১৩৯. ৱজ্জনীযপুগ্গলসন্দস্সনা

২৩৩. ন, ভিক্খৱে, ভিক্খুনিযা নিসিন্নপৰিসায পৱাৰেতব্বং. যো পৱাৰেয্য, আপত্তি দুক্কটস্স. ন, ভিক্খৱে, সিক্খমানায…পে… ন সামণেৰস্স…পে… ন সামণেৰিযা…পে… ন সিক্খং পচ্চক্খাতকস্স…পে… ন অন্তিমৱত্থুং অজ্ঝাপন্নকস্স নিসিন্নপৰিসায পৱাৰেতব্বং. যো পৱাৰেয্য, আপত্তি দুক্কটস্স.

ন আপত্তিযা অদস্সনে উক্খিত্তকস্স নিসিন্নপৰিসায পৱাৰেতব্বং. যো পৱাৰেয্য, যথাধম্মো কাৰেতব্বো. ন আপত্তিযা অপ্পটিকম্মে উক্খিত্তকস্স…পে… ন পাপিকায দিট্ঠিযা অপ্পটিনিস্সগ্গে উক্খিত্তকস্স নিসিন্নপৰিসায পৱাৰেতব্বং. যো পৱাৰেয্য, যথাধম্মো কাৰেতব্বো.

ন পণ্ডকস্স নিসিন্নপৰিসায পৱাৰেতব্বং. যো পৱাৰেয্য, আপত্তি দুক্কটস্স. ন থেয্যসংৱাসকস্স…পে… ন তিত্থিযপক্কন্তকস্স…পে… ন তিৰচ্ছানগতস্স…পে… ন মাতুঘাতকস্স…পে… ন পিতুঘাতকস্স…পে… ন অৰহন্তঘাতকস্স…পে… ন ভিক্খুনিদূসকস্স …পে… ন সঙ্ঘভেদকস্স…পে… ন লোহিতুপ্পাদকস্স …পে… ন উভতোব্যঞ্জনকস্স নিসিন্নপৰিসায পৱাৰেতব্বং. যো পৱাৰেয্য, আপত্তি দুক্কটস্স.

ন, ভিক্খৱে, পাৰিৱাসিকপৱাৰণাদানেন পৱাৰেতব্বং, অঞ্ঞত্ৰ অৱুট্ঠিতায পৰিসায. ন চ, ভিক্খৱে, অপ্পৱাৰণায পৱাৰেতব্বং, অঞ্ঞত্ৰ সঙ্ঘসামগ্গিযাতি.

ৱজ্জনীযপুগ্গলসন্দস্সনা নিট্ঠিতা.

দুতিযভাণৱাৰো নিট্ঠিতো.