১৭৯. কপ্পিযভূমিঅনুজাননা

২৯৫. তেন খো পন সমযেন ৱেসালী সুভিক্খা হোতি সুসস্সা সুলভপিণ্ডা, সুকৰা উঞ্ছেন পগ্গহেন যাপেতুং. অথ খো ভগৱতো ৰহোগতস্স পটিসল্লীনস্স এৱং চেতসো পৰিৱিতক্কো উদপাদি – ‘‘যানি তানি মযা ভিক্খূনং অনুঞ্ঞাতানি দুব্ভিক্খে দুস্সস্সে দুল্লভপিণ্ডে অন্তো ৱুট্ঠং অন্তো পক্কং সামং পক্কং উগ্গহিতপটিগ্গহিতকং ততো নীহটং পুৰেভত্তং পটিগ্গহিতং ৱনট্ঠং পোক্খৰট্ঠং, অজ্জাপি নু খো তানি ভিক্খূ পৰিভুঞ্জন্তী’’তি. অথ খো ভগৱা সাযন্হসমযং পটিসল্লানা ৱুট্ঠিতো আযস্মন্তং আনন্দং আমন্তেসি – ‘‘যানি তানি, আনন্দ, মযা ভিক্খূনং অনুঞ্ঞাতানি দুব্ভিক্খে দুস্সস্সে দুল্লভপিণ্ডে অন্তো ৱুট্ঠং অন্তো পক্কং সামং পক্কং উগ্গহিতপটিগ্গহিতকং ততো নীহটং পুৰেভত্তং পটিগ্গহিতং ৱনট্ঠং পোক্খৰট্ঠং, অজ্জাপি নু খো তানি ভিক্খূ পৰিভুঞ্জন্তী’’তি? ‘‘পৰিভুঞ্জন্তি ভগৱা’’তি. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘যানি তানি, ভিক্খৱে, মযা ভিক্খূনং অনুঞ্ঞাতানি দুব্ভিক্খে দুস্সস্সে দুল্লভপিণ্ডে অন্তো ৱুট্ঠং অন্তো পক্কং সামং পক্কং উগ্গহিতপটিগ্গহিতকং ততো নীহটং পুৰেভত্তং পটিগ্গহিতং ৱনট্ঠং পোক্খৰট্ঠং, তানাহং অজ্জতগ্গে পটিক্খিপামি. ন, ভিক্খৱে, অন্তো ৱুট্ঠং অন্তো পক্কং সামং পক্কং উগ্গহিতপটিগ্গহিতকং পৰিভুঞ্জিতব্বং. যো পৰিভুঞ্জেয্য, আপত্তি দুক্কটস্স. ন চ, ভিক্খৱে, ততো নীহটং পুৰেভত্তং পটিগ্গহিতং ৱনট্ঠং পোক্খৰট্ঠং ভুত্তাৱিনা পৱাৰিতেন অনতিৰিত্তং পৰিভুঞ্জিতব্বং. যো পৰিভুঞ্জেয্য, যথাধম্মো কাৰেতব্বো’’তি.

তেন খো পন সমযেন জানপদা মনুস্সা বহুং লোণম্পি, তেলম্পি, তণ্ডুলম্পি, খাদনীযম্পি সকটেসু আৰোপেত্ৱা বহাৰামকোট্ঠকে সকটপৰিৱট্টং কৰিত্ৱা অচ্ছন্তি – যদা পটিপাটিং লভিস্সাম, তদা ভত্তং কৰিস্সামাতি. মহা চ মেঘো উগ্গতো হোতি. অথ খো তে মনুস্সা যেনাযস্মা আনন্দো তেনুপসঙ্কমিংসু, উপসঙ্কমিত্ৱা আযস্মন্তং আনন্দং এতদৱোচুং – ‘‘ইধ, ভন্তে আনন্দ, বহুং লোণম্পি, তেলম্পি, তণ্ডুলম্পি, খাদনীযম্পি সকটেসু আৰোপিতা তিট্ঠন্তি, মহা চ মেঘো উগ্গতো; কথং নু খো, ভন্তে আনন্দ, পটিপজ্জিতব্ব’’ন্তি? অথ খো আযস্মা আনন্দো ভগৱতো এতমত্থং আৰোচেসি. ‘‘তেন হানন্দ, সঙ্ঘো পচ্চন্তিমং ৱিহাৰং কপ্পিযভূমিং সম্মন্নিত্ৱা তত্থ ৱাসেতু, যং সঙ্ঘো আকঙ্খতি ৱিহাৰং ৱা অড্ঢযোগং ৱা পাসাদং ৱা হম্মিযং ৱা গুহং ৱা. এৱঞ্চ পন, ভিক্খৱে, সম্মন্নিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. যদি সঙ্ঘস্স পত্তকল্লং, সঙ্ঘো ইত্থন্নামং ৱিহাৰং কপ্পিযভূমিং সম্মন্নেয্য, এসা ঞত্তি.

