১৮৯. সমাদাযসত্তকং

৩১২. ভিক্খু অত্থতকথিনো কতচীৱৰং সমাদায পক্কমতি ‘‘ন পচ্চেস্স’’ন্তি. তস্স ভিক্খুনো পক্কমনন্তিকো কথিনুদ্ধাৰো.

ভিক্খু অত্থতকথিনো চীৱৰং সমাদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং সমাদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো চীৱৰং সমাদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো চীৱৰং সমাদায পক্কমতি – ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো সুণাতি – ‘‘উব্ভতং কিৰ তস্মিং আৱাসে কথিন’’ন্তি. তস্স ভিক্খুনো সৱনন্তিকো কথিনুদ্ধাৰো.

ভিক্খু অত্থতকথিনো চীৱৰং সমাদায পক্কমতি – ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো – ‘‘পচ্চেস্সং পচ্চেস্স’’ন্তি – বহিদ্ধা কথিনুদ্ধাৰং ৱীতিনামেতি. তস্স ভিক্খুনো সীমাতিক্কন্তিকো কথিনুদ্ধাৰো.

ভিক্খু অত্থতকথিনো চীৱৰং সমাদায পক্কমতি – ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো – ‘‘পচ্চেস্সং পচ্চেস্স’’ন্তি – সম্ভুণাতি কথিনুদ্ধাৰং. তস্স ভিক্খুনো সহ ভিক্খূহি কথিনুদ্ধাৰো.

সমাদাযসত্তকং নিট্ঠিতং.