১৮১. পঞ্চগোৰসাদিঅনুজাননা

২৯৯. অথ খো ভগৱা ভদ্দিযে যথাভিৰন্তং ৱিহৰিত্ৱা মেণ্ডকং গহপতিং অনাপুচ্ছা যেন অঙ্গুত্তৰাপো তেন চাৰিকং পক্কামি মহতা ভিক্খুসঙ্ঘেন সদ্ধিং অড্ঢতেলসেহি ভিক্খুসতেহি. অস্সোসি খো মেণ্ডকো গহপতি – ‘‘ভগৱা কিৰ যেন অঙ্গুত্তৰাপো তেন চাৰিকং পক্কন্তো মহতা ভিক্খুসঙ্ঘেন সদ্ধিং অড্ঢতেলসেহি ভিক্খুসতেহী’’তি. অথ খো মেণ্ডকো গহপতি দাসে চ কম্মকৰে চ আণাপেসি – ‘‘তেন হি, ভণে, বহুং লোণম্পি, তেলম্পি, তণ্ডুলম্পি, খাদনীযম্পি সকটেসু আৰোপেত্ৱা আগচ্ছথ, অড্ঢতেলসানি চ গোপালকসতানি অড্ঢতেলসানি চ ধেনুসতানি আদায আগচ্ছন্তু, যত্থ ভগৱন্তং পস্সিস্সাম তত্থ তৰুণেন [ধাৰুণ্হেন (সী. স্যা.)] খীৰেন ভোজেস্সামা’’তি. অথ খো মেণ্ডকো গহপতি ভগৱন্তং অন্তৰামগ্গে কন্তাৰে সম্ভাৱেসি. অথ খো মেণ্ডকো গহপতি যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং অট্ঠাসি. একমন্তং ঠিতো খো মেণ্ডকো গহপতি ভগৱন্তং এতদৱোচ – ‘‘অধিৱাসেতু মে, ভন্তে, ভগৱা স্ৱাতনায ভত্তং সদ্ধিং ভিক্খুসঙ্ঘেনা’’তি. অধিৱাসেসি ভগৱা তুণ্হীভাৱেন. অথ খো মেণ্ডকো গহপতি ভগৱতো অধিৱাসনং ৱিদিত্ৱা ভগৱন্তং অভিৱাদেত্ৱা পদক্খিণং কত্ৱা পক্কামি.

অথ খো মেণ্ডকো গহপতি তস্সা ৰত্তিযা অচ্চযেন পণীতং খাদনীযং ভোজনীযং পটিযাদাপেত্ৱা ভগৱতো কালং আৰোচাপেসি – ‘‘কালো, ভন্তে, নিট্ঠিতং ভত্ত’’ন্তি. অথ খো ভগৱা পুব্বণ্হসমযং নিৱাসেত্ৱা পত্তচীৱৰমাদায যেন মেণ্ডকস্স গহপতিস্স পৰিৱেসনা তেনুপসঙ্কমি; উপসঙ্কমিত্ৱা পঞ্ঞত্তে আসনে নিসীদি সদ্ধিং ভিক্খুসঙ্ঘেন. অথ খো মেণ্ডকো গহপতি অড্ঢতেলসানি গোপালকসতানি আণাপেসি – ‘‘তেনহি, ভণে, একমেকং ধেনুং গহেত্ৱা একমেকস্স ভিক্খুনো উপতিট্ঠথ তৰুণেন খীৰেন ভোজেস্সামা’’তি. অথ খো মেণ্ডকো গহপতি বুদ্ধপ্পমুখং ভিক্খুসঙ্ঘং পণীতেন খাদনীযেন ভোজনীযেন সহত্থা সন্তপ্পেসি সম্পৱাৰেসি, তৰুণেন চ খীৰেন. ভিক্খূ কুক্কুচ্চাযন্তা খীৰং ন পটিগ্গণ্হন্তি. পটিগ্গণ্হথ, ভিক্খৱে, পৰিভুঞ্জথাতি. অথ খো মেণ্ডকো গহপতি বুদ্ধপ্পমুখং ভিক্খুসঙ্ঘং পণীতেন খাদনীযেন ভোজনীযেন সহত্থা সন্তপ্পেত্ৱা সম্পৱাৰেত্ৱা তৰুণেন চ খীৰেন ভগৱন্তং ভুত্তাৱিং ওনীতপত্তপাণিং একমন্তং নিসীদি. একমন্তং নিসিন্নো খো মেণ্ডকো গহপতি ভগৱন্তং এতদৱোচ – ‘‘সন্তি, ভন্তে, মগ্গা কন্তাৰা, অপ্পোদকা অপ্পভক্খা, ন সুকৰা অপাথেয্যেন গন্তুং. সাধু, ভন্তে, ভগৱা ভিক্খূনং পাথেয্যং অনুজানাতূ’’তি. অথ খো ভগৱা মেণ্ডকং গহপতিং ধম্মিযা কথায সন্দস্সেত্ৱা সমাদপেত্ৱা সমুত্তেজেত্ৱা সম্পহংসেত্ৱা উট্ঠাযাসনা পক্কামি. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, পঞ্চ গোৰসে – খীৰং, দধিং, তক্কং, নৱনীতং, সপ্পিং. সন্তি, ভিক্খৱে, মগ্গা কন্তাৰা অপ্পোদকা অপ্পভক্খা, ন সুকৰা অপাথেয্যেন গন্তুং. অনুজানামি, ভিক্খৱে, পাথেয্যং পৰিযেসিতুং তণ্ডুলো তণ্ডুলত্থিকেন, মুগ্গো মুগ্গত্থিকেন, মাসো মাসত্থিকেন, লোণং লোণত্থিকেন, গুড়ো গুড়ত্থিকেন, তেলং তেলত্থিকেন, সপ্পি সপ্পিত্থিকেন. সন্তি, ভিক্খৱে, মনুস্সা, সদ্ধা পসন্না, তে কপ্পিযকাৰকানং হত্থে হিৰঞ্ঞং উপনিক্খিপন্তি – ‘ইমিনা অয্যস্স যং কপ্পিযং তং দেথা’তি. অনুজানামি, ভিক্খৱে, যং ততো কপ্পিযং তং সাদিতুং; ন ত্ৱেৱাহং, ভিক্খৱে, কেনচি পৰিযাযেন জাতৰূপৰজতং সাদিতব্বং পৰিযেসিতব্বন্তি ৱদামী’’তি.

পঞ্চগোৰসাদিঅনুজাননা নিট্ঠিতা.