৪. পৱাৰণাক্খন্ধকো

১২০. অফাসুকৱিহাৰো

২০৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন সম্বহুলা সন্দিট্ঠা সম্ভত্তা ভিক্খূ কোসলেসু জনপদে অঞ্ঞতৰস্মিং আৱাসে ৱস্সং উপগচ্ছিংসু. অথ খো তেসং ভিক্খূনং এতদহোসি – ‘‘কেন নু খো মযং উপাযেন সমগ্গা সম্মোদমানা অৱিৱদমানা ফাসুকং ৱস্সং ৱসেয্যাম, ন চ পিণ্ডকেন কিলমেয্যামা’’তি. অথ খো তেসং ভিক্খূনং এতদহোসি – ‘‘সচে খো মযং অঞ্ঞমঞ্ঞং নেৱ আলপেয্যাম ন সল্লপেয্যাম – যো পঠমং গামতো পিণ্ডায পটিক্কমেয্য সো আসনং পঞ্ঞপেয্য, পাদোদকং পাদপীঠং পাদকথলিকং উপনিক্খিপেয্য, অৱক্কাৰপাতিং ধোৱিত্ৱা উপট্ঠাপেয্য, পানীযং পৰিভোজনীযং উপট্ঠাপেয্য; যো পচ্ছা গামতো পিণ্ডায পটিক্কমেয্য, সচস্স ভুত্তাৱসেসো, সচে আকঙ্খেয্য ভুঞ্জেয্য, নো চে আকঙ্খেয্য অপ্পহৰিতে ৱা ছড্ডেয্য, অপ্পাণকে ৱা উদকে ওপিলাপেয্য; সো আসনং উদ্ধৰেয্য, পাদোদকং পাদপীঠং পাদকথলিকং পটিসামেয্য, অৱক্কাৰপাতিং ধোৱিত্ৱা পটিসামেয্য, পানীযং পৰিভোজনীযং পটিসামেয্য, ভত্তগ্গং সম্মজ্জেয্য; যো পস্সেয্য পানীযঘটং ৱা পৰিভোজনীযঘটং ৱা ৱচ্চঘটং ৱা ৰিত্তং তুচ্ছং সো উপট্ঠাপেয্য; সচস্স হোতি অৱিসয্হং, হত্থৱিকাৰেন দুতিযং আমন্তেত্ৱা হত্থৱিলঙ্ঘকেন উপট্ঠাপেয্য; ন ত্ৱেৱ তপ্পচ্চযা ৱাচং ভিন্দেয্য – এৱং খো মযং সমগ্গা সম্মোদমানা অৱিৱদমানা ফাসুকং ৱস্সং ৱসেয্যাম, ন চ পিণ্ডকেন কিলমেয্যামা’’তি. অথ খো তে ভিক্খূ অঞ্ঞমঞ্ঞং নেৱ আলপিংসু, ন সল্লপিংসু. যো পঠমং গামতো পিণ্ডায পটিক্কমতি, সো আসনং পঞ্ঞপেতি, পাদোদকং পাদপীঠং পাদকথলিকং উপনিক্খিপতি, অৱক্কাৰপাতিং ধোৱিত্ৱা উপট্ঠাপেতি, পানীযং পৰিভোজনীযং উপট্ঠাপেতি. যো পচ্ছা গামতো পিণ্ডায পটিক্কমতি, সচে হোতি ভুত্তাৱসেসো, সচে আকঙ্খতি ভুঞ্জতি, নো চে আকঙ্খতি অপ্পহৰিতে ৱা ছড্ডেতি, অপ্পাণকে ৱা উদকে ওপিলাপেতি; সো আসনং উদ্ধৰতি, পাদোদকং পাদপীঠং পাদকথলিকং পটিসামেতি, অৱক্কাৰপাতিং ধোৱিত্ৱা পটিসামেতি, পানীযং পৰিভোজনীযং পটিসামেতি, ভত্তগ্গং সম্মজ্জতি. যো পস্সতি পানীযঘটং ৱা পৰিভোজনীযঘটং ৱা ৱচ্চঘটং ৱা ৰিত্তং তুচ্ছং সো উপট্ঠাপেতি. সচস্স হোতি অৱিসয্হং, হত্থৱিকাৰেন দুতিযং আমন্তেত্ৱা হত্থৱিলঙ্ঘকেন উপট্ঠাপেতি, ন ত্ৱেৱ তপ্পচ্চযা ৱাচং ভিন্দতি.

আচিণ্ণং খো পনেতং ৱস্সংৱুট্ঠানং ভিক্খূনং ভগৱন্তং দস্সনায উপসঙ্কমিতুং. অথ খো তে ভিক্খূ ৱস্সংৱুট্ঠা তেমাসচ্চযেন সেনাসনং সংসামেত্ৱা পত্তচীৱৰমাদায যেন সাৱত্থি তেন পক্কমিংসু. অনুপুব্বেন যেন সাৱত্থি জেতৱনং অনাথপিণ্ডিকস্স আৰামো যেন ভগৱা তেনুপসঙ্কমিংসু, উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. আচিণ্ণং খো পনেতং বুদ্ধানং ভগৱন্তানং আগন্তুকেহি ভিক্খূহি সদ্ধিং পটিসম্মোদিতুং. অথ খো ভগৱা তে ভিক্খূ এতদৱোচ – ‘‘কচ্চি, ভিক্খৱে, খমনীযং, কচ্চি যাপনীযং, কচ্চি সমগ্গা সম্মোদমানা অৱিৱদমানা ফাসুকং ৱস্সং ৱসিত্থ, ন চ পিণ্ডকেন কিলমিত্থা’’তি? ‘‘খমনীযং ভগৱা, যাপনীযং ভগৱা. সমগ্গা চ মযং, ভন্তে, সম্মোদমানা অৱিৱদমানা ফাসুকং ৱস্সং ৱসিম্হা, ন চ পিণ্ডকেন কিলমিম্হা’’তি. জানন্তাপি তথাগতা পুচ্ছন্তি, জানন্তাপি ন পুচ্ছন্তি. কালং ৱিদিত্ৱা পুচ্ছন্তি, কালং ৱিদিত্ৱা ন পুচ্ছন্তি. অত্থসংহিতং তথাগতা পুচ্ছন্তি, নো অনত্থসংহিতং. অনত্থসংহিতে সেতুঘাতো তথাগতানং. দ্ৱীহাকাৰেহি বুদ্ধা ভগৱন্তো ভিক্খূ পটিপুচ্ছন্তি – ধম্মং ৱা দেসেস্সাম, সাৱকানং ৱা সিক্খাপদং পঞ্ঞপেস্সামাতি. অথ খো ভগৱা তে ভিক্খূ এতদৱোচ – ‘‘যথাকথং পন তুম্হে, ভিক্খৱে, সমগ্গা সম্মোদমানা অৱিৱদমানা ফাসুকং ৱস্সং ৱসিত্থ, ন চ পিণ্ডকেন কিলমিত্থা’’তি.

ইধ মযং, ভন্তে, সম্বহুলা সন্দিট্ঠা সম্ভত্তা ভিক্খূ কোসলেসু জনপদে অঞ্ঞতৰস্মিং আৱাসে ৱস্সং উপগচ্ছিম্হা. তেসং নো, ভন্তে, অম্হাকং এতদহোসি – ‘‘কেন নু খো মযং উপাযেন সমগ্গা সম্মোদমানা অৱিৱদমানা ফাসুকং ৱস্সং ৱসেয্যাম, ন চ পিণ্ডকেন কিলমেয্যামা’’তি. তেসং নো, ভন্তে, অম্হাকং এতদহোসি – ‘‘সচে খো মযং অঞ্ঞমঞ্ঞং নেৱ আলপেয্যাম ন সল্লপেয্যাম – যো পঠমং গামতো পিণ্ডায পটিক্কমেয্য সো আসনং পঞ্ঞপেয্য, পাদোদকং পাদপীঠং পাদকথলিকং উপনিক্খিপেয্য, অৱক্কাৰপাতিং ধোৱিত্ৱা উপট্ঠাপেয্য, পানীযং পৰিভোজনীযং উপট্ঠাপেয্য; যো পচ্ছা গামতো পিণ্ডায পটিক্কমেয্য, সচস্স ভুত্তাৱসেসো, সচে আকঙ্খেয্য ভুঞ্জেয্য, নো চে আকঙ্খেয্য অপ্পহৰিতে ৱা ছড্ডেয্য, অপ্পাণকে ৱা উদকে ওপিলাপেয্য; সো আসনং উদ্ধৰেয্য, পাদোদকং পাদপীঠং পাদকথলিকং পটিসামেয্য, অৱক্কাৰপাতিং ধোৱিত্ৱা পটিসামেয্য, পানীযং পৰিভোজনীযং পটিসামেয্য, ভত্তগ্গং সম্মজ্জেয্য; যো পস্সেয্য পানীযঘটং ৱা পৰিভোজনীযঘটং ৱা ৱচ্চঘটং ৱা ৰিত্তং তুচ্ছং সো উপট্ঠাপেয্য; সচস্স হোতি অৱিসয্হং, হত্থৱিকাৰেন দুতিযং আমন্তেত্ৱা হত্থৱিলঙ্ঘকেন উপট্ঠাপেয্য; ন ত্ৱেৱ তপ্পচ্চযা ৱাচং ভিন্দেয্য – এৱং খো মযং সমগ্গা সম্মোদমানা অৱিৱদমানা ফাসুকং ৱস্সং ৱসেয্যাম, ন চ পিণ্ডকেন কিলমেয্যামা’’তি. অথ খো মযং, ভন্তে, অঞ্ঞমঞ্ঞং নেৱ আলপিম্হা ন সল্লৱিম্হা. যো পঠমং গামতো পিণ্ডায পটিক্কমতি সো আসনং পঞ্ঞপেতি, পাদোদকং পাদপীঠং পাদকথলিকং উপনিক্খিপতি, অৱক্কাৰপাতিং ধোৱিত্ৱা উপট্ঠাপেতি, পানীযং পৰিভোজনীযং উপট্ঠাপেতি. যো পচ্ছা গামতো পিণ্ডায পটিক্কমতি, সচে হোতি ভুত্তাৱসেসো, সচে আকঙ্খতি ভুঞ্জতি, নো চে আকঙ্খতি অপ্পহৰিতে ৱা ছড্ডেতি, অপ্পাণকে ৱা উদকে ওপিলাপেতি, সো আসনং উদ্ধৰতি, পাদোদকং পাদপীঠং পাদকথলিকং পটিসামেতি, অৱক্কাৰপাতিং ধোৱিত্ৱা পটিসামেতি, পানীযং পৰিভোজনীযং পটিসামেতি, ভত্তগ্গং সম্মজ্জতি. যো পস্সতি পানীযঘটং ৱা পৰিভোজনীযঘটং ৱা ৱচ্চঘটং ৱা ৰিত্তং তুচ্ছং সো উপট্ঠাপেতি. সচস্স হোতি অৱিসয্হং, হত্থৱিকাৰেন দুতিযং আমন্তেত্ৱা হত্থৱিলঙ্ঘকেন উপট্ঠাপেতি, ন ত্ৱেৱ তপ্পচ্চযা ৱাচং ভিন্দতি. এৱং খো মযং, ভন্তে, সমগ্গা সম্মোদমানা অৱিৱদমানা ফাসুকং ৱস্সং ৱসিম্হা, ন চ পিণ্ডকেন কিলমিম্হাতি.

