১৪৪. ভণ্ডনকাৰকৱত্থু

২৪০. তেন খো পন সমযেন সম্বহুলা সন্দিট্ঠা সম্ভত্তা ভিক্খূ কোসলেসু জনপদে অঞ্ঞতৰস্মিং আৱাসে ৱস্সং উপগচ্ছিংসু. তেসং সামন্তা অঞ্ঞে ভিক্খূ ভণ্ডনকাৰকা কলহকাৰকা ৱিৱাদকাৰকা ভস্সকাৰকা সঙ্ঘে অধিকৰণকাৰকা ৱস্সং উপগচ্ছিংসু – মযং তেসং ভিক্খূনং ৱস্সংৱুট্ঠানং পৱাৰণায পৱাৰণং ঠপেস্সামাতি. অস্সোসুং খো তে ভিক্খূ – ‘‘অম্হাকং কিৰ সামন্তা অঞ্ঞে ভিক্খূ ভণ্ডনকাৰকা কলহকাৰকা ৱিৱাদকাৰকা ভস্সকাৰকা সঙ্ঘে অধিকৰণকাৰকা ৱস্সং উপগতা – মযং তেসং ভিক্খূনং ৱস্সংৱুট্ঠানং পৱাৰণায পৱাৰণং ঠপেস্সামা’’তি. কথং নু খো অম্হেহি পটিপজ্জিতব্বন্তি? ভগৱতো এতমত্থং আৰোচেসুং.

ইধ পন, ভিক্খৱে, সম্বহুলা সন্দিট্ঠা সম্ভত্তা ভিক্খূ অঞ্ঞতৰস্মিং আৱাসে ৱস্সং উপগচ্ছন্তি. তেসং সামন্তা অঞ্ঞে ভিক্খূ ভণ্ডনকাৰকা কলহকাৰকা ৱিৱাদকাৰকা ভস্সকাৰকা সঙ্ঘে অধিকৰণকাৰকা ৱস্সং উপগচ্ছন্তি – মযং তেসং ভিক্খূনং ৱস্সংৱুট্ঠানং পৱাৰণায পৱাৰণং ঠপেস্সামাতি. অনুজানামি, ভিক্খৱে, তেহি ভিক্খূহি দ্ৱে তযো উপোসথে চাতুদ্দসিকে কাতুং – কথং মযং তেহি ভিক্খূহি পঠমতৰং পৱাৰেয্যামাতি. তে চে, ভিক্খৱে, ভিক্খূ ভণ্ডনকাৰকা কলহকাৰকা ৱিৱাদকাৰকা ভস্সকাৰকা সঙ্ঘে অধিকৰণকাৰকা তং আৱাসং আগচ্ছন্তি, তেহি, ভিক্খৱে, আৱাসিকেহি ভিক্খূহি লহুং লহুং সন্নিপতিত্ৱা পৱাৰেতব্বং, পৱাৰেত্ৱা ৱত্তব্বা – ‘‘পৱাৰিতা খো মযং, আৱুসো; যথাযস্মন্তা মঞ্ঞন্তি তথা কৰোন্তূ’’তি. তে চে, ভিক্খৱে, ভিক্খূ ভণ্ডনকাৰকা কলহকাৰকা ৱিৱাদকাৰকা ভস্সকাৰকা সঙ্ঘে অধিকৰণকাৰকা অসংৱিহিতা তং আৱাসং আগচ্ছন্তি, তেহি, ভিক্খৱে, আৱাসিকেহি ভিক্খূহি আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, পচ্চুগ্গন্ত্ৱা পত্তচীৱৰং পটিগ্গহেতব্বং, পানীযেন পৰিপুচ্ছিতব্বা; তেসং ৱিক্খিত্ৱা [ৱিক্খিপাপেত্ৱা (পটিৱিসোধকানং মতি), আচিক্খিত্ৱা (ক.)] নিস্সীমং গন্ত্ৱা পৱাৰেতব্বং, পৱাৰেত্ৱা ৱত্তব্বা – ‘‘পৱাৰিতা খো মযং, আৱুসো; যথাযস্মন্তা মঞ্ঞন্তি তথা কৰোন্তূ’’তি. এৱঞ্চেতং লভেথ, ইচ্চেতং কুসলং. নো চে লভেথ, আৱাসিকেন ভিক্খুনা ব্যত্তেন পটিবলেন আৱাসিকা ভিক্খূ ঞাপেতব্বা –

