১৪০. দ্ৱেৱাচিকাদিপৱাৰণা

২৩৪. তেন খো পন সমযেন কোসলেসু জনপদে অঞ্ঞতৰস্মিং আৱাসে তদহু পৱাৰণায সৱৰভযং অহোসি. ভিক্খূ নাসক্খিংসু তেৱাচিকং পৱাৰেতুং. ভগৱতো এতমত্থং আৰোচেসুং. অনুজানামি, ভিক্খৱে, দ্ৱেৱাচিকং পৱাৰেতুন্তি.

বাড়্হতৰং সৱৰভযং অহোসি. ভিক্খূ নাসক্খিংসু দ্ৱেৱাচিকং পৱাৰেতুং. ভগৱতো এতমত্থং আৰোচেসুং. অনুজানামি, ভিক্খৱে, একৱাচিকং পৱাৰেতুন্তি.

বাড়্হতৰং সৱৰভযং অহোসি. ভিক্খূ নাসক্খিংসু একৱাচিকং পৱাৰেতুং. ভগৱতো এতমত্থং আৰোচেসুং. অনুজানামি, ভিক্খৱে, সমানৱস্সিকং পৱাৰেতুন্তি.

তেন খো পন সমযেন অঞ্ঞতৰস্মিং আৱাসে তদহু পৱাৰণায মনুস্সেহি দানং দেন্তেহি যেভুয্যেন ৰত্তি খেপিতা হোতি. অথ খো তেসং ভিক্খূনং এতদহোসি – ‘‘মনুস্সেহি দানং দেন্তেহি যেভুয্যেন ৰত্তি খেপিতা. সচে সঙ্ঘো তেৱাচিকং পৱাৰেস্সতি, অপ্পৱাৰিতোৱ সঙ্ঘো ভৱিস্সতি, অথাযং ৰত্তি ৱিভাযিস্সতি. কথং নু খো অম্হেহি পটিপজ্জিতব্ব’’ন্তি? ভগৱতো এতমত্থং আৰোচেসুং. ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায মনুস্সেহি দানং দেন্তেহি যেভুয্যেন ৰত্তি খেপিতা হোতি. তত্ৰ চে, ভিক্খৱে, ভিক্খূনং এৱং হোতি – ‘‘মনুস্সেহি দানং দেন্তেহি যেভুয্যেন ৰত্তি খেপিতা. সচে সঙ্ঘো তেৱাচিকং পৱাৰেস্সতি, অপ্পৱাৰিতোৱ সঙ্ঘো ভৱিস্সতি, অথাযং ৰত্তি ৱিভাযিস্সতী’’তি, ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. মনুস্সেহি দানং দেন্তেহি যেভুয্যেন ৰত্তি খেপিতা. সচে সঙ্ঘো তেৱাচিকং পৱাৰেস্সতি, অপ্পৱাৰিতোৱ সঙ্ঘো ভৱিস্সতি, অথাযং ৰত্তি ৱিভাযিস্সতি. যদি সঙ্ঘস্স পত্তকল্লং, সঙ্ঘো দ্ৱেৱাচিকং, একৱাচিকং, সমানৱস্সিকং পৱাৰেয্যা’’তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায ভিক্খূহি ধম্মং ভণন্তেহি…পে… সুত্তন্তিকেহি সুত্তন্তং সঙ্গাযন্তেহি… ৱিনযধৰেহি ৱিনযং ৱিনিচ্ছিনন্তেহি… ধম্মকথিকেহি ধম্মং সাকচ্ছন্তেহি… ভিক্খূহি কলহং কৰোন্তেহি যেভুয্যেন ৰত্তি খেপিতা হোতি. তত্ৰ চে ভিক্খূনং এৱং হোতি – ‘‘ভিক্খূহি কলহং কৰোন্তেহি যেভুয্যেন ৰত্তি খেপিতা. সচে সঙ্ঘো তেৱাচিকং পৱাৰেস্সতি, অপ্পৱাৰিতোৱ সঙ্ঘো ভৱিস্সতি, অথাযং ৰত্তি ৱিভাযিস্সতী’’তি, ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. ভিক্খূহি কলহং কৰোন্তেহি যেভুয্যেন ৰত্তি খেপিতা. সচে সঙ্ঘো তেৱাচিকং পৱাৰেস্সতি, অপ্পৱাৰিতোৱ সঙ্ঘো ভৱিস্সতি, অথাযং ৰত্তি ৱিভাযিস্সতি. যদি সঙ্ঘস্স পত্তকল্লং, সঙ্ঘো দ্ৱেৱাচিকং, একৱাচিকং, সমানৱস্সিকং পৱাৰেয্যা’’তি.