অথ খো ভগৱা ভিক্খূ আমন্তেসি – ‘‘অফাসুঞ্ঞেৱ [অফাসুকঞ্ঞেৱ (সী.)] কিৰমে [কিৰিমে (ক.)], ভিক্খৱে, মোঘপুৰিসা ৱুট্ঠা [ৱুত্থা (ক.)] সমানা ফাসুম্হা [ফাসুকম্হা (সী.)] ৱুট্ঠাতি পটিজানন্তি. পসুসংৱাসঞ্ঞেৱ কিৰমে, ভিক্খৱে, মোঘপুৰিসা ৱুট্ঠা সমানা ফাসুম্হা ৱুট্ঠাতি পটিজানন্তি. এড়কসংৱাসঞ্ঞেৱ কিৰমে, ভিক্খৱে, মোঘপুৰিসা ৱুট্ঠা সমানা ফাসুম্হা ৱুট্ঠাতি পটিজানন্তি. সপত্তসংৱাসঞ্ঞেৱ কিৰমে, ভিক্খৱে, মোঘপুৰিসা ৱুট্ঠা সমানা ফাসুম্হা ৱুট্ঠাতি পটিজানন্তি. কথঞ্হি নামিমে, ভিক্খৱে, মোঘপুৰিসা মূগব্বতং তিত্থিযসমাদানং সমাদিযিস্স’’ন্তি. নেতং, ভিক্খৱে, অপ্পসন্নানং ৱা পসাদায…পে… ৱিগৰহিত্ৱা ধম্মিং কথং কত্ৱা ভিক্খূ আমন্তেসি – ন, ভিক্খৱে, মূগব্বতং তিত্থিযসমাদানং সমাদিযিতব্বং. যো সমাদিযেয্য, আপত্তি দুক্কটস্স. অনুজানামি, ভিক্খৱে, ৱস্সংৱুট্ঠানং ভিক্খূনং তীহি ঠানেহি পৱাৰেতুং – দিট্ঠেন ৱা সুতেন ৱা পৰিসঙ্কায ৱা. সা ৱো ভৱিস্সতি অঞ্ঞমঞ্ঞানুলোমতা আপত্তিৱুট্ঠানতা ৱিনযপুৰেক্খাৰতা. এৱঞ্চ পন, ভিক্খৱে, পৱাৰেতব্বং. ব্যত্তেন ভিক্খুনা পটিবলেন সঙ্ঘো ঞাপেতব্বো –

২১০. ‘‘সুণাতু মে, ভন্তে, সঙ্ঘো. অজ্জ পৱাৰণা. যদি সঙ্ঘস্স পত্তকল্লং, সঙ্ঘো পৱাৰেয্যা’’তি.

থেৰেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘সঙ্ঘং, আৱুসো, পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামি. দুতিযম্পি, আৱুসো, সঙ্ঘং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামি. ততিযম্পি, আৱুসো, সঙ্ঘং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামী’’তি.

নৱকেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘সঙ্ঘং, ভন্তে, পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামি. দুতিযম্পি, ভন্তে, সঙ্ঘং…পে… ততিযম্পি, ভন্তে, সঙ্ঘং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামী’’তি.

২১১. তেন খো পন সমযেন ছব্বগ্গিযা ভিক্খূ থেৰেসু ভিক্খূসু উক্কুটিকং নিসিন্নেসু পৱাৰযমানেসু আসনেসু অচ্ছন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ থেৰেসু ভিক্খূসু উক্কুটিকং নিসিন্নেসু পৱাৰযমানেসু আসনেসু অচ্ছিস্সন্তী’’তি. অথ খো তে ভিক্খূ ভগৱতো এতমত্থং আৰোচেসুং…পে… ‘‘সচ্চং কিৰ, ভিক্খৱে, ছব্বগ্গিযা ভিক্খূ থেৰেসু ভিক্খূসু উক্কুটিকং নিসিন্নেসু পৱাৰযমানেসু আসনেসু অচ্ছন্তী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… ‘‘কথঞ্হি নাম তে, ভিক্খৱে, মোঘপুৰিসা থেৰেসু ভিক্খূসু উক্কুটিকং নিসিন্নেসু পৱাৰযমানেসু আসনেসু অচ্ছিস্স’’ন্তি. নেতং, ভিক্খৱে, অপ্পসন্নানং ৱা পসাদায, পসন্নানং ৱা ভিয্যোভাৱায…পে… ৱিগৰহিত্ৱা ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, থেৰেসু ভিক্খূসু উক্কুটিকং নিসিন্নেসু পৱাৰযমানেসু আসনেসু অচ্ছিতব্বং. যো অচ্ছেয্য, আপত্তি দুক্কটস্স. অনুজানামি, ভিক্খৱে, সব্বেহেৱ উক্কুটিকং নিসিন্নেহি পৱাৰেতু’’ন্তি.

তেন খো পন সমযেন অঞ্ঞতৰো থেৰো জৰাদুব্বলো যাৱ সব্বে পৱাৰেন্তীতি [যাৱ সব্বে পৱাৰেন্তি (স্যা.)] উক্কুটিকং নিসিন্নো আগমযমানো মুচ্ছিতো পপতি. ভগৱতো এতমত্থং আৰোচেসুং. অনুজানামি, ভিক্খৱে, তদমন্তৰা উক্কুটিকং নিসীদিতুং যাৱ পৱাৰেতি, পৱাৰেত্ৱা আসনে নিসীদিতুন্তি.

অফাসুকৱিহাৰো নিট্ঠিতো.

১২১. পৱাৰণাভেদা

২১২. অথ খো ভিক্খূনং এতদহোসি – ‘‘কতি নু খো পৱাৰণা’’তি? ভগৱতো এতমত্থং আৰোচেসুং. দ্ৱেমা, ভিক্খৱে, পৱাৰণা – চাতুদ্দসিকা চ পন্নৰসিকা চ. ইমা খো, ভিক্খৱে, দ্ৱে পৱাৰণাতি.

অথ খো ভিক্খূনং এতদহোসি – ‘‘কতি নু খো পৱাৰণকম্মানী’’তি? [পৱাৰণাকম্মানীতি (স্যা.)] ভগৱতো এতমত্থং আৰোচেসুং. চত্তাৰিমানি, ভিক্খৱে, পৱাৰণকম্মানি – অধম্মেন ৱগ্গং পৱাৰণকম্মং, অধম্মেন সমগ্গং পৱাৰণকম্মং, ধম্মেন ৱগ্গং পৱাৰণকম্মং, ধম্মেন সমগ্গং পৱাৰণকম্মং. তত্ৰ, ভিক্খৱে, যদিদং অধম্মেন ৱগ্গং পৱাৰণকম্মং, ন, ভিক্খৱে, এৱৰূপং পৱাৰণকম্মং কাতব্বং; ন চ মযা এৱৰূপং পৱাৰণকম্মং অনুঞ্ঞাতং. তত্ৰ, ভিক্খৱে, যদিদং অধম্মেন সমগ্গং পৱাৰণকম্মং, ন, ভিক্খৱে, এৱৰূপং পৱাৰণকম্মং কাতব্বং; ন চ মযা এৱৰূপং পৱাৰণকম্মং অনুঞ্ঞাতং. তত্ৰ, ভিক্খৱে, যদিদং ধম্মেন ৱগ্গং পৱাৰণকম্মং, ন, ভিক্খৱে, এৱৰূপং পৱাৰণকম্মং কাতব্বং; ন চ মযা এৱৰূপং পৱাৰণকম্মং অনুঞ্ঞাতং. তত্ৰ, ভিক্খৱে, যদিদং ধম্মেন সমগ্গং পৱাৰণকম্মং, এৱৰূপং, ভিক্খৱে, পৱাৰণকম্মং কাতব্বং; এৱৰূপঞ্চ মযা পৱাৰণকম্মং অনুঞ্ঞাতং. তস্মাতিহ, ভিক্খৱে, এৱৰূপং পৱাৰণকম্মং কৰিস্সাম যদিদং ধম্মেন সমগ্গন্তি, এৱঞ্হি ৱো, ভিক্খৱে, সিক্খিতব্বন্তি.

