১৮৫. চতুমহাপদেসকথা

৩০৫. তেন খো পন সমযেন ভিক্খূনং কিস্মিঞ্চি কিস্মিঞ্চি ঠানে কুক্কুচ্চং উপ্পজ্জতি – ‘‘কিং নু খো ভগৱতা অনুঞ্ঞাতং, কিং অননুঞ্ঞাত’’ন্তি? ভগৱতো এতমত্থং আৰোচেসুং. ‘‘যং, ভিক্খৱে, মযা ‘ইদং ন কপ্পতী’তি অপ্পটিক্খিত্তং তঞ্চে অকপ্পিযং অনুলোমেতি, কপ্পিযং পটিবাহতি, তং ৱো ন কপ্পতি. যং, ভিক্খৱে, মযা ‘ইদং ন কপ্পতী’তি অপ্পটিক্খিত্তং তঞ্চে কপ্পিযং অনুলোমেতি, অকপ্পিযং পটিবাহতি, তং ৱো কপ্পতি. যং, ভিক্খৱে, মযা ‘ইদং কপ্পতী’তি অননুঞ্ঞাতং তঞ্চে অকপ্পিযং অনুলোমেতি, কপ্পিযং পটিবাহতি, তং ৱো ন কপ্পতি. যং, ভিক্খৱে, মযা ‘ইদং কপ্পতী’তি অননুঞ্ঞাতং, তঞ্চে কপ্পিযং অনুলোমেতি, অকপ্পিযং পটিবাহতি, তং ৱো কপ্পতী’’তি.

অথ খো ভিক্খূনং এতদহোসি – ‘‘কপ্পতি নু খো যাৱকালিকেন যামকালিকং, ন নু খো কপ্পতি? কপ্পতি নু খো যাৱকালিকেন সত্তাহকালিকং, ন নু খো কপ্পতি? কপ্পতি নু খো যাৱকালিকেন যাৱজীৱিকং, ন নু খো কপ্পতি? কপ্পতি নু খো যামকালিকেন সত্তাহকালিকং, ন নু খো কপ্পতি? কপ্পতি নু খো যামকালিকেন যাৱজীৱিকং, ন নু খো কপ্পতি? কপ্পতি নু খো সত্তাহকালিকেন যাৱজীৱিকং, ন নু খো কপ্পতী’’তি? ভগৱতো এতমত্থং আৰোচেসুং. ‘‘যাৱকালিকেন, ভিক্খৱে, যামকালিকং, তদহু পটিগ্গহিতং কালে কপ্পতি, ৱিকালে ন কপ্পতি. যাৱকালিকেন, ভিক্খৱে, সত্তাহকালিকং, তদহু পটিগ্গহিতং কালে কপ্পতি, ৱিকালে ন কপ্পতি. যাৱকালিকেন, ভিক্খৱে, যাৱজীৱিকং, তদহু পটিগ্গহিতং কালে কপ্পতি, ৱিকালে ন কপ্পতি. যামকালিকেন, ভিক্খৱে, সত্তাহকালিকং, তদহু পটিগ্গহিতং যামে কপ্পতি, যামাতিক্কন্তে ন কপ্পতি. যামকালিকেন, ভিক্খৱে, যাৱজীৱিকং, তদহু পটিগ্গহিতং যামে কপ্পতি, যামাতিক্কন্তে ন কপ্পতি. সত্তাহকালিকেন, ভিক্খৱে, যাৱজীৱিকং পটিগ্গহিতং, সত্তাহং কপ্পতি, সত্তাহাতিক্কন্তে ন কপ্পতী’’তি.

চতুমহাপদেসকথা নিট্ঠিতা.

ভেসজ্জক্খন্ধকো ছট্ঠো.