১৮৪. ৱুড্ঢপব্বজিতৱত্থু

৩০৩. অথ খো ভগৱা কুসিনাৰাযং যথাভিৰন্তং ৱিহৰিত্ৱা যেন আতুমা তেন চাৰিকং পক্কামি মহতা ভিক্খুসঙ্ঘেন সদ্ধিং অড্ঢতেলসেহি ভিক্খুসতেহি. তেন খো পন সমযেন অঞ্ঞতৰো ৱুড্ঢপব্বজিতো আতুমাযং পটিৱসতি নহাপিতপুব্বো. তস্স দ্ৱে দাৰকা হোন্তি, মঞ্জুকা পটিভানেয্যকা, দক্খা পৰিযোদাতসিপ্পা সকে আচৰিযকে নহাপিতকম্মে. অস্সোসি খো সো ৱুড্ঢপব্বজিতো – ‘‘ভগৱা কিৰ আতুমং আগচ্ছতি মহতা ভিক্খুসঙ্ঘেন সদ্ধিং অড্ঢতেলসেহি ভিক্খুসতেহী’’তি. অথ খো সো ৱুড্ঢপব্বজিতো তে দাৰকে এতদৱোচ – ‘‘ভগৱা কিৰ, তাতা, আতুমং আগচ্ছতি মহতা ভিক্খুসঙ্ঘেন সদ্ধিং অড্ঢতেলসেহি ভিক্খুসতেহি. গচ্ছথ তুম্হে, তাতা, খুৰভণ্ডং আদায নাড়িযাৱাপকেন অনুঘৰকং অনুঘৰকং আহিণ্ডথ, লোণম্পি, তেলম্পি, তণ্ডুলম্পি, খাদনীযম্পি সংহৰথ, ভগৱতো আগতস্স যাগুপানং কৰিস্সামা’’তি. ‘‘এৱং, তাতা’’তি খো তে দাৰকা তস্স ৱুড্ঢপব্বজিতস্স পটিস্সুণিত্ৱা খুৰভণ্ডং আদায নাড়িযাৱাপকেন অনুঘৰকং অনুঘৰকং আহিণ্ডন্তি, লোণম্পি, তেলম্পি, তণ্ডুলম্পি, খাদনীযম্পি সংহৰন্তা. মনুস্সা তে দাৰকে মঞ্জুকে পটিভানেয্যকে পস্সিত্ৱা যেপি ন কাৰাপেতুকামা তেপি কাৰাপেন্তি, কাৰাপেত্ৱাপি বহুং দেন্তি. অথ খো তে দাৰকা বহুং লোণম্পি, তেলম্পি, তণ্ডুলম্পি, খাদনীযম্পি সংহৰিংসু.

অথ খো ভগৱা অনুপুব্বেন চাৰিকং চৰমানো যেন আতুমা তদৱসৰি. তত্ৰ সুদং ভগৱা আতুমাযং ৱিহৰতি ভুসাগাৰে. অথ খো সো ৱুড্ঢপব্বজিতো তস্সা ৰত্তিযা অচ্চযেন পহূতং যাগুং পটিযাদাপেত্ৱা ভগৱতো উপনামেসি – ‘‘পটিগ্গণ্হাতু মে, ভন্তে, ভগৱা যাগু’’ন্তি. জানন্তাপি তথাগতা পুচ্ছন্তি…পে… সাৱকানং ৱা সিক্খাপদং পঞ্ঞপেস্সামাতি. অথ খো ভগৱা তং ৱুড্ঢপব্বজিতং এতদৱোচ – ‘‘কুতাযং, ভিক্খু যাগূ’’তি? অথ খো সো ৱুড্ঢপব্বজিতো ভগৱতো এতমত্থং আৰোচেসি. ৱিগৰহি বুদ্ধো ভগৱা, ‘‘অননুচ্ছৱিকং, মোঘপুৰিস, অননুলোমিকং অপ্পতিৰূপং অস্সামণকং অকপ্পিযং অকৰণীযং. কথঞ্হি নাম ত্ৱং, মোঘপুৰিস, পব্বজিতো অকপ্পিযে সমাদপেস্সসি [সমাদপেসি (ক.)]. নেতং, মোঘপুৰিস, অপ্পসন্নানং ৱা পসাদায…পে… ৱিগৰহিত্ৱা ধম্মিং কথং কত্ৱা ভিক্খূ আমন্তেসি ‘ন, ভিক্খৱে, পব্বজিতেন অকপ্পিযে সমাদপেতব্বং, যো সমাদপেয্য, আপত্তি দুক্কটস্স. ন চ, ভিক্খৱে, নহাপিতপুব্বেন খুৰভণ্ডং পৰিহৰিতব্বং. যো পৰিহৰেয্য, আপত্তি দুক্কটস্সা’’’তি.

অথ খো ভগৱা আতুমাযং যথাভিৰন্তং ৱিহৰিত্ৱা যেন সাৱত্থি তেন চাৰিকং পক্কামি. অনুপুব্বেন চাৰিকং চৰমানো যেন সাৱত্থি তদৱসৰি. তত্ৰ সুদং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন সাৱত্থিযং বহুং ফলখাদনীযং উপ্পন্নং হোতি. অথ খো ভিক্খূনং এতদহোসি – ‘‘কিং নু খো ভগৱতা ফলখাদনীযং অনুঞ্ঞাতং, কিং অননুঞ্ঞাত’’ন্তি? ভগৱতো এতমত্থং আৰোচেসুং. ‘‘অনুজানামি, ভিক্খৱে, সব্বং ফলখাদনীয’’ন্তি.

৩০৪. তেন খো পন সমযেন সঙ্ঘিকানি বীজানি পুগ্গলিকায ভূমিযা ৰোপিযন্তি, পুগ্গলিকানি বীজানি সঙ্ঘিকায ভূমিযা ৰোপিযন্তি. ভগৱতো এতমত্থং আৰোচেসুং. সঙ্ঘিকানি, ভিক্খৱে, বীজানি পুগ্গলিকায ভূমিযা ৰোপিতানি ভাগং দত্ৱা পৰিভুঞ্জিতব্বানি. পুগ্গলিকানি বীজানি সঙ্ঘিকায ভূমিযা ৰোপিতানি ভাগং দত্ৱা পৰিভুঞ্জিতব্বানীতি.

ৱুড্ঢপব্বজিতৱত্থু নিট্ঠিতং.