পৱাৰণাভেদা নিট্ঠিতা.

১২২. পৱাৰণাদানানুজাননা

২১৩. অথ খো ভগৱা ভিক্খূ আমন্তেসি – ‘‘সন্নিপতথ, ভিক্খৱে. সঙ্ঘো পৱাৰেস্সতী’’তি. এৱং ৱুত্তে অঞ্ঞতৰো ভিক্খু ভগৱন্তং এতদৱোচ – ‘‘অত্থি, ভন্তে, ভিক্খু গিলানো, সো অনাগতো’’তি. অনুজানামি, ভিক্খৱে, গিলানেন ভিক্খুনা পৱাৰণং দাতুং. এৱঞ্চ পন, ভিক্খৱে, দাতব্বা – তেন গিলানেন ভিক্খুনা একং ভিক্খুং উপসঙ্কমিত্ৱা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘পৱাৰণং দম্মি, পৱাৰণং মে হৰ, পৱাৰণং মে আৰোচেহি, মমত্থায পৱাৰেহী’’তি কাযেন ৱিঞ্ঞাপেতি, ৱাচায ৱিঞ্ঞাপেতি, কাযেন ৱাচায ৱিঞ্ঞাপেতি, দিন্না হোতি পৱাৰণা; ন কাযেন ৱিঞ্ঞাপেতি, ন ৱাচায ৱিঞ্ঞাপেতি, ন কাযেন ৱাচায ৱিঞ্ঞাপেতি, ন দিন্না হোতি পৱাৰণা. এৱঞ্চেতং লভেথ, ইচ্চেতং কুসলং. নো চে লভেথ, সো, ভিক্খৱে, গিলানো ভিক্খু মঞ্চেন ৱা পীঠেন ৱা সঙ্ঘমজ্ঝে আনেত্ৱা পৱাৰেতব্বং. সচে, ভিক্খৱে, গিলানুপট্ঠাকানং ভিক্খূনং এতদহোসি – ‘‘সচে খো মযং গিলানং ঠানা চাৱেস্সাম, আবাধো ৱা অভিৱড্ঢিস্সতি, কালংকিৰিযা ৱা ভৱিস্সতী’’তি ন, ভিক্খৱে, গিলানো ভিক্খু ঠানা চাৱেতব্বো. সঙ্ঘেন তত্থ গন্ত্ৱা পৱাৰেতব্বং; ন ত্ৱেৱ ৱগ্গেন সঙ্ঘেন পৱাৰেতব্বং. পৱাৰেয্য চে, আপত্তি দুক্কটস্স.

পৱাৰণহাৰকো [পৱাৰণাহাৰকো (স্যা.)] চে, ভিক্খৱে, দিন্নায পৱাৰণায তত্থেৱ পক্কমতি, অঞ্ঞস্স দাতব্বা পৱাৰণা. পৱাৰণহাৰকো চে, ভিক্খৱে, দিন্নায পৱাৰণায তত্থেৱ ৱিব্ভমতি…পে… কালংকৰোতি… সামণেৰো পটিজানাতি… সিক্খং পচ্চক্খাতকো পটিজানাতি… অন্তিমৱত্থুং অজ্ঝাপন্নকো পটিজানাতি… উম্মত্তকো পটিজানাতি… খিত্তচিত্তো পটিজানাতি… ৱেদনাট্টো পটিজানাতি… আপত্তিযা অদস্সনে উক্খিত্তকো পটিজানাতি… আপত্তিযা অপ্পটিকম্মে উক্খিত্তকো পটিজানাতি… পাপিকায দিট্ঠিযা অপ্পটিনিস্সগ্গে উক্খিত্তকো পটিজানাতি… পণ্ডকো পটিজানাতি… থেয্যসংৱাসকো পটিজানাতি… তিত্থিযপক্কন্তকো পটিজানাতি… তিৰচ্ছানগতো পটিজানাতি… মাতুঘাতকো পটিজানাতি… পিতুঘাতকো পটিজানাতি… অৰহন্তঘাতকো পটিজানাতি… ভিক্খুনিদূসকো পটিজানাতি… সঙ্ঘভেদকো পটিজানাতি … লোহিতুপ্পাদকো পটিজানাতি… উভতোব্যঞ্জনকো পটিজানাতি, অঞ্ঞস্স দাতব্বা পৱাৰণা.

পৱাৰণহাৰকো চে, ভিক্খৱে, দিন্নায পৱাৰণায অন্তৰামগ্গে পক্কমতি, অনাহটা হোতি পৱাৰণা. পৱাৰণহাৰকো চে, ভিক্খৱে, দিন্নায পৱাৰণায অন্তৰামগ্গে ৱিব্ভমতি…পে… কালংকৰোতি… সামণেৰো পটিজানাতি… সিক্খং পচ্চক্খাতকো পটিজানাতি… অন্তিমৱত্থুং অজ্ঝাপন্নকো পটিজানাতি… উম্মত্তকো পটিজানাতি… খিত্তচিত্তো পটিজানাতি… ৱেদনাট্টো পটিজানাতি… আপত্তিযা অদস্সনে উক্খিত্তকো পটিজানাতি… আপত্তিযা অপ্পটিকম্মে উক্খিত্তকো পটিজানাতি… পাপিকায দিট্ঠিযা অপ্পটিনিস্সগ্গে উক্খিত্তকো পটিজানাতি… পণ্ডকো পটিজানাতি… থেয্যসংৱাসকো পটিজানাতি… তিত্থিযপক্কন্তকো পটিজানাতি… তিৰচ্ছানগতো পটিজানাতি… মাতুঘাতকো পটিজানাতি… পিতুঘাতকো পটিজানাতি… অৰহন্তঘাতকো পটিজানাতি… ভিক্খুনিদূসকো পটিজানাতি… সঙ্ঘভেদকো পটিজানাতি… লোহিতুপ্পাদকো পটিজানাতি… উভতোব্যঞ্জনকো পটিজানাতি, অনাহটা হোতি পৱাৰণা.

পৱাৰণহাৰকো চে, ভিক্খৱে, দিন্নায পৱাৰণায সঙ্ঘপ্পত্তো পক্কমতি, আহটা হোতি পৱাৰণা. পৱাৰণহাৰকো চে, ভিক্খৱে, দিন্নায পৱাৰণায সঙ্ঘপ্পত্তো ৱিব্ভমতি…পে… কালংকৰোতি… সামণেৰো পটিজানাতি… সিক্খং পচ্চক্খাতকো পটিজানাতি… অন্তিমৱত্থুং অজ্ঝাপন্নকো পটিজানাতি… উম্মত্তকো পটিজানাতি… খিত্তচিত্তো পটিজানাতি… ৱেদনাট্টো পটিজানাতি… আপত্তিযা অদস্সনে উক্খিত্তকো পটিজানাতি… আপত্তিযা অপ্পটিকম্মে উক্খিত্তকো পটিজানাতি… পাপিকায দিট্ঠিযা অপ্পটিনিস্সগ্গে উক্খিত্তকো পটিজানাতি… পণ্ডকো পটিজানাতি… থেয্যসংৱাসকো পটিজানাতি… তিত্থিযপক্কন্তকো পটিজানাতি… তিৰচ্ছানগতো পটিজানাতি… মাতুঘাতকো পটিজানাতি… পিতুঘাতকো পটিজানাতি… অৰহন্তঘাতকো পটিজানাতি… ভিক্খুনিদূসকো পটিজানাতি… সঙ্ঘভেদকো পটিজানাতি… লোহিতুপ্পাদকো পটিজানাতি… উভতোব্যঞ্জনকো পটিজানাতি, আহটা হোতি পৱাৰণা.

পৱাৰণহাৰকো চে, ভিক্খৱে, দিন্নায পৱাৰণায সঙ্ঘপ্পত্তো সুত্তো নাৰোচেতি, আহটা হোতি পৱাৰণা. পৱাৰণহাৰকস্স অনাপত্তি. পৱাৰণহাৰকো চে, ভিক্খৱে, দিন্নায পৱাৰণায সঙ্ঘপ্পত্তো পমত্তো নাৰোচেতি…পে… সমাপন্নো নাৰোচেতি, আহটা হোতি পৱাৰণা. পৱাৰণহাৰকস্স অনাপত্তি.

পৱাৰণহাৰকো চে, ভিক্খৱে, দিন্নায পৱাৰণায সঙ্ঘপ্পত্তো সঞ্চিচ্চ নাৰোচেতি, আহটা হোতি পৱাৰণা. পৱাৰণহাৰকস্স আপত্তি দুক্কটস্স. অনুজানামি, ভিক্খৱে, তদহু পৱাৰণায পৱাৰণং দেন্তেন ছন্দম্পি দাতুং, সন্তি সঙ্ঘস্স কৰণীযন্তি.

পৱাৰণাদানানুজাননা নিট্ঠিতা.

