১৪১. পৱাৰণাঠপনং

২৩৫. তেন খো পন সমযেন ছব্বগ্গিযা ভিক্খূ সাপত্তিকা পৱাৰেন্তি. ভগৱতো এতমত্থং আৰোচেসুং. ন, ভিক্খৱে, সাপত্তিকেন পৱাৰেতব্বং. যো পৱাৰেয্য, আপত্তি দুক্কটস্স. অনুজানামি, ভিক্খৱে, যো সাপত্তিকো পৱাৰেতি, তস্স ওকাসং কাৰাপেত্ৱা আপত্তিযা চোদেতুন্তি.

তেন খো পন সমযেন ছব্বগ্গিযা ভিক্খূ ওকাসং কাৰাপিযমানা ন ইচ্ছন্তি ওকাসং কাতুং. ভগৱতো এতমত্থং আৰোচেসুং. অনুজানামি, ভিক্খৱে, ওকাসং অকৰোন্তস্স পৱাৰণং ঠপেতুং. এৱঞ্চ পন, ভিক্খৱে, ঠপেতব্বা. তদহু পৱাৰণায চাতুদ্দসে ৱা পন্নৰসে ৱা তস্মিং পুগ্গলে সম্মুখীভূতে সঙ্ঘমজ্ঝে উদাহৰিতব্বং – ‘‘সুণাতু মে, ভন্তে, সঙ্ঘো. ইত্থন্নামো পুগ্গলো সাপত্তিকো. তস্স পৱাৰণং ঠপেমি. ন তস্মিং সম্মুখীভূতে পৱাৰেতব্ব’’ন্তি. ঠপিতা হোতি পৱাৰণাতি.

তেন খো পন সমযেন ছব্বগ্গিযা ভিক্খূ – পুৰম্হাকং পেসলা ভিক্খূ পৱাৰণং ঠপেন্তীতি – পটিকচ্চেৱ সুদ্ধানং ভিক্খূনং অনাপত্তিকানং অৱত্থুস্মিং অকাৰণে পৱাৰণং ঠপেন্তি, পৱাৰিতানম্পি পৱাৰণং ঠপেন্তি. ভগৱতো এতমত্থং আৰোচেসুং. ন, ভিক্খৱে, সুদ্ধানং ভিক্খূনং অনাপত্তিকানং অৱত্থুস্মিং অকাৰণে পৱাৰণা ঠপেতব্বা. যো ঠপেয্য, আপত্তি দুক্কটস্স. ন, ভিক্খৱে, পৱাৰিতানম্পি পৱাৰণা ঠপেতব্বা. যো ঠপেয্য, আপত্তি দুক্কটস্স.

২৩৬. এৱং খো, ভিক্খৱে, ঠপিতা হোতি পৱাৰণা, এৱং অট্ঠপিতা. কথঞ্চ, ভিক্খৱে, অট্ঠপিতা হোতি পৱাৰণা? তেৱাচিকায চে, ভিক্খৱে, পৱাৰণায ভাসিতায লপিতায পৰিযোসিতায পৱাৰণং ঠপেতি, অট্ঠপিতা হোতি পৱাৰণা. দ্ৱেৱাচিকায চে, ভিক্খৱে,… একৱাচিকায চে, ভিক্খৱে,… সমানৱস্সিকায চে, ভিক্খৱে, পৱাৰণায ভাসিতায লপিতায পৰিযোসিতায পৱাৰণং ঠপেতি, অট্ঠপিতা হোতি পৱাৰণা. এৱং খো, ভিক্খৱে, অট্ঠপিতা হোতি পৱাৰণা.

কথঞ্চ, ভিক্খৱে, ঠপিতা হোতি পৱাৰণা? তেৱাচিকায, চে, ভিক্খৱে, পৱাৰণায ভাসিতায লপিতায অপৰিযোসিতায পৱাৰণং ঠপেতি, ঠপিতা হোতি পৱাৰণা. দ্ৱেৱাচিকায চে, ভিক্খৱে,… একৱাচিকায চে, ভিক্খৱে,… সমানৱস্সিকায চে, ভিক্খৱে, পৱাৰণায ভাসিতায লপিতায অপৰিযোসিতায পৱাৰণং ঠপেতি, ঠপিতা হোতি পৱাৰণা. এৱং খো, ভিক্খৱে, ঠপিতা হোতি পৱাৰণা.

