১৮২. কেণিযজটিলৱত্থু

৩০০. [ম. নি. ২.৩৯৬ আদযো; সু. নি. সেলসুত্তম্পি পস্সিতব্বং] অথ খো ভগৱা অনুপুব্বেন চাৰিকং চৰমানো যেন আপণং তদৱসৰি. অস্সোসি খো কেণিযো জটিলো – ‘‘সমণো খলু ভো গোতমো সক্যপুত্তো সক্যকুলা পব্বজিতো আপণং অনুপ্পত্তো, তং খো পন ভৱন্তং গোতমং এৱং কল্যাণো কিত্তিসদ্দো অব্ভুগ্গতো…পে… সাধু খো পন তথাৰূপানং অৰহতং দস্সনং হোতী’’তি. অথ খো কেণিযস্স জটিলস্স এতদহোসি – ‘‘কিং নু খো অহং সমণস্স গোতমস্স হৰাপেয্য’’ন্তি. অথ খো কেণিযস্স জটিলস্স এতদহোসি – ‘‘যেপি খো তে ব্ৰাহ্মণানং [অযং পাঠো দী. নি. ১.২৮৫, ৫২৬, ৫৩৬; ম. নি. ২.৪২৭; অ. নি. ৫.১৯১-১৯২ আদযো] পুব্বকা ইসযো মন্তানং কত্তাৰো মন্তানং পৱত্তাৰো, যেসমিদং এতৰহি ব্ৰাহ্মণা পোৰাণং মন্তপদং গীতং পৱুত্তং সমিহিতং, তদনুগাযন্তি তদনুভাসন্তি, ভাসিতমনুভাসন্তি, ৱাচিতমনুৱাচেন্তি, সেয্যথিদং – অট্ঠকো ৱামকো ৱামদেৱো ৱেস্সামিত্তো যমতগ্গি [যমদগ্গি (ক.)] অঙ্গীৰসো ভাৰদ্ৱাজো ৱাসেট্ঠো কস্সপো ভগু [অযং পাঠো দী. নি. ১.২৮৫, ৫২৬, ৫৩৬; ম. নি. ২.৪২৭; অ. নি. ৫.১৯১-১৯২ আদযো], ৰত্তূপৰতা ৱিৰতা ৱিকালভোজনা, তে এৱৰূপানি পানানি সাদিযিংসু. সমণোপি গোতমো ৰত্তূপৰতো ৱিৰতো ৱিকালভোজনা, অৰহতি সমণোপি গোতমো এৱৰূপানি পানানি সাদিযিতু’’ন্তি পহূতং পানং পটিযাদাপেত্ৱা কাজেহি গাহাপেত্ৱা যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি; সম্মোদনীযং কথং সাৰণীযং ৱীতিসাৰেত্ৱা একমন্তং অট্ঠাসি. একমন্তং ঠিতো খো কেণিযো জটিলো ভগৱন্তং এতদৱোচ – ‘‘পটিগ্গণ্হাতু মে ভৱং গোতমো পান’’ন্তি. তেন হি, কেণিয, ভিক্খূনং দেহীতি. অথ খো কেণিযো জটিলো ভিক্খূনং দেতি. ভিক্খূ কুক্কুচ্চাযন্তা ন পটিগ্গণ্হন্তি. পটিগ্গণ্হথ, ভিক্খৱে, পৰিভুঞ্জথাতি. অথ খো কেণিযো জটিলো বুদ্ধপ্পমুখং ভিক্খুসঙ্ঘং পহূতেহি পানেহি সহত্থা সন্তপ্পেত্ৱা সম্পৱাৰেত্ৱা ভগৱন্তং ধোতহত্থং ওনীতপত্তপাণিং একমন্তং নিসীদি. একমন্তং নিসিন্নং খো কেণিযং জটিলং ভগৱা ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো কেণিযো জটিলো ভগৱতা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো ভগৱন্তং এতদৱোচ – ‘‘অধিৱাসেতু মে ভৱং গোতমো স্ৱাতনায ভত্তং সদ্ধিং ভিক্খুসঙ্ঘেনা’’তি. মহা খো, কেণিয, ভিক্খুসঙ্ঘো অড্ঢতেলসানি ভিক্খুসতানি, ত্ৱঞ্চ ব্ৰাহ্মণেসু অভিপ্পসন্নোতি. দুতিযম্পি খো কেণিযো জটিলো ভগৱন্তং এতদৱোচ – ‘‘কিঞ্চাপি খো, ভো গোতম, মহা ভিক্খুসঙ্ঘো অড্ঢতেলসানি ভিক্খুসতানি, অহঞ্চ ব্ৰাহ্মণেসু অভিপ্পসন্নো, অধিৱাসেতু মে ভৱং গোতমো স্ৱাতনায ভত্তং সদ্ধিং ভিক্খুসঙ্ঘেনা’’তি. মহা খো, কেণিয, ভিক্খুসঙ্ঘো অড্ঢতেলসানি ভিক্খুসতানি, ত্ৱঞ্চ ব্ৰাহ্মণেসু অভিপ্পসন্নোতি. ততিযম্পি খো কেণিযো জটিলো ভগৱন্তং এতদৱোচ – ‘‘কিঞ্চাপি খো, ভো গোতম, মহা ভিক্খুসঙ্ঘো অড্ঢতেলসানি ভিক্খুসতানি, অহঞ্চ ব্ৰাহ্মণেসু অভিপ্পসন্নো, অধিৱাসেতু ভৱং গোতমো স্ৱাতনায ভত্তং সদ্ধিং ভিক্খুসঙ্ঘেনা’’তি. অধিৱাসেসি ভগৱা তুণ্হীভাৱেন. অথ খো কেণিযো জটিলো ভগৱতো অধিৱাসনং ৱিদিত্ৱা উট্ঠাযাসনা পক্কামি. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, অট্ঠ পানানি – অম্বপানং জম্বুপানং চোচপানং মোচপানং মধূকপানং [মধুপানং (সী. স্যা.)] মুদ্দিকপানং সালূকপানং ফাৰুসকপানং. অনুজানামি, ভিক্খৱে, সব্বং ফলৰসং ঠপেত্ৱা ধঞ্ঞফলৰসং. অনুজানামি, ভিক্খৱে, সব্বং পত্তৰসং ঠপেত্ৱা ডাকৰসং. অনুজানামি, ভিক্খৱে, সব্বং পুপ্ফৰসং ঠপেত্ৱা মধূকপুপ্ফৰসং. অনুজানামি, ভিক্খৱে, উচ্ছুৰস’’ন্তি.