১২৩. ঞাতকাদিগ্গহণকথা

২১৪. তেন খো পন সমযেন অঞ্ঞতৰং ভিক্খুং তদহু পৱাৰণায ঞাতকা গণ্হিংসু. ভগৱতো এতমত্থং আৰোচেসুং. ইধ পন, ভিক্খৱে, ভিক্খুং তদহু পৱাৰণায ঞাতকা গণ্হন্তি. তে ঞাতকা ভিক্খূহি এৱমস্সু ৱচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং মুঞ্চথ, যাৱাযং ভিক্খু পৱাৰেতী’’তি. এৱঞ্চেতং লভেথ, ইচ্চেতং কুসলং. নো চে লভেথ, তে ঞাতকা ভিক্খূহি এৱমস্সু ৱচনীযা – ‘‘ইঙ্ঘ, তুম্হে আযস্মন্তো মুহুত্তং একমন্তং হোথ, যাৱাযং ভিক্খু পৱাৰণং দেতী’’তি. এৱঞ্চেতং লভেথ, ইচ্চেতং কুসলং. নো চে লভেথ, তে ঞাতকা ভিক্খূহি এৱমস্সু ৱচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং নিস্সীমং নেথ, যাৱ সঙ্ঘো পৱাৰেতী’’তি. এৱঞ্চেতং লভেথ, ইচ্চেতং কুসলং. নো চে লভেথ, ন ত্ৱেৱ ৱগ্গেন সঙ্ঘেন পৱাৰেতব্বং. পৱাৰেয্য চে, আপত্তি দুক্কটস্স.

ইধ পন, ভিক্খৱে, ভিক্খুং তদহু পৱাৰণায ৰাজানো গণ্হন্তি…পে… চোৰা গণ্হন্তি … ধুত্তা গণ্হন্তি… ভিক্খুপচ্চত্থিকা গণ্হন্তি. তে ভিক্খুপচ্চত্থিকা ভিক্খূহি এৱমস্সু ৱচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং মুঞ্চথ, যাৱাযং ভিক্খু পৱাৰেতী’’তি. এৱঞ্চেতং লভেথ, ইচ্চেতং কুসলং. নো চে লভেথ, তে ভিক্খুপচ্চত্থিকা ভিক্খূহি এৱমস্সু ৱচনীযা – ‘‘ইঙ্ঘ, তুম্হে আযস্মন্তো মুহুত্তং একমন্তং হোথ, যাৱাযং ভিক্খু পৱাৰণং দেতী’’তি. এৱঞ্চেতং লভেথ, ইচ্চেতং কুসলং. নো চে লভেথ, তে ভিক্খুপচ্চত্থিকা ভিক্খূহি এৱমস্সু ৱচনীযা – ‘‘ইঙ্ঘ, তুম্হে আযস্মন্তো ইমং ভিক্খুং মুহুত্তং নিস্সীমং নেথ, যাৱ সঙ্ঘো পৱাৰেতী’’তি. এৱঞ্চেতং লভেথ, ইচ্চেতং কুসলং. নো চে লভেথ, ন ত্ৱেৱ ৱগ্গেন সঙ্ঘেন পৱাৰেতব্বং. পৱাৰেয্য চে, আপত্তি দুক্কটস্সাতি.

ঞাতকাদিগ্গহণকথা নিট্ঠিতা.

১২৪. সঙ্ঘপৱাৰণাদিপ্পভেদা

২১৫. তেন খো পন সমযেন অঞ্ঞতৰস্মিং আৱাসে তদহু পৱাৰণায পঞ্চ ভিক্খূ ৱিহৰন্তি. অথ খো তেসং ভিক্খূনং এতদহোসি – ‘‘ভগৱতা পঞ্ঞত্তং ‘সঙ্ঘেন পৱাৰেতব্ব’ন্তি. মযঞ্চম্হা পঞ্চ জনা. কথং নু খো অম্হেহি পৱাৰেতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, পঞ্চন্নং সঙ্ঘে পৱাৰেতুন্তি.

২১৬. তেন খো পন সমযেন অঞ্ঞতৰস্মিং আৱাসে তদহু পৱাৰণায চত্তাৰো ভিক্খূ ৱিহৰন্তি. অথ খো তেসং ভিক্খূনং এতদহোসি – ‘‘ভগৱতা অনুঞ্ঞাতং পঞ্চন্নং সঙ্ঘে পৱাৰেতুন্তি. মযঞ্চম্হা চত্তাৰো জনা. কথং নু খো অম্হেহি পৱাৰেতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, চতুন্নং অঞ্ঞমঞ্ঞং পৱাৰেতুং. এৱঞ্চ পন, ভিক্খৱে, পৱাৰেতব্বং. ব্যত্তেন ভিক্খুনা পটিবলেন তে ভিক্খূ ঞাপেতব্বা –

‘‘সুণন্তু মে আযস্মন্তো. অজ্জ পৱাৰণা. যদাযস্মন্তানং পত্তকল্লং, মযং অঞ্ঞমঞ্ঞং পৱাৰেয্যামা’’তি.

থেৰেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা তে ভিক্খূ এৱমস্সু ৱচনীযা – ‘‘অহং, আৱুসো, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামি. দুতিযম্পি…পে… ততিযম্পি অহং, আৱুসো, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামী’’তি.

নৱকেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা তে ভিক্খূ এৱমস্সু ৱচনীযা – ‘‘অহং, ভন্তে, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামি. দুতিযম্পি…পে… ততিযম্পি অহং, ভন্তে, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তো অনুকম্পং উপাদায. পস্সন্তো পটিকৰিস্সামী’’তি.

তেন খো পন সমযেন অঞ্ঞতৰস্মিং আৱাসে তদহু পৱাৰণায তযো ভিক্খূ ৱিহৰন্তি. অথ খো তেসং ভিক্খূনং এতদহোসি – ‘‘ভগৱতা অনুঞ্ঞাতং পঞ্চন্নং সঙ্ঘে পৱাৰেতুং, চতুন্নং অঞ্ঞমঞ্ঞং পৱাৰেতুং. মযঞ্চম্হা তযো জনা. কথং নু খো অম্হেহি পৱাৰেতব্ব’’ন্তি? ভগৱতো এতমত্থং আৰোচেসুং. অনুজানামি, ভিক্খৱে, তিণ্ণং অঞ্ঞমঞ্ঞং পৱাৰেতুং. এৱঞ্চ পন, ভিক্খৱে, পৱাৰেতব্বং. ব্যত্তেন ভিক্খুনা পটিবলেন তে ভিক্খূ ঞাপেতব্বা –

‘‘সুণন্তু মে আযস্মন্তা. অজ্জ পৱাৰণা. যদাযস্মন্তানং পত্তকল্লং, মযং অঞ্ঞমঞ্ঞং পৱাৰেয্যামা’’তি.

থেৰেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা তে ভিক্খূ এৱমস্সু ৱচনীযা – ‘‘অহং, আৱুসো, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তা অনুকম্পং উপাদায. পস্সন্তো পটিকৰিস্সামি. দুতিযম্পি…পে… ততিযম্পি অহং, আৱুসো, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তা অনুকম্পং উপাদায. পস্সন্তো পটিকৰিস্সামী’’তি.

নৱকেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা তে ভিক্খূ এৱমস্সু ৱচনীযা – ‘‘অহং, ভন্তে, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তা অনুকম্পং উপাদায. পস্সন্তো পটিকৰিস্সামি. দুতিযম্পি…পে… ততিযম্পি অহং, ভন্তে, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদন্তু মং আযস্মন্তা অনুকম্পং উপাদায. পস্সন্তো পটিকৰিস্সামী’’তি.

২১৭. তেন খো পন সমযেন অঞ্ঞতৰস্মিং আৱাসে তদহু পৱাৰণায দ্ৱে ভিক্খূ ৱিহৰন্তি. অথ খো তেসং ভিক্খূনং এতদহোসি – ‘‘ভগৱতা অনুঞ্ঞাতং পঞ্চন্নং সঙ্ঘে পৱাৰেতুং, চতুন্নং অঞ্ঞমঞ্ঞং পৱাৰেতুং, তিণ্ণং অঞ্ঞমঞ্ঞং পৱাৰেতুং. মযঞ্চম্হা দ্ৱে জনা. কথং নু খো অম্হেহি পৱাৰেতব্ব’’ন্তি. ভগৱতো এতমত্থং আৰোচেসুং. অনুজানামি, ভিক্খৱে, দ্ৱিন্নং অঞ্ঞমঞ্ঞং পৱাৰেতুং. এৱঞ্চ পন, ভিক্খৱে, পৱাৰেতব্বং. থেৰেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা নৱো ভিক্খু এৱমস্স ৱচনীযো – ‘‘অহং, আৱুসো, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদতু মং আযস্মা অনুকম্পং উপাদায. পস্সন্তো পটিকৰিস্সামি. দুতিযম্পি…পে… ততিযম্পি অহং, আৱুসো, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদতু মং আযস্মা অনুকম্পং উপাদায. পস্সন্তো পটিকৰিস্সামী’’তি.

নৱকেন ভিক্খুনা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা থেৰো ভিক্খু এৱমস্স ৱচনীযো – ‘‘অহং, ভন্তে, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদতু মং আযস্মা অনুকম্পং উপাদায. পস্সন্তো পটিকৰিস্সামি. দুতিযম্পি…পে… ততিযম্পি অহং, ভন্তে, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা. ৱদতু মং আযস্মা অনুকম্পং উপাদায. পস্সন্তো পটিকৰিস্সামী’’তি.

