১৪৫. পৱাৰণাসঙ্গহো

২৪১. তেন খো পন সমযেন সম্বহুলা সন্দিট্ঠা সম্ভত্তা ভিক্খূ কোসলেসু জনপদে অঞ্ঞতৰস্মিং আৱাসে ৱস্সং উপগচ্ছিংসু. তেসং সমগ্গানং সম্মোদমানানং অৱিৱদমানানং ৱিহৰতং অঞ্ঞতৰো ফাসুৱিহাৰো অধিগতো হোতি. অথ খো তেসং ভিক্খূনং এতদহোসি – ‘‘অম্হাকং খো সমগ্গানং সম্মোদমানানং অৱিৱদমানানং ৱিহৰতং অঞ্ঞতৰো ফাসুৱিহাৰো অধিগতো. সচে মযং ইদানি পৱাৰেস্সাম, সিযাপি ভিক্খূ পৱাৰেত্ৱা চাৰিকং পক্কমেয্যুং. এৱং মযং ইমম্হা ফাসুৱিহাৰা পৰিবাহিৰা ভৱিস্সাম. কথং নু খো অম্হেহি পটিপজ্জিতব্ব’’ন্তি? ভগৱতো এতমত্থং আৰোচেসুং.

ইধ পন, ভিক্খৱে, সম্বহুলা সন্দিট্ঠা সম্ভত্তা ভিক্খূ অঞ্ঞতৰস্মিং আৱাসে ৱস্সং উপগচ্ছন্তি. তেসং সমগ্গানং সম্মোদমানানং অৱিৱদমানানং ৱিহৰতং অঞ্ঞতৰো ফাসুৱিহাৰো অধিগতো হোতি. তত্ৰ চে ভিক্খূনং এৱং হোতি – ‘‘অম্হাকং খো সমগ্গানং সম্মোদমানানং অৱিৱদমানানং ৱিহৰতং অঞ্ঞতৰো ফাসুৱিহাৰো অধিগতো. সচে মযং ইদানি পৱাৰেস্সাম, সিযাপি ভিক্খূ পৱাৰেত্ৱা চাৰিকং পক্কমেয্যুং. এৱং মযং ইমম্হা ফাসুৱিহাৰা পৰিবাহিৰা ভৱিস্সামা’’তি, অনুজানামি, ভিক্খৱে, তেহি ভিক্খূহি পৱাৰণাসঙ্গহং কাতুং. এৱঞ্চ পন, ভিক্খৱে, কাতব্বো. সব্বেহেৱ একজ্ঝং সন্নিপতিতব্বং – সন্নিপতিত্ৱা ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অম্হাকং সমগ্গানং সম্মোদমানানং অৱিৱদমানানং ৱিহৰতং অঞ্ঞতৰো ফাসুৱিহাৰো অধিগতো. সচে মযং ইদানি পৱাৰেস্সাম, সিযাপি ভিক্খূ পৱাৰেত্ৱা চাৰিকং পক্কমেয্যুং. এৱং মযং ইমম্হা ফাসুৱিহাৰা পৰিবাহিৰা ভৱিস্সাম. যদি সঙ্ঘস্স পত্তকল্লং, সঙ্ঘো পৱাৰণাসঙ্গহং কৰেয্য, ইদানি উপোসথং কৰেয্য, পাতিমোক্খং উদ্দিসেয্য, আগমে জুণ্হে কোমুদিযা চাতুমাসিনিযা পৱাৰেয্য. এসা ঞত্তি.

‘‘সুণাতু মে, ভন্তে, সঙ্ঘো. অম্হাকং সমগ্গানং সম্মোদমানানং অৱিৱদমানানং ৱিহৰতং অঞ্ঞতৰো ফাসুৱিহাৰো অধিগতো. সচে মযং ইদানি পৱাৰেস্সাম, সিযাপি ভিক্খূ পৱাৰেত্ৱা চাৰিকং পক্কমেয্যুং. এৱং মযং ইমম্হা ফাসুৱিহাৰা পৰিবাহিৰা ভৱিস্সাম. সঙ্ঘো পৱাৰণাসঙ্গহং কৰোতি, ইদানি উপোসথং কৰিস্সতি, পাতিমোক্খং উদ্দিসিস্সতি, আগমে জুণ্হে কোমুদিযা চাতুমাসিনিযা পৱাৰেস্সতি. যস্সাযস্মতো খমতি পৱাৰণাসঙ্গহস্স কৰণং, ইদানি উপোসথং কৰিস্সতি, পাতিমোক্খং উদ্দিসিস্সতি, আগমে জুণ্হে কোমুদিযা চাতুমাসিনিযা পৱাৰেস্সতি, সো তুণ্হস্স; যস্স নক্খমতি, সো ভাসেয্য.

‘‘কতো সঙ্ঘেন পৱাৰণাসঙ্গহো, ইদানি উপোসথং কৰিস্সতি, পাতিমোক্খং উদ্দিসিস্সতি, আগমে জুণ্হে কোমুদিযা চাতুমাসিনিযা পৱাৰেস্সতি. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

তেহি চে, ভিক্খৱে, ভিক্খূহি কতে পৱাৰণাসঙ্গহে অঞ্ঞতৰো ভিক্খু এৱং ৱদেয্য – ‘‘ইচ্ছামহং, আৱুসো, জনপদচাৰিকং পক্কমিতুং; অত্থি মে জনপদে কৰণীয’’ন্তি, সো এৱমস্স ৱচনীযো – ‘‘সাধাৱুসো, পৱাৰেত্ৱা গচ্ছাহী’’তি. সো চে, ভিক্খৱে, ভিক্খু পৱাৰযমানো অঞ্ঞতৰস্স ভিক্খুনো পৱাৰণং ঠপেতি, সো এৱমস্স ৱচনীযো – ‘‘অনিস্সৰো খো মে ত্ৱং, আৱুসো, পৱাৰণায, ন তাৱাহং পৱাৰেস্সামী’’তি. তস্স চে, ভিক্খৱে, ভিক্খুনো পৱাৰযমানস্স অঞ্ঞতৰো ভিক্খু তস্স ভিক্খুনো পৱাৰণং ঠপেতি, উভো সঙ্ঘেন সমনুযুঞ্জিত্ৱা সমনুগাহিত্ৱা যথাধম্মং কাৰাপেতব্বা. সো চে, ভিক্খৱে, ভিক্খু জনপদে তং কৰণীযং তীৰেত্ৱা পুনদেৱ অন্তো কোমুদিযা চাতুমাসিনিযা তং আৱাসং আগচ্ছতি, তেহি চে, ভিক্খৱে, ভিক্খূহি পৱাৰিযমানে অঞ্ঞতৰো ভিক্খু তস্স ভিক্খুনো পৱাৰণং ঠপেতি, সো এৱমস্স ৱচনীযো – ‘‘অনিস্সৰো খো মে ত্ৱং, আৱুসো, পৱাৰণায; পৱাৰিতো অহ’’ন্তি. তেহি চে, ভিক্খৱে, ভিক্খূহি পৱাৰিযমানে সো ভিক্খু অঞ্ঞতৰস্স ভিক্খুনো পৱাৰণং ঠপেতি, উভো সঙ্ঘেন সমনুযুঞ্জিত্ৱা সমনুগাহিত্ৱা যথাধম্মং কাৰাপেত্ৱা সঙ্ঘেন পৱাৰেতব্বন্তি.

পৱাৰণাসঙ্গহো নিট্ঠিতো.

পৱাৰণাক্খন্ধকো চতুত্থো.