১৪৩. ৱত্থুঠপনাদি

২৩৯. ইধ পন, ভিক্খৱে, ভিক্খু তদহু পৱাৰণায সঙ্ঘমজ্ঝে উদাহৰেয্য – ‘‘সুণাতু মে, ভন্তে, সঙ্ঘো. ইদং ৱত্থু পঞ্ঞাযতি, ন পুগ্গলো. যদি সঙ্ঘস্স পত্তকল্লং, ৱত্থুং ঠপেত্ৱা সঙ্ঘো পৱাৰেয্যা’’তি. সো এৱমস্স ৱচনীযো – ‘‘ভগৱতা খো, আৱুসো, ৱিসুদ্ধানং পৱাৰণা পঞ্ঞত্তা. সচে ৱত্থু পঞ্ঞাযতি, ন পুগ্গলো, ইদানেৱ নং ৱদেহী’’তি.

ইধ পন, ভিক্খৱে, ভিক্খু তদহু পৱাৰণায সঙ্ঘমজ্ঝে উদাহৰেয্য – ‘‘সুণাতু মে, ভন্তে, সঙ্ঘো. অযং পুগ্গলো পঞ্ঞাযতি, ন ৱত্থু. যদি সঙ্ঘস্স পত্তকল্লং, পুগ্গলং ঠপেত্ৱা সঙ্ঘো পৱাৰেয্যা’’তি. সো এৱমস্স ৱচনীযো – ‘‘ভগৱতা খো, আৱুসো, সমগ্গানং পৱাৰণা পঞ্ঞত্তা. সচে পুগ্গলো পঞ্ঞাযতি, ন ৱত্থু, ইদানেৱ নং ৱদেহী’’তি.

ইধ পন, ভিক্খৱে, ভিক্খু তদহু পৱাৰণায সঙ্ঘমজ্ঝে উদাহৰেয্য – ‘‘সুণাতু মে, ভন্তে, সঙ্ঘো. ইদং ৱত্থু চ পুগ্গলো চ পঞ্ঞাযতি. যদি সঙ্ঘস্স পত্তকল্লং, ৱত্থুঞ্চ পুগ্গলঞ্চ ঠপেত্ৱা সঙ্ঘো পৱাৰেয্যা’’তি. সো এৱমস্স ৱচনীযো – ‘‘ভগৱতা খো, আৱুসো, ৱিসুদ্ধানঞ্চ সমগ্গানঞ্চ পৱাৰণা পঞ্ঞত্তা. সচে ৱত্থু চ পুগ্গলো চ পঞ্ঞাযতি, ইদানেৱ নং ৱদেহী’’তি.

পুব্বে চে, ভিক্খৱে, পৱাৰণায ৱত্থু পঞ্ঞাযতি, পচ্ছা পুগ্গলো, কল্লং ৱচনায. পুব্বে চে, ভিক্খৱে, পৱাৰণায পুগ্গলো পঞ্ঞাযতি, পচ্ছা ৱত্থু, কল্লং ৱচনায. পুব্বে চে, ভিক্খৱে, পৱাৰণায ৱত্থু চ পুগ্গলো চ পঞ্ঞাযতি, তং চে কতায পৱাৰণায উক্কোটেতি, উক্কোটনকং পাচিত্তিযন্তি.

ৱত্থুঠপনাদি নিট্ঠিতা.