২১৮. তেন খো পন সমযেন অঞ্ঞতৰস্মিং আৱাসে তদহু পৱাৰণায একো ভিক্খু ৱিহৰতি. অথ খো তস্স ভিক্খুনো এতদহোসি – ‘‘ভগৱতা অনুঞ্ঞাতং পঞ্চন্নং সঙ্ঘে পৱাৰেতুং, চতুন্নং অঞ্ঞমঞ্ঞং পৱাৰেতুং, তিণ্ণং অঞ্ঞমঞ্ঞং পৱাৰেতুং, দ্ৱিন্নং অঞ্ঞমঞ্ঞং পৱাৰেতুং. অহঞ্চম্হি এককো. কথং নু খো মযা পৱাৰেতব্ব’’ন্তি? ভগৱতো এতমত্থং আৰোচেসুং.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায একো ভিক্খু ৱিহৰতি. তেন, ভিক্খৱে, ভিক্খুনা যত্থ ভিক্খূ পটিক্কমন্তি উপট্ঠানসালায ৱা মণ্ডপে ৱা ৰুক্খমূলে ৱা, সো দেসো সম্মজ্জিত্ৱা পানীযং পৰিভোজনীযং উপট্ঠাপেত্ৱা আসনং পঞ্ঞপেত্ৱা পদীপং কত্ৱা নিসীদিতব্বং. সচে অঞ্ঞে ভিক্খূ আগচ্ছন্তি, তেহি সদ্ধিং পৱাৰেতব্বং; নো চে আগচ্ছন্তি, ‘অজ্জ মে পৱাৰণা’তি অধিট্ঠাতব্বং. নো চে অধিট্ঠেয্য, আপত্তি দুক্কটস্স.

তত্ৰ, ভিক্খৱে, যত্থ পঞ্চ ভিক্খূ ৱিহৰন্তি, ন একস্স পৱাৰণং আহৰিত্ৱা

চতূহি সঙ্ঘে পৱাৰেতব্বং. পৱাৰেয্যুং চে, আপত্তি দুক্কটস্স. তত্ৰ, ভিক্খৱে, যত্থ চত্তাৰো ভিক্খূ ৱিহৰন্তি, ন একস্স পৱাৰণং আহৰিত্ৱা তীহি অঞ্ঞমঞ্ঞং পৱাৰেতব্বং. পৱাৰেয্যুং চে, আপত্তি দুক্কটস্স. তত্ৰ, ভিক্খৱে, যত্থ তযো ভিক্খূ ৱিহৰন্তি, ন একস্স পৱাৰণং আহৰিত্ৱা দ্ৱীহি অঞ্ঞমঞ্ঞং পৱাৰেতব্বং. পৱাৰেয্যুং চে, আপত্তি দুক্কটস্স. তত্ৰ, ভিক্খৱে, যত্থ দ্ৱে ভিক্খূ ৱিহৰন্তি, ন একস্স পৱাৰণং আহৰিত্ৱা একেন অধিট্ঠাতব্বং. অধিট্ঠেয্য চে, আপত্তি দুক্কটস্সাতি.

সঙ্ঘপৱাৰণাদিপ্পভেদা নিট্ঠিতা.

১২৫. আপত্তিপটিকম্মৱিধি

২১৯. তেন খো পন সমযেন অঞ্ঞতৰো ভিক্খু তদহু পৱাৰণায আপত্তিং আপন্নো হোতি. অথ খো তস্স ভিক্খুনো এতদহোসি – ‘‘ভগৱতা পঞ্ঞত্তং ‘ন সাপত্তিকেন পৱাৰেতব্ব’ন্তি. অহঞ্চম্হি আপত্তিং আপন্নো. কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং [আৰোচেসি (ক.)].

ইধ পন, ভিক্খৱে, ভিক্খু তদহু পৱাৰণায আপত্তিং আপন্নো হোতি. তেন, ভিক্খৱে, ভিক্খুনা একং ভিক্খুং উপসঙ্কমিত্ৱা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘অহং, আৱুসো, ইত্থন্নামং আপত্তিং আপন্নো, তং পটিদেসেমী’’তি. তেন ৱত্তব্বো – ‘‘পস্সসী’’তি. আম পস্সামীতি. আযতিং সংৱৰেয্যাসীতি.

ইধ পন, ভিক্খৱে, ভিক্খু তদহু পৱাৰণায আপত্তিযা ৱেমতিকো হোতি. তেন, ভিক্খৱে, ভিক্খুনা একং ভিক্খুং উপসঙ্কমিত্ৱা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘অহং, আৱুসো, ইত্থন্নামায আপত্তিযা ৱেমতিকো; যদা নিব্বেমতিকো ভৱিস্সামি তদা তং আপত্তিং পটিকৰিস্সামী’’তি ৱত্ৱা পৱাৰেতব্বং; ন ত্ৱেৱ তপ্পচ্চযা পৱাৰণায অন্তৰাযো কাতব্বোতি.

আপত্তিপটিকম্মৱিধি নিট্ঠিতা.

১২৬. আপত্তিআৱিকৰণৱিধি

২২০. তেন খো পন সমযেন অঞ্ঞতৰো ভিক্খু পৱাৰযমানো আপত্তিং সৰতি. অথ খো তস্স ভিক্খুনো এতদহোসি – ‘‘ভগৱতা পঞ্ঞত্তং ‘ন সাপত্তিকেন পৱাৰেতব্ব’ন্তি. অহঞ্চম্হি আপত্তিং আপন্নো. কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং.

ইধ পন, ভিক্খৱে, ভিক্খু পৱাৰযমানো আপত্তিং সৰতি. তেন, ভিক্খৱে, ভিক্খুনা সামন্তো ভিক্খু এৱমস্স ৱচনীযো – ‘‘অহং, আৱুসো, ইত্থন্নামং আপত্তিং আপন্নো. ইতো ৱুট্ঠহিত্ৱা তং আপত্তিং পটিকৰিস্সামী’’তি ৱত্ৱা পৱাৰেতব্বং; ন ত্ৱেৱ তপ্পচ্চযা পৱাৰণায অন্তৰাযো কাতব্বো.

ইধ পন, ভিক্খৱে, ভিক্খু পৱাৰযমানো আপত্তিযা ৱেমতিকো হোতি. তেন, ভিক্খৱে,

ভিক্খুনা সামন্তো ভিক্খু এৱমস্স ৱচনীযো – ‘‘অহং, আৱুসো, ইত্থন্নামায আপত্তিযা ৱেমতিকো; যদা নিব্বেমতিকো ভৱিস্সামি তদা তং আপত্তিং পটিকৰিস্সামী’’তি ৱত্ৱা পৱাৰেতব্বং; ন ত্ৱেৱ তপ্পচ্চযা পৱাৰণায অন্তৰাযো কাতব্বোতি.

আপত্তি আৱিকৰণৱিধি নিট্ঠিতা.

১২৭. সভাগাপত্তিপটিকম্মৱিধি

২২১. তেন খো পন সমযেন অঞ্ঞতৰস্মিং আৱাসে তদহু পৱাৰণায সব্বো সঙ্ঘো সভাগং আপত্তিং আপন্নো হোতি. অথ খো তেসং ভিক্খূনং এতদহোসি – ‘‘ভগৱতা পঞ্ঞত্তং ‘ন সভাগা আপত্তি দেসেতব্বা, ন সভাগা আপত্তি পটিগ্গহেতব্বা’তি. অযঞ্চ সব্বো সঙ্ঘো সভাগং আপত্তিং আপন্নো. কথং নু খো অম্হেহি পটিপজ্জিতব্ব’’ন্তি? ভগৱতো এতমত্থং আৰোচেসুং.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সব্বো সঙ্ঘো সভাগং আপত্তিং আপন্নো হোতি. তেহি, ভিক্খৱে, ভিক্খূহি একো ভিক্খু সামন্তা আৱাসা সজ্জুকং পাহেতব্বো – গচ্ছাৱুসো, তং আপত্তিং পটিকৰিত্ৱা আগচ্ছ, মযং তে সন্তিকে তং আপত্তিং পটিকৰিস্সামাতি. এৱঞ্চেতং লভেথ, ইচ্চেতং কুসলং. নো চে লভেথ, ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং সব্বো সঙ্ঘো সভাগং আপত্তিং আপন্নো. যদা অঞ্ঞং ভিক্খুং সুদ্ধং অনাপত্তিকং পস্সিস্সতি তদা তস্স সন্তিকে তং আপত্তিং পটিকৰিস্সতী’’তি ৱত্ৱা পৱাৰেতব্বং; ন ত্ৱেৱ তপ্পচ্চযা পৱাৰণায অন্তৰাযো কাতব্বো.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সব্বো সঙ্ঘো সভাগায আপত্তিযা ৱেমতিকো হোতি. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং সব্বো সঙ্ঘো সভাগায আপত্তিযা ৱেমতিকো. যদা নিব্বেমতিকো ভৱিস্সতি তদা তং আপত্তিং পটিকৰিস্সতী’’তি ৱত্ৱা, পৱাৰেতব্বং, ন ত্ৱেৱ তপ্পচ্চযা পৱাৰণায অন্তৰাযো কাতব্বোতি.

সভাগাপত্তিপটিকম্মৱিধি নিট্ঠিতা.

পঠমভাণৱাৰো নিট্ঠিতো.

১২৮. অনাপত্তিপন্নৰসকং

২২২. তেন খো পন সমযেন অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতিংসু, পঞ্চ ৱা অতিৰেকা ৱা. তে ন জানিংসু ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেসুং. তেহি পৱাৰিযমানে অথঞ্ঞে আৱাসিকা ভিক্খূ আগচ্ছিংসু বহুতৰা. ভগৱতো এতমত্থং আৰোচেসুং.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, অৱসেসেহি পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, অৱসেসেহি পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিতমত্তে অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিতমত্তে অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিতমত্তে অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিতমত্তে, অৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিতমত্তে, অৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিতমত্তে, অৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিতমত্তে, একচ্চায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিতমত্তে, একচ্চায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিতমত্তে, একচ্চায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিতমত্তে, সব্বায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিতমত্তে, সব্বায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং অনাপত্তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা সমগ্গসঞ্ঞিনো পৱাৰেন্তি. তেহি পৱাৰিতমত্তে, সব্বায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং অনাপত্তি.