‘‘সুণন্তু মে, আযস্মন্তো [আযস্মন্তা (ক.)], আৱাসিকা. যদাযস্মন্তানং পত্তকল্লং, ইদানি উপোসথং কৰেয্যাম, পাতিমোক্খং উদ্দিসেয্যাম, আগমে কাড়ে পৱাৰেয্যামা’’তি. তে চে, ভিক্খৱে, ভিক্খূ ভণ্ডনকাৰকা কলহকাৰকা ৱিৱাদকাৰকা ভস্সকাৰকা সঙ্ঘে অধিকৰণকাৰকা তে ভিক্খূ এৱং ৱদেয্যুং – ‘‘সাধাৱুসো, ইদানেৱ নো পৱাৰেথা’’তি, তে এৱমস্সু ৱচনীযা – ‘‘অনিস্সৰা খো তুম্হে, আৱুসো, অম্হাকং পৱাৰণায; ন তাৱ মযং পৱাৰেয্যামা’’তি. তে চে, ভিক্খৱে, ভিক্খূ ভণ্ডনকাৰকা কলহকাৰকা ৱিৱাদকাৰকা ভস্সকাৰকা সঙ্ঘে অধিকৰণকাৰকা তং কাড়ং অনুৱসেয্যুং, আৱাসিকেন, ভিক্খৱে, ভিক্খুনা ব্যত্তেন পটিবলেন আৱাসিকা ভিক্খূ ঞাপেতব্বা –

‘‘সুণন্তু মে, আযস্মন্তো, আৱাসিকা. যদাযস্মন্তানং পত্তকল্লং, ইদানি উপোসথং কৰেয্যাম, পাতিমোক্খং উদ্দিসেয্যাম, আগমে জুণ্হে পৱাৰেয্যামা’’তি. তে চে, ভিক্খৱে, ভিক্খূ ভণ্ডনকাৰকা কলহকাৰকা ৱিৱাদকাৰকা ভস্সকাৰকা সঙ্ঘে অধিকৰণকাৰকা তে ভিক্খূ এৱং ৱদেয্যুং – ‘‘সাধাৱুসো, ইদানেৱ নো পৱাৰেয্যাথা’’তি, তে এৱমস্সু ৱচনীযা – ‘‘অনিস্সৰা খো তুম্হে, আৱুসো, অম্হাকং পৱাৰণায, ন তাৱ মযং পৱাৰেয্যামা’’তি. তে চে, ভিক্খৱে, ভিক্খূ ভণ্ডনকাৰকা কলহকাৰকা ৱিৱাদকাৰকা ভস্সকাৰকা সঙ্ঘে অধিকৰণকাৰকা তম্পি জুণ্হং অনুৱসেয্যুং, তেহি, ভিক্খৱে, ভিক্খূহি সব্বেহেৱ আগমে জুণ্হে কোমুদিযা চাতুমাসিনিযা অকামা পৱাৰেতব্বং.

তেহি চে, ভিক্খৱে, ভিক্খূহি পৱাৰিযমানে গিলানো অগিলানস্স পৱাৰণং ঠপেতি, সো এৱমস্স ৱচনীযো – ‘‘আযস্মা খো গিলানো. গিলানো চ অননুযোগক্খমো ৱুত্তো ভগৱতা. আগমেহি, আৱুসো, যাৱ অৰোগো হোসি. অৰোগো আকঙ্খমানো চোদেস্সসী’’তি. এৱঞ্চে ৱুচ্চমানো চোদেতি, অনাদৰিযে পাচিত্তিযং. তেহি চে, ভিক্খৱে, ভিক্খূহি পৱাৰিযমানে অগিলানো গিলানস্স পৱাৰণং ঠপেতি, সো এৱমস্স ৱচনীযো – ‘‘অযং খো, আৱুসো, ভিক্খু গিলানো. গিলানো চ অননুযোগক্খমো ৱুত্তো ভগৱতা. আগমেহি, আৱুসো, যাৱাযং ভিক্খু অৰোগো হোতি. অৰোগং আকঙ্খমানো চোদেস্সসী’’তি. এৱঞ্চে ৱুচ্চমানো চোদেতি, অনাদৰিযে পাচিত্তিযং. তেহি চে, ভিক্খৱে, ভিক্খূহি পৱাৰিযমানে গিলানো গিলানস্স পৱাৰণং ঠপেতি, সো এৱমস্স ৱচনীযো – ‘‘আযস্মন্তা খো গিলানা. গিলানো চ অননুযোগক্খমো ৱুত্তো ভগৱতা. আগমেহি, আৱুসো, যাৱ অৰোগা হোথ. অৰোগো অৰোগং আকঙ্খমানো চোদেস্সসী’’তি [যাৱ অৰোগো হোতি, অৰোগং আকঙ্খমানো চোদেস্সসীতি (ক.)]. এৱঞ্চে ৱুচ্চমানো চোদেতি, অনাদৰিযে পাচিত্তিযং. তেহি চে, ভিক্খৱে, ভিক্খূহি পৱাৰিযমানে অগিলানো অগিলানস্স পৱাৰণং ঠপেতি, উভো সঙ্ঘেন সমনুযুঞ্জিত্ৱা সমনুগাহিত্ৱা [সমনুভাসিত্ৱা (সী.)] যথাধম্মং কাৰাপেত্ৱা সঙ্ঘেন পৱাৰেতব্বন্তি.

ভণ্ডনকাৰকৱত্থু নিট্ঠিতং.