২৩৭. ইধ পন, ভিক্খৱে, তদহু পৱাৰণায ভিক্খু ভিক্খুস্স পৱাৰণং ঠপেতি. তং চে ভিক্খুং অঞ্ঞে ভিক্খূ জানন্তি, ‘‘অযং খো আযস্মা অপৰিসুদ্ধকাযসমাচাৰো, অপৰিসুদ্ধৱচীসমাচাৰো, অপৰিসুদ্ধাজীৱো, বালো, অব্যত্তো, ন পটিবলো অনুযুঞ্জীযমানো অনুযোগং দাতু’’ন্তি, ‘অলং, ভিক্খু, মা ভণ্ডনং, মা কলহং, মা ৱিগ্গহং, মা ৱিৱাদ’ন্তি ওমদ্দিত্ৱা সঙ্ঘেন পৱাৰেতব্বং.

ইধ পন, ভিক্খৱে, তদহু পৱাৰণায ভিক্খু ভিক্খুস্স পৱাৰণং ঠপেতি. তং চে ভিক্খুং অঞ্ঞে ভিক্খূ জানন্তি, ‘‘অযং খো আযস্মা পৰিসুদ্ধকাযসমাচাৰো, অপৰিসুদ্ধৱচীসমাচাৰো, অপৰিসুদ্ধাজীৱো, বালো, অব্যত্তো, ন পটিবলো অনুযুঞ্জীযমানো অনুযোগং দাতু’’ন্তি, ‘অলং, ভিক্খু, মা ভণ্ডনং, মা কলহং, মা ৱিগ্গহং, মা ৱিৱাদ’ন্তি ওমদ্দিত্ৱা সঙ্ঘেন পৱাৰেতব্বং.

ইধ পন, ভিক্খৱে, তদহু পৱাৰণায ভিক্খু ভিক্খুস্স পৱাৰণং ঠপেতি. তং চে ভিক্খুং অঞ্ঞে ভিক্খূ জানন্তি, ‘‘অযং খো আযস্মা পৰিসুদ্ধকাযসমাচাৰো, পৰিসুদ্ধৱচীসমাচাৰো, অপৰিসুদ্ধাজীৱো, বালো, অব্যত্তো, ন পটিবলো অনুযুঞ্জীযমানো অনুযোগং দাতু’’ন্তি, ‘অলং, ভিক্খু, মা ভণ্ডনং, মা কলহং, মা ৱিগ্গহং, মা ৱিৱাদ’ন্তি ওমদ্দিত্ৱা সঙ্ঘেন পৱাৰেতব্বং.

ইধ পন, ভিক্খৱে, তদহু পৱাৰণায ভিক্খু ভিক্খুস্স পৱাৰণং ঠপেতি. তং চে ভিক্খুং অঞ্ঞে ভিক্খূ জানন্তি, ‘‘অযং খো আযস্মা পৰিসুদ্ধকাযসমাচাৰো, পৰিসুদ্ধৱচীসমাচাৰো, পৰিসুদ্ধাজীৱো, বালো, অব্যত্তো, ন পটিবলো অনুযুঞ্জীযমানো অনুযোগং দাতু’’ন্তি, ‘অলং, ভিক্খু, মা ভণ্ডনং, মা কলহং, মা ৱিগ্গহং, মা ৱিৱাদ’ন্তি ওমদ্দিত্ৱা সঙ্ঘেন পৱাৰেতব্বং.