অনাপত্তিপন্নৰসকং নিট্ঠিতং.

১২৯. ৱগ্গাৱগ্গসঞ্ঞীপন্নৰসকং

২২৩. ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা ৱগ্গসঞ্ঞিনো পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পৱাৰেতব্বং. পৱাৰিতানং আপত্তি দুক্কটস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা ৱগ্গসঞ্ঞিনো পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, অৱসেসেহি পৱাৰেতব্বং. পৱাৰিতানং আপত্তি দুক্কটস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা ৱগ্গসঞ্ঞিনো পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, অৱসেসেহি পৱাৰেতব্বং. পৱাৰিতানং আপত্তি দুক্কটস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ধম্মসঞ্ঞিনো ৱিনযসঞ্ঞিনো ৱগ্গা ৱগ্গসঞ্ঞিনো পৱাৰেন্তি. তেহি পৱাৰিতমত্তে,…পে… অৱুট্ঠিতায পৰিসায…পে… একচ্চায ৱুট্ঠিতায পৰিসায…পে… সব্বায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি বহুতৰা…পে… সমসমা…পে… থোকতৰা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং আপত্তি দুক্কটস্স.

ৱগ্গাৱগ্গসঞ্ঞীপন্নৰসকং নিট্ঠিতং.

১৩০. ৱেমতিকপন্নৰসকং

২২৪. ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘কপ্পতি নু খো অম্হাকং পৱাৰেতুং, ন নু খো কপ্পতী’’তি ৱেমতিকা পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পৱাৰেতব্বং. পৱাৰিতানং আপত্তি দুক্কটস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘কপ্পতি নু খো অম্হাকং পৱাৰেতুং, ন নু খো কপ্পতী’’তি ৱেমতিকা পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, অৱসেসেহি পৱাৰেতব্বং. পৱাৰিতানং আপত্তি দুক্কটস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘কপ্পতি নু খো অম্হাকং পৱাৰেতুং, ন নু খো কপ্পতী’’তি ৱেমতিকা পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, অৱসেসেহি পৱাৰেতব্বং. পৱাৰিতানং আপত্তি দুক্কটস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘কপ্পতি নু খো অম্হাকং পৱাৰেতুং, ন নু খো কপ্পতী’’তি ৱেমতিকা পৱাৰেন্তি. তেহি পৱাৰিতমত্তে…পে… অৱুট্ঠিতায পৰিসায…পে… একচ্চায ৱুট্ঠিতায পৰিসায…পে… সব্বায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি বহুতৰা…পে… সমসমা…পে… থোকতৰা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং আপত্তি দুক্কটস্স.

ৱেমতিকপন্নৰসকং নিট্ঠিতং.

১৩১. কুক্কুচ্চপকতপন্নৰসকং

২২৫. ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘কপ্পতেৱ অম্হাকং পৱাৰেতুং, নাম্হাকং ন কপ্পতী’’তি কুক্কুচ্চপকতা পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পৱাৰেতব্বং. পৱাৰিতানং আপত্তি দুক্কটস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘কপ্পতেৱ অম্হাকং পৱাৰেতুং, নাম্হাকং ন কপ্পতী’’তি কুক্কুচ্চপকতা পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, অৱসেসেহি পৱাৰেতব্বং. পৱাৰিতানং আপত্তি দুক্কটস্স.

ইধ পন, ভিক্খৱে, অঞ্ঞৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘কপ্পতেৱ অম্হাকং পৱাৰেতুং, নাম্হাকং ন কপ্পতী’’তি কুক্কুচ্চপকতা পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, অৱসেসেহি [অৱসেসেহি তেসং সন্তিকে (ক.)] পৱাৰেতব্বং. পৱাৰিতানং আপত্তি দুক্কটস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘কপ্পতেৱ অম্হাকং পৱাৰেতুং, নাম্হাকং ন কপ্পতী’’তি কুক্কুচ্চপকতা পৱাৰেন্তি. তেহি পৱাৰিতমত্তে,…পে… অৱুট্ঠিতায পৰিসায…পে… একচ্চায ৱুট্ঠিতায পৰিসায…পে… সব্বায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি বহুতৰা…পে… সমসমা…পে… থোকতৰা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং আপত্তি দুক্কটস্স.

কুক্কুচ্চপকতপন্নৰসকং নিট্ঠিতং.

১৩২. ভেদপুৰেক্খাৰপন্নৰসকং

২২৬. ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, অৱসেসেহি পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি – ভেদপুৰেক্খাৰা পৱাৰেন্তি. তেহি পৱাৰিযমানে অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, অৱসেসেহি পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি – ভেদপুৰেক্খাৰা পৱাৰেন্তি. তেহি পৱাৰিতমত্তে অথঞ্ঞে আৱাসিকা ভিক্খূ আগচ্ছন্তি বহুতৰা, তেহি ভিক্খৱে ভিক্খূহি পুন পৱাৰেতব্বং, পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিতমত্তে অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিতমত্তে অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিতমত্তে, অৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিতমত্তে, অৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিতমত্তে, অৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিতমত্তে, একচ্চায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিতমত্তে, একচ্চায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিতমত্তে, একচ্চায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিতমত্তে, সব্বায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি বহুতৰা. তেহি, ভিক্খৱে, ভিক্খূহি পুন পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিতমত্তে, সব্বায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি সমসমা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং আপত্তি থুল্লচ্চযস্স.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা

ভিক্খূ সন্নিপতন্তি, পঞ্চ ৱা অতিৰেকা ৱা. তে জানন্তি ‘‘অত্থঞ্ঞে আৱাসিকা ভিক্খূ অনাগতা’’তি. তে ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. তেহি পৱাৰিতমত্তে, সব্বায ৱুট্ঠিতায পৰিসায, অথঞ্ঞে আৱাসিকা ভিক্খূ আগচ্ছন্তি থোকতৰা. পৱাৰিতা সুপ্পৱাৰিতা, তেসং সন্তিকে পৱাৰেতব্বং. পৱাৰিতানং আপত্তি থুল্লচ্চযস্স.

ভেদপুৰেক্খাৰপন্নৰসকং নিট্ঠিতং.

পঞ্চৱীসত্তিকা নিট্ঠিতা.

১৩৩. সীমোত্তন্তিকপেয্যালং

২২৭. ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায সম্বহুলা আৱাসিকা ভিক্খূ সন্নিপতন্তি, পঞ্চ ৱা অতিৰেকা ৱা. তে ন জানন্তি ‘‘অঞ্ঞে আৱাসিকা ভিক্খূ অন্তোসীমং ওক্কমন্তী’’তি…পে… তে ন জানন্তি ‘‘অঞ্ঞে আৱাসিকা ভিক্খূ অন্তোসীমং ওক্কন্তা’’তি…পে… তে ন পস্সন্তি অঞ্ঞে আৱাসিকে ভিক্খূ অন্তোসীমং ওক্কমন্তে…পে… তে ন পস্সন্তি অঞ্ঞে আৱাসিকে ভিক্খূ অন্তোসীমং ওক্কন্তে…পে… তে ন সুণন্তি ‘‘অঞ্ঞে আৱাসিকা ভিক্খূ অন্তোসীমং ওক্কমন্তী’’তি…পে… তে ন সুণন্তি ‘‘অঞ্ঞে আৱাসিকা ভিক্খূ অন্তোসীমং ওক্কন্তা’’তি…পে….

আৱাসিকেন আৱাসিকা একসতপঞ্চসত্ততি তিকনযতো, আৱাসিকেন আগন্তুকা, আগন্তুকেন আৱাসিকা, আগন্তুকেন আগন্তুকা, পেয্যালমুখেন সত্ত তিকসতানি হোন্তি.

সীমোক্কন্তিকপেয্যালং নিট্ঠিতং.

১৩৪. দিৱসনানত্তং

২২৮. ইধ পন, ভিক্খৱে, আৱাসিকানং ভিক্খূনং চাতুদ্দসো হোতি, আগন্তুকানং পন্নৰসো. সচে আৱাসিকা বহুতৰা হোন্তি, আগন্তুকেহি আৱাসিকানং অনুৱত্তিতব্বং. সচে সমসমা হোন্তি, আগন্তুকেহি আৱাসিকানং অনুৱত্তিতব্বং. সচে আগন্তুকা বহুতৰা হোন্তি, আৱাসিকেহি আগন্তুকানং অনুৱত্তিতব্বং.

ইধ পন, ভিক্খৱে, আৱাসিকানং ভিক্খূনং পন্নৰসো হোতি, আগন্তুকানং চাতুদ্দসো. সচে আৱাসিকা বহুতৰা হোন্তি, আগন্তুকেহি আৱাসিকানং অনুৱত্তিতব্বং. সচে সমসমা হোন্তি, আগন্তুকেহি আৱাসিকানং অনুৱত্তিতব্বং. সচে আগন্তুকা বহুতৰা হোন্তি, আৱাসিকেহি আগন্তুকানং অনুৱত্তিতব্বং.