তেন খো পন সমযেন কোসলেসু জনপদে অঞ্ঞতৰস্মিং আৱাসে তদহু পৱাৰণায মহাভিক্খুসঙ্ঘো সন্নিপতিতো হোতি, পৰিত্তঞ্চ অনোৱস্সিকং [অনোৱস্সকং (ক.)] হোতি, মহা চ মেঘো উগ্গতো হোতি. অথ খো তেসং ভিক্খূনং এতদহোসি – ‘‘অযং খো মহাভিক্খুসঙ্ঘো সন্নিপতিতো, পৰিত্তঞ্চ অনোৱস্সিকং, মহা চ মেঘো উগ্গতো. সচে সঙ্ঘো তেৱাচিকং পৱাৰেস্সতি, অপ্পৱাৰিতোৱ সঙ্ঘো ভৱিস্সতি, অথাযং মেঘো পৱস্সিস্সতি. কথং নু খো অম্হেহি পটিপজ্জিতব্ব’’ন্তি? ভগৱতো এতমত্থং আৰোচেসুং. ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায মহাভিক্খুসঙ্ঘো সন্নিপতিতো হোতি, পৰিত্তঞ্চ অনোৱস্সিকং হোতি, মহা চ মেঘো উগ্গতো হোতি. তত্ৰ চে ভিক্খূনং এৱং হোতি – ‘‘অযং খো মহাভিক্খুসঙ্ঘো সন্নিপতিতো, পৰিত্তঞ্চ অনোৱস্সিকং, মহা চ মেঘো উগ্গতো. সচে সঙ্ঘো তেৱাচিকং পৱাৰেস্সতি, অপ্পৱাৰিতোৱ সঙ্ঘো ভৱিস্সতি, অথাযং মেঘো পৱস্সিস্সতী’’তি. ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং মহাভিক্খুসঙ্ঘো সন্নিপতিতো, পৰিত্তঞ্চ অনোৱস্সিকং, মহা চ মেঘো উগ্গতো. সচে সঙ্ঘো তেৱাচিকং পৱাৰেস্সতি, অপ্পৱাৰিতোৱ সঙ্ঘো ভৱিস্সতি, অথাযং মেঘো পৱস্সিস্সতি. যদি সঙ্ঘস্স পত্তকল্লং, সঙ্ঘো দ্ৱেৱাচিকং, একৱাচিকং, সমানৱস্সিকং পৱাৰেয্যা’’তি.

ইধ পন, ভিক্খৱে, অঞ্ঞতৰস্মিং আৱাসে তদহু পৱাৰণায ৰাজন্তৰাযো হোতি…পে… চোৰন্তৰাযো হোতি… অগ্যন্তৰাযো হোতি… উদকন্তৰাযো হোতি… মনুস্সন্তৰাযো হোতি… অমনুস্সন্তৰাযো হোতি… ৱাড়ন্তৰাযো হোতি… সৰীসপন্তৰাযো হোতি… জীৱিতন্তৰাযো হোতি… ব্ৰহ্মচৰিযন্তৰাযো হোতি. তত্ৰ চে ভিক্খূনং এৱং হোতি – ‘‘অযং খো, ব্ৰহ্মচৰিযন্তৰাযো. সচে সঙ্ঘো তেৱাচিকং পৱাৰেস্সতি, অপ্পৱাৰিতোৱ সঙ্ঘো ভৱিস্সতি, অথাযং ব্ৰহ্মচৰিযন্তৰাযো ভৱিস্সতী’’তি, ব্যত্তেন ভিক্খুনা পটিবলেন সঙ্ঘো ঞাপেতব্বো –

‘‘সুণাতু মে, ভন্তে, সঙ্ঘো. অযং ব্ৰহ্মচৰিযন্তৰাযো. সচে সঙ্ঘো তেৱাচিকং পৱাৰেস্সতি, অপ্পৱাৰিতোৱ সঙ্ঘো ভৱিস্সতি, অথাযং ব্ৰহ্মচৰিযন্তৰাযো ভৱিস্সতি. যদি সঙ্ঘস্স পত্তকল্লং, সঙ্ঘো দ্ৱেৱাচিকং, একৱাচিকং, সমানৱস্সিকং পৱাৰেয্যা’’তি.

দ্ৱেৱাচিকাদিপৱাৰণা নিট্ঠিতা.