অথ খো কেণিযো জটিলো তস্সা ৰত্তিযা অচ্চযেন সকে অস্সমে পণীতং খাদনীযং ভোজনীযং পটিযাদাপেত্ৱা ভগৱতো কালং আৰোচাপেসি – ‘‘কালো, ভো গোতম, নিট্ঠিতং ভত্ত’’ন্তি. অথ খো ভগৱা পুব্বণ্হসমযং নিৱাসেত্ৱা পত্তচীৱৰমাদায যেন কেণিযস্স জটিলস্স অস্সমো তেনুপসঙ্কমি; উপসঙ্কমিত্ৱা পঞ্ঞত্তে আসনে নিসীদি সদ্ধিং ভিক্খুসঙ্ঘেন. অথ খো কেণিযো জটিলো বুদ্ধপ্পমুখং ভিক্খুসঙ্ঘং পণীতেন খাদনীযেন ভোজনীযেন সহত্থা সন্তপ্পেত্ৱা সম্পৱাৰেত্ৱা ভগৱন্তং ভুত্তাৱিং ওনীতপত্তপাণিং একমন্তং নিসীদি. একমন্তং নিসিন্নং খো কেণিযং জটিলং ভগৱা ইমাহি গাথাহি অনুমোদি –

‘‘অগ্গিহুত্তমুখা যঞ্ঞা, সাৱিত্তী ছন্দসো মুখং;

ৰাজা মুখং মনুস্সানং, নদীনং সাগৰো মুখং.

‘‘নক্খত্তানং মুখং চন্দো, আদিচ্চো তপতং মুখং;

পুঞ্ঞং আকঙ্খমানানং সঙ্ঘো, ৱে যজতং মুখ’’ন্তি.

অথ খো ভগৱা কেণিযং জটিলং ইমাহি গাথাহি অনুমোদিত্ৱা উট্ঠাযাসনা পক্কামি.

কেণিযজটিলৱত্থু নিট্ঠিতং.