ইধ পন, ভিক্খৱে, আৱাসিকানং ভিক্খূনং পাটিপদো হোতি, আগন্তুকানং পন্নৰসো. সচে আৱাসিকা বহুতৰা হোন্তি, আৱাসিকেহি আগন্তুকানং নাকামা দাতব্বা সামগ্গী; আগন্তুকেহি নিস্সীমং গন্ত্ৱা পৱাৰেতব্বং. সচে সমসমা হোন্তি, আৱাসিকেহি আগন্তুকানং নাকামা দাতব্বা সামগ্গী; আগন্তুকেহি নিস্সীমং গন্ত্ৱা পৱাৰেতব্বং. সচে আগন্তুকা বহুতৰা হোন্তি, আৱাসিকেহি আগন্তুকানং সামগ্গী ৱা দাতব্বা, নিস্সীমং ৱা গন্তব্বং.

ইধ পন, ভিক্খৱে, আৱাসিকানং ভিক্খূনং পন্নৰসো হোতি, আগন্তুকানং পাটিপদো. সচে আৱাসিকা বহুতৰা হোন্তি, আগন্তুকেহি আৱাসিকানং সামগ্গী ৱা দাতব্বা, নিস্সীমং ৱা গন্তব্বং. সচে সমসমা হোন্তি, আগন্তুকেহি আৱাসিকানং সামগ্গী ৱা দাতব্বা, নিস্সীমং ৱা গন্তব্বং. সচে আগন্তুকা বহুতৰা হোন্তি, আগন্তুকেহি আৱাসিকানং নাকামা দাতব্বা সামগ্গী; আৱাসিকেহি নিস্সীমং গন্ত্ৱা পৱাৰেতব্বং.

দিৱসনানত্তং নিট্ঠিতং.

১৩৫. লিঙ্গাদিদস্সনং

২২৯. ইধ পন, ভিক্খৱে, আগন্তুকা ভিক্খূ পস্সন্তি আৱাসিকানং ভিক্খূনং আৱাসিকাকাৰং, আৱাসিকলিঙ্গং, আৱাসিকনিমিত্তং, আৱাসিকুদ্দেসং, সুপ্পঞ্ঞত্তং মঞ্চপীঠং ভিসিবিব্বোহনং, পানীযং পৰিভোজনীযং সপট্ঠিতং, পৰিৱেণং সুসম্মট্ঠং; পস্সিত্ৱা ৱেমতিকা হোন্তি – ‘‘অত্থি নু খো আৱাসিকা ভিক্খূ, নত্থি নু খো’’তি. তে ৱেমতিকা ন ৱিচিনন্তি, অৱিচিনিত্ৱা পৱাৰেন্তি. আপত্তি দুক্কটস্স…পে… তে ৱেমতিকা ৱিচিনন্তি, ৱিচিনিত্ৱা ন পস্সন্তি, অপস্সিত্ৱা পৱাৰেন্তি. অনাপত্তি. তে ৱেমতিকা ৱিচিনন্তি, ৱিচিনিত্ৱা পস্সন্তি, পস্সিত্ৱা একতো পৱাৰেন্তি. অনাপত্তি. তে ৱেমতিকা ৱিচিনন্তি, ৱিচিনিত্ৱা পস্সন্তি, পস্সিত্ৱা পাটেক্কং পৱাৰেন্তি. আপত্তি দুক্কটস্স. তে ৱেমতিকা ৱিচিনন্তি, ৱিচিনিত্ৱা পস্সন্তি, পস্সিত্ৱা – ‘‘নস্সন্তেতে, ৱিনস্সন্তেতে, কো তেহি অত্থো’’তি – ভেদপুৰেক্খাৰা পৱাৰেন্তি. আপত্তি থুল্লচ্চযস্স.

ইধ পন, ভিক্খৱে, আগন্তুকা ভিক্খূ সুণন্তি আৱাসিকানং ভিক্খূনং আৱাসিকাকাৰং, আৱাসিকলিঙ্গং, আৱাসিকনিমিত্তং, আৱাসিকুদ্দেসং, চঙ্কমন্তানং পদসদ্দং, সজ্ঝাযসদ্দং, উক্কাসিতসদ্দং, খিপিতসদ্দং; সুত্ৱা ৱেমতিকা হোন্তি – ‘‘অত্থি নু খো আৱাসিকা ভিক্খূ, নত্থি নু খো’’তি. তে ৱেমতিকা ন ৱিচিনন্তি, অৱিচিনিত্ৱা পৱাৰেন্তি. আপত্তি দুক্কটস্স. তে ৱেমতিকা ৱিচিনন্তি, ৱিচিনিত্ৱা ন পস্সন্তি, অপস্সিত্ৱা পৱাৰেন্তি. অনাপত্তি. তে ৱেমতিকা ৱিচিনন্তি, ৱিচিনিত্ৱা পস্সন্তি, পস্সিত্ৱা একতো পৱাৰেন্তি. অনাপত্তি. তে ৱেমতিকা ৱিচিনন্তি, ৱিচিনিত্ৱা পস্সন্তি, পস্সিত্ৱা পাটেক্কং পৱাৰেন্তি. আপত্তি দুক্কটস্স. তে ৱেমতিকা ৱিচিনন্তি, ৱিচিনিত্ৱা পস্সন্তি, পস্সিত্ৱা ‘‘নস্সন্তেতে, ৱিনস্সন্তেতে, কো তেহি অত্থো’’তি ভেদপুৰেক্খাৰা পৱাৰেন্তি. আপত্তি থুল্লচ্চযস্স.

ইধ পন, ভিক্খৱে, আৱাসিকা ভিক্খূ পস্সন্তি আগন্তুকানং ভিক্খূনং আগন্তুকাকাৰং, আগন্তুকলিঙ্গং, আগন্তুকনিমিত্তং, আগন্তুকুদ্দেসং, অঞ্ঞাতকং পত্তং, অঞ্ঞাতকং চীৱৰং, অঞ্ঞাতকং নিসীদনং, পাদানং ধোতং, উদকনিস্সেকং; পস্সিত্ৱা ৱেমতিকা হোন্তি – ‘‘অত্থি নু খো আগন্তুকা ভিক্খূ, নত্থি নু খো’’তি. তে ৱেমতিকা ন ৱিচিনন্তি, অৱিচিনিত্ৱা পৱাৰেন্তি. আপত্তি দুক্কটস্স. তে ৱেমতিকা ৱিচিনন্তি, ৱিচিনিত্ৱা ন পস্সন্তি, অপস্সিত্ৱা পৱাৰেন্তি. অনাপত্তি. তে ৱেমতিকা ৱিচিনন্তি, ৱিচিনিত্ৱা পস্সন্তি, পস্সিত্ৱা একতো পৱাৰেন্তি. অনাপত্তি. তে ৱেমতিকা ৱিচিনন্তি, ৱিচিনিত্ৱা পস্সন্তি, পস্সিত্ৱা পাটেক্কং পৱাৰেন্তি. আপত্তি দুক্কটস্স. তে ৱেমতিকা ৱিচিনন্তি, ৱিচিনিত্ৱা পস্সন্তি, পস্সিত্ৱা – নস্সন্তেতে, ৱিনস্সন্তেতে, কো তেহি অত্থোতি – ভেদপুৰেক্খাৰা পৱাৰেন্তি. আপত্তি থুল্লচ্চযস্স.

ইধ পন, ভিক্খৱে, আৱাসিকা ভিক্খূ সুণন্তি আগন্তুকানং ভিক্খূনং আগন্তুকাকাৰং,

আগন্তুকলিঙ্গং, আগন্তুকনিমিত্তং, আগন্তুকুদ্দেসং, আগচ্ছন্তানং পদসদ্দং, উপাহনপপ্ফোটনসদ্দং, উক্কাসিতসদ্দং, খিপিতসদ্দং; সুত্ৱা ৱেমতিকা হোন্তি – ‘‘অত্থি নু খো আগন্তুকা ভিক্খূ, নত্থি নু খো’’তি. তে ৱেমতিকা ন ৱিচিনন্তি, অৱিচিনিত্ৱা পৱাৰেন্তি. আপত্তি দুক্কটস্স. তে ৱেমতিকা ৱিচিনন্তি, ৱিচিনিত্ৱা ন পস্সন্তি, অপস্সিত্ৱা পৱাৰেন্তি. অনাপত্তি. তে ৱেমতিকা ৱিচিনন্তি, ৱিচিনিত্ৱা পস্সন্তি, পস্সিত্ৱা একতো পৱাৰেন্তি. অনাপত্তি. তে ৱেমতিকা ৱিচিনন্তি, ৱিচিনিত্ৱা পস্সন্তি, পস্সিত্ৱা পাটেক্কং পৱাৰেন্তি. আপত্তি দুক্কটস্স. তে ৱেমতিকা ৱিচিনন্তি, ৱিচিনিত্ৱা পস্সন্তি, পস্সিত্ৱা – নস্সন্তেতে, ৱিনস্সন্তেতে, কো তেহি অত্থোতি – ভেদপুৰেক্খাৰা পৱাৰেন্তি. আপত্তি থুল্লচ্চযস্স.

লিঙ্গাদিদস্সনং নিট্ঠিতং.