ইধ পন, ভিক্খৱে, তদহু পৱাৰণায ভিক্খু ভিক্খুস্স পৱাৰণং ঠপেতি. তং চে ভিক্খুং অঞ্ঞে ভিক্খূ জানন্তি, ‘‘অযং খো আযস্মা পৰিসুদ্ধকাযসমাচাৰো, পৰিসুদ্ধৱচীসমাচাৰো, পৰিসুদ্ধাজীৱো, পণ্ডিতো, ব্যত্তো, পটিবলো অনুযুঞ্জীযমানো অনুযোগং দাতু’’ন্তি, সো এৱমস্স ৱচনীযো, ‘‘যং খো ত্ৱং, আৱুসো, ইমস্স ভিক্খুনো পৱাৰণং ঠপেসি, কিম্হি নং ঠপেসি, সীলৱিপত্তিযা ৱা ঠপেসি, আচাৰৱিপত্তিযা ৱা ঠপেসি, দিট্ঠিৱিপত্তিযা ৱা ঠপেসী’’তি? সো চে এৱং ৱদেয্য – ‘‘সীলৱিপত্তিযা ৱা ঠপেমি, আচাৰৱিপত্তিযা ৱা ঠপেমি, দিট্ঠিৱিপত্তিযা ৱা ঠপেমী’’তি, সো এৱমস্স ৱচনীযো – ‘‘জানাসি পনাযস্মা সীলৱিপত্তিং, জানাসি আচাৰৱিপত্তিং, জানাসি দিট্ঠিৱিপত্তি’’ন্তি? সো চে এৱং ৱদেয্য – ‘‘জানামি খো অহং, আৱুসো, সীলৱিপত্তিং, জানামি আচাৰৱিপত্তিং, জানামি দিট্ঠিৱিপত্তি’’ন্তি, সো এৱমস্স ৱচনীযো – ‘‘কতমা পনাৱুসো, সীলৱিপত্তি, কতমা আচাৰৱিপত্তি, কতমা দিট্ঠিৱিপত্তী’’তি? সো চে এৱং ৱদেয্য – ‘‘চত্তাৰি পাৰাজিকানি, তেৰস সঙ্ঘাদিসেসা, অযং সীলৱিপত্তি; থুল্লচ্চযং, পাচিত্তিযং, পাটিদেসনীযং, দুক্কটং, দুব্ভাসিতং, অযং আচাৰৱিপত্তি; মিচ্ছাদিট্ঠি, অন্তগ্গাহিকাদিট্ঠি, অযং দিট্ঠিৱিপত্তী’’তি, সো এৱমস্স ৱচনীযো – ‘‘যং খো ত্ৱং, আৱুসো, ইমস্স ভিক্খুনো পৱাৰণং ঠপেসি, দিট্ঠেন ৱা ঠপেসি, সুতেন ৱা ঠপেসি, পৰিসঙ্কায ৱা ঠপেসী’’তি? সো চে এৱং ৱদেয্য – ‘‘দিট্ঠেন ৱা ঠপেমি, সুতেন ৱা ঠপেমি, পৰিসঙ্কায ৱা ঠপেমী’’তি, সো এৱমস্স ৱচনীযো – ‘‘যং খো ত্ৱং, আৱুসো, ইমস্স ভিক্খুনো দিট্ঠেন পৱাৰণং ঠপেসি, কিং তে দিট্ঠং, কিন্তি তে দিট্ঠং, কদা তে দিট্ঠং, কত্থ তে দিট্ঠং, পাৰাজিকং অজ্ঝাপজ্জন্তো দিট্ঠো, সঙ্ঘাদিসেসং অজ্ঝাপজ্জন্তো দিট্ঠো, থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপজ্জন্তো দিট্ঠো, কত্থ চ ত্ৱং অহোসি, কত্থ চাযং ভিক্খু অহোসি, কিঞ্চ ত্ৱং কৰোসি, কিঞ্চাযং ভিক্খু কৰোতী’’তি? সো চে এৱং ৱদেয্য – ‘‘ন খো অহং, আৱুসো, ইমস্স ভিক্খুনো দিট্ঠেন পৱাৰণং ঠপেমি, অপিচ সুতেন পৱাৰণং ঠপেমী’’তি, সো এৱমস্স ৱচনীযো – ‘‘যং খো ত্ৱং, আৱুসো, ইমস্স ভিক্খুনো সুতেন পৱাৰণং ঠপেসি, কিং তে সুতং, কিন্তি তে সুতং, কদা তে সুতং, কত্থ তে সুতং, পাৰাজিকং অজ্ঝাপন্নোতি সুতং, সঙ্ঘাদিসেসং অজ্ঝাপন্নোতি সুতং, থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপন্নোতি সুতং, ভিক্খুস্স সুতং, ভিক্খুনিযা সুতং, সিক্খমানায