‘‘সুণাতু মে, ভন্তে, সঙ্ঘো. সঙ্ঘো ইত্থন্নামং ৱিহাৰং কপ্পিযভূমিং সম্মন্নতি. যস্সাযস্মতো খমতি ইত্থন্নামস্স ৱিহাৰস্স কপ্পিযভূমিযা সম্মুতি, সো তুণ্হস্স; যস্স নক্খমতি, সো ভাসেয্য.

‘‘সম্মতো সঙ্ঘেন ইত্থন্নামো ৱিহাৰো কপ্পিযভূমি. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

তেন খো পন সমযেন মনুস্সা তত্থেৱ সম্মুতিযা [সম্মতিকায (স্যা.)] কপ্পিযভূমিযা যাগুযো পচন্তি, ভত্তানি পচন্তি, সূপানি সম্পাদেন্তি, মংসানি কোট্টেন্তি, কট্ঠানি ফালেন্তি. অস্সোসি খো ভগৱা ৰত্তিযা পচ্চূসসমযং পচ্চুট্ঠায উচ্চাসদ্দং মহাসদ্দং কাকোৰৱসদ্দং, সুত্ৱান আযস্মন্তং আনন্দং আমন্তেসি – ‘‘কিং নু খো সো, আনন্দ, উচ্চাসদ্দো মহাসদ্দো কাকোৰৱসদ্দো’’তি? ‘‘এতৰহি, ভন্তে, মনুস্সা তত্থেৱ সম্মুতিযা কপ্পিযভূমিযা যাগুযো পচন্তি, ভত্তানি পচন্তি, সূপানি সম্পাদেন্তি, মংসানি কোট্টেন্তি, কট্ঠানি ফালেন্তি. সো এসো, ভগৱা, উচ্চাসদ্দো মহাসদ্দো কাকোৰৱসদ্দো’’তি. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, সম্মুতি [সম্মতিকা (স্যা.)] কপ্পিযভূমি পৰিভুঞ্জিতব্বা. যো পৰিভুঞ্জেয্য, আপত্তি দুক্কটস্স. অনুজানামি, ভিক্খৱে, তিস্সো কপ্পিযভূমিযো – উস্সাৱনন্তিকং গোনিসাদিকং গহপতি’’ন্তি.

তেন খো পন সমযেন আযস্মা যসোজো গিলানো হোতি. তস্সত্থায ভেসজ্জানি আহৰিযন্তি. তানি ভিক্খূ বহি ৱাসেন্তি. উক্কপিণ্ডিকাপি খাদন্তি, চোৰাপি হৰন্তি. ভগৱতো এতমত্থং আৰোচেসুং. অনুজানামি, ভিক্খৱে, সম্মুতিং কপ্পিযভূমিং পৰিভুঞ্জিতুং. অনুজানামি, ভিক্খৱে, চতস্সো কপ্পিযভূমিযো – উস্সাৱনন্তিকং গোনিসাদিকং গহপতিং সম্মুতিন্তি.

কপ্পিযভূমিঅনুজাননা নিট্ঠিতা.

সীহভাণৱাৰো নিট্ঠিতো চতুত্থো.