১৩৬. নানাসংৱাসকাদীহি পৱাৰণা

২৩০. ইধ পন, ভিক্খৱে, আগন্তুকা ভিক্খূ পস্সন্তি আৱাসিকে ভিক্খূ নানাসংৱাসকে. তে সমানসংৱাসকদিট্ঠিং পটিলভন্তি, সমানসংৱাসকদিট্ঠিং পটিলভিত্ৱা ন পুচ্ছন্তি, অপুচ্ছিত্ৱা একতো পৱাৰেন্তি. অনাপত্তি. তে পুচ্ছন্তি, পুচ্ছিত্ৱা নাভিৱিতৰন্তি, অনভিৱিতৰিত্ৱা একতো পৱাৰেন্তি. আপত্তি দুক্কটস্স. তে পুচ্ছন্তি, পুচ্ছিত্ৱা নাভিৱিতৰন্তি, অনভিৱিতৰিত্ৱা পাটেক্কং পৱাৰেন্তি. অনাপত্তি.

ইধ পন, ভিক্খৱে, আগন্তুকা ভিক্খূ পস্সন্তি আৱাসিকে ভিক্খূ সমানসংৱাসকে. তে নানাসংৱাসকদিট্ঠিং পটিলভন্তি, নানাসংৱাসকদিট্ঠিং পটিলভিত্ৱা ন পুচ্ছন্তি, অপুচ্ছিত্ৱা একতো পৱাৰেন্তি. আপত্তি দুক্কটস্স. তে পুচ্ছন্তি, পুচ্ছিত্ৱা অভিৱিতৰন্তি, অভিৱিতৰিত্ৱা পাটেক্কং পৱাৰেন্তি. আপত্তি দুক্কটস্স. তে পুচ্ছন্তি, পুচ্ছিত্ৱা অভিৱিতৰন্তি, অভিৱিতৰিত্ৱা একতো পৱাৰেন্তি. অনাপত্তি.

ইধ পন, ভিক্খৱে, আৱাসিকা ভিক্খূ পস্সন্তি আগন্তুকে ভিক্খূ নানাসংৱাসকে. তে সমানসংৱাসকদিট্ঠিং পটিলভন্তি, সমানসংৱাসকদিট্ঠিং পটিলভিত্ৱা ন পুচ্ছন্তি, অপুচ্ছিত্ৱা একতো পৱাৰেন্তি. অনাপত্তি. তে পুচ্ছন্তি, পুচ্ছিত্ৱা নাভিৱিতৰন্তি, অনভিৱিতৰিত্ৱা একতো পৱাৰেন্তি. আপত্তি দুক্কটস্স. তে পুচ্ছন্তি, পুচ্ছিত্ৱা নাভিৱিতৰন্তি, অনভিৱিতৰিত্ৱা পাটেক্কং পৱাৰেন্তি. অনাপত্তি.

ইধ পন, ভিক্খৱে, আৱাসিকা ভিক্খূ পস্সন্তি আগন্তুকে ভিক্খূ সমানসংৱাসকে. তে নানাসংৱাসকদিট্ঠিং পটিলভন্তি, নানাসংৱাসকদিট্ঠিং পটিলভিত্ৱা ন পুচ্ছন্তি, অপুচ্ছিত্ৱা একতো পৱাৰেন্তি. আপত্তি দুক্কটস্স. তে পুচ্ছন্তি, পুচ্ছিত্ৱা অভিৱিতৰন্তি, অভিৱিতৰিত্ৱা পাটেক্কং পৱাৰেন্তি. আপত্তি দুক্কটস্স. তে পুচ্ছন্তি, পুচ্ছিত্ৱা অভিৱিতৰন্তি, অভিৱিতৰিত্ৱা একতো পৱাৰেন্তি. অনাপত্তি.

নানাসংৱাসকাদীহি পৱাৰণা নিট্ঠিতা.

১৩৭. ন গন্তব্বৱাৰো

২৩১. ন, ভিক্খৱে, তদহু পৱাৰণায সভিক্খুকা আৱাসা অভিক্খুকো আৱাসো গন্তব্বো, অঞ্ঞত্ৰ সঙ্ঘেন, অঞ্ঞত্ৰ অন্তৰাযা. ন, ভিক্খৱে, তদহু পৱাৰণায সভিক্খুকা আৱাসা অভিক্খুকো অনাৱাসো গন্তব্বো, অঞ্ঞত্ৰ সঙ্ঘেন, অঞ্ঞত্ৰ অন্তৰাযা. ন, ভিক্খৱে, তদহু পৱাৰণায সভিক্খুকা আৱাসা অভিক্খুকো আৱাসো ৱা অনাৱাসো ৱা গন্তব্বো, অঞ্ঞত্ৰ সঙ্ঘেন, অঞ্ঞত্ৰ অন্তৰাযা.

ন, ভিক্খৱে, তদহু পৱাৰণায সভিক্খুকা অনাৱাসা অভিক্খুকো আৱাসো গন্তব্বো, অঞ্ঞত্ৰ সঙ্ঘেন, অঞ্ঞত্ৰ অন্তৰাযা. ন, ভিক্খৱে, তদহু পৱাৰণায সভিক্খুকা অনাৱাসা অভিক্খুকো অনাৱাসো গন্তব্বো, অঞ্ঞত্ৰ সঙ্ঘেন, অঞ্ঞত্ৰ অন্তৰাযা. ন, ভিক্খৱে, তদহু পৱাৰণায সভিক্খুকা অনাৱাসা অভিক্খুকো আৱাসো ৱা অনাৱাসো ৱা গন্তব্বো, অঞ্ঞত্ৰ সঙ্ঘেন, অঞ্ঞত্ৰ অন্তৰাযা.

ন, ভিক্খৱে, তদহু পৱাৰণায সভিক্খুকা আৱাসা ৱা অনাৱাসা ৱা অভিক্খুকো আৱাসো গন্তব্বো, অঞ্ঞত্ৰ সঙ্ঘেন, অঞ্ঞত্ৰ অন্তৰাযা. ন, ভিক্খৱে, তদহু পৱাৰণায সভিক্খুকা আৱাসা ৱা অনাৱাসা ৱা অভিক্খুকো অনাৱাসো গন্তব্বো, অঞ্ঞত্ৰ সঙ্ঘেন, অঞ্ঞত্ৰ অন্তৰাযা. ন, ভিক্খৱে, তদহু পৱাৰণায সভিক্খুকা আৱাসা ৱা অনাৱাসা ৱা অভিক্খুকো আৱাসো ৱা অনাৱাসো ৱা গন্তব্বো, অঞ্ঞত্ৰ সঙ্ঘেন, অঞ্ঞত্ৰ অন্তৰাযা.

ন, ভিক্খৱে, তদহু পৱাৰণায সভিক্খুকা আৱাসা সভিক্খুকো আৱাসো গন্তব্বো, যত্থস্সু ভিক্খূ নানাসংৱাসকা, অঞ্ঞত্ৰ সঙ্ঘেন, অঞ্ঞত্ৰ অন্তৰাযা. ন, ভিক্খৱে, তদহু পৱাৰণায সভিক্খুকা আৱাসা সভিক্খুকো অনাৱাসো গন্তব্বো, যত্থস্সু ভিক্খূ নানাসংৱাসকা, অঞ্ঞত্ৰ সঙ্ঘেন, অঞ্ঞত্ৰ অন্তৰাযা. ন, ভিক্খৱে, তদহু পৱাৰণায সভিক্খুকা আৱাসা সভিক্খুকো আৱাসো ৱা অনাৱাসো ৱা গন্তব্বো, যত্থস্সু ভিক্খূ নানাসংৱাসকা, অঞ্ঞত্ৰ সঙ্ঘেন, অঞ্ঞত্ৰ অন্তৰাযা.

ন, ভিক্খৱে, তদহু পৱাৰণায সভিক্খুকা অনাৱাসা সভিক্খুকো আৱাসো গন্তব্বো, যত্থস্সু ভিক্খূ নানাসংৱাসকা, অঞ্ঞত্ৰ সঙ্ঘেন, অঞ্ঞত্ৰ অন্তৰাযা. ন, ভিক্খৱে, তদহু পৱাৰণায সভিক্খুকা অনাৱাসা সভিক্খুকো অনাৱাসো গন্তব্বো, যত্থস্সু ভিক্খূ নানাসংৱাসকা, অঞ্ঞত্ৰ সঙ্ঘেন, অঞ্ঞত্ৰ অন্তৰাযা. ন, ভিক্খৱে, তদহু পৱাৰণায সভিক্খুকা অনাৱাসা সভিক্খুকো আৱাসো ৱা অনাৱাসো ৱা গন্তব্বো, যত্থস্সু ভিক্খূ নানাসংৱাসকা, অঞ্ঞত্ৰ সঙ্ঘেন, অঞ্ঞত্ৰ অন্তৰাযা.

ন, ভিক্খৱে, তদহু পৱাৰণায সভিক্খুকা আৱাসা ৱা অনাৱাসা

ৱা সভিক্খুকো আৱাসো গন্তব্বো, যত্থস্সু ভিক্খূ নানাসংৱাসকা, অঞ্ঞত্ৰ সঙ্ঘেন, অঞ্ঞত্ৰ অন্তৰাযা. ন, ভিক্খৱে, তদহু পৱাৰণায সভিক্খুকা আৱাসা ৱা অনাৱাসা ৱা সভিক্খুকো অনাৱাসো গন্তব্বো, যত্থস্সু ভিক্খূ নানাসংৱাসকা, অঞ্ঞত্ৰ সঙ্ঘেন, অঞ্ঞত্ৰ অন্তৰাযা. ন, ভিক্খৱে, তদহু পৱাৰণায সভিক্খুকা আৱাসা ৱা অনাৱাসা ৱা সভিক্খুকো আৱাসো ৱা অনাৱাসো ৱা গন্তব্বো, যত্থস্সু ভিক্খূ নানাসংৱাসকা, অঞ্ঞত্ৰ সঙ্ঘেন, অঞ্ঞত্ৰ অন্তৰাযা.