সুতং, সামণেৰস্স সুতং, সামণেৰিযা সুতং, উপাসকস্স সুতং, উপাসিকায সুতং, ৰাজূনং সুতং, ৰাজমহামত্তানং সুতং, তিত্থিযানং সুতং, তিত্থিযসাৱকানং সুত’’ন্তি? সো চে এৱং ৱদেয্য – ‘‘ন খো অহং, আৱুসো, ইমস্স ভিক্খুনো সুতেন পৱাৰণং ঠপেমি, অপিচ পৰিসঙ্কায পৱাৰণং ঠপেমী’’তি, সো এৱমস্স ৱচনীযো – ‘‘যং খো ত্ৱং, আৱুসো, ইমস্স ভিক্খুনো পৰিসঙ্কায পৱাৰণং ঠপেসি, কিং পৰিসঙ্কসি, কিন্তি পৰিসঙ্কসি, কদা পৰিসঙ্কসি, কত্থ পৰিসঙ্কসি, পাৰাজিকং অজ্ঝাপন্নোতি পৰিসঙ্কসি, সঙ্ঘাদিসেসং অজ্ঝাপন্নোতি পৰিসঙ্কসি, থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপন্নোতি পৰিসঙ্কসি, ভিক্খুস্স সুত্ৱা পৰিসঙ্কসি, ভিক্খুনিযা সুত্ৱা পৰিসঙ্কসি, সিক্খমানায সুত্ৱা পৰিসঙ্কসি, সামণেৰস্স সুত্ৱা পৰিসঙ্কসি, সামণেৰিযা সুত্ৱা পৰিসঙ্কসি, উপাসকস্স সুত্ৱা পৰিসঙ্কসি, উপাসিকায সুত্ৱা পৰিসঙ্কসি, ৰাজূনং সুত্ৱা পৰিসঙ্কসি, ৰাজমহামত্তানং সুত্ৱা পৰিসঙ্কসি, তিত্থিযানং সুত্ৱা পৰিসঙ্কসি, তিত্থিযসাৱকানং সুত্ৱা পৰিসঙ্কসী’’তি? সো চে এৱং ৱদেয্য – ‘‘ন খো অহং, আৱুসো, ইমস্স ভিক্খুনো পৰিসঙ্কায পৱাৰণং ঠপেমি, অপি চ অহম্পি ন জানামি কেন পনাহং ইমস্স ভিক্খুনো পৱাৰণং ঠপেমী’’তি. সো চে, ভিক্খৱে, চোদকো ভিক্খু অনুযোগেন ৱিঞ্ঞূনং সব্ৰহ্মচাৰীনং চিত্তং ন আৰাধেতি, অননুৱাদো চুদিতো ভিক্খূতি অলং ৱচনায. সো চে, ভিক্খৱে, চোদকো ভিক্খু অনুযোগেন ৱিঞ্ঞূনং সব্ৰহ্মচাৰীনং চিত্তং আৰাধেতি, সানুৱাদো চুদিতো ভিক্খূতি অলং ৱচনায. সো চে, ভিক্খৱে, চোদকো ভিক্খু অমূলকেন পাৰাজিকেন অনুদ্ধংসিতং পটিজানাতি, সঙ্ঘাদিসেসং আৰোপেত্ৱা সঙ্ঘেন পৱাৰেতব্বং. সো চে, ভিক্খৱে, চোদকো ভিক্খু অমূলকেন সঙ্ঘাদিসেসেন অনুদ্ধংসিতং পটিজানাতি, যথাধম্মং কাৰাপেত্ৱা সঙ্ঘেন পৱাৰেতব্বং. সো চে, ভিক্খৱে, চোদকো, ভিক্খু অমূলকেন থুল্লচ্চযেন… পাচিত্তিযেন… পাটিদেসনীযেন… দুক্কটেন… দুব্ভাসিতেন অনুদ্ধংসিতং পটিজানাতি, যথাধম্মং কাৰাপেত্ৱা সঙ্ঘেন পৱাৰেতব্বং. সো চে, ভিক্খৱে, চুদিতো ভিক্খু পাৰাজিকং অজ্ঝাপন্নোতি পটিজানাতি, নাসেত্ৱা সঙ্ঘেন পৱাৰেতব্বং. সো চে, ভিক্খৱে, চুদিতো ভিক্খু সঙ্ঘাদিসেসং অজ্ঝাপন্নোতি পটিজানাতি, সঙ্ঘাদিসেসং আৰোপেত্ৱা সঙ্ঘেন পৱাৰেতব্বং. সো চে, ভিক্খৱে, চুদিতো ভিক্খু থুল্লচ্চযং… পাচিত্তিযং… পাটিদেসনীযং… দুক্কটং… দুব্ভাসিতং অজ্ঝাপন্নোতি পটিজানাতি, যথাধম্মং কাৰাপেত্ৱা সঙ্ঘেন পৱাৰেতব্বং.

পৱাৰণাঠপনং নিট্ঠিতং.