১৯০. আদাযছক্কং

৩১৩. ভিক্খু অত্থতকথিনো ৱিপ্পকতচীৱৰং আদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং, ন পচ্চেস্স’’ন্তি. সো তং চীৱৰং কাৰেতি. তস্স ভিক্খুনো নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং আদায পক্কমতি. তস্স বহিসীমগতস্স এৱং হোতি – ‘‘নেৱিমং চীৱৰং কাৰেস্সং, ন পচ্চেস্স’’ন্তি. তস্স ভিক্খুনো সন্নিট্ঠানন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং আদায পক্কমতি. তস্স বহিসীমগতস্স এৱং হোতি – ‘‘ইধেৱিমং চীৱৰং কাৰেস্সং ন পচ্চেস্স’’ন্তি. সো তং চীৱৰং কাৰেতি. তস্সং তং চীৱৰং কযিৰমানং নস্সতি. তস্স ভিক্খুনো নাসনন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং আদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো সুণাতি – ‘‘উব্ভতং কিৰ তস্মিং আৱাসে কথিন’’ন্তি. তস্স ভিক্খুনো সৱনন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং আদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো ‘‘পচ্চেস্সং পচ্চেস্স’’ন্তি বহিদ্ধা কথিনুদ্ধাৰং ৱীতিনামেতি. তস্স ভিক্খুনো সীমাতিক্কন্তিকো কথিনুদ্ধাৰো.

ভিক্খু অত্থতকথিনো ৱিপ্পকতচীৱৰং আদায পক্কমতি ‘‘পচ্চেস্স’’ন্তি. সো বহিসীমগতো তং চীৱৰং কাৰেতি. সো কতচীৱৰো ‘‘পচ্চেস্সং পচ্চেস্স’’ন্তি সম্ভুণাতি কথিনুদ্ধাৰং. তস্স ভিক্খুনো সহ ভিক্খূহি কথিনুদ্ধাৰো.

আদাযছক্কং নিট্ঠিতং.