’তি. তে এৱং ৱদন্তি – ‘‘গচ্ছাৱুসো, তং চীৱৰং আহৰ, মযং তে ইধ চীৱৰং কৰিস্সামা’’তি. সো তং আৱাসং গন্ত্ৱা ভিক্খূ পুচ্ছতি – ‘‘কহং মে, আৱুসো, চীৱৰপটিৱীসো’’তি? তে এৱং ৱদন্তি – ‘‘অযং তে, আৱুসো, চীৱৰপটিৱীসো’’তি. সো তং চীৱৰং আদায তং আৱাসং গচ্ছতি. তমেনং অন্তৰামগ্গে ভিক্খূ পুচ্ছন্তি – ‘‘আৱুসো, কহং গমিস্সসী’’তি? সো এৱং ৱদেতি – ‘‘অমুকং নাম আৱাসং গমিস্সামি, তত্থ মে ভিক্খূ চীৱৰং কৰিস্সন্তী’’তি. তে এৱং ৱদন্তি – ‘‘অলং, আৱুসো, মা অগমাসি, মযং তে ইধ চীৱৰং কৰিস্সামা’’তি. তস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

৩২৩. ভিক্খু অত্থতকথিনো দিসংগমিকো পক্কমতি চীৱৰপটিৱীসং অপৱিলাযমানো. তমেনং দিসংগতং ভিক্খূ পুচ্ছন্তি – ‘‘কহং ত্ৱং, আৱুসো, ৱস্সংৱুট্ঠো, কত্থ চ তে চীৱৰপটিৱীসো’’তি? সো এৱং ৱদেতি – ‘‘অমুকস্মিং আৱাসে ৱস্সংৱুট্ঠোম্হি, তত্থ চ মে চীৱৰপটিৱীসো’’তি. তে এৱং ৱদন্তি – ‘‘গচ্ছাৱুসো, তং চীৱৰং আহৰ, মযং তে ইধ চীৱৰং কৰিস্সামা’’তি. সো তং আৱাসং গন্ত্ৱা ভিক্খূ পুচ্ছতি – ‘‘কহং মে, আৱুসো, চীৱৰপটিৱীসো’’তি? তে এৱং ৱদন্তি – ‘‘অযং তে, আৱুসো, চীৱৰপটিৱীসো’’তি. সো তং চীৱৰং আদায তং আৱাসং গচ্ছতি. তস্স তং আৱাসং গতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

অপৱিলাযননৱকং নিট্ঠিতং.